ما هي ميزه محركات البوكسر من السوبارو ؟؟؟

[Kazzaz]

انا مش عارف بجد الميزه انها بوكسر و بالاقي الناس تقول كده و بقول معاهم هههه بعدين دورت علي معلومات عن المحرك وانا كلي ثقه انه حاجه محصلتش :10D5C8~1107: بس لقيت اني مش فاهم حاجه و كل اللي فهمته انه شغال افقي مش راسي و ده بيقلل الاهتزازات ... بس ايه الفايده يعني من كده مش فاهم ؟؟ و ايه الفايده لما يبقي بوكسر و مجرد 95 حصان و عزم 145 تقريبا ( موديل 2006 امبريزا و ال 2007 ) و غيري 130 حصان و عزم اعلي بكثير !! استفدت ايه انا من البوكسر ؟؟

[ouba2]

انا مش عارف بجد الميزه انها بوكسر و بالاقي الناس تقول كده و بقول معاهم هههه بعدين دورت علي معلومات عن المحرك وانا كلي ثقه انه حاجه محصلتش :10d5c8~1107: بس لقيت اني مش فاهم حاجه و كل اللي فهمته انه شغال افقي مش راسي و ده بيقلل الاهتزازات ... بس ايه الفايده يعني من كده مش فاهم ؟؟ و ايه الفايده لما يبقي بوكسر و مجرد 95 حصان و عزم 145 تقريبا ( موديل 2006 امبريزا و ال 2007 ) و غيري 130 حصان و عزم اعلي بكثير !! استفدت ايه انا من البوكسر ؟؟

استفدت اعلي ثبات ممكن تشوفة في عربية بدون انظمة الكترونية

[ouba2]

اتفرج علي دول و احكم
YouTube - Subaru AWD vs. Everyone Else
YouTube - subaru_symetrical_awd.mpg

[Kazzaz]

ممممم .. بس ما في عربيات كثيره ثابته زي السيفيك مثلا و محرك اقوي ... يعني معقوله ان ميزه المحرك مش قوته و لكن في انه بيدي ثبات للعربي ؟؟ انا بصراحه كنت فاكر غير كده بس اهو حاجه كويسه برده

تعديل : شكرا علي الفيديوهات هاتفرج عليها الان

[Sameh]

غير تقليل الإهتزازات ، الموتور إرتفاعه منخفض لأن مشوار البساتم بالعرض ووش السلندر على الجانبين مش فوق والكرنك فى منتصف الموتور مش فى الأسفل ، وبالتالى إرتفاعه منخفض وده يخلى مركز ثقله قريب من الأرض وبالتالى يعزز من ثبات العربية ، بالإضافة لكدة عند الحوادث الكبيرة بيلف وينزل لتحت العربية بدل ما يقتحم الصالون ويأذى الركاب

[Kazzaz]

يا جماعه لا كلام السوبارو من اكثر السيارات ثباتا ركبتها الي الان ... بس انا بتكلم علي قوه الموتور كنت اتمني ان يكون ميزه الموتور في قوته و ليس انه بيعمل ثبات للعربيه فقط ... لان ال 95 حصان دي حاجه تقهر

[khalid_adel]

بص ياسيدي الموتور البوكسر ده المفروض بيبان صح في السوبارو من 2000 سي سي مش 1600 ابدا ( حرام اللي بيحصل في بلدنا ده ) ومثال لذلك شوف مواتير البورش بتبدا من كام سي سي وهي بوكسر ايضا
المهم السوبارو مع 2000 تيربو ولا 2500 بجد سحبها هاايل وتطلع من عربيات كتير في فئتها اما لما ننزل لل 1.6 ده بيموت من قدرات الموتور جاااااامد
وبالنسبه لموتور البوكسر من سوبارو فهو من قلائل جدا انك تلاقي موتور سعته 2500 سي سي وهو مكون من 4 سلندرات فقط مش 6
وبرضه من القلائل انك تلاقي 2500 سي سي بيطلع فوق 300 حصان بدون تعديلات ( ستوك )
وعلى فكره الموتور ده خد احسن موتور لمده سنتين او تلاته ورا بعض في وسط منافسين له كبااااار اوي وانت اكيد عارفهم
بس يا سيدي هو ده الموتور البوكسر اللي مصمماه سوبارو بكل بساطه

[Kazzaz]

انا عارف ان المواتير بره اكيد افضل 65154120 مره من ال 1.6 الي موجود في مصر .. بس ايضا لا اري ميزه في المحرك غير الثبات يعني لا اري انه عشان بوكسر مثلا قوي كسرعه لان علي سبيل المثال المتسوبيشي لانسر الافو اسرع من الwrx ... بدون بوكسر ولا غيره .. يعني ميزته الي عرفتها منكم الان انه ميزته في انه بيدي ثبات للعربيه و مش في انه بيدي عزم او هورس بور ... لان المواتير بره قويه ايضا و في كثيييير اقوي من مواتير البوكسر من السوبارو

و حتي علي المقياس الصغير للمحركات في مصر اعتقد معظم العربيات اقوي منك في المواتير حتي الفيرنا و الكوري عموما و طبعا السيفيك و الياباني .. اه انا عرف انه بيدي ثبات ولكن كنت اتمني ان يكون البوكسر ده مثال للقوه و ليس الثبات فقط

انت عارف انا اللي مضايقني و انا بجيب العربيه كانت الميزه المميزه بجانب انها 4*4 انها محرك بوكسر فانا كنت فاكر اه 95 حصان و عزم 140 مش مشكله بس اكيد حاجه هلاميه و اكني راكب 150 حصان ( لاني ماكنتش بفهم اوي في الحاجات دي و كنت فاكر البوكسر ده بيدي قوه تفرق عن اي عربيه تانيه ) ههههههههه بس لقيت انها عاديه جدا في السحب .. و العزم بصرحه كويس و اعتقد ان ال 4*4 مساعد في حته العزم دي لاني بحس عزمها كويس جدا

[Kazzaz]

khalid_adel

انت حاطط صور او فيدوهات ؟؟ لو حاطط مش باين منهم حاجه علي فكره

[Ahmed Hassan]

المشكله انك اتصدمت لانك كنت فاكر ان لمجرد ان المحرك بوكسر فهيكون قوي. في النهايه المحرك البوكسر مبدأ عمله هوه نفس المحرك العادي سواء كان l أو v
و زيه زي بقية المحركات ممكن يكون ضعيف او قوي.

كل ميزة المحرك البوكسر هيه في وضعيته اللي بتقلل مركز الجاذبيه و بتدي توزيع مثالي للوزن و بالتالي بيزود الثبات و القدره على المناوره. ده بالاضافه لان الكبالن بتكون طولها متساوي و ده بيدي ميزه جامده جدا في نقل الحركه و بيمنع العربيه ترمي يمين او شمال لما بتكون في ارض زلقه زي التلج او الوحل

[Kazzaz]

فعلا تقدر تقول اصبت شويه بالاحباط بس حاسس ان كان ممكن يكون هورس بور اعلي .. صحيح حد جرب اداء الموتور مع اي عربيه تانيه ؟؟؟؟

بس بيني و بينكم هي مصر اعتقد الثبات في العربيات اهم من السرعه في الشوارع دي

[Mosso]

هقوللك على حاجه يا محمد,
انا من ساعة ما جبت العربيه دي وانا عارف اني مش هجري بيها او بمعنى اصح مش هشد بيها مع حد,
لاني عارف ان العربيه دي مش بتاعة شد لاني بركب سوبارو من موديل 1998,
وانا بجيبها كان فرق 6 الاف بس بينها و بين السيفيك لو عايز اجري كنت اكيد هجيب السيفيك,
متحاولش وانت راكبها تلاقي واحد بفيرنا شايف نفسه تقول بس اوعى بقه انا هقطعه و تروح طالع وراه عشان في الاخر هيبقى شكلك مش قوي :d
و نصيحه في الجري متهزرش مع فيرنا و الانترا لاني ليا تجارب مش لذيذه معاهم :d
لكن الموقف الي فاكره كويس ان مره في اخر منحنى على المحور الي عند نادي 6 اكتوبر قبل ما يعملوا المطبات كان في الانترا و لانسر شارك بيشدوا مع بعض لكن اول ما جه الملف انا دخلته على 140 و الالنترا عوم و اللانسر لحق نفسه بفرامل,,,,

لكن وانا في العربيه بحس انها حاضنه الي جواها و ماسكه نفسها مش بحس اني طاير و مقلق من اي قطه تطلع في الطريق!!! يمكن عشان كده بحبها,

و موضوع الثبات ده نسبي على فكره,
لان في الاول و في الاخر العربيه مش متدبسه في الارض بعواميد عشان ماتعومش,
لا, هي عربيه عاديه جدا ماشيه على كاوتش و لو الكاوتش بتاعها نوعه سيء (زي الي انا مركبه ) اكيد هيأثر جامد على ثباتها,
لكن بيميزها الكنترول بتاعها على السرعات و دي بقه ميزة الدفع الرباعي و الموتور البوكسر انك لو اتزنقت و لازم غرزه انت ممكن تبقى مرعوب بس لو عملتها هتحس انها كانت سهله

المشكله ان من كتر الناس ما بتسمع عن ثباتها بتحس انهم مثلا لو جم يأمركوا بيها مش هتأمرك مثلا!!!

انما بجد عايز تحس بيها افضل راكبها و اتحرك بيها اسبوعين متواصلين عشان تاخد عليها و بعدين اركب اي عربيه تانيه (من نفس الفئه) و هتحس بالفرق

[Youssef.Awad]

YouTube - Subaru Horizontally Opposed Boxer Engine

YouTube - boxer engine

YouTube - Subaru Boxer Turbo Diesel Engine

بعد أما حضرتك تتفرج على الفيديوهات السابقة
أحب ان ألخص موضوع المحركات البوكسر فى النقاط التالية:

1.المحركات البوكسر أصغر حجما وأقل وزنا من محركات الاسطوانات المتتالية IN-LINE سواء طوليا أو عرضيا أو حتى المتتداخلة فى المحركات الكبيرة السعة V-SHAPED
2.المحركات البوكسر متماثلة تماما SYMETRICAL MIRROR IMAGE وبالتالى ينعكس هذا على توزيع الوزن بالتساوى 50:50 فى الاتجاهات الاربع وبالتالى توزيع وزن السيارة طوليا وربما عرضيا فى بعض الطرازات فيصبح وزن السيارة بالكامل موزع مناصفة بين الامام والخلف وبين اليمين واليسار
3.سوبارو ليست الشركة الوحيدة بالعالم التى تستخدم تلك النوعية من المحركات فهناك بعض طرازات بى ام دبليو القديمة والفولكس بيتلز وأشهرها البورش وعادة ما تكون مناسبة فى السيارات التى يكون فيها المحرك فى الخلف .. لكن سوبارو هى الوحيدة المحافظة على المحركات البوكسر حتى الآن مثل بورش الالمانية وتعمل على تطويرها عام بعد عام لدرجة أنها طرحت العام الماضى أول محرك بوكسر يعمل بالديزل سداسى الاسطوانات يولد قوة تصل الى 300 حصانا
4.حركة دوران البساتم وأشواطها مع حركة الصمامات بطريقة أفقية وليس رأسية لها مردود إيجابى على تقليل الاهتزازات والضوضاء المنبعثة من مثيلاتها من المحركات العادية لو تساوت فى سعتها اللترية أو عدد اسطوانتها
5.بالنسبة لقدرة تلك المحركات الحصانية .. فلا تظهر فى المحركات الأقل سعة لترية والأفضل أن تقارن بينها وبين باقى الطرازات إذا ما توفرت محركات 2000-2500-3000 سى سى وليس 1600 كما موجود بالامبريزا
6.من يقصد سيارة السوبارو لإقتنائها أو حتى قيادتها فيكون غرضه الأساسى هو التمتع بإحساس لا يضاهى وليس له مثيل فى الثبات والتحكم على كافة السرعات وظروف القيادة المختلفة والمفاجئة على الطريق دون أن تضطر لأن تخفض سرعتك (كما ذكر بعض الأعضاء عن تجربة شخصية)
وليس غرضه التسارع الفائق التوقعات ولا دخول السباقات او الراليات (بالرغم من أن اسم سوبارو امبريزا مرتبط تاريخيا براليات WRC من تسعينات القرن الماضى)
7.تميز السوبارو بتقنية محركات فريدة قابلة للتحديث بمرور الوقت وتخصصها فى هذا النوع تحديدا يصنفها كسيارة UNIQUE لها شخصية فريدة ومستقلة عن غيرها وخارج المنافسة مع كامل الاحترام لكافة ماركات وطرازات السيارات اليابانية وغير اليابانية بالعالم أجمع ومن يركبها لابد أن يرضى بهذا قبل أن يبحث عن قوتها بالأحصنة .. فمن رأيى أكم من السيارات التى لا مثيل لها فى القوة ولكن غير آمنة على السرعات العالية التى لا ضرورة لها على طرقاتنا وإن اقتضت الضرورة لذلك فهناك نسخ أخرى كـ WRX وSTI وغيرها من طرازات سوبارو ؟!!!

[Kazzaz]

ايوه انا فهمت الكلام ده و علي فكره انا عندي ثبات السوبارو اهم من الشد و الجري بس انا كنت بتكلم اني فقط حسيت ان العربيه تستحق اكثر من كده ..
طيب يا جماعه مافيش اي تظبيطات علي الموتور تعلي من اداءه ؟؟

[Kazzaz]

المشكله ان من كتر الناس ما بتسمع عن ثباتها بتحس انهم مثلا لو جم يأمركوا بيها مش هتأمرك مثلا!!!

تخيل :D :D :D و بالنسبه ل ken block خليهم بتفرجوا يا عم

y2y1500
شكرا علي الشرح و علي الفيديوهات .. و شكرا لكل اللي فهمني انهارده حاجه ..