نقاش بخصوص سوبارو

[amrelsaqqa]

عن نفسى مثلا اللى يخلينى اتراجع عن شراء العربية دى

محدش بيفهم فيها - موتورها مختلف محدش بيعرف يعملله عمرة غير في التوكيل - قطع غيار غالية وفي التوكيل بس

دى اهم اسباب تمنع انتشارها

[Medo007]

عن نفسى مثلا اللى يخلينى اتراجع عن شراء العربية دى

محدش بيفهم فيها - موتورها مختلف محدش بيعرف يعملله عمرة غير في التوكيل - قطع غيار غالية وفي التوكيل بس

دى اهم اسباب تمنع انتشارها

بس العربية لسة جديدة
يعني اللى هيجبها حرام اساسا يفكر هيعملها عمرة موتور امتى
طب ما السيراتو منتشرة زي الرز دلوقتي هل حد فكر او عمل عمرة موتور
طبعا لا

[ahmad7610]

موديل 2005 كان يبدا من 120 و 2007 كانت تبدا من 111 و 2008 تبدا من 129 و 2009 تبدا من 135
-
أعلى فئة 2009 155...
-
التوكيل مش مقصر .. وشوف سوبارو دلوقتى و شوفها من 4 سنين .
-
أعتقد إن من 5 سنين كانت سوبارو منسية زى فولفو وألفاروميو و مازدا ... شوف دلوقتى ماشاء الله سوبارو تفوقت عليهم كلهم حتى المازدا.. وفقا لأخر تقرير مبيعات عن شهر يناير و فبراير ( رغم إن مبيعات مازدا ممكن تكون مش دقيقة بسبب الخليجى المنتشر )
-
التوكيل رغم ده كله مقصر فى الدعاية فقط .. عمره مثلا ما عمل إعلان تلفزيون .. ونادرا لما ينزل إعلان جرنال .. وبيبقى مفيهوش معلومات كافية

[kaz08]

تساؤلات من واحد مش خبير

تحياتي للزملاء الاعزاء:

السوبارو رااااااائعة وتحملها ممتاز ونعومتها فائقة ومريحة جدا، وقطع غيارها مش اغلى كتير من قطع هوندا ولا تويوتا.

لكن لي بعض التساؤلات:

1. Awd معناها ان الاربع عجلات شغالين وفيهم دفع من الموتور، من اول لحظة لاخر لحظة، أقصد مفيش امكانية تحويل من دفع ثنائي لدفع رباعي والعكس.

2. دا معناه إنها معقدة في صيانتها، وقد ، أقول قد ، يكون سبب استهلاك اكثر للوقود.

3. لماذا لا يوجد منها موديل بدون awd وطبعا المتوقع انها تكون ارخص،
ودا لوحصل ان العربية زي ماهي كدا دلوقتي وارخص 7 او 8 الاف جنيه ( وممكن اطمع واقول 15): اكيد هتبيع احسن.

[Kazzaz]

kaz08 :
يعني انت عايز تشيل اهم ميزه فيها :) ... اولا صعب بل مستحيل الي الان لان الشركه من زمان و هي واخده الawd و محرك البوكسر كاشئ اساسي لا يتغير ..
انا بصراحه البنزين سحبه معايا ممتاز ...
الصيانه في التوكيل زي الفل لو قصدك بره ماشي معاك ...

[Mosso]

kaz08 :
يعني انت عايز تشيل اهم ميزه فيها :) ... اولا صعب بل مستحيل الي الان لان الشركه من زمان و هي واخده الawd و محرك البوكسر كاشئ اساسي لا يتغير ..
انا بصراحه البنزين سحبه معايا ممتاز ...
الصيانه في التوكيل زي الفل لو قصدك بره ماشي معاك ...

لا يا محمد هي في فعلا منها دفع امامي بس مش بتنزل مصر بس للموديل الـ1600 فقط الـ2000 مفيش منه,
و بيكون فعلا استهلاكها في البنزين اقل و بتكون انطلاقطها اسرع (الكلام ده حسب منتديات لسوبارو في السعوديه و الاردن و فلسطين و ماليزيا ) لان معظم الدول دي مبينزلوش الـawd غير في ال2000,
لكن انا عن نفسي مقدرش اتنازل عن الawd,
مش مهم عندي اجري بسرعه ولا اسابق الناس بس ابقى الحمد لله مطمئن ان في كنترول كويس على العربيه

[Eng.Sameh]

( رغم إن مبيعات مازدا ممكن تكون مش دقيقة بسبب الخليجى المنتشر )

بالظبط كده .. مبيعات مازدا كلها اصلا خليجي .. وانتشار المازدا اكتر بكتييييييييييير من السوبارو .. اصلا المازدا تعتبر من العربيات اللي منتشرة بشكل مرضي جدا ( لا هي مرطرطة بشكل يضيع زهوتها ولا هي قليلة ومش ماشية في الشوارع ) يعني الأنتشار الحلو .

بالنسبة بقه لموضوع السوبارو .. فطبعا هي عربية محترمة جداً .. بس مش عارف فعلا ليه مش منتشرة خالص كده .. يمكن عشان سحبها تقيل شوية ( اسمع بس ولكن مجربتش ) .. او عشان نادرة فالناس بتخاف تشتريها فالندرة بتزيد ..

عموما هو احنا كمصريين عندنا معايير بتاعتنا لوحدنا في موضوع العربيات ده بالذات.

[Horsepower]

إمبريزا من أقوى السيارات ... مش أي حد يقدر ال awd ... العربية دي ال wrx منها بتستخم في فرنسا في الشرطة لإيقاف السيارات السريعة المخالفة (فيراري و لامبورجيني و بورش ... إلخ) طبعا مش ال 1500 سي سي إللي بتنزل مصر ... بتكون 3500 تيربو.
العربية مش منتشرة لأنها الإبنة الوحيدة من سوبارو 1500, إنما مثلا تويوتا عندها (كورولا - ياريس - كامري - أفينسيس - أفينزا) ... إنما سوبارو معندهاش غير إمبريزا و ليجاسي .
مشكلتها الوحيدة إنها محتاجة موتور أكبر من 1500 سي سي ... و على فكرة نفس العربية بنفس الشاسيه إللي بتنزل مصر بموتور 1500 بينزل عليها موتور 2500 برة بدون أي تعديل.
عربية ممتازة فعلا عايزة سواق.

[Ahmed Hassan]

. Awd معناها ان الاربع عجلات شغالين وفيهم دفع من الموتور، من اول لحظة لاخر لحظة، أقصد مفيش امكانية تحويل من دفع ثنائي لدفع رباعي والعكس.

مفيش اماكنيه لفصل الدفع الرباعي في سوبارو. لكن فيه عربيات منها بتنزل جر امامي (الشكل القديم من الامبريزا لغاية ١٩٩٨ في مصر كله جر امامي).

إمبريزا من أقوى السيارات ... مش أي حد يقدر ال awd ... العربية دي ال wrx منها بتستخم في فرنسا في الشرطة لإيقاف السيارات السريعة المخالفة (فيراري و لامبورجيني و بورش ... إلخ) طبعا مش ال 1500 سي سي إللي بتنزل مصر ... بتكون 3500 تيربو.
العربية مش منتشرة لأنها الإبنة الوحيدة من سوبارو 1500, إنما مثلا تويوتا عندها (كورولا - ياريس - كامري - أفينسيس - أفينزا) ... إنما سوبارو معندهاش غير إمبريزا و ليجاسي .
مشكلتها الوحيدة إنها محتاجة موتور أكبر من 1500 سي سي ... و على فكرة نفس العربية بنفس الشاسيه إللي بتنزل مصر بموتور 1500 بينزل عليها موتور 2500 برة بدون أي تعديل.
عربية ممتازة فعلا عايزة سواق.

لو قصدك موديلا السوبارو بموتور صغير فهي الامبريزا اللي كانت ١٦٠٠ و اصبحت ١٥٠٠ في الموديل الجديد. فيه كمان سوبارو جستي و دي اصغر من كده كمان،،، بس مش موتور بوكسر

فيه كمان موديلا تانيه بمواتير اكبر تبدأ بالامبريزا و الليجاسي مرورا بالفورستر و انتهاء باكبر عربيات سوبارو "تريبكا" و موتور العربيات دي يبدأ ب ٢٠٠٠ سي سي لغاية٣٦٠٠ سي سي بتربو و بدون

[Sameh]

ألعربيه دى عاوزه واحد ركيب وغاوى

هى دى إجابة السؤال

السوبارو زيها زي الميجان زي السيات زي الفيات زي الفورد زي اي ماركه محترمه بس السوق المصري مش قابلها و قابل حاجات اقل منها كتير جداااااااااااااا و باسعار مبالغ فيها كمان

الناس فى مصر بتشترى النترا و i30 بسعر الميجان والفوكاس والمازدا 3 ، وبيشتروا بريليانس بسعر فانتازيا وجيتا - هى ثقافة محدودة والناس بتصدق اللى بتقرأه فى ملاحق السيارات وكلام بتوع المبيعات وبيفتكر إنه اشترا عربية ماحدش ركبها قبله ولا بعده وهى برة مايشغلوهاش عربية دليفرى حتى مع احترامى ، لكن الموافقة على التسعير المبالغ فيه لموديلات رخيصة هو اللى خلى التوكيلات تتمادى والسوق يبوظ

طب ما كله بيذم في شيفروليه منصور
وغبور وعربيات مليانة هونداي مثلا

عشان للأسف معظم القوة الشرائية فى مصر حافظة مش فاهمة وبتروح تشترى بثقافة القطيع ، يعنى بيشترى اللى هو شايفه فى الشارع ومع جاره ومع قريبه ، مش بيشترى الأحسن ولا بيعرف يدور على المعلومة من مكانها الصحيح ، وبعدين يرجعوا يشتكوا من العربيات والتوكيلات لكن لسة بيشتروها برضه !!

بس هي العربيه كعربيه ممتازه ان كنت بركب جولف 4 قبلها و الان مرتاح اكتر بكتيير
و بعدين يا باشا ده اخرها تقريبا 150 الف و بدايتها 116 يعني حتي مش ب 160 الف ...

وشهد شاهد من أهلها :) ، وهى ب 154 موديل 2010 أوتوماتيك ، بس مافيش 116 على فكرة ، موديل 2010 بقا كاتيجورى واحد فى الأوتوماتيك أبو 154 اللى هو كان فى 2009 الموديل اللى قبل ال RK بس زاد عليه الملتيميدا وفوانيس سودا من الداخل وشبكة زى ال wrx

عن نفسى مثلا اللى يخلينى اتراجع عن شراء العربية دى
محدش بيفهم فيها - موتورها مختلف محدش بيعرف يعملله عمرة غير في التوكيل - قطع غيار غالية وفي التوكيل بس
دى اهم اسباب تمنع انتشارها

هو كام واحد دلوقتى بيعمل عمرة قبل ما يبيع عربيته ؟ الحاجة التانية لو المواتير العادية بتعمر على 250-300 الموتور البوكسر بيعدى ال 500 الف كيلو مستريح أوى (التوكيل بيقول مليون بس ده مش منطقى) ، يعنى إن شاء الله عمرك ما هتحتاج تعمل عمرة عشان ال 500 الف دول تعملهم فى 25 سنة لو بتمشى 20 الف فى السنة أو فى 15 سنة لو بتعمل 33 الف فى السنة يعنى ساعتها هيبقا عندك 50 سنة :)

السوبارو رااااااائعة وتحملها ممتاز ونعومتها فائقة ومريحة جدا، وقطع غيارها مش اغلى كتير من قطع هوندا ولا تويوتا.
لكن لي بعض التساؤلات:
1. Awd معناها ان الاربع عجلات شغالين وفيهم دفع من الموتور، من اول لحظة لاخر لحظة، أقصد مفيش امكانية تحويل من دفع ثنائي لدفع رباعي والعكس.
2. دا معناه إنها معقدة في صيانتها، وقد ، أقول قد ، يكون سبب استهلاك اكثر للوقود.
3. لماذا لا يوجد منها موديل بدون awd وطبعا المتوقع انها تكون ارخص،
ودا لوحصل ان العربية زي ماهي كدا دلوقتي وارخص 7 او 8 الاف جنيه ( وممكن اطمع واقول 15): اكيد هتبيع احسن.

1- انت كدة عايز تلغى أهم ميزة فى سوبارو وتحولها لعربية عادية جداً
2- مافيش صيانة معقدة ولا حاجة ، إيه هى صيانة الكورونا والدفرنس والكردان ؟ زيت كورونا مش أقل من 100 الف كيلو ! ، الدفرنس والكردان عمرهم ما هيتكسروا لأن العربية دى بتشيل مواتير 500 حصان يعنى ال 106 ولا حاجة
3- لو فيه موديل كدة وأرخص يبقا سيبك من سوبارو بقا خلاص لأنها هتبقا عربية تانية خالص

إمبريزا من أقوى السيارات ... مش أي حد يقدر ال awd ... العربية دي ال wrx منها بتستخم في فرنسا في الشرطة لإيقاف السيارات السريعة المخالفة (فيراري و لامبورجيني و بورش ... إلخ) ... و على فكرة نفس العربية بنفس الشاسيه إللي بتنزل مصر بموتور 1500 بينزل عليها موتور 2500 برة بدون أي تعديل.
عربية ممتازة فعلا عايزة سواق.

كلام سليم جداً وأنا اتقالى من صديق فرنسى انهم عندهم 9 عربيات wrx sti بيستخدموها على طريق النفق بين فرنسا وانجلترا عشان يجيبوا بيها العربيات اللى بتيجى من انجلترا فوق ال 260 وكدة ، ليه ماختاروش M3 مثلاً ولا M5 ولا كورفيت مثلاً ؟ عشان ال sti أحسن فى المطاردات عشان سرعتها مع ثباتها مع امكانيات المناورة العالية أوى ، وانا شوفت فيديو سوبارو 300 حصان بتطلع من بورش 500 حصان ممكن تشوفوه على اليوتيوب

ودى صورة على الماشى



ودى صورة تانية أنا بحبها لسوبارو


وعلى فكرة الل بيقول اليابانى مايجيش حاجة فى الألمانى ، الكلام ده لا ينطبق على سوبارو بالذات لأن الألمان نفسهم ليهم جملة مشهورة ممكن تدور عليها على جوجل بيقولوا Subaru: The Japanese Car The German's Wish They Made يعنى الألمان بيعترفوا إن هى دى العربية اليابانى الوحيدة اللى كانوا نفسهم إن يبقا هم اللى عملوها ، يعنى شهادة تقدير بإمتياز من أحسن صانع للسيارات فى العالم

[Horsepower]

ما شاء الله عليك يا سامح ... لو إشتغلت في مبيعات سوبارو مكانش ده بقى حالهم.

[Medo007]

تشكر يا سامح انت جبت من الاخرر
احنا حافظين مش فاهمين
ههههه

[amrelsaqqa]

ايه الحلاوة دى يا استاذ سامح

لا تمام بجد مية مية

طيب يعنى مثلا لو انا معايا 60 الف وعايز اشترى عربية
اشترى واحدة مستعملة وكويسة وكل حاجة وانا مطمن من قطع الغيار وكدة ؟

وبعدين عايز اعرف هل فعلا قطع الغيار في التوكيل بس
او التوكيل و الحرفيين بس

ماهى برضه مشكلة

هل عشان اغير حاجة بسيطة انزل مصر مخصوص وانا برة القاهرة
ما هى دى مشكلتها بجد
غير كدة العربية بتتكلم عن نفسها واللى بيفهم في العربيات لازم يقدرها

وبعدين كنت سمعت كمان ان 1500 اللى بتنزل عندنا تقريبا 95 حصان

عشان طبعا تقيلة و الدفع الرباعى بيضيع احصنة
وناس قالتلى عشان تبقى سوبارو بجد يبقى ما تقلش عن 2.5 لتر
ما هو برضه الواحد ما يشتريش عربية وييجى واحد بفيرنا يطلع منها !!

ياريت حد يصحح كلامى لو معلوماتى غلط

[Sameh]

ما شاء الله عليك يا سامح ... لو إشتغلت في مبيعات سوبارو مكانش ده بقى حالهم.

العفو يا أحمد بيه ده بس من ذوقك

تشكر يا سامح انت جبت من الاخرر
احنا حافظين مش فاهمين
ههههه

البركة فى نايل موتورز بقا ينور الناس ويدى كل حاجة حقها

ايه الحلاوة دى يا استاذ سامح
لا تمام بجد مية مية

ربنا يخليك ويكرمك

طيب يعنى مثلا لو انا معايا 60 الف وعايز اشترى عربية
اشترى واحدة مستعملة وكويسة وكل حاجة وانا مطمن من قطع الغيار وكدة ؟

عموماً المستعمل مالوش قاعدة وبيخضع للحالة ، ده فى كل العربيات ، ممكن تبقا لقطة وممكن تبقا مقلب ، عايزة حرص ورأى واحد واتنين يشوفوها معاك ، بس عموماً فى السوبارو المستعمل معظم الحاجات اللقطة بتتكلم فى 85-95 ، فأخشى ان ال 60 تخليك تجيب سوبارو متهانة شوية أو عاملة حادثة

وبعدين عايز اعرف هل فعلا قطع الغيار في التوكيل بس
او التوكيل و الحرفيين بس
ماهى برضه مشكلة
هل عشان اغير حاجة بسيطة انزل مصر مخصوص وانا برة القاهرة
ما هى دى مشكلتها بجد
غير كدة العربية بتتكلم عن نفسها واللى بيفهم في العربيات لازم يقدرها

متهيألى فى السوبارو التوكيل رقم واحد والحرفيين رقم اتنين خصوصاً فى الموديلات الجديدة ، ماعرفش حضرتك مقيم فين وفيه محلات لسوبارو جنبك ولا لأ ، بس هى عموماً أقل إنتشاراً من معظم اليابانى

وبعدين كنت سمعت كمان ان 1500 اللى بتنزل عندنا تقريبا 95 حصان
عشان طبعا تقيلة و الدفع الرباعى بيضيع احصنة
وناس قالتلى عشان تبقى سوبارو بجد يبقى ما تقلش عن 2.5 لتر
ما هو برضه الواحد ما يشتريش عربية وييجى واحد بفيرنا يطلع منها !!
ياريت حد يصحح كلامى لو معلوماتى غلط

واحدة واحدة هنا

1- ال 1500 مش 95 حصان إنما بيطلع 107 حصان عند 6000 لفة وعزم 142 نيوتن عند 3200 لفة ، ودى نفس أرقام المواتير ال 1600 بالنسبة للحصان ، وبالنسبة للعزم أقل بحاجة بسيطة (حوالى 5-7 نيوتن) بس بيعوضه بميزة إنه بيخرج أقصى قدرة عند آر بى إم منخفض نسبياً ، يعنى مش 4500 زى معظم المواتير ، وده معناه أداء كويس وإستجابة عالية أول ما تضغط على الدواسة من غير حرق كتير وتاخد وقت عقبال ما تجمع على الغيار
تقريباً انت متلخبط مع موتور البوكسر ال 1600 اللى كان بينزل فى موديل 2007 ، ده كان فعلاً بيخرج 95 حصان عند 5200 لفة و عزم 143 عند 3600 ، عشان كدة الموتور ال 1500 ده يعتبر تطوير جامد للموتور اللى قبله من حيث الحصان والعزم وإستهلاك الوقود

2- طبعاً الموتور ال 2.5 هيبقا مالوش حل ، وعموماً هو نازل فى التوكيل فى ال wrx ال 224 حصان ب 400 الف و ال wrx ال 265 حصان ب 600 الف !! أما ال wrx sti ال 305 حصان مجابهاش من أصله !! وكلهم مواتير 2500 بس فرق البوست بتاع التربو والتغذية وخروج العادم وشغل سوبارو العالى اللى خلاها بالموتور ده تسبق موستانج 8 سلندر 4600 سى سى و بورش كايين 8 سلندر 4800 سى سى يعنى ضعف ال سى سى تقريباً :)

3- أيوة الفيرنا تطلع من سوبارو 1500 وعربيات تانية كتيرة فى أول الشد يعنى من 0-100 مثلاً بعد كدة مين يكمل لل 200 بثبات ومين تتحكم فيه والطريق بايظ أو فيه مياه ومين لو عملت بيه حادثة لا قدر الله يحميك ومايبقاش حتة عجينة ... الخ ، لو هتقيس بفكرة مين يطلع من الفيرنا يبقا غالباً مش هتلاقى عربية 1600 غير السيفك أو المواتير ال 1.4 التربو بتاعت فيات وفولكس ! وعموماً عايز أطمنك إن تسارعها كويس وعادى مش سئ زى ما انت فاكر بس المشكلة إن اللى بيركبها بيبقا طمعان فى أداء الراليات بتاع ال sti :) فبيتهيأله إن العربية بطيئة

[amrelsaqqa]

متشكر جدا لسعة صدرك واجابتك الوافية

وفعلا انا حصل عندى لبس انا كنت بتكلم عن موتور ال2007 بس قلت 1500

الف الف شكر