coolant اجيب ايه و اغيره ولا ازود ؟

[Kazzaz]

انا مش عارف اجيب نوع ايه و مش فاهم التركيز يفرق في ايه و الاحسن تركيز عالي ولا مثلا 10 في الميه ؟
و لو جبت اغير الميه افضيها يعني الموجوده دي افضيها و بعدين احط ميه جديده علي نضافه ولا ازود و خلاص ؟
و لو اغيرها ... ازاي افضي الموجود ؟

[khalid_adel]

انا كنت بسيب الموضوع ده على التوكيل لانهم بيظبطو الميه صح وعمر ما الميه عملت مشاكل معايا
لكن بتوع البنزينه وبيحط اي نوع وخلاص دول بلاش منهم لان لو الدوره اختلفت خلاص يبقى الميه حتنقص ومش حتظبط ابدا ( في انواع ميه مينفعش تتحط مع انواع ) يعني لازم لو حتزود يبقى نفس النوع

[Kazzaz]

اكيد التوكيل هايظبط الموضوع طبعا بس حاسس ان مش معقوله الميه يعني اروح التوكيل عشان يعملوها .. ده الناس بره بتعمل الصيانه في بيتهم هههه يعني شايف ان الواحد لازم يدوس شويه في العربيه

[Ahmed Hassan]

انا بحط توتال الحمراء organicool حتى لما غيرت في التوكيل جبتها معايا.
عايز تحط موبيل مفيش مشاكل بس المهم سواء توتال او موبيل تتأكد انها اصليه.
الموضوع سهل:
١- هتفتح غطاء الريداتير و ترفع العربيه.
٢- هتفك الطبه بتاعت الريداتير من تحت (و انت تحت العربيه و وشك في وش العربيه هتكون على الشمال)
٣- هتستنى لغايه الميه ما تصفى خالص.
٤- تقفل الطبه بتاعت الريداتير و تنزل العربيه.
٥- من الريداتير (مش من العلبه) تزود ميه لغاية ما الريداتير يتملي (و العربيه مطفيه)
٦- دور العربيه و خليك دايس بنزين و لفات الموتور خليها اعلى من ٢٠٠٠ ار بي ام.
٧- و انت دايس بنزين كمل مليء الريداتير لانك هتلاقيه نقص. لما الميه تكمل اقفل الغطاء.
٨- هتحتاج تفضل دايس بنزين لغايه ما العربيه تسخن و تتأكد ان المروحه اشتغلت.

موضوع انك تدوس بنزين ده مهم و لازم تعمله لانك لو مهعملتوش العربيه هتسخن و الروحه مش هتشتغل.
* لو العربيه سخنت منك و المروحه مشتغلتش افي العربيه ربع ساعه و جرب تاني.

[khalid_adel]

الله ينور عليك يا احمد باشا هي دي النقطه اللي كنت عايز اوضحها بس للاسف كنت ناسي بزود او بكمل الميه تاني امتي ( لما المروحه تشتغل وكده )
طب معلش سوال يا احمد لو العربيه قربه بس ومفيش غطا ردياتير
وكمان انت مذكرتش يملي القربه امتي ؟؟ بعد الردياتير ما يملي بعد المروحه ؟؟
شاكرين يا باشا على الافاده

[Ahmed Hassan]

الله ينور عليك يا احمد باشا هي دي النقطه اللي كنت عايز اوضحها بس للاسف كنت ناسي بزود او بكمل الميه تاني امتي ( لما المروحه تشتغل وكده )
طب معلش سوال يا احمد لو العربيه قربه بس ومفيش غطا ردياتير
وكمان انت مذكرتش يملي القربه امتي ؟؟ بعد الردياتير ما يملي بعد المروحه ؟؟
شاكرين يا باشا على الافاده

لو العربيه قربه بس هتزود من القربه.
بالنسبه للي انا ذكرته فوق مش هتفضي القربه. فبالتالي هيكون فيها ميه عادي. ممكن بعد ما تخلص عملية تغيير الميه كلها و كانت القربه ناقصه زودها لغاية تحت الـ max بشويه. متوصلش للماكس و لا تزود عنه.