العربية جالها هبوط.. :)

[Ahmad Allawy]

السلام عليكم..
باختصار شديد.. العربية اول مشوار كبير اطلعه بيها من البيت للقرية الذكية..
كانت تمام و زي الفل.. ملبستش ولا مطب ولا حفرة ولا اي حاجة الحمد لله..

خلصت اليوم و انا ماشي باركب العربية لقيتها مايلة شوية ناحيتي.. يعني الجنب الشمال اوطي من اليمين.. قولت يمكن بيتهيألي.. جبت معايا واحد صاحبي و شاف قالي لأ مايلة فعلا..
الكاوتش مش مهوي ولا حاجة.. و المسافة بين الكاوتش و الرفرف مختلفة الشمال عن اليمين..

لما روحت وقفتها في الجراج و بصيت لقيتها كده فعلا..

هل حد ممكن يكون عنده اي تفسير منطقي..؟
انا رايح بيها التوكيل ان شاء الله يوم السبت الصبح.. بس حابب افهم..

[khalid_adel]

مش عايز افتي وان كنت اشك في مساعد هو اللي يهبط العربيه كده

[mando_07]

أعتقد المساعد اليمين ضرب زيت ، اكشف و طمنا وإن شاء الله تبقى بسيطة

[Ahmad Allawy]

جميل.. انا برضه توقعي ان في حاجة غلط في المساعدين..
طيب المساعد اللي باظ.. الواطي ولا العالي؟؟
الناحية العالية ولا الواطية اقصد..!!!

الناحية العالية بتاخد و تدي مع المطبات و ممكن اقول انها خفيفة شوية.. و الواطية ناشفة شوية.. بس برضه مش قوي..

[BESOHOTFLASHb]

بص حضرتك هو ممكن يكون الياي هبط شوية او يكون البطيخة اتقطعت اللي هي البتاعة الجلد اللي بتبقي مسكة المساعد من فوق وهي شكلها مدور بتبقي موجودة واحدة يمين وواحدة شمال في البادي بتاع العربية

[Ahmad Allawy]

بس اكيد مش المفروض الياي يهبط لوحده كده فجأة..
البطيخة دي هاشوفها لما اروح ان شاء الله..

[egyptiandiver]

سلامتها

[khalid_adel]

لو من مساعد يبقي من الناحيه اللي وطيت اكتر

[mahmoudselim]

الموضوع دا لية احتمالات كتير وأكتر من سبب
بس انا برجح السوست مش عارف لية ...

[Ahmad Allawy]

الله يسلمك.. :) :)
ان غدا لناظره قريب..
يوم السبت ان شاء الله هنشوف التوكيل هيقول ايه..

[khalid_adel]

ان شاء الله تبقي حاجه بسيطه

[Ahmad Allawy]

روحت التوكيل امبارح و لله الحمد..
المهندس تامر استلم مني العربية.. و نده صنايعي بص عليها و قالي مفيش حاجة العربية زي الفل..
قاوحت معاه و قولتله لأ في فرق و شوف تاني بنفسك.. المهم قولتله ارفعها و اكشف و بعدين نتكلم..
رفعوا العربية و ظبطوا الهوا و قاسوا فرق الارتفاع.. و طلعوا جربوا العربية و كده..

رجعوا قالولي العربية فيها فرق 1 سم فعلا... و بنشوف حاجة عشان نقولك الاول هنصلح علي حسابك ولا حسابنا..

المفروض انه اللي حصل ده في العفشة.. يعني مش هتفرق العربية بتعمل صيانة الخمسات ولا العشرات عندعهم ولا لأ.. عشان مفش يانة من دول فيها حاجة بتتغير في العفشة.. بس الحمد لله كل صياناتها معمولة عندهم.. و مفيش ولا صيانة متعملتش..

المهم قالك سوستة مساعد.. و موجوده في جسر السويس..
هاوديها بكرة ان شاء الله تتعمل هناك عشان هناك في جهاز قياس شاسيه و ظبط زوايا..

[Ahmad Allawy]

السلام عليكم..
عدنا من جديد.. لسة راجع حالا من التوكيل..

المفاجأة المدوية..
السوبارو الامبريزا السيدان (مش عارف الهاتش باك ايه نظامها..)
الشكل الموجود حاليا من اول 2009 لحد 2011 فيها الناحية اللي قدام شمال اوطي من اليمين بحوالي 1 سم ده الطبيعي.. و المهندس كريم مدير الورشة هناك وراني ده بعيني في 3 عربيات هناك منهم 2009 و منهم 2011 و مش ماشيين كتير يعني ملحقوش يبقي فيهم عيب او كده.. و قالي اول مرة تجيله الشكوي دي من حد..

يعني بلا فخر اول واحد يقفش الموضوع ده.. :)

سألت عن السبب قالي هابعت اسأل في سوبارو اليابان و لما يجيلي رد هاقولك..

[ELzanatti]

ممنوع الكتابه بالفرانكو اراب
برجاء مراجعة قواعد المنتديhttp://www.nilemotors.net/Nile/forum...uncements.html
مشرف القسم 6-ب

[Ahmad Allawy]

ايه يا جدعان الاشتغالات دي؟؟ :) :)
لو تقصد وائل علي سالم.. هو اجازة..

مين بقي؟؟ كلمة السر..