سوبارو 2012 كلام نهائي من فضلكم

[dody2k]

سلام عليكم .. أنا حجزت سوبارو 2012 وقلقان من كذا حاجة ومحتاج مساعدتكم عشان احسم قراري .. أول حاجة سمعت إن سحب العربية مش اد كده مقارنة بعربيات تانية ارخص كتير منها زي اللانسر والصني!!! واعلى سرعة للعربية .. تاني حاجة ارتفاعها عن الارض وهل هي بتحك في المطبات ولا لأ .. موضوع الطنابير اللي بتتغير كل 5000 كم .. واخيرا التعامل مع التوكيل وتوفر قطع الغيار .

[AlGazar2]

و عليكم السلام

بص سحب العربيه مش زى اللانسر و الصنى عشان العربيه اتقل من اللانسر و الصنى بكتير و دفع رباعى

الموتور الجديد محدش جربه لسه بس هو موتور 114 حصان تقريبا

العربيه ارتفاعها مناسب ليها زى الكورولا تقريبا او اكتر شويه اعلى سرعه محدش جربها لسه فى المنتدى و قالنا بس عدادها 240 تقريبا يعنى تجيب 220 مستريح

مفيش عربيه بتغير طنابير كل 5000 كيلو ابدا ده الزيت بيتغير على 10000 العربيه صيانتها لغايه 75 الف بتغير زيت و فلتر و الكاتينه على 90

توكل على الله و احجز تست درايف و شوفها على الطبيعه و هاتها و انت الكسبان

[eng.m7md.ali]

عربية تحفة
ممكن تعمل test drive ليها عشان ترتاح اكتر
بالتوفيق

[amro_26]

العربية ما شاء الله عليها جميلة جدا وانا اشترتها من شهرين وعلى فكرة كان معايا لانسر 2008 سبورت وهارد على حضرتك :
1- سحب العربية فوق الممتاز مش بحس بسرعتها ابدا بتجيب من صفر - 100 فى 10 ثوان تقريبا
2- طنابير مش ممكن تتغير على 5000 كم استحالة طبعا
3- الصيانة هى اللى بتكون كل 5000 كم وبتغير زيت 10000 كم وفلتر زيت كل صيانة بمعنى كل 5000 كم بتغير زيت 10000 كم للحفاظ على الموتور
4- العربية مش بتغير كاتينة
5 - اول صيانة فعلية فى العربية عند ال 100000 كم انما قبل كده زيت وفلتر بس والتيل حسب الاستهلاك وهما بيقولوا بيقعد من 40000كم إلى 60000 كم
6 - العربية واطية شوية يعنى لازم تاخد المطب سمبوكسة عشان ماتحكش بس هى مش بتحك على الفاضى والمليان لكن فى مطبات فى شوارعنا زبالة فده الواحد ياخد احتياطاته احسن وبالذات وهو محمل فى العربية ورا
7- ثبات خرافى للعربية وفى الملفات والغرز حكاية
8- العربية ناعمة اوى وماتحسش بالارض وهى ماشية ولا بالمطبات ناعمة جدا
9- التكيييف تحفة ثلاجة ما شاء الله عليه
10 - العربية واسعة من الداخل وشنطتها واسعة وبصراحة استريحت جدا فيها
11- الاضاءة الخارجية على الطريق واضحة وحادة جدا يعنى تشوف الطريق بوضوح جدا وممكن تتحكم فى ارتفاع وانخفاض الاضاءة عن الارض
12- التوكيل محترم جدا ومعاملة رائعة

وشكرا ولو فى اى سؤال تحت أمر حضرتك

[Youssef.Awad]

ركوبة متميزة لكن للناس اللى عارفة قيمتها لأن ماحدش بياخد كل حاجة من العربية