عايز أركب سوبارو2004 بس عندى كام سؤال

[mopecoolboy]

السلام عليكم
انا معايا هوندا 93 و من كام يوم صاحبى قالى متجرب تبيعها و تكمل عليها و تجيب سوبارو 2004 او 2005 ب حوالى 50 ألف
الفكرة طلعت فى دماغى الهوندا بصراحة جميلة جدا بس المشكلة قديمة .. عايز اجدد برضو على قد الفلوس اللى معايا .. بس قلقان عشان صاحبى معاة سوبارو امبريزا 2008 بس كل حاجة بيجبها من التوكيل و مفيش غير 2 برة التوكيل بيشتغلو فيها
المهم يا ريت مكنش بتقل عليكم
عايز أعرف اسعار قطع الغيار و شوية أسعار عن العفشة خصوصا سوبارو 2004 او 2005 و اية أكتر القطع الغالية فيها سواء فى العفشة او الصيانة او اى حاجة تانية ...كمان هل فعلا ممكن الاقى حاجة محترمة بـ 50 ألف ؟؟

أرجو الافادة للاهمية... وشكرا جزيلا ليكو يا رجالة

[eslam.maghawry]

متابع

[Eslam.Elrefaey]

https://www.facebook.com/groups/4729614106/?fref=ts

[mopecoolboy]

يا رييت إجابة

[eslamsubaru]

اولا اهلا بيك .
ثانيا اهنيك على تفكيرك الموديل ده من سوبارو ملوش حل . انا معايا موديل 2005 . العربية محترمة جدا و صياناتها بالتوكيل مش مكلفة على فكرة لو انت مواظب على الصيانات ..
عموما لو حاجة نظيفة منها هتعملها 60-70 حسب الحالة مش 50 للأسف .. 50 دى كانت ممكن من 4 سنين فاتو قبل الزيادات الغريبة فى اسعار المستعمل .. يعنى تلاقى فيرنا مستعملة نفس الموديل و بتتباع ب 60000 !!!!!! .. عموما حتى لو جبتها ب 65 فصدقنى انت اللى كسبان خصوصا لو العربية حالتها نظيفة . دى اسعار قطع الغيار جوه و بره التوكيل و اسعار الصيانات .
انا العربية معايا دلوقتى بقالها 10 سنين و مجمل اللى اتصرف عليها صيانات لا يتعدى 25000 ج خلال ال 10 سنين .. طبعا بدون البنزين :) ..
قطع الغيار متوفرة بالتوكيل علطول : و فيه ناس بره التوكيل بتجيب قطع استيراد (هشام بالضاهر و عايد بالحرفيين و محل اسمه صقر بالمعادى و محل اسمه short بالحرفيين).. بس فرق السعر عن قطع التوكيل الأصلية ميستاهلش المجازفة :

الأسعار اللى هكتبهالك بتكون بالضريبة و التركيب :

1) فلتر زيت : 60 بيتغير كل 5000 كم بالتوكيل ممكن يقعد اكثر طبعا بس التوكيل امان
2) فلتر هواء : 160 بيتغير كل 20000 كم او حيب الحالة
3) فلتر بنزين : 210 بيتغير ما بين 30000 الى 40000 كم
4) تيل فرامل امامى : الأثنين ب 550 بالتركيب العمر الافتراضى ما بين 20000 الى 45000 كم حسب سواقتك : اخر مره قعد معايا 42000 كم بدون مبالغة .
5) تيل فرامل خلفى : 560 و ده حتى الأن مغيرتوش و عامل 110000 كم .
6) مساعد امامى : الواحد 800 بتركيبه
7) مساعد خلفى : الواحد 750 بتركيبه
8) بلى عجل خلفى : الواحدة ب 700 بالتركيب : و دى غيرتها مرة واحدة على 105000 كم .. علشان بدأ صوتها يخشن.
9) جلب مقصات : كله ب 650 بالتركيب . و دى غيرتها مره واحدة على 108000 كم .
10) تيش ميزان : ( اسم تانى مسامير استابيلايزر ) : 400 ج : و دى غيرتها على 90000 كم .
11) بوجيهات : الواحد 60 ج و تركيبه تقريبا 20 . بس هكتبلك سعر الصيانة شاملة تحت .
12) سير دينامو : 140
13) بلية كاتينة : 250 ج الواحدة
14) ترس كاتينة : 500 ج الواحد
15) سير كاتينة : 250 ج

اسعار الصيانات الدورية لو هتواظب بالتوكيل :

1) كل 5000 كم اسمها الصيانة العادية : صيانة زيت موتور + فلتر زيت + تشحيم + تنظيف فرامل + رجلاش فرامل + تنظيف دورة الهواء و الفلتر و تنظيف وحدة الخنق ( كل التنظيف بمواد خاصة مش بالهواء) + تربيط عفشة = 700 ج

2) كل 25000 كم : صيانة عادية + صيانة بوجيهات = 1100

3) كل 40000 كم : صيانة زيوت شاملة ( تغير الزيوت كلها بفلاترها : زيت موتور + زيت فتيس + زيت فرامل + زيت الدفع الرباعى + تغير و تنظيف دورة التبريد مياه الريداتير) + الصيانة العادية = 1200 ج

4) كل 75000 كم : صيانة الكاتينة : الصيانة العادية + تغيير 2 ترس كاتينة + 3 بلى كاتينة + سير كاتينة = 2200 ج دى اغلى صيانة بالعربية

اسعار القطع الخارجية : هكتبهالك مقارنة بينها و بين الاستيراد ( التوكيل الأول طبعا )

1) فانوس امامى : 1600 ..... 1000
2) فانوس خلفى: 900 .... 300 الى 400
3) الباب او رفرف : افتكر 1000 بدهانه بالتوكيل بس مش متأكد قوى من السعر ..... استيراد ممكن 250-300 بدون دهان
4) الزجاج الأمامى : يابانى اصلى 4500 .. سوبارو من جريش 900 ..... استيراد 550
5) مراية جانبية : 600 توكيل ..... 200 استيراد

هى القطع الخارجية اللى غالية شوية بس مقارنة بالباقى الأن مش فارقة كتير.

[mopecoolboy]

معلش يا باشا تعبتك معايا و شكرا جدا على الرد الوافى دا يا eslamsubaru