استشارة من ملاك سوبارو امبريزا

[medo_egypt86]

انا ان شاء الله مقبل على شراء سوبارو امبريزا 2007 اتوماتيك
قدامي عربية حالتها كويسة الحمدلله
ايه اخبار قطع الغيار؟
وموجودة فين ؟
وايه رأيكوا في الموديل ده عموما

[eslamsubaru]

اولا اهلا بيك .
ثانيا اهنيك على تفكيرك الموديل ده من سوبارو حلو جدا . انا معايا موديل 2005 هية هية موديلات 2006-2007 الاختلاف فالشكل الخارجى بس . العربية محترمة جدا و صياناتها بالتوكيل مش مكلفة على فكرة لو انت مواظب على الصيانات ..
عموما لو حاجة نظيفة منها هتعملها 65-75 حسب الحالة .
دى اسعار قطع الغيار جوه و بره التوكيل و اسعار الصيانات .
انا العربية معايا دلوقتى بقالها 10 سنين و مجمل اللى اتصرف عليها صيانات لا يتعدى 25000 ج خلال ال 10 سنين .. طبعا بدون البنزين :) ..
قطع الغيار متوفرة بالتوكيل علطول : و فيه ناس بره التوكيل بتجيب قطع استيراد (هشام بالضاهر و عايد بالحرفيين و محل اسمه صقر بالمعادى و محل اسمه short بالحرفيين).. بس فرق السعر عن قطع التوكيل الأصلية ميستاهلش المجازفة :

الأسعار اللى هكتبهالك بتكون بالضريبة و التركيب :

1) فلتر زيت : 60 بيتغير كل 5000 كم بالتوكيل ممكن يقعد اكثر طبعا بس التوكيل امان
2) فلتر هواء : 160 بيتغير كل 20000 كم او حيب الحالة
3) فلتر بنزين : 210 بيتغير ما بين 30000 الى 40000 كم
4) تيل فرامل امامى : الأثنين ب 550 بالتركيب العمر الافتراضى ما بين 20000 الى 45000 كم حسب سواقتك : اخر مره قعد معايا 42000 كم بدون مبالغة .
5) تيل فرامل خلفى : 560 و ده حتى الأن مغيرتوش و عامل 110000 كم .
6) مساعد امامى : الواحد 800 بتركيبه
7) مساعد خلفى : الواحد 750 بتركيبه
8) بلى عجل خلفى : الواحدة ب 700 بالتركيب : و دى غيرتها مرة واحدة على 105000 كم .. علشان بدأ صوتها يخشن.
9) جلب مقصات : كله ب 650 بالتركيب . و دى غيرتها مره واحدة على 108000 كم .
10) تيش ميزان : ( اسم تانى مسامير استابيلايزر ) : 400 ج : و دى غيرتها على 90000 كم .
11) بوجيهات : الواحد 60 ج و تركيبه تقريبا 20 . بس هكتبلك سعر الصيانة شاملة تحت .
12) سير دينامو : 140
13) بلية كاتينة : 250 ج الواحدة
14) ترس كاتينة : 500 ج الواحد
15) سير كاتينة : 250 ج

اسعار الصيانات الدورية لو هتواظب بالتوكيل :

1) كل 5000 كم اسمها الصيانة العادية : صيانة زيت موتور + فلتر زيت + تشحيم + تنظيف فرامل + رجلاش فرامل + تنظيف دورة الهواء و الفلتر و تنظيف وحدة الخنق ( كل التنظيف بمواد خاصة مش بالهواء) + تربيط عفشة = 700 ج

2) كل 25000 كم : صيانة عادية + صيانة بوجيهات = 1100

3) كل 40000 كم : صيانة زيوت شاملة ( تغير الزيوت كلها بفلاترها : زيت موتور + زيت فتيس + زيت فرامل + زيت الدفع الرباعى + تغير و تنظيف دورة التبريد مياه الريداتير) + الصيانة العادية = 1200 ج

4) كل 75000 كم : صيانة الكاتينة : الصيانة العادية + تغيير 2 ترس كاتينة + 3 بلى كاتينة + سير كاتينة = 2200 ج دى اغلى صيانة بالعربية

اسعار القطع الخارجية : هكتبهالك مقارنة بينها و بين الاستيراد ( التوكيل الأول طبعا )

1) فانوس امامى : 1900 ..... 1000
2) فانوس خلفى: 850 .... 300 الى 400
3) الباب او رفرف : افتكر 1000 بدهانه بالتوكيل بس مش متأكد قوى من السعر ..... استيراد ممكن 250-300 بدون دهان
4) الزجاج الأمامى : يابانى اصلى 4500 .. سوبارو من جريش 900 ..... استيراد 550
5) مراية جانبية : 600 توكيل ..... 200 استيراد

هى القطع الخارجية اللى غالية شوية بس مقارنة بالباقى الأن مش فارقة كتير.

[blazer]

السوبارو ال 2007 متازه وياريت تقول هتخلصها على كام بعد اذنك
اعتقد ياباشا انت بتعمل صيانات كدا قبل مواعيدها
يعنى زيت الماتور كل 10000
سير الكاتينة مكتوب انه كل 120 الف بس عشان ظروف القياده فى مصر كل 90 الف
الزيوت و البوجيهات كل 60 الف

[eslamsubaru]

السوبارو ال 2007 متازه وياريت تقول هتخلصها على كام بعد اذنك
اعتقد ياباشا انت بتعمل صيانات كدا قبل مواعيدها
يعنى زيت الماتور كل 10000
سير الكاتينة مكتوب انه كل 120 الف بس عشان ظروف القياده فى مصر كل 90 الف
الزيوت و البوجيهات كل 60 الف

لا صيانات العربية مش بدرى و لا حاجة : ده الجدول اللى بالتوكيل : و الزيت بغيره على 5000 لأنى بعمل ال 5000 كم فى اكثر من 6 شهور و عليه لازم اغير الزيت حتى لو هو بتاع ال 10000 كم ... و الكاتينة بتتعمل ما بين 75000 - 90000 و عندى عملتها على 75000 كم لأنها اتعملت عندى على 8 سنين .. و صيانة الزيوت الشاملة فى اى عربية على 40000 كم فى كل التوكيلات مش سوبارو بس . و البوجيهات اللى بتتغير على ال 60000 بتكون الايريديوم مش البوجيهات العادية : و برضه كل التوكيلات بتغير البوجيهات ما بين 25 الى 30 الف كيلو (البوجيهات العادية)..
اى صيانة بتكون محددة بالكيلو مترات او المدة الزمنية ايهما اقرب

[medo_egypt86]

يعنى لو عربية 2007 - فابريقة بالكامل - اول يد - 49000 كم
تعمل كام؟

[blazer]

لا صيانات العربية مش بدرى و لا حاجة : ده الجدول اللى بالتوكيل : و الزيت بغيره على 5000 لأنى بعمل ال 5000 كم فى اكثر من 6 شهور و عليه لازم اغير الزيت حتى لو هو بتاع ال 10000 كم ... و الكاتينة بتتعمل ما بين 75000 - 90000 و عندى عملتها على 75000 كم لأنها اتعملت عندى على 8 سنين .. و صيانة الزيوت الشاملة فى اى عربية على 40000 كم فى كل التوكيلات مش سوبارو بس . و البوجيهات اللى بتتغير على ال 60000 بتكون الايريديوم مش البوجيهات العادية : و برضه كل التوكيلات بتغير البوجيهات ما بين 25 الى 30 الف كيلو (البوجيهات العادية)..
اى صيانة بتكون محددة بالكيلو مترات او المدة الزمنية ايهما اقرب

انا كلامى على الكيلو متر فعلا ,, حضرتك عامل الكيلو متر فى فتره بعيده فعشان كدا بيغيروا ليك الصيانه على الفترات الاقرب

[eslamsubaru]

يعنى لو عربية 2007 - فابريقة بالكامل - اول يد - 49000 كم
تعمل كام؟

الكيلو متر بتاع العربية قليل : اتأكد ان صاحبها أول يد : علشان ميكونش ملعوب فالعداد .. و طبعا لازم تكشف على العربية بالتوكيل اولا :
السعر هيفرق حسب الفئة : بس السعر ده لأن عدد الكيلو مترات لقطة لو هى كده فعلا
1) مانيوال : تعمل من 65-70
2) اوتوماتيك اول فئة : 70-75
3) اوتوماتيك هاى لاين : 75-80

[medo_egypt86]

اول فئة وصاحبها ماسك في 84000

[blazer]

اول فئة وصاحبها ماسك في 84000

كتير جدا جدا عليها
الموديل دا آخره 75 الف لو فبريكا بلكامل حالة ممتازه
وعاوز اقولك ان لو راح يسعرها عند معرض او فى السوق هيسمع 55 الف و آخره 65 الف و دا طبعا بسبب ثقافة السوق الى ظالمه العربيه
بس انت بتشترى بسعر السوق فمتشتريهاش غاليه اوى كدا حتى لو انت غاويها

[h_e_e]

باشا لو حالتها نضيفه يبقي تستاهل الفلوس دي :) الفلوس دي اصلا متجبلكش لانسر متهانه. لو العربيه حلوه انت بتشتريي حاله! انا نعايا 2003 و مش هبيعها اقل من 65 مهما حصل و جالي فيها من تجار ارقام كبيره علي فكرا!
اهم حاجه حالت العربيه متنساش انك ممكن تدفع 65 في عريه و ف خلال سنه تدفع 20 عليها ولا حاجه!

[eslamsubaru]

انا مع ان صاحبها مسعرها غالية بس مش للدرجة دى .. اه العربية حالتها شكلها نظيفة و عدد الكيلو مترات هيخليك راكب عربية كويسة .. بس اكشف على العربية فالتوكيل و يتشاف ايه المطلوب لها و سعر الصيانات و يتخصم من ثمنها ما دام مصمم على على سعر عالى : و غالبا هتلاقى العربية عايزة الصيانات دى :
1) صيانة زيوت شاملة ( لو ما كانش عاملها على 40000 كم) و سعرها 1300 ج
2) ممكن صيانة بوجيهات : سعرها 600
3) ممكن علشان العربية بقالها فترة (8 سنين ) ممكن التوكيل يكون هيعملها صيانة للكاتينة : فممكن تدخلها فى 1200 كمان لو صيانة و تغيير سير و لو صيانة كاتينة كاملة هتعملها 2200
4) الكاوتشات : لو بتاعتها الأصلية يبقى اكيد هتتغير و طبعا هتركب بريدجستون ( 3000 ج) كمان

عموما انا لو مكان صاحبها هتصعب عليا انى ابيعها بسعر قليل بس اخرها يوم ما تستعظم لو الصيانات اللى فوق التوكيل قال انها تمام يبقى اخرها 77-80 بالعافية ..

لأن مع احترامى لصاحبها : 85 تجيبلك 2008 حالة كويسة و عاملة اقل من 80000 كم أو 2009 حالة جيدة يعنى عاملة اكثر من 80000كم ..

[blazer]

هو لو حسب صبانة الكاتينة و الكاوتش بس هيدخل فى 5500 جنيه ولو العربيه محتاجه طنابير و تيل ضيف عليهم 1500 كمان فلو هيعمل كل الحجات دى فى العربيه بحيث انك تركب ومتحطش فيها مسمار ,, يعنى توديها للوكيل و يعملوا كل الصيانات فهتلاقيه دافع من 6 - 8 الاف جنيه