اللحظة الحاسمة ...

[MmikemM]

اللحظة الحاسمة هي تلك اللحظة التي لن تستطيع عندها التردد وكذا التأكد او التراجع والتمهل ... تماما كما يحدث عندما تواجه عائق او مفاجأة اثناء القيادة .. اللحظة الحاسمة عند الارتباط بكل معانية انسانيا وكذلك اليا ... في مصر نعتبر السيارة كالعروسة وكثيرون وانا منهم اقدر هذا التشبية جدا ولا اعتبر نفسي علي شفا الجنون عندما اطالب سياراتي بالتحمل اكثر او اعطائي العون الذي اريده منها او حتي حينما اربت عليها . بس مين بقي بنت الحلال اللي تستاهل مع العلم ان الارتباط عموما مكلف بس مين اللي تستاهل .....في بنت حلوة...حلوة اوي وزي القمر اسمها النترا بجد زي القمر وتخليك فاخور وانت معاها تحس بأنك مدلل اوي ومش ناقصك حاجة ودي انا عاشقها بس الجمال والدلال مش كل حاجة المهم كلام اجددانا اللي دايما بيكون صح .. خد اللي تستحملك وتكون انت قابلها وخليها هي تحبك وتريحك ولما تريحك وتطلع اصيلة معاك انت هتدوب فيها ، ههههههههههههههههه ومن هنا لاقيت البنت الجدعة اللي بجد راجل معاك راجل في الطريق يعني متعرفش تتدلع منك او تترقص وقت ما تحب وكمان راجل في كلمتها انها ملتزمه بالثبات وعمرها ما تتغير مهما حصل وحتي لو انت اتجننت بتفضل حضناك وتحافظ عليك بجد التحمل ده جميل وهي فعلا بميت راجل بس عارف بقي لما ببقي معاها وفي قلبها فعلا بتدلعني قد ايه ناعمة معايا وقد ايه واثقة من نفسها المهم بقيت بحب السوبارو اكتر من اي عربية تانية ( واحدة تانية ) بس بقي عاوز اتأكد من بعض الاشعات اللي سمعتها في حد قال ان زيت موبيل وان يتغير كل 6000 كم بس ده حقيقي ؟؟؟ مع العلم ان في ابو غالي قالولي لاء وقالولي في الصيانة هيقوللك تعال بعد 10000 غير زيت ، حاجة كمان صحيح مينفعش اركب سماعات عالية عشان انا بحب جدا الموسيقي ؟ والسبب عشان التكييف الاوتو الموزع ورا !!!! وكمان ليا تعليق علي الموتور هو ليه طالع منه ما يشبه مواسير الميه كدا ؟؟ بصراحة ده مخوفني اوي ... ومش هخبي عليكم انا طولي 181 سم لما جيت اركب الامبريزا البنطلون وانا بقعد بووووووم وكان موقفي محرج جدا بس عموما عاوز اعرف ايه رايكم انتم البنت النترا ولا الاصيلة سوبارو ... اتوجة بالشكر وبعميق الشكر لادارة هذا المنتدي الراقي والجاد وكذلك لكم ومشاركتم لي واسف للاطالة .

[PRO-DRIVE]

انت تقصد الهوزات زي اللي في الصوره دي ؟؟
عادي والله انا مفتحتش البونيت غير مرات تعد علي الاصابع

و هي علي فكره لازم يكوانوا كدا عشان السلندرات مش جنب بعض و عادي جدا انا مش شايف فيها عيب في العربيه :o

بالنسبه للصيانه هي المفروض كل 10000 بس يعني الصح بنغير كل 7 او 8 بالكتير اوي

بعدين تقارنها بألنترا ؟؟ عيب عليك :D صحيح هيونداي حلوه و كل حاجه بس لاهي دفع رباعي ولا هي في نص ثبات سوبارو و شكل سوبارو رياضي اكتر

عموما شوف عاوز تسأل في ايه و احنا حاضرين

[Heshaam]

عزيزي أ. MmikemM

حقيقي عايز أهنيك على أسلوبك البليغ ده. أسلوب شيق في إطار درامي جذاب. حاول تمتعنا بيه في مساهماتك اللي جاية كده إن شاء الله.

البنتين محترمين وعلى قد ما هتديهم من إهتمامك هيدوك من أصالتهم وحبهم ليك. بس لو سألتني هأختار مين - وأنا مش صاحب خبرة عريضة في السيارات - هأقولك السوبارو لأني بأشوف فيها حاجة مختلفة ورياضية وأنيقة (إن شاء الله بقية إخواننا هنا في المنتدى يدلوا بدلوهم من حيث أسئلتك الفنية) وأعتقد في تغطيات وافية في المنتدى بتاع السوبارو عليها فممكن ترجعلها.

المشكلة الأساسية من وجهة نظري هي موضوع الطول لأنها مشكلة بالنسبة لي برضه - عندنا كيا اسبكترا وأعتقد إنها نفس ارتفاع السوبارو من الداخل تقريبا - فده بيخليني أدور على بنت حلال تديني وضعي برضه وأنا بأتعامل معاها (دماغي ما تخبطش في السقف، او أحس إني مقرفس لو حد ركب ورايا واضطريت أقدم الكرسي)

[PRO-DRIVE]

انا داخل في 175 او 180 بين الرقمين دول و مفيش اي حاجه من دي العربيه طولها مناسب اوي

[Ahmed Hassan]

أولا يا استاذ MmikemM احب اهنيك على اسلوبك الجميل اللي كتبت بيه الموضوع. انا طولي 181 و وزني 110 و مفيش اي مشكله بالنسبه للجلوس في العربيه. بس للأمانه انا من النوع اللي بينزل الكرسي لتحت على الآخر لأني بحب الاحساس الرياضي ده. انا مركب فرش جلد وده بيعلى الكرسي شويه.. بس مفيش اي مشكله و دماغي مش بتخبط في السقف و لا حاجه.

بالنسبه للزيت همه فعلا في الصيانه قالولي يتغير كل 5000 او 6000 كم مش 10000 كم لأن -حسب كلام التوكيل- الموتور عومه عالي على RPM قليل, بالاضافه اي ان فترات ال IDLING للموتور عندنا كبيره (الوقوف بالعربيه و الموتر شغال) و ده بيقصر عمر الزيت. عموما انا مضطر اسمع الكلام لغايه لما اتأكد من مصدر تاني.

المواسير اللي انته خايف منها دي مواسير التكييف و مفيش اي مشكله منها و هيه موجوده في كل العريات مش السوبارو بس.

ربنا يوفقك في الاختيار.

[MmikemM]

الي كل الاصدقاء اشكر اهتمامكم

يا جماعة بجد انا في قمة سعادتي من ردودكم واهتمامكم ، اما لكل من تقدم بالشكر لاسلوبي فانا اعجز عن وصف رقي ورصانة تذوقكم لكلماتي وهو ما يعكس سمو الفكر والثقافة ، بالنسبة للعزيز الاخ/ تيربو اشكرك جدا ....بس عارف انا صعقت لما فتحت ولاقيتك مضيف صورة الوحش الكامن تحت الغطاء الامامي لسوبارو، بجد عاوز اتوجه ليك بوافر الشكر والامتنان لاهتمامك يا فندم ، بس اسمح لي اقولك راي صغير ان النترا بجد حلوة وزي القمر بس مش عارف انا من الرجالة اللي بتقلق من البنات اللي فيهم رقة اوي بس هي بجد اخاذه . بس غالبا انا مشوفتش اجابتك علي موضوع القص لاضافة سماعات بيضاوي من الخلف ووضع بازوكا وجي ام هل ده ممكن في وجود التكييف التيربو ورا !!! بجد من فضلك عاوز اجابة مباشرة ومدي تأثيرها علي العربية لو انا عملت كدا لكن وفي كل الاحوال اشكرك مرة تانية واتمني لك ولاسرتك رمضان كريم جدا لك وكل من حولك وايام مليئة بالخير الوافر .

الاخ العزيز هشام يا فندم اشكرك لحسن تقيمك وتشجعيك رزقك الله بمن يدفعك ويشجعك لما فية الخير الوافر لك دائما .وبالنسبة لموضوع الطول ممكن يكون تعديل وضعية الدريكسيون فية التوافق الافضل للتعامل مع السيارة في الدخول والخروج . ولا ايه !! :)

أحمد حسن اسمح لي ان ارفع التكليف فقد وجدت حروفي قد ازالته فارجو منك السماح واعتباري الاخ لك ، لذلك اشكر جدا كلماتك ولن اطيل مديح كلماتك المفروغ منه بقدر ما سأشكر لك وضوحك في عدم التأكد الكامل من المعلومة.

عموما انا مضطر اسمع الكلام لغايه لما اتأكد من مصدر تاني.

شكرا للجميع واتمني لكم جميعا الخير

[PRO-DRIVE]

شوف هو مفيش حاجه في العربيات مستحيله بس اهم حاجه تعملها صح و انا شخصيا خبرتي في السماعات و الكهربا
شبه معدومه :mrgreen: فأنت حط موضوع في سوق التوفيقيه لالا اقصد قسم الاكسسوارات :mrgreen:
و هناك الناس حتفيدك
و برضه بقولك مفيش حاجه مستحيله في العربيات

[Ahmed Anwer]

السوبارو بنت جميلة برده
بس حضرتك نسيت تقول إنها بنت ناس أوي و كمان دكتوره في الجامعة
يعني يوم ماهتزعل منك هتطلع عينك فلوس
و لو جيت تطلقها هتدفعك اللي وراك و اللي قدامك
رأيي تخليك في بنت الفلاحين الغلبانة الإلنترا

[PRO-DRIVE]

استاذ شاركي كان حاط اسعار لليارس روح بص عليها و بص علي اسعار امبريزا عمرك ما حتلاقي كبير ( مع اختلاف الفئات )

[khalid_adel]

بالنسبه للسماعات في البورده ورا
انت ممكن تركب سماعات بيضاوي بس مقاس صغير شفتها كانت اكسبلود في امبريزا في التوكيل وده مغيرش حاجه
بالنسبه بقى للي انا حاعمله ان شاء الله قريب واللي انت عايزه انك تركب سماعات بيضاوي ورا في البورده
حتفك البورده اللي في العربيه وحزام الامن اللي في الكنبه الوسط فقط وتركب بورده تفصيل وساعتها تحط فيها اللي انت عايزه المهندس اللي في التوكيل قالي اعمل كده
ده غير ان في 4 سماعات في الابواب ( ورا وقدام ) و2 تويتر قدام
وكمان بازوكا في الشنطه يبقى كده تمام اوي
بص بالنسبه للعربيه انت لو ناوي انك مش حتبيعها خالص يبقى هاتلك الامبريزا وانت مطمن اما لو بتغير كتير يبقى بلاش عشان حتخسر كتير

[Ahmed Hassan]

بالنسبه للسماعات في البورده ورا
انت ممكن تركب سماعات بيضاوي بس مقاس صغير شفتها كانت اكسبلود في امبريزا في التوكيل وده مغيرش حاجه
بالنسبه بقى للي انا حاعمله ان شاء الله قريب واللي انت عايزه انك تركب سماعات بيضاوي ورا في البورده
حتفك البورده اللي في العربيه وحزام الامن اللي في الكنبه الوسط فقط وتركب بورده تفصيل وساعتها تحط فيها اللي انت عايزه المهندس اللي في التوكيل قالي اعمل كده
ده غير ان في 4 سماعات في الابواب ( ورا وقدام ) و2 تويتر قدام
وكمان بازوكا في الشنطه يبقى كده تمام اوي
بص بالنسبه للعربيه انت لو ناوي انك مش حتبيعها خالص يبقى هاتلك الامبريزا وانت مطمن اما لو بتغير كتير يبقى بلاش عشان حتخسر كتير

لو ناوي تفك البورده اللي ورا بص فيها من تحت من جوه الشنطه و اتاكد ان مفيش أي توصيلات من الاريال داخله عليها

الحاجه التانيه بقه... علشان السماعات دي تتركب... مش المفروض ال سي دي يتفك من التابلوه؟؟ هيتعمل فين الكلام ده؟

[khalid_adel]

ايوه طبعا مظبوط لازم يتفك السي دي بس انا كده كده مغير الهيد يونيت ومركب كينوود دي في دي
وان شاء الله حاعملها عند ادريان او ممكن الراجل اللي عند شارع احمد عرابي (بتاع كينود وكلاريون ) لسه حاشوف حد فيهم

[PRO-DRIVE]

خالد الحققققققني و قلي الكينوود دا مواصفاته ايه اصلي محتار اوي و عاوز اجيب واحد قبل العيد

[khalid_adel]

ده ياباشا اللينك بتاعه وهو ده اللي عندي

http://www.kenwoodhk.com.hk/new/eng/products/car_detail.php?model_no=DDX8037&category=Audio-Visual%20Entertainment%20System&language=ENG

وعلى فكره هو مناسب جدا حجم التابلوه ( بالملي كانه نازل بيها )
وهو تمنه 6800 جنيه تقريبا
بس في حاجه هو بقاله معايا سنه ونص ومش عارف ليه معدش بيقرا سي ديهات منسوخه بيقولي read error وبيقرا اوريجينال بس روحت اشوفه قالي حانفكه ونبعته للمصنع ويشوفوه وللاسف الضمان خلص فكسلت بقى
ودي صوره ليه في العربيه

[Ahmed Hassan]

ما شاء الله شكله تحفه و لايق عليها جدا
اعتقد ان ده error ممكن يتعالج.. كان حصلي حاجه كده في ال سي دي في العربيه القديمه و اتظبط