بحث ومناقشة تركيب جنوط للماروتى

[Abdm]

يا ريت يا شباب الماروتى تذكروا تفاصيل كتير عملية وتكون بقدر الامكان اتنفذت عن الجنوط لان موضوع الجنوط أنا شايفة مهم جدا من الناحية العملية .

أولا : لثبات السيارة أكتر

ثانيا : الآضرار الممكنة الحدوث للعفشة هل سوف يكون هناك أضرار أم لا

ثالثا : مقاس الكاوتش الجديد المناسب مع الجنط والمقاس القديم لعدم الآخلال بقراءة عداد السرعة واستهلاك البنزين والعفشة وخلافة
وقد ذكر المقاس قبل ذلك هنا فى القسم وهو 13/165/55
ونوع الجنوط أية وبكام

رجاء ذكر جميع التفاصيل عن كل شىء خاص بالجنوط من جميع الجوانب والزوايا ويفضل من الناحية العملية يعنى يكون متنفذ مسبقا . وجزاكم الله خيرا

[Abdm]

يا ريت المشاركة يا شباب علشان الموضوع دة مهم جدا ومتعلق ببعض الايجابيات والسلبيات فعيزين نعرف المميزات أكتر ولا العيوب خاصة أن الجنوط والكاوتش من ضمن مميزاتهم ثبات السيارة وتوازنها على السرعات العالية مع عمل الفرامل بكافاءة فى المواقف الحرجة واللى بسبب ضعف الفرامل على السرعات ممكن ما تلحقش تفرمل لان الكاوتش صغير ومعامل الآحتكاك مع الارض ضعيف على السرعة العالية وأنا بقول سرعة عالية يعنى مثلا 100 أو 110 أو 120 مش أكتر من كدة . وشكرا

[OZYDREAMS]

انا شوفت نوعين للجنوط للماروتى الجنوط الاول تقريبا كان عامل 600 جنيه بس ده عادى والتانى نيكل وكان عامل 1250 بس الصراحة انا سألت عند الراجل على اسعار حاجات عارف أتمنها لقيت أسعاره نار بس الميزة انك هتركب الجنوط على طول مش هتغير كاوتش ولا أى حاجه

[m7nsh]

انا عن نفسى نويت قريب اجنط ان شاء الله 13
افضل مقاس للكاوتش 165/55/13
او 175 /50/13
ولو انى مش عارف التانى دى موجود اصلا ولا لأ ,,بس الأولانى كان فى عضو معانا مركبه
اى جديد هيحصل هوافيكم بيه ان شاء الله

[Abdm]

انا عن نفسى نويت قريب اجنط ان شاء الله 13
افضل مقاس للكاوتش 165/55/13
او 175 /50/13
ولو انى مش عارف التانى دى موجود اصلا ولا لأ ,,بس الأولانى كان فى عضو معانا مركبه
اى جديد هيحصل هوافيكم بيه ان شاء الله

الله ينور عليك يا باشا فعلا المقاسين دول هما أحسن وأفضل مقاسين مناسبين للماروتى
وعلى الرغم من أن هذا التغيير لة فوائد من ناحية ثبات السيارة و وقوة الفرامل وفعاليتها أكثر

لكن بالنسبة للآضرار الممكنة الحدوث للعفشة هل سوف يكون هناك أضرار أم لا

[kimoboy]

I think better stay with 12 wheels

[Abdm]

i think better stay with 12 wheels

طيب هل ممكن تغيير مقاس الكاوتش فقط للآعرض على نفس الجنت 12 ولا هتبقى هيا هيا بردة فيها مشاكل .على ما أعتقد لو كدة كدة هيكون فية مشاكل مع تعريض الكاوتش على الجنط الاصلى يبقى الآفضل نعرض على جنوط 13 ولا أنتوا أية رئيكم وجزاكم الله خيرا

[Abdm]

يا أجدع شباب الموضوع دة مهم قوى للعربية من جميع الزوايا ممكن يكون لية عيوب لكن على ما أعتقد المميزات أكتر بكتيير .
الكلام اللى أنا بقولة صح ولا غلط يا ريت ما تحرموناش من خبراتكم علشان الكل يستفيد ومنعملش أى أخطاء فى العربية تسبب مشاكل كبيرة
وشكر.

[pharonicking]

انا اعتقد ملوش لازمة تركب جنوط انت مش حتجرى بيها جامد عشان الثبات وكدة ممكن تركب طاسات عشان الشكل بس"

[Hosam_Optrawy]

طب ياجماعه ممكن حد يقوللى الماروتى بتنزل بمقاس جنوط وكاوتش كام بالظبط ؟؟؟

[Abdm]

أصل أنا بحب أمشى دائما مش أقل من 100 وممكن أستمر عليها يعنى كبيرى قوى 110 أو 120 وبعدين أرجع تانى لكن السرعة الثابتة بتكون متوسط 100و 110
فأنا فكرت فى فكرة تانى ألا وهى يا عم الحاج بدل تغيير الجنوط ممكن نغير الكاوتش بس وبحثت ولقيت كام مقاس يا ريت تشاركونا برئيكم أيهما الآفضل وما رئيكم فى الفكرة عامة .
المقاسات هى 12/60/175
165/65/12
والمقاس الآخير دة 12/70/155 يختلف حاجة بسيطة عن السابقين بس أنا شايفة الآفضل ما رئيكم دام فضلكم .
الميزة فى المقاسات دية أنها هتركب على نفس الجنط الآصلى وبكدة نكون عرضنا الكاوتش بدون تغيير الجنوط وبالمرة توفير يا ريت ترسونا على بر فى الموضوع دة ونعرف راسنا من رجلنا من الناحية العملية والميكانيكية والعفشجية والشكلية وكل حاجة وجزاكم الله خيرا.

[Abdm]

طب ياجماعه ممكن حد يقوللى الماروتى بتنزل بمقاس جنوط وكاوتش كام بالظبط ؟؟؟

أنا أسف أنا كنت مركز شوية ما أخذتش بالى من مداخلتك يا باشا المقاس الآصلى الفبريكا بتاع العربية هو 12/70/145 وربنا يوفق الجميع ونوصل لاحسن الحلول تغيير جنوط 13 ولا ذى ما أقترحت قبل كدة تغيير كاوتش فقط وأنا ذكرت التفاصيل مسبقا وشكرا لمشاركتك وعذرا للتاخير .

[Hosam_Optrawy]

أنا أسف أنا كنت مركز شوية ما أخذتش بالى من مداخلتك يا باشا المقاس الآصلى الفبريكا بتاع العربية هو 12/70/145 وربنا يوفق الجميع ونوصل لاحسن الحلول تغيير جنوط 13 ولا ذى ما أقترحت قبل كدة تغيير كاوتش فقط وأنا ذكرت التفاصيل مسبقا وشكرا لمشاركتك وعذرا للتاخير .

ولا يهمك مفيش حاجه

بالنسبه لسؤالك

طبعا انت هاتجيب كاوتش أعرض من اللى عندك عشان تبقى استفدت بالتغيير

لو هاتغير الكاوتش فقط على نفس الجنط

يبقى عندك مقاسين

الأول 155/65-12 ودا هايدى نفس الارتفاع وقراية العداد

والثانى 165/60-12 ودا هايفرق حاجه بسيطه اوى هايوطى العربيه 2.5 مللى يعنى حوالى ربع سم يعنى حاجه لاتذكر

وعداد السرعه هايبقى قارى 101 وانت ماشى على 100

دول أقرب مقاسين للأصلى والمقاس التانى طبعا أفضل لانه أعرض



فى حالة بقى انك هاتجيب جنوط 13 عندك برضه مقاسين

الأول 165/55-13 ودا برضه هايفرق حاجه بسيطه جدا هايعللى العربيه 1.9 مللى يعنى اقل من ربع سم

وعداد السرعه هايبقى قارى 99 وانت ماشى على 100

والثانى 175/50-13 ودا هايدى نفس الارتفاع وقراية العداد

__________________

اى مقاس من دول مناسب للعربيه ومش هايعمل مشاكل ان شاء الله

بس عندى ليك ملحوظتين

- المقاس 175/50-13 أعرضهم يعنى هايدى أفضل ثبات

لكن هو أكثر مقاس ضررا فيهم لان نسبة الكاوتش فيه قليله

- لو لقيت المقاسين 165/60-12 و 165/55-13

هات ال 12 ووفر تمن الجنوط لان الاتنين هايكون ادائهم واحد

وكمان ال 12 افضل لانه هايكون أقل ضررا لان فيه نسبة كاوتش اكتر من ال 13

وبالتوفيق

[Abdm]

شكرا يا باشا وجزاك الله خير . وأنا ان شاء الله هختار مقاس من 12 بدل الجنوط 13 علشان نريح العفشة وشكرا.

[sab3aawy]

اسمحوا لى اقول بعض الحاجات اللى هى معظمها اتقال قبل كدة لكن لمجرد تأكيد المعلومة:

1- ارتفاع عجلة السيارة الصلية هو 145(عرض الفردة بالمللى) مضروبة فى 70(الرقم الثانى فى المقاس ، نسبة العرض للارتفاع مئويا) مقسومة على 100 ثم مضروبة فى 2 (فوق وتحت) ثم نجمعها على 12 (قطر الجنط بالبوصة) مضروبة فى 25.4 (عدد المللى مترات فى البوصة ) فتكون النتيجة=145*70/100*2+12*25.4= 507 مللى متر
1-فى حالة التغيير لجنط 13 فأن هناك اختيار بين مقاسين:

أ- اما 145/65/13 وله ميزتين، اولهما انه سهل العثور عليه وثانيهما انه هيكون بعرض الكاوتش الأصلى بما يضمن ان معدل استهلاك علبة الديريكسيون واستهلاك الوقود سيظل كما هو بفضل عدم تغير الاحتكاك مع الأرض، وهنا يكون دعم الثبات ناشئا من خفة وزن الجنط الألومنيوم وكبر حجم الجنط على حساب الوسادة الهوائية فى الكاوتش، قطره الخارجى سيكون 518 مللى اى تقريبا بارتفاع 1 سم زيادة عن الارتفاع الأصلى وهى ليست مسألة جوهرية خاصة ان عداد السرعة اصلا يقرأ اعلى من الحقيقة وبالتالى فان قليلا من تقريب الحقيقة اللى قراءة العداد لن يضر

ب- او المقاس 165/55/13 وهذا المقاس سوف يعطى قدر عالى من الثبات بفضل عرض الفردة وانخفاض البروفيل الجانبى للفردة بالنسبة لعرضها مع خفة وزن الجنط الألومنيوم بالطبع، لكنه سيرفع استهلاك الوقود بأقل من 5% واستهلاك علبة الديريكسيون وثقل حركة طارة الديريكسيون فى اليد بحوالى 10% تقريبا وذلك بسبب زيادة مساحة الاحتكاك مع الأرض، ارتفاعه الكلى 511 ملى اى بزيادة 3 مم فقط عن الكاوتش الأصلى وهى نسبة لا تذكر...

لا انصح بتركيب كاوتش 175 نهائيا على السيارة حيث ان الزيادة المبالغ فيها فى العرض فد تسبب احتكاك الكواتش بفجوات السيارة اثناء الالتفاف والمطبات

لا انصح ايضا بتركيب اى فردة يزيد ارتفاعها الكلى عن 525 مللى لأنها غالبا ستحتك بصاج السيارة فى كل مطب وتتلفه الى جانب تلفها

بالنسبة للتعريض دون تغيير الجنط فسيسرى عليه ما يسرى على التعريض مع تركيب الجنط، تحسن فى الثبات مع زيادة فى الاحتكاك ترفع الاستهلاك، وبرضه ممنوع اكثر من 165 وممنوع اى فردة ارتفاعها اكثر من 525 مم