نداء الى كل مالكى الالتو

[RAMYALI_1982]

ارجو الافادة يااخوانى اية رايكو فى العرابية دى هل اعتماديتها عالية هل تتحمل المشاوير الطويلة والسفر باستمرار وهل هى احسن ولا الاتوس لان هى اقري سيارة لها فى السعر لان ال اى 10 والبيكانتو والكلام دة غالى عليا ارجوكم كل اللى يعرف اى معلومة اعنها مايخلش عليا دى تحويشة العمر ولو اتخميت فى عربية هيكون مستحيل بالنسبالى تعويض الخسارة
انا اسف على الاطالة سوالى عن ال 1100 سى سى طبعا حتى لانظلم ال 800 فى المقارنة مع عربيات اكبر منها وشكرااا

[Abdm]

على فكرة أنا بالنسبة ليا الآلتو أحسن من i10 وأقل شعرة بسيطة جدا من البكانتو من ناحية الوسع البكانتو أوسع سنة من الآلتو لكن أنا بردة بشجع الآلتو لآنها يابانى تقفيل هندى أحسن من الكورى وأعلى من البيكانتو شوية وأكيد أعلى من الآتوس وال i10 . البيكانتو تمتاز فقط فى التوكيل المحترم الآعلى من السوزوكى والهيونداى أيضا مع الآنتشار أكثر من السوزوكى
السوزوكى الآلتو 1100 تصل وتقارن ب البيكانتو وال I10 لكن بالتأكيد هى أعلى من الآتوس
توكيل الآثنين تقريبا نفس المستوى
شكل وحجم ووسع الآلتو أحسن من الآتوس .وأنت فى الآخر طبعا ليك مطلق الآختيار . والله الموفق

[RAMYALI_1982]

واللة ياباشا انا شاكر ليك جدا بس انت الةحيد اللى عبرتنى ها انت الوحيد اللى معاك الالتو عموما انا شاكر جدا ذوقك واهتمامك بجد انت انسان محترم

[Abdm]

يا باشا على أية أحنا كلنا بنساعد بعض وأن شاء الله باقى الآخوة اللى عندهم معلومات يفيدونا بأذن الله . والله الموفق

[ahmedbakr50]

عن نفسى أنا ركبت الإتنين الأتوس أوسع وشنطتها أكبر وكمالياتها أكتر
الأتوس باور - تكييف - راديو سى دى - ساعة ديجيتال - عداد أر بى إم
الأتو باور - تكييف - راديو شرائط
والإثنين تجميع هندى

[romeo_6887]

خليك في الاتوس افضل
مش معني كده ان الالتو وحشه
بس بحس ان الاتوس افضل

[zalpany2000]

السلام عليكم ورحمة الله
اخي الكريم اسف علي التأخير
حضرتك بتتلكم عن الالتو ال 1100
مش ال800 تمام كده

تعالي كده بالرحة واحدة وحدة نحط معايير للمقارنة

1- السعر
سعر الالتو الفول اوبشنز 1100 تقريبا 55000 . صح ، في حين البيكانتو تقريبا ب 62000 ..يعني فرق 7000 لصالح الالتو .. ودي ميزة
وكذلك سعر الI 10 59000 تقريبا
يعني فرق 4000 لصالح الالتو برضو

يعني الاتو فرق سعر افضل
اما السبارك
فسعرها 54000 ..تقريبا زي الالتو مافيش فرق كبير في السعر


2- الحجم
الالتو ... والسبارك تقريبا نفس الحجم
البيكانتوا والI10 برضو نفس الحجم
و الفرق بين الاربعة مش كبير قوي
بس اعتقد ان اوسعهم ال I10

3- التقفيل
افضلهم تقفيل البيكانتوا ... بحيادية شديدة .. ثم ال I10 ثم الألتو والاسبارك

خامات الالتو والاسبارك اقتصادية جدا .. وبرضو ال I10 ... اما البيكانتوا الوحيدة اللي ماحستش فيها بكده

6- الاداء
هاتكلم هنا عن الالتو ال800 مقارنة مع البيكانتوا ومع السبارك
الالتو ال 800 انا كنت باشد بيها علي بيكانتوا وعلي سبارك و اكتر من مرة افرق عنهم ... بس ال I10 احسن شوية في الفرق ده .. وبعدين البكانتوا اللي كانت سايقاها واحدة زميلتي -اعتقد هي مش عارفة تشد بالعربية - بس الالتو احسن من السبارك في التجميع والسحب نسبيا -و بالمناسبة دي اخر حاجه تفكر فيها في عربية صغيرة-
التكييف
تكييف الالتو ال 800 علي قده يعني مش جامد جدا .. جربت الI10 احسن شوية بس برضو كانت زيرو
اما السبارك و البيكانتوا مش عارف بصراحة

7-الامان
تجربة شخصية مع الالتو و مع الI10
مع الالتو عملت بيها حادثة .. نسبيا ماكانتش جامده جدا بس التلفيات كانت كتييييييييييييييير ودي الرابط بتاعها

http://www.nilemotors.net/Nile/91581-a.html

وصلت الخبطة للزجاج اللي اتشرخ خالص بس الحمد لله
جت سليمة

بالنسبة لل I10 كانت مع بنت خالتي و عملت بيها حادثة جامدة جدا علي الصحراوي
العربية اتخرشمت اتخرشمت يعني و اتكهنت ... بس تبص علي الكابينة .. زي ما هي .. اعتقد لو دي كانت عربيتي كان زماني هامبرجر .. ولا بلاش هامبرجر علشان مش ناقصة لحم بورك و خنازير
تقدر تقول بيف برجر :)))

البيكانتوا اعتقد برضو ان صاجها محمل شوية

8- قطع الغيار

الاتو سيارة قطع غيارها غييييييييييييييير رخيصة .. والاصلي غير متوافر دائما .... مثلا تدفع 180 جنيه في تيل فرامل امامي :)
تدفع مثلا 200 جنيه في الايريال ... تدفع 400 جنيه في فانوس .. كده

الI10 اعتقد نفس الدنيا هي و البيكانتوا والسبارك ... الفروق مش كبيرة لكن .... وركز في لكن .. توااااااااافر قطعة الغيار هنا هو المقياس
و المقياس هاينسحب علي توكيل العربية
ودي نقطتنا التالية

9- التوكيل

اولا مودرن موتورز وكيل الالتو
وكيل تعبان فعلا .... عن تعامل وصيانات دورية و عن تعامل في اصلاح الحادثة .. اولا مصنعيات مبالغ فيها جدا جدا .. ثانيا العربية ممكن توديها بالعيب وتطلع بنفس العيب
ثالثا ... عدم توافر قطع الغيار أحيانا .. مرة رحت اغير التيل و الطنابير مالقيتش تيل وطنابير في المركز الرئيسي في ابو رواش :))) متخيل حضرتك ؟؟؟ انا رايح بالعربية من غير فرامل و بقول ربنا يستر ولما وصلت علشان يصلحوا العيب... قالولي ماعندناش تيل ولا طنابير :)
ماكينة الزجاج الكهرباء عطلانة من 4 شهور و ماجابوهاش :)
عندي سنسور الاكسجين اللي فوق الموتور عطلان من ساعة الحادثة ولسه ماجاش :)
عااادي
رفايع ... صح ؟؟؟؟

توكيل هايونداي ... برضو سئ مش كويس علي حسب ما اسمع ..
افضلهم اطلاقا توكيل كيا .. بجد من الاكثر احتراما

استهلاك الوقود
اعتقد كلهم في نفس الرينج و كلها سيارات موفرة

[a7la1=#b80202]اختصارا و تلخيصا وراي شخصي
لو حضرتك بتتلكم عن الالتو ال 800 .. الكاملة .. دي افضل سيارة في فئتها فعلا وميزة التكييف والسعر هايلة
انما لو بتتكلم عن ال 1100
فالمنافسين فعلا اقويا وانا باتكلم عن ال I10 و عن البيكانتوا
و انا ارشح لحضرتك كلاهما ... و الاريح بالنسبة لحضرتك
بالنسبالي .. انا ادي صوتي للبيكانتوا[/a7la1]

تحياتي
و آسف للإطالة

[zalpany2000]

سؤال رفيع بقي يا شباب
هو فيه أتوس زيرو لسسسسسسسسسه ؟؟؟؟؟!!!!
ولا انتوا تقصدوا ال i10
؟

[Abdm]

نورت يا أستاذ zalpany2000 بقالك كتيير غايب عن قسم السوزوكى وموضوعات الآلتو خاصة فينك يا باشا هو قسم السوزوكى مش عجبك ولا أية . يا ريت ما تحرمناش من حضورك معانا هنا لآن الناس الحلوة اللى ذى حضرتك دية منقدرش نستغنى عنهم . ويا ريت تتابع معانا على طول مواضيع الماروتى والآلتو . والسلام عليكم ورحمة الله وبركاتة

[zalpany2000]

استاذ عبد الحي
الف شكر ليك
معاك حق فعلا ... انا غايب بقالي فترة والله مشغول جامد جدا جدا جدا
دعواتك بس
وكلامك والله وسام علي صدري يافندم
ربنا يعزك
و ان شاء الله تلاقيني علي طول

[Abdm]

د.حسام ربنا يستر طريقك ويصلح حالك ويكرمك ويسرلك جميع أمورك ويعينك على عمل الخير ويجزيك خير على مساعدة الناس ونحن وجميع الآخوة أمين يا رب العالمين

[RAMYALI_1982]

zalpany2000العضو الكريم

انا شاكر جدا على المقارنة التفصيلية بس حضرتك مكتبتش عن الاتوس حاجة

انا كنت عايز اعرف معلومات عن الاتوس كمان وشاكر ليك مرة كمان

[zalpany2000]

بص يا باشا انا اولا بالنسبالي معلومة جديدة ان فيه أتوس جديدة ؟؟ حتي تلاقيني سألت فيه منها زيرو ولا لأ

انا من سنتين كنت باشوف العربيات اللي في نفس الفئة .. هو بصراحة الأتوس البريميم ... أوسع العربيات اللي من الفئة دي ... أوسع من الالتو و السبارك ... بس معلومات قنيه عنها للأسف ما أعرفش كتير عنها :) وأيامها اللي هو من سنتين كانت العربية مش موجوده أساسا
فعلشان كده بقول هي فيه منها جديدة ولا لأ ؟؟ و لو فيه جديد .. موديل كام ؟!!!

[RAMYALI_1982]

الاتوس برايم PRIME ولسة موجودة عادى موديل 2010 بس هو الوكيل مش مهتم بالدعاية عليها اوى هو مركز مع الفرنا وانت طالع بس هى موجودة بشكل طبيعى وتمنها بين 52000 و 53500على حسب المكان

[Abdm]

لو عايز أى تفاصيل أكتر ممكن تلقى نظرة على قسم الهيونداى هتلاقى كلام كتيير قوى عن الآتوس . والله الموفق