عايز مراية استيراد للماروتي.. ممكن حد يدلني

[dr.hazem]

السلام عليكم ورحمة لله

اخواني محتاج حد يدلني
من كام يوم واحد الحمد لله لطشلي المرايه اليمين وفشفشها

رحت وسط البلد فشارع احمد حلمي لقيت عندهم المهم اخدت اللي المفروض انضف واحده عندهم
وللاسف مكنتش بتتحرك غير لبرة وجوه وانا طويل فمعرفتش اشوف فيها حاجه
غير ان ابعادها كانت سيئه للغايه
سألت عليها في مودرن موتورز قالولي ب 88 جنيه بس خلصانه وهتيجي كمان اسبوعين


ياترى ممكن حد يساعدني
ناس قالتلي هلاقيها استيراد في الحرفيين

لو بجد حد يقدر يفيدني ياريت قريب لاني مش عارف امشي من غير مرايات

تحياتي

[dolly13]

انا حصللى الموقف ده من 3 سنين فى الماروتى برده ودخت على المراية اليمين دى
رحت التوفيقية وجبتها للاسف مش اصلية يدوب تشوف فيها كاوتش العربية
فعلا فيه مشكلة فى وجود المرايا الاصلية للماروتى لان حتى التوكيل ايامها رفض يجيبهالى
حاول تشوف موضوع الحرفيين ده وبالتوفيق

[heshom]

فعلا فرق كبير بين المراية الأصلية و التقليد أنا المراية اليمين الأصلية كسرهالى واحد ابن حلال كان ماشى سرحان بدراجة
المهم مالقيتش الأصلية و اللى أشتريتهاتعتبر مراة مستوية و ليست مقعرة
على فكرة لو الزجاج الأصلى سليم و الفريم هو اللى انكسر ممكن تشترى التقليد ( هى ب 20 جنيه تقريبا) و تركب عليها الزجاج الاصلى زى ما أنا عملت

[heshom]

فعلا فرق كبير بين المراية الأصلية و التقليد أنا المراية اليمين الأصلية كسرهالى واحد ابن حلال كان ماشى سرحان بدراجة
المهم مالقيتش الأصلية و اللى أشتريتهاتعتبر مراة مستوية و ليست محدبة
على فكرة لو الزجاج الأصلى سليم و الفريم هو اللى انكسر ممكن تشترى التقليد ( هى ب 20 جنيه تقريبا) و تركب عليها الزجاج الاصلى زى ما أنا عملت

[dolly13]

??????????????

[dr.hazem]

انا اللي اتكسر عندي الزجاج الاصلي للاسف
الفريم سليم

وبجد مش عارف اعمل ايه انا قرفت من المرايه اللي مش اصليه وفكيتها وقلت دي مش هركبها تاني

انا سمعت عن واحد قدام مول الحرية بيقص مرايات حلو جدا

هشوف واقولكم ايه الاخبار

بس لو حد بجد يعرف مكان بيبيعها استيراد يقولنا

تحياتي

[dr.hazem]

انا الفكره اللي جاتلي
اني اخد المرايه التقليد اركبها عالقاعده الاصليه بحيث تبقى تطلع وتنزل فوق وتحت وعشان احل مشكلة الابعاد قلت ألزق عليها مرايه محدبه اللي بتتباع ب 2 جنيه وخلص الموضوع

وانا فعلا لزقت عالمرايه التقليدد واحده بس فعلا مجال الرئيه بالليل مبيبقاش حلو

ربنا يسهلها وتتحل المشكله

شكرا لتعاونكم

[aymanay32]

انا قولت لك روح اشترى المراية اللى عليها الكتابة بتاعة الرؤية اللى بعيد قد تكون اقرب

[dr.hazem]

انا قولت لك روح اشترى المراية اللى عليها الكتابة بتاعة الرؤية اللى بعيد قد تكون اقرب

مهو انا فعلا اشتريت دي وهيا دي اللي مكنتش بتتحرك لفوق
غير ان الابعاد فيها زباله فعلا

فاهمني؟
يعني فعلا مكتوب عليها ان الصوره اقرب مما تبدو بس ولا اقرب ولا حاجه دي مرايه عاديه جدا

[abogogo]

المشكلة دي عانيت منها وحلتها بأني بهوي المسمار الي من تحت عشان المرايه تطلع وتنزل بس فعلا برضه مش زي الاصلي حاولت أعدل حاجة اسبور العربيه عشان صغيرة ألاقي العربيه عمله زي العيل ابو ودان مطرطقه

[dr.hazem]

النهارده نزلت ادور على مراية استيراد في شارع احمد حلمي

رحت لرامي
لقيتها عنده بس بتاعة الموديلات القديمه
شكلها هيبقى غير التانيه اللي عندي
لكن بتطلع لفوق وتحت وكله واصليه ب 40 جنيه

بس معجبنيش اني امشي بالعربية كل جنب شكل
لفيت على كم محل بلا جدوى

رحت لسوزوكي سنتر وهوا بنفسه قالي انسى مفيش زي الاصليه
وانضف وحده عنده ب 35 وبرضو مبتتحركش لفوق وتحت

وهوا الحقيقه قالي هاتها من التوكيل هتلاقيها اخت اللي كانت عندك بالظبط
وبالتالي ان شاء الله هنزل على الدقي وربنا يسهلها

وهروح برضو قبلها في محاوله لاننا نقص مرايه على قدها وربنا يسهل ان شاء الله


تحياتي

[m7nsh]

الموضوع ده حصلى حوالى 4 5 مرات لحد دلوقتى .. و كل مره فى المرايه اليمين واحد ابن حلاااااااال يكسرهالى( الحمد لله انها بتيجى فى اليمين بس مش طالبه الشمال كمان !! )
الفريم سليم و المرايه اللى اتكسرت .. بعد اللف و التنقيب فعلا وصلت لنتيجه حضرتك .. انها مش موجوده تقريبا
انا روحت لبتاع مرايات و قصلى مرايه عاديه و لزقها فى الفريم ب 5 جنيه .. و الحوار ده بقولكو اتكرر كتير .. فقلت الحمد لله والله لو الواحد كان جاب الأصليه كان زعل عليها ..
بس الحمد لله الشمال لسه بخيرها و ربنا يستر

[dr.hazem]

شباااااااااااااااااااااب

والحمد لله واتحلت ياشباب

سألت الناس ودلوني على واحد جامد بيقص المرايات اخت الاصليه بالظبط
انا معرفش ليه انا مرحتلوش من الاول
المهم رحت النهارده

والراجل قالي عايزها بالابعاد زي الاصليه ولا مراية وخلاص
المرايه بيقصها ب 5 جنيه اما اللي زي الاصليه ف ب 50 جنيه
انا والله قلتله انها في التوكيل ب 88 وانه كتير وهوا مرضيش ينزل تعريفة
وبما ان التوكيل المرايه مش عنده فبالنسبالي انا كده حليت المشكله وبمراية اصلية برضو

صحيح هوا مبلغ كتير
بس لو واخد بالك المرايه الاصلية مفيش زيها
المهم توكلت على الله وقلتله قصها
وما شاء الله قصها ورجعت زي ما كانت والله يا اخواني
وحط حواليها سيليكون اسود فمش باين اطلاقا
شغل نضيف جدا جدا
وهوا قصها على مراية ماروتي عنده
والمدهش في الموضوع ان الابعاد بالظبط نفس الاصلية

الحمد لله

يعني كده ان شاء الله مفيش مشاكل

وهرفعلكم الصور بتاعة المراية بعد التصليح ان شاء الله كمان شويه


اللي عايز تفاصيل المكان معرفش ينفع اكتبها عالعام ولا لأ
عموما هوا قدام الحرية مول واسمه الحرية سنتر للزجاج
اللي عايز تفاصيل اكتر ممكن يسألني وهبعتله كرت المحل عالخاص

على فكره اللي دلني عليه هوا احد الاخوه هنا عالمنتدى


نصيحة اخيره بقا

لو عايز تحافظ عالمرايه

ريح المسمار بتاعها شويه بحيث انها تكون مرنه لو حد خبطها بس مش تريحه بحيث ان الهوا يحركها

فاهمينني
وياسلام لو ترشلك رشة wd-40 عالمفصله
تبقى تحفه

ربنا يحفظنا كلنا من شرور الطريق

آمين

تحياتي

اخوكم حازم

[heshom]

ألف مبروك وربنا يحفظك
الحرية مول اللى فى مصر الجديدة؟

[dr.hazem]

ألف مبروك وربنا يحفظك
الحرية مول اللى فى مصر الجديدة؟

ايوة بالظبط
المحل صغير قدام المدخل بتاع المول

وادي صور المراية بعد ما خلصت







تحياتي