امبارح نور العربية العادي فصل مع ان العالي شغال حد عنده تفسير؟

[dr.hazem]

بسم الله الرحمن الرحيم
امبارح ياشباب نزلت بالليل
نورت نور العربية
السهاري اشتغل عادي
بشغل النور العادي رعش كده رعشه وفصل
قلت انا اكيد فيوز
بجرب العالي لقيته شغال فاستغربت
فكيت الفيوز بتاع النور لقيته سليم!!!

فمش عارف المشكله كده ممكن تكون فين؟؟
هل ممكن الدراع نفسه علق مثلا؟ ولا ايه

واللي يعرف كهربائي كويس قريب مني في عين شمس ولا الحرفيين يقولي اسمه عشان اروحله ولو اني والله منا فاضي اطلاقا
الله المستعان

تحياتي

[م/مصطفى محمود]

طب ما مكن تكون اللمبة إتحرقت !!!!

[dr.hazem]

طب ما مكن تكون اللمبة إتحرقت !!!!

ممكن تكون اللمبه اتحرقت عالناحيتين فنفس الوقت؟؟

[mr_sameh]

ممكن يكون الدراع معلق

[alking_2006]

السلام عليكم

انا كان حصللى نفس الموقف دا الشهر اللى فات و رحت عند كهربائى غيرللى الفيوز و اللمبتين علشان كانوا محروقين

على فكرة الموضوع مش محتاج كهربائى لأن الماروتى كهربتها بسيطة

اتأكد اوى ان الفيوز شغال (كارتة الفيوزات الصينى بتبقى ب 1.5 جنيه)
و انزل هات لمبتين 90/100 اللمبة بتبقى عاملة 12 جنيه من اى بتاع اكسسوار
اللمض بتتركب فى الفوانيس عند طريق كلبس حديد كدا بيدخل و يخرج بطريقة معينة و سهلة
و بعد كدا ركب الجاكات فى اللمض من ورا هتلاقى الدنيا شغال قشطة ان شاء الله

المهم ابقى طمنى

سلام

[ihabchina]

دكتور حازم ده مش عيب لمبة خالص عشان الماروتى عندنا هى لمبة واحدة فيها العالى والواطى يعنى لو اللمبة فيها حاجة هتفصل خالص عالى وواطى بتأكيد وهى على فكرة 55/60 وات ونوعها المانى

اعتقد ده فى الفيوز لان فى فيز ل العالى هتلاقية لونة احمر مكتوب علية 10 والتانى فيز ازرق ومكتوب علية 10 برضة

اصل مرة الفيز اتحرق عندى والكهربائى غيرى الفيز . بس بصراحة معرفش اماكنهم تحديدا

متقلقش ده حوار سهل شوف اى اى كهربائى مش لازم حد عبقرى يعنى هيجرب الفيز ويغيرلك اللى ضارب

ربنا معاك فى الامتحانات ويقويك

[dr.hazem]

طلع كتاوت النور ياشباب ورحت للكهربائي بدله بواحد تركي وعلق ورجعتله واتخانقت معاه عادي جدا لانه حمار مش بني آدم
قال النور العالي لما ترعش بيشبك وميفصلش ويقولي ده نظامه كده المهم ماعلينا رحت اشتريت واحد فرنساوي وركبته بايدي والحمد لله كله تمام

شكرا للجميع

تحياتي

[aymanay32]

الكتاوت دة مكانة فين
انا كنت شوفت واحد تحت الدركسيون هوه دة و لا مكان تانى

[dr.hazem]

الكتاوت دة مكانة فين
انا كنت شوفت واحد تحت الدركسيون هوه دة و لا مكان تانى

في الكبوت ورا البطارية علطول
اللي جوه ده بتاع الغمازات على ما اعتقد

تحياتي

[alking_2006]

الكتاوت دة مكانة فين
انا كنت شوفت واحد تحت الدركسيون هوه دة و لا مكان تانى

هوا فيه تحت الدركسيون على طول مربع اسود كدا و هوا دا ماكينة الفلاشر
مش عارف هيا دى اللى قصدك عليها و لا ايه

[dr.hazem]

هوا فيه تحت الدركسيون على طول مربع اسود كدا و هوا دا ماكينة الفلاشر
مش عارف هيا دى اللى قصدك عليها و لا ايه

لا ياشباب
في واحد بيبقى في الكبوت
علطول ورا البطاريه متثبت ب مسمار
اللي جوه بتاع الغمازات
انا رحت للكهربائي وقلتله المشكله دي يا في الدراع يا في الكتاوت
فهوا جرب وفعلا طلع الكتاوت ده نصه محروق
ولما ركبلي واحد تركي طلع معلق فانا مشيت ورحت انا اشتريت واحد فرنساوي وركبته والحمد لله كله تمام

سلامي