الحمد لله جبت التو 2008 تكييف

[meedoo]

السلام عليكم شروط التقسيط بالنسبه لموظفى الحكومه مفردات المرتب للمشترى و الضامن و6صور بطاقه و ايصال نور/تليفون/غاز و على فكره لساكنى مدينه نصر بنك ناصر فرع الحى السابع المعامله فيه اكثر من ممتازه و الموظفين بيخدموك كانك جايب واسطه من مدير البنك

[Ayman_Abdullah]

هو مفيش تقسيط من بتك ناصر للى شغالين فى القطاع الخاص ؟؟؟؟؟؟

[mo7amed_omara]

السلام عليكم يا ميدو انا من اسكندرية و حجزت واحدة بس لسة حستلم فى شهر 6 قوولى كدة انت جبتها منين؟؟ و بكام؟؟ انا حجزت التو 800 سىسى

[mo7amed_omara]

و نسيت اقولك 1000 مبروك يا باشا

[tamtam]

الف مبروووووك
انا كمان ناوية اجيب التو بس كنت عايزة اسأل سؤال:
انا بسافر حوالى 80 كم يوميا و تقريبا نص الطريق بيتعمل فيه ترميمات فالسفر ممكن ياخد حوالى ساعتين. فهل الافضل اجيب التو 800 سى سى ام 1100 سى سى؟
شكرا

[bassemali]

طبعا يفضل 1100 أو 1300 يا تام تام

[medogoda]

هل العربية بها بور ؟

السلام عليكم مبروك عليك العربية بجد روبنا يبارلك كنت عاوز اسال سؤال هل العربية بيها باور ؟ وياتري التكييف متحمل علي ايه لانه مش من المعقول انه يكون متحمل علي الموتور ؟

[meedoo]

السياره 800cc , وملائمه للسفر و المسافات الطويله و هى من مودرن موتورز الوكيل المعتمد ب45900 بالتكييف كاش و الموديل الاعلى 49900 به تكيييف و باور و سنتر وزجاج كهربائى امامى

[flower]

السلام عليكم،،
أولا مبروك على العربية ،،، و ربنا يباركلك فيها،،
أنا بقى عايزة أسأل عن سعر الألتو الجديدة ، وتقسيط ولا كاش،
وحكاية الاكصدامات اللي بلون العربية دي عبارة عن ايه؟ الفبر الأسود اللي تحت الكابوت وتحت النمر؟؟ ولا أنهي بالظبط؟؟
و التكييف ،، ايه نظامه؟؟ شغال كويس؟ ولا بيأثر على موتور العربية من ناحية انها 800 cc بس؟؟
أنا سمعت ان التكييف على موتور تاني وبالتالي مش بيأثر في أي حاجة؟
و ياترى بتسخن ولا لأ؟؟

أتمنى تكون عندك سعة صدر للرد على استفساراتي الكثيرة نسبيا، واسفة على الإطالة،
وشكرا جزيلا مقدما،،

[Ayman_Abdullah]

لو سمحت يا أستاذ ميدو ممكن update تقييم عن حالة العربية من جميع النواحى (التكييف -الثبات-السخونة-الموتور-الصاج-أسعار قطع الغيار إن أمكن) لإن فى ناس كتير بتفكر فى العربية دى
شكرا مقدما

[wisambasha]

الف مبروك ربنا يديك خيرها و يكفيك شرها

[mo7amed_omara]

ميدو انت فينك رد على الاسئلة عايز اعرف اخر تطورات العربية اية

[meedoo]

السلام عليكم انا اسف للتاخير فى الرد و لكن اطمنكم انا عملت 2600 كم و السياره زى الفل تكييف جميل و مابيحملش على الموتور بتجيب 120كم و التكييف شغال و ثابته على الارض و مافيش اى عيوب فى السياره غير انها ضيقه شويه من جوه

[sweetheart_]

السلام عليكم
احب اشكركم كلكوا على الافاده اللى بتقدموها من خلال استعراض تجاربكم يمكن تكون دى اول مشاركه ليا فى الموقع كله بس بجد لما لقيت ان الحديث بينكم مفيد للدرجه دى قلت انى هستفيد كتير من الكلام معاكوا والمثل بيقول اسال مجرب ولا تسال طبيب انا حمد وبتطلع انى اجيب عربيه عشان المواصلات صعبه عليا انا ومراتى اوى بس المشكله انى هجبها قسط لان مش معايا للكاش المهم انا ممكن ادفع مقدم 15 او 20% فى ماروتى او التو بس بصراحه فى حاجه مش عارف حد هنا هيقدر يفدنى فيها ولا لا هى انى عايز ابعد عن شبهة الربا والبنوك فهل حد يعرف طريقه مضمونه شرعيه عشان اشترى بيها ماروتى او التو تقسيط واسف للاطاله

[sweetheart_]

الاخ ميدو لو سمحت عايز اعرف هو البنك اشترى العربيه وبعدين بعهالك ولا اتكتبت باسمك على طول يعنى ادولك الفلوس .يعنى العربيه اتكتبت باسم البنك وبعدين البنك بعهالك ولا ايه بالظبط ؟ مهم الرد لو سمحت وكما الاجراءات خدت معاك اد ايه وقت والقسط بتدفعوا ازاى بتحول المرتب ولا بتدفعوا بنفسك ؟ وبالنسبه للقسط ليه يوم معين متتاخرش عنه يعنى فى فترة سماح لسداد القسط ؟ معلش تقلت عليك بس انت اكيد عارف الحيره دى وجربتها .وربنا يبركلك فى العربيه ويسترها معاك ان شاء الله.