أرجوا النصيحة من عباقرة المنتدي

[waleed_hanafy]

السلام عليكم ورحمة الله وبركاته
يارب تكونوا بخير يا جماعة وربنا يوفقكم
انا عضو جديد قرأت المنتدي الخاص بالسوزوكي من أوله لأخره
لأني بصراحة عايز اجيب عربية ومحتاج بعد فضل الله مساعدتكم معي
أولا انا في الأول كنت محتار مابين المستعمل والجديد ولكن بعد موضوع إن العربيات اللي من 25 سنة تتكهن فقررت إني أشتري جديد أنا صح ولا خطأ؟
ثانيا كنت محتار ما بين لادا 2107 وشوية عربيات أخريمثل الألتو بس لقيت عربية التو ففكرت فيها بس لي شوية استفسارات عنها لو أمكن أكون شاكر
بالنسبة للمقارنة بينها وبين لادا 2017 أنهي الأحسن
وكم عدد الركاب حتي يكونوا مستريحين يعني تشيل 3 أفراد في الكرسي الخلفي ولا لأ؟
ممكن أسافر بالألتو ولا لأ؟
أنا عارف إنها هاتشباك بس ممكن أركب فوق شبكة وأحط فيها الشنط ولا لأ؟
وياريت حد يكون جربها قبل كده علشان أنا أول مرة هأركب عربية خالص يعني ماحطتش مفتاح في العربية قبل كده
وقلت لنفسي ان متاعب عربية مستعملة ممكن تخليني أكره العربيات كلها علشان كده فكرت في الجديد
أنا مش مهم الشكل عندي أكثر من إني أجد سيارة تتحمل معي وتكون تسافر ومالهاش مشاكل في التوكيل يعني كمان تريحني في البنزين
انا سئلت أسئلة محتاجة ربع قرن للإجابة بس أنا طمعان فيكم وربنا يوفقكم جميعا

[SEATLOVER]

يا waleed_hanafy اهلاً بيك معانا
الحقيقة سؤالك مكتوب بطريقة حلوة اوى توضح انك فعلاً قبل ما تكتب السؤال ..قريت كتير و بحثت فى المنتدى و دى احلى حاجة ممكن تتعمل قبل ما حد يسأل سؤال .. بحييك
هارد عليك من كلامك الحلو بإيجاز عشان ما توهش ..ماشى

أولا انا في الأول كنت محتار مابين المستعمل والجديد ولكن بعد موضوع إن العربيات اللي من 25 سنة تتكهن فقررت إني أشتري جديد أنا صح ولا خطأ؟

الموضوع دة لسة قدامة شوية .. ومش كل القديم يعنى ممكن من سنة 87 تبقى فى الامان
ومش كل القديم وحش ولا كل الجديد جميل
انما رأيى معاك هنا ( جديد) .. تمام

ثانيا كنت محتار ما بين لادا 2107 وشوية عربيات أخريمثل الألتو بس لقيت عربية التو ففكرت فيها بس لي شوية استفسارات عنها لو أمكن أكون شاكر
بالنسبة للمقارنة بينها وبين لادا 2017 أنهي الأحسن

انت عارف طبعاً ان سؤالك فى قسم السوزوكى .. فعشان كدة لو عايز مقارنة خليها فى قسم المقارنات
انما رأيى معاك هنا (الاتنين حلوين وكل واحدة لها مميزاتها ) .. تمام

وكم عدد الركاب حتي يكونوا مستريحين يعني تشيل 3 أفراد في الكرسي الخلفي ولا لأ؟

اة تشيل طبعاً .... بس مش بصفة دايمة ..بعنى مش فى كل مشوار كل يوم ..ولا اية

ممكن أسافر بالألتو ولا لأ؟

اة طبعاً تقدر إن شاء الله .. وتبقى ممتازة فى السفر كمان (بدون سرعات عالية -بدون مطبات على سرعة وبتحميل )

أنا عارف إنها هاتشباك بس ممكن أركب فوق شبكة وأحط فيها الشنط ولا لأ؟

اة طبعاً ممكن جداً

أنا مش مهم الشكل عندي أكثر من إني أجد سيارة تتحمل معي وتكون تسافر ومالهاش مشاكل في التوكيل يعني كمان تريحني في البنزين

هو دة الصح لما تفكر فى عربية

واخيراً نصيحتى ليك وعشان ذى ما قلتلك دة مش قسم المقارنات هاقولك كلمتين
لو هاتصون وتحافظ و تحاول تحدد من استعمالك على نمط عربيتك لتحقيقها راحتك على جزء من مطالبك ..... يبقى الالتو
لو هاتسيب نمط استعمالك براحتة وهاتصون على اد ما تقدر وهاتتبسط من عربيتك لتحقيقها مطالبك على جزء من راحتك ..يبقى اللادا

ربنا يوفقك يارب .

[fahd_628]

الألتو مش واسعة من ورة هية تاخد 2 تمام فى الخلف 3 حيبقو مزنقين و ممكن تجربها فى معرض لو عاوز و ممكن عادى تسافر بيها بس مش تمشى 120-140 لأ 100 تمام اوى و العربية حلوة و لو انى افضل الادا عنها معرفش لية لأنى بس ان الادا اكبر و اقوى و بتستحمل اكتر و حاجاتها رخيصة جدا و متوفرة بكثرة بس طبعا شكلها القديم و نشوفيتها ممكن يكونو مشكلة بالنسبالك و على فكرة دلوقتى توكيل لادا بيركب فيها تكييف و باور كمان لو عاوز

[waleed_hanafy]

جزا الله خيرا كل من رد علي ولي سؤال أخر
يلا بقي من باب الطمع
هي العربية ألتو باور ولا لأ
والعادية منها زجاج كهرباء ولا لأ
ودمتم

[mars3v]

بلاش ترمى فلوسك فى الالتو، بجد حرام...انا اختى معاها الالتو، الموتور ضعيف جدا و متحسش انو 1000 سىسى، انا كان معايا بولو 99 و الفرق كان رهيب جدا...شنطتها ديقه و من جوه ضيقه، العربيه من بره صغيره، يعنى لو عملت بيها حادثه جامده مش هيتبقى منها حاجه...
انت راجل يعنى اكيد هاتحتاجها فى سفر و لو اتجوزت هاتبقى ديه عربية الاسره يعنى عايز حاجه تسد معاك...ده غير ان ثباتها سىء جدا

[hazem_khidr]

رايي من رايي اخويا سيات لافر
عاوز عربيه مدنيه و مفيش مانع من سفريه في الاسبوع يبقي الالتو
عاوز عربيه تستحمل بس تاخد بالك من بيض العفشه و عربيه خشنخ شويه يبقي للادا.
.....................
عاوز حاجه تريحك و تكون شكلها معقول يبقي تضحي شويه و تجيب شاهين

[engahmed29]

(بلاش ترمى فلوسك فى الالتو، بجد حرام...انا اختى معاها الالتو، الموتور ضعيف جدا و متحسش انو 1000 سىسى، انا كان معايا بولو 99 و الفرق كان رهيب جدا...شنطتها ديقه و من جوه ضيقه، العربيه من بره صغيره، يعنى لو عملت بيها حادثه جامده مش هيتبقى منها حاجه...
انت راجل يعنى اكيد هاتحتاجها فى سفر و لو اتجوزت هاتبقى ديه عربية الاسره يعنى عايز حاجه تسد معاك...ده غير ان ثباتها سىء جدا)

انا معترض تماما على الكلام ده اولا الالتو موتورها 800 او 1100 و مفيش منه 1000 ، ثانيا موتورها على قدها و كويس و بيسحب تمام و بتجرى زى الفل ، و بعدين الالتو حاجة و البولو حاجة تانية ، مينفعش اقارن فئة بفئة تانية ، و يا شيخ فال الله ولا فالك ، فى حد يقول العربية صغيرة و لو عملت بيها حادثة جامده ، استغفر الله العظيم ، هو الي طالع من حادثة جامدة بيفكر بقى العربية صغيرة ولا كبيرة ، و بعدين ما فى الف عربية صغيرة زى الاتوس و الجيتس و السبارك و الماروتى ، كل دول لازم يفكروا لما يعملوا حوادث جامدة يتصرفوا ازاى ، و بعدين ثبات ايه الي بتتكلم عنه ، دى سياره عائلية مش مخصصة للراليات