صيانة الماروتى فى التوكيل

[haneen83]

السلام عليكم
انا معايا ماروتى 2010 و للاسف لظروف خارجه عن ارادتى ما قدرتش اروح اعمل صيانه الالف و هى دلوقتى عامله 2080 كيلو .. السؤال بقى هل حد يقدر يفيدنى انا موقفى ايه دلوقتى و لو روحت التوكيل ايه اللى هيحصل
هاعمله على حسابى و الا ايه لو عملته على حسابى هادفع قد ايه

و سؤال بقى من ناحيه الموتور هل ده فيه خطر عليه لانى ما غيرتش الزيت بتاع اول الف
ارجو الافاده

[m7nsh]

مممممم
هو غلط فعلا انك تمشى كتير على زيت التليين ( اللى هو فى اول 1000 كيلو ) و المفروض يتغير
بخصوص التوكيل مش هاقدر افيدك لأنى متعاملتش معاه قبل كده .. بس اى ميكانيكى بره ممكن يعمل الموضوع ده .. يغير الزيت و يغير الفلتر .. ومش مطلوب اكتر من كده فى الوقت ده
ملحوظه برده عشان القلق ميزيدش ... عن نفسى غيرت زيت التليين عند 1800 كيلو .. و مفيش اى مشاكل :)

[haneen83]

يعنى انت يا محنش ما روحتش التوكيل خالص ؟؟
اصل فيه ناس بتقوللى انه العربيه لازم تتشد بعد اول الف و انا مش فاهمه يعنى ايه
الى جانب انى كنت باقرص عليها شويه فى الغيار لانى كنت لسه باتعلم عليها فهل ده برضه يكون بوظ الموتور ؟؟
و ما تعرفش ميكانيكى كويس اروح اعمل عنده الحاجات دى ؟؟

[عمرو السعدنى]

التوكيل ملوش اى لزمه خالص

حراميه على الفاضى

العربيه بسيطه و تقدرى تعملى فيها الصيانه عند اى حد

روحى لحد بتاع زيت حطى زيت موبيل 3000 و غيرى الفلتر و خلاص

[m7nsh]

لا مروحتش التوكيل خالص و مش ناوى الحقيقه :)
و كلمه " تتشد " دى كبيره اوى على عربيه عامله الف كيلو !!
تتشد دى بتتقال مع العربيات اللى بتكون عاوزه شغل كتير و مخبوطه مثلا يقولك هشد العربيه سمكره و بويه و عفشه و هكذا
انما صيانه الألف " من الكتالوج " مش اكتر من تغيير زيت و فلتر
و اى ميكانيكى محترف او على قده خالص يعمل الموضوع ده .. و للأسف معرفش حد قريب منك فى الشيخ زايد .. انا بعيد عنها بأكتر من 100 كيلو
:))

[meemo]

مع احترامي لقصة ان التوكيل ملوش لازمة انا فعلا موافق وابصم بالعشرة ان التوكيل غالي ومبالغ فيه جدا بس المثل بيقول ادي العيش لخبازه لو هياكل نصه
انا معي موديل 2009 كنت جايبها زيرو من وقت ماشترتها وانا اي شئ علي طول في التوكيل ولسه عامل صيانة ال10000كم يوم الاتنين اللي فات السعر مبالغ فيه اه صح بس الواحد مطمن حتي لمبة الفانوس غيرتها في التوكيل ب20 جنيه ومصنيعة 25 جنيه سعر غريب صح بس الواحد بيشتري دماغه وفي حاجة مهمة لما صيانة ال10000 ننكلف حوالي 300 جنيه اعتقد ان ال300 جنيه اصلا مش مبلغ في حد ذاته بس انا مطمن وخصوصا ان المدام هي اللي بتركب العربية وفي حاجة تاني بصراحة في التوكيل فعلا بيهتموا بالعربية مش علشان هي ماروتي لا مفيش اهتمام بخش الورشة واقف واسال العامل واسال المهندس ويشرح اه اللي في العربية وبصراحة انا بعمل كده علشان اذا اراد ربنا وحبت ابيع العربية تجيب سعر كويس

[A.Saad]

عدم الانتظام فى الصيانة ممكن يطلع العربية من الضمان
حاولى تروحى فى اقرب وقت لو ناوية تحافظى على الضمان ولاحظى ان فيه فروع للتوكيل بتشتغل السبت
وشوفى مركز خدمة معتمد يكون سمعته كويسة ممكن تروحيه برده

[kimo_cat]

انا عملت صيانة الالف دي وانا كنت عامل تقريبا 1500 ، انت ليكي لغاية 2000 كيلو
الصيانة المجانية مش مجانية ولا حاجه ، انت هاتدفعي تمن الزيت والفلتر
لكن المجاني هو المصنعية فقط
يعني التوفير في حدود 50 او 75 جنيه بس
لكن الأحن انك تغيري الزيت بسرعه وهاتحسي انك راكبه عربيه تانية اسرع بكتير وصوت الموتور افضل
لأن الزيت اللى جاي بيها ده علشان التليين فقط مش بتاع جري او مشاوير
لما تغيري زيت حطي موبيل ون اللى بيمشي 10 الاف كيلو افضل ما كل شويهه تروحي التوكيل او حتى لميكانيكي
العربية بتاخد 3 لتر موبيل ون كان تمنهم تقريبا 190 والفلتر تقريبا 35 مش متأكد الموضوع كله كان في حدود 230 او 240
انما بعدها لما عملت صيانة 10 الاف طبعا زاد المصنعية كان في حدود 380 تقريبا
وبالتوفيق ان شاء الله

[shshmoh]

انا هروح التوكيل لصيانة الالف ان شاء الله يوم السبت
فى التوكيل بتاع نيسان فى شارع السندباد
انا حجزت بالتليفون ووصفولى العنوان
ياريت لو حد اتعامل مع التوكيل ده يعرفنى الناس هناك متعبين ولا اية و كمان سؤال مهم
انا مستلم العربية من غير كاسيت ولا انذار
من سمير ريان ب 63500
و سالت فى التوكيل قال الكاسيت ب 800 و الانذار ب 800
فهل لو ركبت الحجات ده بره تخرج العربية كلها من الضمان ولا كهربة العربية فقط
ارجو الرد السريع من خبرة الزملاء
علشان انا ساكن فى التجمع و الانذار لا يمكن الاستغناء عنه

و شكرا

[love7amada]

حراااااااااااااااااااااااااااااااااااااااااام
ده الانزار بالسنتر ف تكير وولف ب 300 جنيه بالتركيب و ف التوكيل مش عند كهربائي بره
بيستهبلوا و الله

[hamaza81]

انا كنت في التوكيل فرع الدقي الأسبوع دا بودي الماروتي بتاعة واحد صاحبي
وسألت على الإنذار والسنتر طلعوا الاثنين تقريبا في حدود 570 بالتركيب

[shshmoh]

حرام 570 كتيييير

[hamaza81]

انا عربيتي 2010 كانت نازلة بالإنذار والسنتر والكاسيت (جميع الكماليات)
دي كانت عربية صاحبي 2009 نازله من غير حاجة
ولما في التوكيل قالوله 570
صاحبي صرف نظر طبعا لان كدة كتير

هو برة مش هايزيد عن 300 جنيه بس اعتقد دا هايخرجك برة الضمان

[m7nsh]

كتير تنين 570 !
هو الطبيعى بيكون فى حدود 300 .. بس فعلا بيطلعك من الضمان .. لأنه بيقطع سلوك وبيعمل شغل

[meemo]

اذا ركبت الحاجات بره هتخرج الكهرباء من الضمان انا جبت كاسيت بايونير من الخارج وركبته في التوكيل طبعا هما مكنوش في الاول عايزن يركبه ويقول لا لازم تشتري الكاسيت من عندنا اول مارحت ومعي الكاسيت محدش قال حاجة وركبوه انما بكام باه
تركيب كاسيت وسماعات 100 جنيه ممكن تشتري الكاسيت وهما يركبه في التوكيل