ماروتى ولا فيات 127 ولا لادا 2105

[tamlove]

بصراحة واحد صاحبى عايز يشترى عربية فى حدود 15 ألف وأنا رشحتله ماروتى 97 وأصدقاء آخرين رشحوله لادا 2105 موديل 83 ،فيات127 موديل 85 على الرغم من الماروتى يابانى وجديدة فى التسعينات وبتشم البنزين يعنى الصفيحة ممكن تعمل أكثر من 350 ألف كم وقطع غيارها رخيصة ومتنسوش إنها موديل منتصف التسعينات أما اللاد موديل الثمانيات وطالع أبوها وكمان الـ 127
أرجو من حضراتكم الرد السريع ولسيادتكم جزيل الشكر

[mesaharaty]

الماروتى حلوة

[zaman288]

السلام عليكم ورحمه الله وبركاته

علي حسب معلوماتي البسيطه ان الماروتي هندي مش ياباني رغم انها سوزوكي لكن مش شرط انها ياباني زي البيتلز البرازيلي وكمان يعيب الماروتي انها 3 سلندر يعني مش هتكون بقوه ال4 سلندر اكيد لكن مش معني كده انها وحشه انا بقولك بس علي عيوبها وعيوب التانيين زي ماحضرتك قولتك موديلات قديمه وكمان ميزه الماروتي من ناس معاهم العربيه ان قطع غيارها رخيصه جدا والاختيار ليك في الاول والاخر

[tamlove]

أنا ليه سؤال هل يصلحلها بنزين 80 بحكم إنها كاريراتير ؟؟؟؟

[ehab_11_22]

الماروتى كويسة وحمالة قسية
بس الصفيحه أخرها 320 مش 350 ولا حاجة

[ehab_11_22]

فى ناس كتير هنا فى المنتدى بتحطلها 80

بس أنا الصراحة بستخدم 92 أو 90

[dr.hazem]

بنزين ٨٠ بيتحط فيها عادي جدا
بالنسبة لعدد الكيلوات حاجات كتيره بتتحكم فيه لكن يتراوح التنكي بتاعها (اللي هوا بيستوعب ٢٨ لتر) بتعمل من ٣٠٠ الى ٤٠٠ كيلو

ماروتي احسنلك
تحياتي

[tamlove]

شكرا لكل من أفد فى ذلك الموضوع وأنا سعيد لمعرفتكو فى هذا المنتدى العظيم بما تحمل الكلمة من معنى

[عمرو السعدنى]

ماروتى احسن طبعا و موضوع 3 سلندر مش هتحس بيه خالص لان العربيه خفيفه

[mohamed2002]

الماروتي والادا 2105 بجكم أني بسوق الاتنين فالادا لها مميزات من حيث القوة والاررتفاع عن الآرض وطبعا واسعه جدا مقارنة بالماروتي واستهلاك الادا للبنزين مرتفع جدا مقارنة بالماروتي
الماروتي مميزاتها ناعمة وسلسة واستهلاك بنزين خفيف جدا بالاضافة انها منخفضة وبتحك في المطبات العالية
لو اسرة يبقي لادا ولو شاب يبقي ماروتي
قطع الغيار الاتنين اسعارهم حلوة

[sab3aawy]

اللادا ممتازة فقط لو مش ناوى تمشى بيها، يعنى تقعد جواها وهى واقفة وخلاص وخلاص لأنها بالفعل واسعة جدا، لكن لو فكرت تمشى بيها هتتضايق جدا ، موتور خشن وديريكسيون وفتيس ودبرياج التعامل معهم مستحيل وعومان ولا عبد اللطيف ابو هيف فى زمانه وبتسقف وبتاكل بنزين ، ده غير كارثة بيضة المقص اللى ممكن تحل عليك فى اى لحظة تخلى العربية تبرك على الأرض ويمكن تنقلب لو كنت ماشى بسرعة

بالنسبة لل 127 والماروتى الاتنين صالونهم قد بعض ، وفرق السعة اللترية مش كتير (100 سى سى) ومن واقع التجربة الاتنين بيجرو زى بعض ويمكن الماروتى تتفوق كمان ، شنطة ال 127 اكبر لكن اضطرارك دائما لوضع الاستبن فى الشنطة اللى هى مش مكانه (لأن مكانه فى الكبوت مش بيساعه علشان عادة الاستبن بيكون 145 بدلا من 135 المقاس الأصلى لأن المقاس الأصلى نادر) بياكل الشطنة، كما ان سهولة العثور على ماروتى مش ضاربة فيها البارومة اسهل بكتير من العثور على 127 لم تلتهمها البارومة، واخيرا الماروتى فرصة انها تتقلب اقل بكتير من فرصة ال127 فى انها تتقلب، تقريبا مش فاضا فى مصر اى 127 متقلبتش قبل كدة، ده غير اللى اتقلبت مرتين وتلاتة، لو هنقارن ال ماروتى بال 128 هتكون مقارنة عادلة لأن كل واحدة فيهم لها مميزات على الاخرى ، يعنى مثلا ال 128 صالونها واسع وموتورها هادى وشنطتها كبيرة وثابتة على الأرض احسن شوية من الماروتى، مقابل ان الماروتى استهلاكها فىالبنزين اقل وزاوية دورانها اقل وسحبها احسن شوية، لكن اللادا وال127 عربيات مليانة مشاكل

[motazgamal]

اللادا ممتازة فقط لو مش ناوى تمشى بيها، يعنى تقعد جواها وهى واقفة وخلاص وخلاص لأنها بالفعل واسعة جدا، لكن لو فكرت تمشى بيها هتتضايق جدا ، موتور خشن وديريكسيون وفتيس ودبرياج التعامل معهم مستحيل وعومان ولا عبد اللطيف ابو هيف فى زمانه وبتسقف وبتاكل بنزين ، ده غير كارثة بيضة المقص اللى ممكن تحل عليك فى اى لحظة تخلى العربية تبرك على الأرض ويمكن تنقلب لو كنت ماشى بسرعة

بالنسبة لل 127 والماروتى الاتنين صالونهم قد بعض ، وفرق السعة اللترية مش كتير (100 سى سى) ومن واقع التجربة الاتنين بيجرو زى بعض ويمكن الماروتى تتفوق كمان ، شنطة ال 127 اكبر لكن اضطرارك دائما لوضع الاستبن فى الشنطة اللى هى مش مكانه (لأن مكانه فى الكبوت مش بيساعه علشان عادة الاستبن بيكون 145 بدلا من 135 المقاس الأصلى لأن المقاس الأصلى نادر) بياكل الشطنة، كما ان سهولة العثور على ماروتى مش ضاربة فيها البارومة اسهل بكتير من العثور على 127 لم تلتهمها البارومة، واخيرا الماروتى فرصة انها تتقلب اقل بكتير من فرصة ال127 فى انها تتقلب، تقريبا مش فاضا فى مصر اى 127 متقلبتش قبل كدة، ده غير اللى اتقلبت مرتين وتلاتة، لو هنقارن ال ماروتى بال 128 هتكون مقارنة عادلة لأن كل واحدة فيهم لها مميزات على الاخرى ، يعنى مثلا ال 128 صالونها واسع وموتورها هادى وشنطتها كبيرة وثابتة على الأرض احسن شوية من الماروتى، مقابل ان الماروتى استهلاكها فىالبنزين اقل وزاوية دورانها اقل وسحبها احسن شوية، لكن اللادا وال127 عربيات مليانة مشاكل

الراجل دة كلامة80% صح بس ال128 بتفتح شاسية بسرعة مع احترامي ليك
بس رأي ان15 تجيب 127 نضيفة اوي و متظبطة ومافيهاش مشاكل كتير