للاسف الترموستات طلع مضروب

[maged]

انا كنت عامل موضوع عن سخونة الماروتى بعد النص بسبب ان المروحة بتشتغل مـتأخر قوى بعد النص بكتير وبتفصل بعد ثوانى قبل الحرارة ما تنزل
مع العلم ان لايوجد ترموستات كوعة
الردياتير نظيف
المياة لا تنقص
اشتريت ترموستات للمروحة من كرم جابر ش دمشق وركبيته عند ميكانيكى قدام المحل لكى اتأكد انه يعمل وفعلا اشتغل كويس ولكن تانى يوم بدأ يخرف
دلوقتى مش معقول كل يوم هشترى ترموستات ب 55 جنيه غير التركيب ويطلع بايظ
فكرت انى اذهب الى التوكيل اللى فى طريق الهايكستب لتركيب ترموستات اصلى لكن قلت استشير حبابيبى اعضاء المنتدى الاول
ايه رأيكم

[dr.hazem]

مش عارف الحقيقه
انت جربت تسأل في شارع احمد حلمي؟؟؟
ممكن تلاقيها عند رامي جديده او استيراد

كلمه عالموبايل ولو مش معاك نمرته اشوفهالك

تحياتي

[maged]

شكرا للاهتمام

[sab3aawy]

انا عانيت اشد المعاناه الفترة الماضية من موضوع السخونة والترموستات الخ ، وطلع ان العيب مش من الترموستات خالص والحمد لله حليت المشكلة
المسارات بتاعت المية فى المحكر والردياتير كانت مكتومة ، ومع عدم وجود ثرموستات الكوعى ده بيخلى دفع الطرمبة الى اعلى الردياتير قوى جدا، ومع سخونة المية وبدء غليان جزء منها الضغط فى منطقة اعلى الردياتير بيوصل للحد الأقصى المسموح اللى بعده بتبتدى المية تزق صمام الامان بتعا غطاء الردياتير وتروح على القربة، وبالتالى بتنقص، ولما تنقص واصلا احنا متفقين انها بتعدى فى مسارات ضيقة فى الردياتير بتكون وصلت للثرموستات بتاع المروحة ساقعة اسقع من الدرجة اللى تخليه يلقط، وفى حين انها بسبب كميتها القليلة برضه بتسخن جدا فى الموتور وعلى ما توصل لحساس العداد الموجود فى اسخن نقطة فى المحرك بتكون فوق درجة الغليان وهو الامر الذى يؤدى انك تشوف درجة الحرارة عالية جدا لأن حساس عداد الحرارة راكب فى اسخن نقطة فى الدايرة وثرموستات المروحة راكب فى ابرد نقطة فى الدايرة، ومع زيادة سخونة المية تغلى اكتر والضغط يزيد اكتر وتطرد مية اكتر للقربة وتسخن اكتر حتى تصل لنقطة الكارثة
اعمل اللى انا عملته وبإذن الله ربنا هيحلها معاك زى ما حلها معايا
1- اشترى منظف رادياتير مركز (أنا جبت رابيدو انتاج مصرى بتاع شركة ادكو اسكندرية تمنه اقل من 10 جنيه)
2- اشترى غطاء ردياتير جديد(انا جبت واحد تايوانى تمنه 10 جنيه)
3- لو لسة محتفظ بثرموستات الكوعة اختبره (سخن شوية مية وامسكه من أعلاه بزرادية ونزله فى المية بحيث البلوك النحاس بتاعه يبقى مغمور وخليك ماسه شوية وبص عليه، مفروض انه يفتح وتلاقى البلوك النحاس نزل لتحت قبل غليان المية، لو مفتحش اشترى واحد تانى)
4- اشترى جوان للكوعة ، لو ملقيتوش سهل تفصيله (انا قصيت واحد من كاوتش بتاع غيار تالف لبالونة موتور مياه منزلى، ويمكن قصه من اى كاوتش داخلى قديم، وبالتجربة المطاط بيستحمل درجة حرارة مية المحرك ، لاحظ ان الخراطيم مطاطية)
5- اشترى علبتين من المادة المركزة الخضراء التى تضاف الى مية الحنفية لتحويلها الى ميه خضراء، اقضل كثيرا من المياه الخضراء المخففة التى تباع فى جراكن، انا جبت الأمريكى ماركة أبرو من شارع دمشق ب 10 جنيه
6- فضى المية اللى فى العربية وبعدين قم بقفيل دائرة المياه واملاه مية من الحنفية والموتور بارد، وبعدين صب عليها منظف الردياتير او مزيل الصدأ كما يسمونه
7- دور العربية وسيبها دايرة سلانسيه 20-30 دقيقة
8- بطل العربية وسيبها لحد ما تبرد الى درجة حرارة الجو (مش أقل من ساعتين)
9- نزل مية الغسيل بالكامل من الدورة
10 فك الكوعة ونضف مكان الجوان القديم بعناية من الكوعة ومن مكانها وفصل جوان لو مكنتش اشتريت واحد
11رجع ثرموستات الكوعة الى مكانه، وحط الجوان فوق منه(الجوان لازم ييجى فوق الثرموستات وليس تحته
12 قفل الكوعة بعناية على الثرموستات والجوان
13 املا الردياتير من الحنفية واضف عليها علبة واحدة من المركز الأخضر(خلى التانية معاك)
14- ركب غطاء الردياتير الجديد
15- املأ القربة بمياه من الحنفية بدون اضافات حتى منتصف المسافة بين min و Max ولا تضيف اى شئ لمياه القربة حتى يظل لونها شفاف، ولاحظ مستواها بدقة
16 استعمل السيارة فى مشاوريك العاديدة ولاحظ تغير لون مياه القربة وارتفاع مستواها على مدى يومين ولاحظ كذلك هل ثرموستات المروحة بيشتغل فى وقته الطبيعى(فوق النص بحاجة بسيطة ام لا)
17- لو لاحظت ان مستوى المية فى القربة تقريبا مبيعلاش (يعنى مش اكتر من 2 مللى مثلا فى مشوار 50 كم) ولون المية فى القربة لم يتغير للأخض سوى بدرجة بسيطة جدا(يعنى بقت مية شفافة لونها يميل شوية للأخضر، مش نفس درجة الأخضر بتاعة مية الردياتير) يبقى باذن الله مشكلتك اتحلت وده هينعكس على اداء ثرموستات المروحة
لو بعد الشرالتجربة دى مجابتش نتيجة نحاول نتناقش تانى

[maged]

الف شكر مستر سبعاوى على الاشتراك معنا فى الموضوع
لكن انا عندى مياة الردياتير لا تنقص ابدا مهما كانت السخونه وانا لاحظت من كلامك انه كان يوجد مشكلة فى نقصان المياة عندك
وكمان انا معنديش ترموستات كوع فهل اشترى واحد ام لا
وكمان انا ذهبت لمتخصص ردياتير من المشهورين بلامانه اسمه السبكى بشلرع احمد عرابى عين شمس وقال لى ان الردياتير مش مخنوق بل يعمل بطريقة سليمه ودورة المياة سريعة وتقليب المياة ممتاز وهو يستبعد ان يكون الردياتير سبب المشكلة
ودلوقتى انا عملت مفتاح كمترايه بنفسى لتشغيل المرحوحة عند النص تجنبا للسخونة لحين التفكير فى حل للمشكلة
فهل كل ما قلته للك يغير اى شىء فى الحل المقدم منك
والف شكر لمشاركتك وانا واثق انه طالما انك بدأت تشارك معنا فى الموضوع انشاء الله المشكلة سوف تحل

[maged]

الحمد لله تم تغيير ترموستات الردياتير للمرة الثانيه واصبحت المروحة تعمل عند منتصف المؤشر وتتوقف عند الربع وتم شراء الترموستات ب 30 جنيه من ميدو بشارع احمد حلمى