مساعدة لاصحاب السويفت

[casper1500]

انا عندى 128 موديل 83 موتور 1100 سي سي ..
بفكر اغير لسوزوكى سويفت تسعينات .. بس حاسس انها مش هتبقى نقله جامدة .. انا عايز عربيه تبقى مريحة شوية يعني عافشة ناعمه , موتور سحبه كويس , تكييف .. هل لو جبت السويفت هحس بفرق يستاهل ولا استنى شوية و اجيب حاجة احسن ؟؟
بالمناسبة بردة انا عايز اعرف هل العربيه ثابتها حلو لحد 120 - 130 كدة ؟؟
هل عفشتها ناعمة و لا مش اوى ؟
فيها باور و لا لأ ؟
فيه واحدة شيفها موديل 93 يابانى بـ 35 الف دى كتير و لا ايه ؟
سمعت ان الموتور بالفتيس بيتشروا جديد بـ 2000 جنيه هل دة صحيح !!

يا ريت حد يوضحلى .. و شكرا

[nav man]

انت هتحس لما تسوقها لو كانت نقلة والا لا لان في واحد صاحبي كان معة 28 وجاب سويفت وطبعا حس بفرق كبير اوي. كافية انها ياباني واثبتت انها عربية معمرة.بالنسبة للسعر حسب حالتها انا معي م 93 لو بعتها هطلب فيها 35000 بس مش هخلي اللي يشتريها يعمل فيها حاجة.السرعة انا بسافر بيها كتير ال120 دا النورمل بتعي بس هي خفيفة انا معاك وجبت بيها ل 155 بس طبعا مش باخد بيها غرز. والسحب بتعها حلو جدا.العربية دي محترمة جدا وانا بعتز بيها اوي

[nav man]

في المنتدي في نصايح للسويفت كان اخرها لاخى furp هي دي فعلا مشاكل السويفت واي سؤال طبعا لاخوي حزومة ربنا يباركلوا

[furp]

السلام عليكم اخي العزيز

اولا بالنسبه للقارنه بين ال128 والسويفت فلا توجد وجه مقارنه اولا انته هتركب عربيه هيبان عليها فلوسك لكن ال128 كلها من السبعينات لغاية دلوقتي نفس الشكل وطبعا مش بتبان الفلوس عليها

اما بالنسبه انها هتكون نقله فهيا طبعا نقله ليه اولا هتركب عربيه حديثه بتكنولوجيا اعلي ومكونات يابانية موتور اكثر من رائع وسحبه ممتاز جدا وفعلا الموتور استيراد بالفتيس بيعمل 2000 جنيه

ده بالاضافه الي ان قطع غيارها موجوده ومتوفره جديده ومستعمله وده بالاضافه الي ان عفشة السياره ناعمه ومريحه ومعمره

الموديلات اليابانيه بتنزل بتكيف والتكيف بتاعها ممتاز ولا يؤثر علي الموتور بشكل كبير علي الرغم من ان قوة الموتور 1300 سي سي

اما المصري لا يوجد به تكييف وممكن تركب تكييف في حدود 2500-3000 جنيه

اما بالنسبه للثبات العربيه تصميمها يعتمد علي خفتها لذلك فان استهلاك البنزين لا يذكر بتعمل 320 كيلو في الصفيحه وده ممتاز جدا جدا

لكن الثبات متوسط مش وحش ومش عالي يعني الافضل مش تزود علي 100 كيلو الا لو كنت محمل العربيه وبرضك متزودش قوووووووي عليها لانها اصلا مصممه لتكون خفيفه الحركه

طبعا ده بالاضافه الي ان تصميم السياره اكثر من رائع فالابعاد الخارجيه كلها محسوسه بشكل واضح ومتحكم فيه وعلي الرغم من ان السياره تبدو كسياره سيدان من الخارج الا ان السياره مساحتها الداخليه مريحه وتبدو اكثر اتساعا مما تبدو من الخارج

اما بالنسبه للسعر فهو يعتمد علي الحاله العامه للسياره والرينج هو 35 الف ولكن ده اذا لم تحتاج اي مصاريف

لكن بالطبع الاهم الدواخل وحالة الموتور والشكل الخارجي والكماليات

وربنا يوفقك للقرار السليم

[hazem_khidr]

بتتكلموا عن السويفت من ورايا و لا ايه ؟؟؟؟؟؟؟؟ههههههههههه
لا انا بهزر طبعا
الاستاذ frup و الاستاذ محمد عادل جابو من الاخر.
اولا ال 128 حاجه و السويفت حاجه تانيه خاااااااااالص
ركوبه و قوه و عزم و مشاكل بالكاد معدومه
لا بقي سلك دبرياج يقطع و لا سخونيه و لا شاسيه بيفتح و لا الكلام الفاضي دا كله
عربيه ممتازه.
مافيهاش باور و مش محتاجه باور الدركسيون بتاعها خفيف و عن نفسي انا متقله شويه علشان بحب الدركسيون التقيل !!!!!!!!
بس دا اللي عاوز اوضحه
اما الباقي ف الاخوه الاعزاء اتكرموا و جابو من الاخر

[casper1500]

شكرا يا جماعه والله افيدتونى اوى :)

بس يا ريت يا استاذ حازم تقولى انت بتتعامل مع مين من الميكانيكية و قطع الغيار و كدة لانى من المنصورة يعني قريب منك .. و لا في حد عندكم في المحلة و لا ايه ؟؟!!

[hazem_khidr]

من المنصوره و بتسال واحد غلبان من المحله زيي هههههههههه
لا بهزر طبعا اسأل وقت من انت عاوز
المنصوره مليانه قطع غيار سويفت في الحسينيه و انا جايب سبراتير استعمال قبل كده من عندكم بس مش فاكر مين
حشوفلك الكارت بتاع المحل و اقولك عليه.
بالنسبه للمحله
انا بجيب كل قطع الغيار الجديده من عند رافت كامل في شارع البحر
و الاستعمال يا من المنصوره يا من القاهره من شارع احمد حلمي يجي 30 محل جنب بعض عندهم سويفت استعمال و جديد

[casper1500]

من المنصوره و بتسال واحد غلبان من المحله زيي هههههههههه

دة ااحنا اللي غلابة و الله

طيب عموما انا نااااو بحاول اشوف واحدة هنا في المنصورة (ملاكى دقهلية يعني) و ربنا يسهل ان شاء الله و شوف كدة لو لقيت واحدة كويسة ابقى قولى ,, و يا سلام تقولى اكشف عليها فين :) ... و لو اشتريت واحدة و عايز اروشها شوية اروح فين !!
اشطاط

[a_abdhamid]

بص يا سيدي مفيش اي وجه مقارنه بين الاتنين
انا معايا سويفت 93 والحمد لله نضيفه قوي وهتحس بفرق كبير جدا
وقطع الغيار رخيصه وهتلاقيها في حسين بيك عند الخضري او غيره
تقريبا قطع الغيار زي 128 فرق يدوب خمسه او عشره جنيه
وسيبك من موضوع رشه ولا مش رشه اهم حاجه تكون حالتها نضيفه ومتكنش فيها برومه