الردياتير بينقط بعد ما ابطل العربيه فقط

[Lolopepo]

ردياتير العربيه لا بينقط و لا يرشح طول ما العربيه بارده و لكن بشغلها و امشي بيها لا تنقط و لكن عندما ابطلها بتنقط علي خفيف حيث معدل التنقيط نصف لتر اسبوعيا مع اني غيرتلها المياة و غيرت جوان الطبه
مش عارف اعمل ايه و خايف اروح لبتاع ردياتير يشتغلني و يدخلني في متاهات
افيدوني........................................... .......

[abogogo]

حاول تعرف مكان التنقيط فين ومن اي جهه ... ايضا وضعك للمياه في القربة بتكون على اي مستوى
اسباب نقصان المياه في الراديتير :
وجود خرم في الراديتير
وجود تسريب من الخراطيم الرايح والجاي من الموتور
غطاء الراديتير غير صالح
طرمبة المياه
قربة المياه بها خرم او الخرطوم الواصل غير صالح

[Amr Axel]

زي ما abogogo قالك شوف سبب التنقيط
ممكن يكون خرم في الريداتير او القربة خراطيم
و لو مثلا خرم في الريداتير بيتلحم و الخراطيم لو فيها حاجة تتغير
متقلقش بسيطة ان شاء الله

[Lolopepo]

شكرا للرد
التنقيط من مكانين من الجنب الشمال و الجنب اليمين للردياتير نفسة
طيب لو فية خرم لية ما بينقطشي علي طول

[HOSSAM99]

حضرتك إفحص فايظ مياه التبريد لو هو يبقي ده طبيعي لو مش هو يبقي فيه جز مخروم (حدد مصدر التنقيط)

[abogogo]

شكرا للرد
التنقيط من مكانين من الجنب الشمال و الجنب اليمين للردياتير نفسة
طيب لو فية خرم لية ما بينقطشي علي طول

لما العربية بتدور وتسخن ... المياه بتتمدد من السخونة وبدل مايرجع الفايز للقربة بيهرب من الاخرام الموجوده في الراديتير الموضوع بسيط تروح لبتاع راديتير والموضوع مش هيعدي العشرين جنيه

[Amr Axel]

شكرا للرد
التنقيط من مكانين من الجنب الشمال و الجنب اليمين للردياتير نفسة
طيب لو فية خرم لية ما بينقطشي علي طول

لما بيكون الريداتير مخروم دايما بيتم نصح الشخص انه يدور العربية و يزود المية...ليه ؟؟
لأن لما العربية بتبقي شغالة المية بتمشي في الدورة بتاعتها و بالتالي مش بتنقط الا بسيط جدااا
انما طول ما العربية واقفة بتنزل المية اللي فيها

نيجي بقي لموضوع الريداتير عندك الخرمين دول فين ؟؟ تحت و لا فوق ؟؟
و ع حسب وصفك اعتقد انهم فوق لأنك بتقول لما بتكون العربية باردة مش بتنقط و لما تمشي بيها بتلاحظ ان المية قلت

و بالنسبة الاخرام بتتلحم عادي متقلقش :)

[karimfahmy99]

معلش سؤال . الردياتير دا الومنيوم ؟؟ و بتستعمل مية خضرا و لا عادية ؟؟ معلش الاسئلة خارج الموضوع بس انا بعمل بحث لتاكيد ان الميية الخضرا بتاكل الردياتير الالومنيوم

[Lolopepo]

شكرا علي الاهتمام و الافادة لكل من قام بالرد

[sab3aawy]

واضح ان عندك خرم ضئيل جدا فى الردياتير لأن المية مش بتخرج منه غير لما تسخن وتتمدد وتقع تحت ضغط بخارها وتمددها فيدفعها الضغط للخروج من هذا الشق الضيق

وعلاج هذه المشكلة بسيط للغاية وباذن الله هتعمله وتحل مشكلتك ومتنساش تدعيلى

شوف يا سيدى، هتروح كارفور او هايبر وان او سبينيز وتروح القسم الخاص بمنتجات السيارات ، هتور على منتج اسمه "رايدياتور ويلد" radiator weld ، فيه منه مصرى ماركة رابيدو انتاج شركة أدكو-الاسكندري فى حدود 10-12 جنيه، وفيه منه امريكى اسمه ستوب ليك stop leak على ما اذكر فى حدود 40 جنيه، وفيه صينى، انا شخصيا بميل لتشجيع صناعة بلدى وجربت المصرى وكويس، انت لو عايز تدفع هات الأمريكى، المهم هتستعمله طبقا للتعليمات الواردة على العلبة، والتى تتضمن -على ما اذكر انك تفك الكوعة بتاعت ثرموستات المية وتشيل ثرموستات الكوعة وتعبى البتاع ده مكانها-كل ده والعربية باردة، وتقفل تانى وتكمل مية الردياتير وتمشى 3 ايام -برضه على ما اذكر لكن اتأكد من على العلبة- بدون ثرموستات، وهو فى هذة الأثناء هيقوم بسد الثقب، وبعدين بعد 3 أيام تفك الكوعة تانى وترجع الثرموستات مطرحه و تقفل وتغير مية الردياتير كلها بالمية اللى انت بتحب تستخدمها وخلاص ، فقط خد بالك انك لو فكيت الكوعة هتحتاج جوان جديد ليها لأن القديما غالبا بيتدمر مع الفك، اما انك تشترى واحد ، هتلاقيه ب 5 جنيه وللا حاجة عند بتاع قطع الغيار، هات اكتر من واحد للآمان، او انك تعمل زييى وتفصل جوان من كاوتش داخلى قديم او بالونة موتور مية قديمة، انا عملت واحدة من بالونة موتور مية ومشيت بيها عشرات الآلاف من الكيلومترات بدون ادنى مشكلة
لو الحل ده مجابش معاك نتيجة، بس غالبا -بنسبة 99%- هيجيب نتيجة، فيه منتج تانى اقوى واستخدامه اسهل، اسمع بلوك ويلدblock weld ، من انتاج ادكو برضه، ده حاجة عاملة زى الصمغ العربى بتاع الشجر كدة، تكون العربية سخنة (بس مش أوى علشان لما تفتح الردياتير ميضربش فى وشك) يعنى اللى هو تسخناه الصبح لحد 60-70 بالكتير وتفتح الغطا، وتكون المية ناقصة فى الردياتير شوية علشان تعرف تحطه، يعنى حوالى نص لتر مثلا، وتحل المنتج ده فى شوية مية سخنة علشان ميلزقش ويتكوم فى حتة، وتضيفه بميته السخنة فى العربية وهى دايرة وتكمل ميتك لو ناقصة وتقفل الردياتير وخلاص ومتعملش حاجة تانى بعد كدة، البتاع ده طول ما هو فى المية بيبقى سايل، اول ما بيشوف هوا بيتجلط زى الدم بالظبط ويسد الفتحة اللى خرج منها، وممكن يفضل فى دورة تبريد السيارة طول عمر المية بدون مشاكل او ممكن تنزله وتغير المية بعد فترة، وده ميزته كمان انه لو حصل اى شقوق فى دورة المية جوة جسم الموتور بيسدها، بس انا بفضل ابتدى بالنوع الأولانى لأنه خفيف ومش بيرفع لزوجة المية

انا زمان كان معايا عربية ريجاتا دورة المية بتاعتها كانت مخربأه وبتجيب مية من كل حته، وكنت بزود لها كل يوم لترين تلاتة، علبة البلوك ويلد دى انهت المشكلة الى غير رجعة من غير ما اغير اى قطعة فى دورة الميه

[Lolopepo]

الف الف شكر يا استاذ سبعاوي علي هذة الافادة العظيمه
بس انا فاكر قبل كدة ان بتاع الردياتير قلي حط فلفل اسمر مطحون او ينسون بس انا ما رضتشي اسمع كلامة لاني خفت يسد المواسير

[abogogo]

الف الف شكر يا استاذ سبعاوي علي هذة الافادة العظيمه
بس انا فاكر قبل كدة ان بتاع الردياتير قلي حط فلفل اسمر مطحون او ينسون بس انا ما رضتشي اسمع كلامة لاني خفت يسد المواسير

في ناس بتحط بن القهوة في الراديتير وعن تجربة

[Lolopepo]

الف شكر يا استاذ سبعاوي
لكن عندي سؤال ؟
مرة كان معايا عربية فيها مشكلة تسريب الميكانيكي حطلي مادة شبه الينسون حد يعرف اية المادة دي ؟؟؟؟؟؟؟؟؟؟
انا لما سالتة قالي دي ينسون بس انا اعتبرتة بيهزر

[Lolopepo]

thanxxxxxxx

[Lolopepo]

انا حطيت بن قهوة و مستني لما اشوف
و بالنسبة للمنتجات اللي قالي عليها استاذ سبعاوي انا مش لاقيها هنا في المنصورة