نويت اشتري ماروتي زيرو

[eng_ahmedmf]

السلام عليكم
انا نويت اشتري ماوتي جديده و كل اللي اعرفهم مش مشجعني و انا حاسس انها كويسه فا ياريت حد ينصحني و يقولي ايه المشاكل اللي لاقها لما استعمل الماروتي انا بسوق من 10 سنين و كان معايا 127 فيورا و بعدين بيجو 305 و اخيرا خيونداي ماتركس بس مش طولت معايا غير 6 شهور بس و لظروف خاصه محتاج عربيه صغيره خفيفه و علي قد مصاريفي الشهريه مش تصرف معايا كتير تنصحوني بايها ولا ايه شكرا ليكم ارجو الرد ضروري من كل واحد كان معاه العربيه دي

[karimfahmy99]

الماروتى عربية كويس و اقتصادية و المبدأ العام حافظ عليها تحافظ عليك - عيبها بس من غير تكييف لو انت من هواة التكييف - لو عاوز حاجة مكيفة ممكن الالتو بس اعتقد غالية شوية

[Amr Axel]

العربية بسم الله ما شاء الله كويسة جداااااا و حمالة قاسية و مناسبة لشوارعنا
لكن زي ما استاذ كريم قالك حافظ عليها تحافظ عليك طول ما انت بتعملها الصيانة الدورية من زيت و قطع غيار و زوايا و تربيط عفشة...ألخ...ألخ
هتحس ان العربية ديه احسن من اي عربية تاني
و من ضمن طبعا ميزتها اسعار قطع غيار رخيصة و متوافرة في كل مكان يعني تقدر تعتبرها بديلة الــ128 في قطع الغيار في مصر :)
صغيرة و تقدر تركنها في اي مكان خاصة ان بقي صعب تركن دلوقتي بعربية كبييرة وسط البلد
و موفرة في استهلاك البنزين

عيوبها ان حضرتك بتشتري عربية بدون كماليات رفاهية زي تكييف او ازاز كهربا

و ده موضوع تفاريح كده عن الماروتي

http://www.nilemotors.net/Nile/229742-a.html

اذا قررت تشتريها و عايز تسأل في اي حاجة من صيانة او تظبيط ليها القسم مفتوح لحضرتك في اي وقت تسأل و ان شاء الله نقدر نفيدك :)

[Italiano81]

ليا راى انك تشوف حاجه كسر زيرو وحالتها كويسه وفى كتير على كونتكت كار وهاتفرق فى السعر كتير

[mahamedaraby]

هى عربيه ممتازه جدا واقتصاديه فى البنزين والصيانه وكويسه لشاب لوحده او عائله لسه صغيره بس عيبها التكيف وحر الصيف صعب اوى انك يبقى معاك عربيه زيرو وفى عز الحر اللى فى صيف معندكش تكيف

[eng_ahmedmf]

لو علي التكيف انا مش مهم عندي و ربنا يقدم الخير

[ehab_11_22]

أستخير الله وان شاء الله خير

[abomouhsen]

انصحك بالماروتى الزيرو عن تجربة شخصية
انا اشتريتها فى شهر سبتمبر اللى فات ب 37500 جنيه بدون كماليات
مميزاتها :
1- سهولة كبيرة فى الركن فى اى حتة بالزات الأمكنة الصغيرة على السيرارات العادية
2- موفرة جدا فى البنزين ...... انا سوقت بيها حوالى 900 كيلو فى اسكندرية كنت بسوق يوميا من 8 الصبح لحد واحدة فجرا تقريبا وكنت بفول بنزين 90 وكل ده مصرفتش 300 جنيه على بعضهم (تخيل) مدى الوفر فى الاستهلاك
3-الشغل فيها سهل ورخيص يعنى مثلا انا عملت حادثة صغيرة وخبطت عربية فيورا من ورا لأنى سرحت والماروتى وشها دخل لجوه وكمان عربية نتشت فيا من الجمب (كا ده اخد سمكرة ورجعهالى زى ما هيا بالضبط ب 80 جنيه) لك ان تتخيل
4- اللى بيقولولك لما يركب فيها حمولة كتيره بتقلل السحب متصدقهومش ...... مثال عملى: ركبت فيها انا ووالدى وولدتى وزوجتى و2 اطفال يعنى حوالى فوق 400 كيلو وكان السحب بتاعها من سرعة 80 إلى سرعة 100 ك/س مابين 3 ثوان وخمسة وكان السحب على مطلع كوبرى كمان ... بسم الله ما شاء الله زى الفل

العيوب:
1- عدم الرحرحة يعنى لو واحد عايز يرجع الكورسى لوا اللى وراه مضطر يربع رجليه
2- ممكن ترجيع الكرسى (الظهر بس) وحبة صغيرة كمان مش قوى
3- صغر حجم الشنطة يادوب عدة العربية وممكن تاخد عربية اطفال مهيا مطبقة لكن لو عاوز شنط كبيرة يبقى مضطر تتنى الكنبة اللى ورا هيا بتنام وبتدى مسحة كبيرة للشنط بس فى الحالة دى تاخد راكب واحد بس معاك قدام
4- السيارة فى الصيف قيادتها (سونا) لأنها من غير تكييف لدرجة انى كنت حاطط فوطة قطن فى التابلوه عشان كل شوية انشف العرق الكابينه بتاعتها حر جدا فى الصيف بس ممكن تركبلها تكييف بحوالى 2000 جنيه والخبراء فى المنتدى عملوا موضوع رائع عن تركيب التكييف للماروتى ممكن ترجعله وعلى فكرة مش بيقلل السحب قوى الا فى السرعات الكبيرة (فوق ال 100) مثلا

الرأى اجمالا:
توكل على الله وهاتها .... السيارة ممتازة داخل المدينة وفى السفر كمان (على فكرة انا سافرت بيها من اسكندرية للمنصورة والعكس) ممتازة على الطريق بس متعليش عن 100/120 فى اى ظرف هتلاقيها ثابتة معاك وزى الفل، وكمان اقتصاديات السيارة مناسبة جدا لأن دخا خصوصا فى الأام الجميلة اللى بنعيشها حاليا (ربنا يفرجها عالكل يارب) يعنى تقدر تقول كده : الماروتى عربية اللى معهوش فلوس فى مصر ونفسه يركب عربية زيرو كويسة تشيله هوا واسرته وتحميه من بهدله المواصلات والزحمة وقله ادب ورخامة التاكسيات ... خصوصا لو اختك او والدتك او بنتك او مراتك اللى هتسوقها.

اتمنى يكون كلامى افادك وعلى فكرة ده عن تجربة شخصية يعنى السيارة بتاعتى وانا اللى كنت سايقها وحبيت اقولك عن تجربتى الشخصية قبل الشرا لأنى كنت بسأل زيك كده بالضبط قبل ما اشتريها من شهرين فاتوا ..... وربنا يوفقك ويديك خيرها ويكفيك شرها

هــــــــــــــــــــــــــــــــــــــذا والله من وراء القصــــــــــــــــــــــــــــــــــــد
والسلام عليكم ورحمة الله وبركاته
تحياتى

[msfahim]

عربيه جميله ,توكل على الله و هاتها

[mohamed_kta]

انا راكب الماروتى من شهر يناير 2009 ماشاء الله و لاقوة إلا بالله عربية بتاعت شقاء و بهدلة عفشة زى الفل و كمان بنزين ببلاش و صيانتها بالأصلى لاتقارن و الله يا أخى انا هغير بعد شهر و أحتمال أجيب قيرنا لسه بستخير و بستشير أنا قررت أنى مش هبعها و هديها لزوجتى من حبنا فيها و على فكرة خلال الكام سنة دول سافرت بيها حوالى 25 مرة لمدن كتيير ، الاهم انت استشرت لازم تستخير و توكل و هتدعيلى .

[mohamed_kta]

أسف للأضافة أنا عامل بيها 85 الف لو اى استفسار تحت امرك