ماكينة الزجاج باظت

[alking_2006]

السلام عليكم

امبارح ماكينة الزجاج باظت و رحت للراجل فكها و قالى ان التروس باظت و انا فعلا شفتها بنفسى
المهم كان عايز يشتغلنى و يدينى ماكينة زجاج استيراد ب 120 جنيه و عمال يقولى دى جديدة اقوله دى استيراد و الشحم باين فيها و اثار الاستعمال يقولى لا دى بشوكها

المهم كبرت دماغى و كلمت سوزوكى سنتر لقيت عنده الماكينة الجديدة ب 85 جنيه

عندى سؤال بقى دلوقتى
عايز اعرف اسم المفتاح اللى بيفك المسمار بتاع ماكينة الزجاج
المسمار راسه عامله زى النجمه و المفتاح على شكل حرف إل
علشان هنزل التوفيقية اجيب الماكينة و اجيب طقم المفاتيح دى و اركب الماكينة بنفسى علشان اتخنقت من الاشتغالات

[dr.hazem]

ألانكيه

ده مفكات راسها نجمه وعلى شكل حرف إل



تحياتي

[alking_2006]

ألانكيه

ده مفكات راسها نجمه وعلى شكل حرف إل



تحياتي

شكرا يا جميل

[mesaharaty]

85 جنيه
السعر ده لباب واحد طبعا ؟

[Amr Axel]

حضرتك مركب الازاز الكهربا ؟؟ لو مركبه
ايه الشغل اللي تم في الباب و الضفيرة و و خد وقت اد ايه و كلفك كام للبابين اللي قدام المكنة و الاسلاك و خلافه + المصنعية
و اذا سمحت ممكن صورة لمكنة الازاز اللي بتركب لأني عايز اركب مكنة ازاي كهربا و قلقان شوية من اللعب في الضفيرة
بالرغم ان فيه موديلات من الالتو نازلة فول اوبشن يعني اعتقد العلبة اللي بتركب هتكون موجودة جاهزة ع التركيب ان شاء الله بس عايز اعرف الشغل ازاي و التكلفة

[alking_2006]

85 جنيه
السعر ده لباب واحد طبعا ؟

اه و دى ماكينة باب السائق

[alking_2006]

حضرتك مركب الازاز الكهربا ؟؟ لو مركبه
ايه الشغل اللي تم في الباب و الضفيرة و و خد وقت اد ايه و كلفك كام للبابين اللي قدام المكنة و الاسلاك و خلافه + المصنعية
و اذا سمحت ممكن صورة لمكنة الازاز اللي بتركب لأني عايز اركب مكنة ازاي كهربا و قلقان شوية من اللعب في الضفيرة
بالرغم ان فيه موديلات من الالتو نازلة فول اوبشن يعني اعتقد العلبة اللي بتركب هتكون موجودة جاهزة ع التركيب ان شاء الله بس عايز اعرف الشغل ازاي و التكلفة

لا انا مش مركب ازاز كهربا انا بتكلم على الماكينة العادية اللى فيها تروس دى
و الحمد لله جبتها و ركبتها و كله تمام و جبت طقم مفاتيح الألانكيه ب 25 جنيه

[mesaharaty]

هى ماكينة الزجاج(ليست الكهربائية) لما تعصلج ممكن نرش عليها شوية wd 40 ولا لازم تتفك وتتغسل بجاز مثلا ؟
هى بتبقى قطع بلاستيكية ولا معدنية ؟

معلش أصل أخوكم جديد عليه الموضوع ده

شكرا

[alking_2006]

ماكينة الزجاج بتبقى كلها حديد (ترسين بيدخلوا فى بعض مع تدوير الأكره - بإختصار شكلها عامل زى المقص)

و طبعا ممكن نرش عليها
wd40
لما تعصلج و انا كنت بعمل كدا فعلا و كنت برش على المجره اللى العجل بتاع الماكينه بيمشى فيها

بس لو التروس معصلجه يبقى لازم تتفك كلها
لكن مع الاسف لما فكيتها لقيت التروس اتعصرت فى بعضها و اتاكلت من كتر ما كنت بتعافى عليها و انا بقفل و بفتح الزجاج و طبعا كان لازم تتغير

و فى حاجة تانيه بتكون السبب فى ان الماكينة تعصلج و هو القطيفه اللى الزجاج بيمشى فيها طالع نازل و دى حاجة بردو من الحاجات اللى غيرتها مع الماكينة علشان القطيفه كان خلاص اتقطع و كان بيعصلج مع تحريك الزجاج و بيتباع بالمتر و الباب بياخد حوالى 2 متر

[mesaharaty]

أنا فى الحقيقة عندى فى الباب الورانى الصاج دخل لجوة شوية نتيجة إحتكاك مع سيارة أخرى بس مش داخلة لجوة قوى يعنى ومن ساعتها الباب بقى تقيل عند نص المسافة بتاعته كده فهل ممكن الحتة المزنوقة دى تكون السبب فى عدم سهولة فتح الزجاج ؟
وهل ممكن يكون حصل إلتواء فى أى جزء حديدى من ماكينة الزجاج أو بسبب ضغط الحتة المحكوكة يؤدى إلى صعوبة حركة الزجاج ؟

[alking_2006]

اه طبعا (التواء صاج الباب او التواء صاج الماكينة) ممكن يكون السبب فى ان الزجاج مش بيتحرك بسهوله

كخطوة اولى ممكن تفك ماكينة الزجاج و تحاول تستعدلها بالشاكوش و دى حاجة سهله و لو كان السبب من صاج الباب ذات نفسه يبقى روح لسمكرى يستعدل الباب

فك ماكينة الزجاج سهل جدا
1- فك التجليدة بتاعة الباب
2- ارفع الزجاج لحد النص
3- هتلاقى تحت الزجاج مباشرة عند اخره مسمارين مثبتين الزجاج فى الماكينة و دول فكهم بمفك صليبة
4- بعد ما الزجاج يبقى حر الحركة بعد الفك, ارفعه بإيدك لحد اخره و ارشق مفك ما بين الزجاج و بين الباب من فوق علشان الزجاج ميقعش
5- هتلاقى عند الاكره بتاعة الزجاج 4 مسامير و دول فكهم بمفك صليبة
6- هتلاقى بعد الاكره بشويه فيه مسمارين على شكل نجمه و دول فكهم بمفتاح الأنكيه و دا الطقم ب 25 جنيه
7- بعد كدا هتلاقى الماكينة خرجت معاك, بص عليها و شوف لو فيها اى التواء عايز يستعدل

و على فكرة لو فيه التواء فى صاج الباب يبقى فى الغالب هتحتاجو تفكوا الماكينة علشان السمكرى يعرف يشتغل براحته

و تربيط الماكينة اعمل الخطوات دى بالعكس و الله الموفق

[mesaharaty]

طيب الفرش ده لما بيتفك وتيجى تركبه تانى بيبقى مظبوط ولا ما بيرجعش كما كان ؟

[alking_2006]

لا بيرجع مظبوط طبعا طالما بتركبه صح

[aymanay32]

فيه كلبسات ماسكه فرش الباب فى الصاج
بتشد الفرش بيطلع و لما بتركبة بتضغط على الكلبسات بيدخل مكانه تانى