مشكله كهرباء

[Italiano81]

ارجو الافاده
انا سافرت 3 اسابيع وكنت سايب المفاتيح لوالدى عشان يدور العربيه وكان كلو تمام لمده اسبوعين بعد كده العربيه بقت مش عاوزه تدور زالمهم لما رجعت شوفت ميكانيكا الراجل قالى ده بوجيهات وغيرها قالى هى بقالها اد ايه قولتله مكملتشى 2000 كيلو فاقالى كده يبقى انت محتاج تظبط تاكيهات وتنضف الكربراتير عشان دول الى خلوها تبوظ بسرعه زالمهم روحت للميكانيكى بتاعى وقالى نغير كمانكوندنسير وابلتين ونضف الكربراتير وظبط التكيهات وعملت مشوار حوالى 90 ك وتانى يوم مشيت بيها شويه امت وقفت فى نص السكه وحلفت ما تدور فيه كهربا ومارش بس مش بدور حد عنده فكره ده ممكن يكون ايه؟

[josephn]

أنا حصلت معاية قبل كده أكون ماشى مشوار حوالى ساعة أو أثنين و بعدين أبطلها علشان أروح أشترى حاجة أجى أدورها مترضاش تدور بس سبتها كده حوالى 1/4 ساعة بعد كدة حولت تانى أشتغلت بس مش عارف أيه السبب

[hamaza81]

هي العربية مش راضية تدور أساسا؟
واللا بتدورها مثلا تقوم تعمل تنتيشة وتبطل؟

[Italiano81]

هي العربية مش راضية تدور أساسا؟
واللا بتدورها مثلا تقوم تعمل تنتيشة وتبطل؟

للاسف مش بدور كان بلظبط مش فيها بنزين لدرجه سواق تاكسى قالى ده مش فيها بنزين وانا الموشر جايب اكتير من النص ومع ذلك رحت جبت 5 لتر وحطيتهم

[alking_2006]

ممكن بسبب فلتر البنزين مسدود
انتا بقالك قد ايه على فلتر البنزين دا لأنه بيتغير كل 40 الف

و هل فى الطبيعى بتمونها بأستمرار و لا بتستنى لحد ما التنك يكون على وشك انه يفضى خالص و بعد كدا تقوم ممون علشان الحركة دى بتخلى طرمبة البنزين تشفط الرواسب اللى فى تنك البنزين و تدخلها على الكاربراتير فبتضر (فلتر البنزين - طرمبة البنزين - الكاربراتير)

[Italiano81]

ممكن بسبب فلتر البنزين مسدود
انتا بقالك قد ايه على فلتر البنزين دا لأنه بيتغير كل 40 الف

و هل فى الطبيعى بتمونها بأستمرار و لا بتستنى لحد ما التنك يكون على وشك انه يفضى خالص و بعد كدا تقوم ممون علشان الحركة دى بتخلى طرمبة البنزين تشفط الرواسب اللى فى تنك البنزين و تدخلها على الكاربراتير فبتضر (فلتر البنزين - طرمبة البنزين - الكاربراتير)

انا دايما بمونها وهى على نص الموشر بس موضوع الفلتر ده انا شارى العربيه مستعمله وهى راكب فيها اتنين فلتى فا انا لما غيرت غيرت واحد بس والمفروض العربيه قبل ما تقف بسبب فلتر البنزين انها تنتش معايا فتره وده محصلش

[Amr Axel]

ايه يا ريس كل اللي الميكانيكي عمله ده اللي اعرفه انك لسه جايب العربية يبقي ليه كل الكلام ده
و هل سيبت البطارية بدون صيانة او تزويد مية فترة كبييرة و الوالد مكنش بيدورها كتيير ؟؟
لأن ممكن يكون السبب في كل ده البطارية
و عشان تتأكد اديها زقة و ارمي و شوف هتدور و لا لأ و تروح لكهربائي سيارات يقيس و عشان يتأكد هيقلبلك البطارية كلها و يحطلك حمض و يسيبها ع التونجر و يشوف هتشحن و لا لأ
و لو ربع فيها ضارب هتلاقي عين من العيون مش بتغلي زي الباقيين

[Italiano81]

ايه يا ريس كل اللي الميكانيكي عمله ده اللي اعرفه انك لسه جايب العربية يبقي ليه كل الكلام ده
و هل سيبت البطارية بدون صيانة او تزويد مية فترة كبييرة و الوالد مكنش بيدورها كتيير ؟؟
لأن ممكن يكون السبب في كل ده البطارية
و عشان تتأكد اديها زقة و ارمي و شوف هتدور و لا لأ و تروح لكهربائي سيارات يقيس و عشان يتأكد هيقلبلك البطارية كلها و يحطلك حمض و يسيبها ع التونجر و يشوف هتشحن و لا لأ
و لو ربع فيها ضارب هتلاقي عين من العيون مش بتغلي زي الباقيين

اكسيل باشا عامل ايه؟
بص يا باشا اولا العربيه انا شاريها مستعمله موديل 2000
تانى حاجه انا لسه جايب بطاريه جديده من 3 شهور وهى فارتا جافه وبلفعل فيه ميكانيكى بصلى عليها امبارح وقالى الكهربه مش داخله على الموتور وانهارده هاشوف كهربائى

[Amr Axel]

اكسيل باشا عامل ايه؟
بص يا باشا اولا العربيه انا شاريها مستعمله موديل 2000
تانى حاجه انا لسه جايب بطاريه جديده من 3 شهور وهى فارتا جافه وبلفعل فيه ميكانيكى بصلى عليها امبارح وقالى الكهربه مش داخله على الموتور وانهارده هاشوف كهربائى

الحمد الله انت عامل ايه ؟؟
انا كنت فاكرك جايبها زيرو فاستغربت انه عمل كل الكلام ده فكنت عامل كده ههههه
بس هو فعلا ممكن يكون الحوار كهربا و شوف و بلغنا باللي تم :)

[Italiano81]

اخر الاخبار الميكانيكى لسه مكلمنى دلوقت وقالى ان المشكله ان سير الكاتينه اتقطع وبكره هاوديهاله وبيقولى ربنا يستر ما تكونشى جابت صبابات كمان مع انى لسه عامل عمره كامله ومتغير فيها سير الكاتينه من 2000 كيلو بس

[Italiano81]

انا شكلى هاظبطها وابيعها و اجيب واحده زيرو او كسر زيرو نظرا لعدم وجود وقت للصنيعيه بس كنت عاوز اخد رايكم فى عرضها عشان انا فعلا مش هاعرف اسعرها هى ميكانيكا كلها اتظبطت ولسه معمولها عمره متكلفه 3150 وفيها بطاريه جديده من 3 شهور و2 كوتش جداد من 5 شهور مامشيوش 2500كيلو الزيوت كلها لسه متغيره من 1000 كيلو وطقم كهرباء جديد - العربيه موديل 2000 فبريكا جوه محتاجه تترش من بره الصالون جيد كل العدادات والانوار شغاله كويس هى العربيه بقالها معايا سنه بلظبط والرخصه فيها سنه كمان وفى السنه ده العربيه مشيت 4500 كيلو العربيه ده تعمل كام

[aymanay32]

انا اعتقد انها لما اتركنت فترة طويلة فالوساخة اللى فى فلتر البنزين ترسبت عليه و نشفت و سدت المسام بتاعته
و تسببت فى عدم الدوارة و الفصل بتاع العربية
و ان كل اللى عمله الميكانيكى كان اشتغالات لانه كان تقريبا فاضى و مافيش زباين غيرك
موضوع ان مافيش كهرباء داخلىة على الموتور ده غريب شوية و ممكن يكون اشتغالة برضوا
و خليك مع سير الكاتينة لحد باب الدار يعنى لحد ما تعرف الحقيقة بس لازم ساعة الفك تكون واقف بنفسك و تتاكد انه فعلا اتقطع مش تمثيلية بيعملها عليك الميكانيكى
و لو لقيته سليم يبقى لازم تغير الميكانيكى فورا

[Italiano81]

الموضوع طلع كلاتى ان سير الكتينه نط سنتين والعربيه وقفت وعشان انا حاولت ادورها فا الصبابات باظت واتغيرت وبقى كولو تمام ودلوقت انا بلين