صيانة السوزوكى سويفت

[wlng76]

انا اشترين سويفت مو 94 وعايز ميكانيكى كويس ويا ريت لو يكون حافظ السويف بالذات علشان عايز أظبط الموتور, وكمان أماكن قطع غيارة مضمونة وأصلى فى مدينة نصر.
سؤال كمان ممكن المواصفات الفنية للسويفت - أو الكتالوج.

[furp]

السلام عليكم

ازيك ياباشا والف مبروك علي العربيه

ربنا يباركلك فيها ويملهالك بركه

عموما اخوك برضك لسه مشتري السويفت جديد
ومعظم الي اعرفه عنها من استاذنا الكبير في المنتدي هنا
استاذ حازم
بس للاسف هو من المحله تقريبا فمعرفتش منه اماكن ميكانيكيا في القاهره

عموما في واحد كان شغال في توكيل سوزوكي وفتح ورشة وهو في ميدان لبنان ومعروف قوي لو سالت عليه هناك بمهندس السويفت
بس بصراحه انا مجربتوش

لكن انا في واحد انا بتعامل معاه هو عنده ورش وقطع غيار استيراد للسويفت وطبعا حفظنها صم هناك وده في دار السلام
لو تحب ممكن اديلك رقمه واوصفلك مكانه

بالنسبه لقطع الغيار هو فيه في شارع احمد حلمي والاستاذ حازم كان رشحلي محل اسمه ميدو2 وعموما هناك قطع غيار السويفت بالكتير يعني متقلقش

بالنسبه للكتالوج انا معايا بتاع 93 الياباني لو ينفع قولي ابعتهولك علي الميل


والف مبروك مره تانيه

[mtageldeen]

أولاً مبروك علي السيارة
ربنا يعطيك خيرها ويكفيك شرها

ثانياً: أتمني أن تخبرنا عن مواصفاتها (حالتها) وسعرها

[hazem_khidr]

الاستاذ furp قام بالواجب و رد عليك:)
بالنسبه للصيانات ف قولي حضرتك عاوز تعمل ايه بالضبط او بتشتكي من ايه.

[furp]

الاستاذ furp قام بالواجب و رد عليك:)
بالنسبه للصيانات ف قولي حضرتك عاوز تعمل ايه بالضبط او بتشتكي من ايه.

استاذ حازم باشا خضر

ربنا يخليك يارب

بس واجب ايه الي انا قومت بيه دانت كبيرنا هنا
وبرضك عاوزينك ترد وايدك معانا علشان نستفيد ونتعلم منك اكتر

وياريتك برضك متنساش كده وتفتكرنا دايما
وربنا يكرمك يارب والف شكر علي الخبرات الجميله
الي اتعلمناها منك

[hazem_khidr]

يا باشا لا خبرت و لا حاجه
اللي بيقدرني عليه ربنا بعمله
ميزتي اني مش بسيب العربيه واقفه عند اي صنايعي و امشي لازم بقف علشان اتعلم.
:)

[nav man]

الف مبروك انا معاي المنول بتاع السويفت بس انا 93 تقريبا مافيش اختلف

[wlng76]

ألف شكر لكل اللى رد علىً الأستاذ furp, والأستاذ حازم باشا خضر, والأستاذ محمد عادل, والأستاذ mtageldeen.
للأستاذ mtageldeen, مواصفاتها كالتالى, مو 94 حالتها رشة برة طبعا, وحالتها فعلا ممتازة, الموتور والعفشة وكمان أكتر حاجة عجبتنى فيها ان صالون السيارة كأنها ما اتركبتش قبل كدة, والكاسيت الأصلى, انا دفعت 35 ألف فيها, بالرغم من كتير قالولى ان كدة كتير بس انا حاسس الموضوع لو جه فى ألف مش مشكلة المهم ان العربية نضيفة وسليمة, وبحالتها, وبعدين انا شاريها من اول مالك.
بالنسبة للأستاذ حازم باشا, أنا ما بأشتكيش من حاجة معينة بس انا شاكك ان استهلاك البنزين مش كويس, تقريبا بتعمل 200 ك فى الصفيحة داخل المدينة, وأنا كنت متوقع اكتر من كدة زى ما سمعت عنا, ففكرت ان ممكن لو ميكانيكى فاهم فيها كويس هيعرف يظبطها كويس, سؤال كمان هية العربية دى فيها أبلاتين وكندنسر؟ فيها فلاتر بنزين؟ مكانها فين؟ لإنى مش شايف فلاتر بنزين, وكمان حاسس انهم محتاجين يتغيرواو لإن العربية بتلقط فى الدوران بسنة مارش وبعدين تبطل وما تدورش إلا لما ادوس دواسة البنزين كام مرة.

[nav man]

لا مافيهاش ابلتين وكوندنسر بس بتغير البوجيهات بالنسبة للبنزين انا مش فاكر بتعمل كام في المدينة انا بسافر بيها للقاهرة 220كم بتعمل 17 لتر بالضبط نص التنك عملية التدوير لازم تشوفها

[hazem_khidr]

العفو يا باشا علي ايه
1.مافيهاش ابلاتين و كوندنسر فيها اتوماتيك مكانهم و فيه شاكوش .
2.فيه فلتر بنزين تحت الكنبه الخلفيه بعد التانك علي طول و دا غالي شويه ب 25 جنيه باين وانا مركب كمان فلتر بنزين عادي قبل الكاربيراتير علي طول و دا مفيد جدا و بيشيل كتير.
3.بالنسبه لاستهلاك البنزين ف كده كويس جوه البلد اوي ما تخليش حد يلعب فيها.
4.العربيه بالمنظر اللي بتقول عليه عاوزه تتضبط الكهربا بتاعها و الهوا و علشان ما تبطلش اول ما تدورها

[wlng76]

شكرا يا حازم باشا على اهتمامك وردودك!
سؤال كمان : ايه الفلاتر اللى فى العربية, وأماكنها علشان انا عايز أغيرهم بنفسى لإنى بأستمتع لما بأعمل الصيانة البسيطة فى عربيتى ؟
وكمان ايه جدول الصيانات الدورية بالنسبة للسويفت؟

[furp]

شكرا يا حازم باشا على اهتمامك وردودك!
سؤال كمان : ايه الفلاتر اللى فى العربية, وأماكنها علشان انا عايز أغيرهم بنفسى لإنى بأستمتع لما بأعمل الصيانة البسيطة فى عربيتى ؟
وكمان ايه جدول الصيانات الدورية بالنسبة للسويفت؟

استاذ حازم باشا

ياريتك كمان تعتبرني معاك وانت بترد علي الدكتور

انا برضك فعلا محتاج اعرف كل الكلام الي فات
معلش بنتقل عليك

علشان حضرتك استاذنا الكبير

[Karim Salem]

الف مبروك ربنا يباركلك فيها

استاذ wlng76

اولا الف مبروك على العربية
انا كانت معايا عربيتى اللى فاتت كانت سوزوكى سويفت 93
العربية بسم الله ماش اء الله رائعة فى كل حاجة و عاوز اقول انها كانت معيا لمدة 5 سنين منهم 3 سنين سفر اسكندرية القاهرة كل اسبوع
انا بعت العربية بعد ما مشيت بيها 340000 كيلو و انا زعلان جدا عليها - لانى محسوك حبتين و باخد بالى من العربية و ايدى فيها على طول.
المهم هو خد بالك من اهم عيوبها ان السقف من عند الزجاج دايما بيعمل بارومة و ديه حلها انك كل لما تغسل العربية تنشف كويس المناطق ديه.
ثانيا الكوبلن بتعاها سخيف حبتين و غالى شوية - اوعى من اللى بيملوا الكوبلن و الكلام ده لانك فى الاخر كده كده هتجيب جديد.
غير كده العربية رائعة - سحب - ثبات (لحد اقصى سرعة 120) (مرة واحدة اخد الطريق بتاع القاهرة اسكندرية كله على سرعة 140-150 بس كان ظرف طارق و منصحش لان العربية بيكون ثباتها موش حلو على السرعات العالية).
عاوز اقولك هيا ابتدت تطلب مصاريف كتير بعد ال270000 (يعنى مثلا غيرت المساعدين الاماميين و السست الخلفية ، اسطوانة و كوبلن و اسبراتير) و كان الاسبراتير جدنينى لانى مكنتش لاقيه ( لاقيها اخير عند واحد صاحب تاكسى سويفت و كان شايل واحد احتياطى مستعمل و اخده منه بعد الفصال ب300 جنيه).
احسن مكيانيكى روحتلة هو نور (و ده ميكانيكى متخصص فى اليابانى) و تليفونه 0108207993 مكانة جنب الحديقة الدولية فى مدينى نصر.
على العموم انا تحت امرك فى اى اسئلة.
اخوك كريم سالم

[hazem_khidr]

شكرا يا حازم باشا على اهتمامك وردودك!
سؤال كمان : ايه الفلاتر اللى فى العربية, وأماكنها علشان انا عايز أغيرهم بنفسى لإنى بأستمتع لما بأعمل الصيانة البسيطة فى عربيتى ؟
وكمان ايه جدول الصيانات الدورية بالنسبة للسويفت؟

استاذ حازم باشا

ياريتك كمان تعتبرني معاك وانت بترد علي الدكتور

انا برضك فعلا محتاج اعرف كل الكلام الي فات
معلش بنتقل عليك

علشان حضرتك استاذنا الكبير

جمعت المشاركتين سوا لانهم نفس المحتوي و الاتنين من اخوات عزاز عليا اوي:)
الفلاتر :
1.فلتر الهوا و دا تحت العمه السودا في الموتور و دي بتتفك من تلات كليبسات بتنزلهم لتحت و تفك الصاموله في النص بيطلع معاك نص العمه حتلاقي الفلتر تحتها و هو ياباني ب 50 جنيه.
لو الفلتر مش عليه زيت انفخه في البنزينه لو عليه زيت غيره و قبل ما تغيره امسح مكانه ممكن يكون خرطوم بخار الزيت ناطر زيت في العمه نتيجه التبخير او غيار الزيت كان زايد(حصلت معايا مره و الفلتر باظ)
2.فلتر البنزين و دا تحت و لازم ميكانيكي يبص عليه و الفلتر اللي فوق ف دا مش موجود في كل العربيات انا عن نفسي ركبته في العربيه يوم ما جبتها و كل فتره بغيره قبل ما يتسد.
3.فلتر الزيت و دا ممكن تشوفه من الكبود في اسفل يسار الموتور و دا بيتغير مع الفلتر.
انا بغيره كل 5000 كيلو(كل غيار زيت ) بستعمل موبيل XHP و زيت ممتاز فعلا.
4.بالنسبه للبوجيهات ف انا ما غيرتش بوجيهات من سنه و نص الحمد لله
كنت جايب طقم بوش من الامارات الماني اصلي و لسه فيها من يوم ما جيت و حبعت اجيب زيه لانه ممتاز فعلا بس انا بجيب البوجيه الرفيع و سن طويل.
العربيه معايا ما شاء الله مش بتتعبني في حاجه و اللي مداوم عليه بس هو الزيت و الفلاتر
5.بالنسبه للسيور ف انا كل 30 الف كيلو بغير سير الكاتينه و الدينامو و التكييف
و دايما بخلي معايا سير دينامو احتياطي.
6.زيت الفتيس بغيره كل سنه و بجيب اسو خفيف الكيلو ب 11 جنيه و بتاخد في حدود 3 كيلو.
7.مياه الردياتير ممكن تحط ميه عاديه مش حتعمل حاجه بس الافضل مياه خضرا و انا بفضل وموبيل.
8.زيت الباكم بستعمل دوت 3 و بزوده كل سنه او كل سنه و نص مش فاكر بصراحه بنساه.
9.بالنسبه للعفشه فدائم التربيط يعني كل شهرين تلاته اربطها مره و لو اي صوت طلع منها اجري اشوف الصوت دا من ايه و لو حتغير حاجه في العفشه غير جديـــــــــــــــــد و اياك و الاستعمال.
دا اللي فاكره دلوقتي لو في اي سؤال انا تحت امركم :)

[wlng76]

أستاذ حازم, أستاذ كريم؛ شكرا ليكم جدا على اهتمامكم وكرمكم فى الرد.