الفتيس بيهرب

[alking_2006]

السلام عليكم

دلوقتى فيه مشكلة فى الماروتى و الرجاء الافادة

لما ببقى طالع على اى نقلة بحرك الفتيس بسهولة عادى لكن العربية ذات نفسها مش بتاخد النقلة على طول يعنى بقعد عمال ازود بنزين و فجأة العربية تاخد النقلة بعد ما اكون زودت بنزين جامد فتقوم ناطة و ناتشة من مكانها و شبة طالعه امريكانى و النطة دى بتبقى جامدة اوى فى الغيار الاول و المارشدير و بتقل مع التانى و اقل مع التالت و اقل مع الرابع

مع العلم انى مغير طقم الكهربا و الفلاتر كلها و السيور و منظف الكاربراتير

فأنا شاكك فى الدبرياج الديسك و الاسطوانة و البلية مع العلم ان العربية بتشد معايا كويس لحد 100 و موديلها 99 و مشميتش ريحة شياط

ارجو الافادة

[Amr Axel]

لما بتدوس بنزين خفيف كأنك طالع عادي فيه رجرجة سواء اولاني او مارشدير ؟؟ و لا فيه هزة او رجة طول الوقت

دور العربية و خليها ع السلانسيه شوف هتسمع زي صوت حاجة بتخبط و لا صوت الموتور بس بدون ما حاجة تخبط

و العربية ع السلانسيه بعد ما تدور عالطول دوس تكة ع الدبرياج يعين أقل من ربع دوسة كمان كأنك ساند عليه بس اسمع اذا كان فيه صوت حرت او حاجة بتحك و لا لأ

و اهم حاجة اعمل الكلام ده في مكان هادي مفيهوش دوشة عشان تقدر تسمع , شوف الليلة دي و انا منتظر ردك :)

[waelgam2005]

يانهار ابيض ومقندل بنيلة عليا ايه ده كله انا مش فاهم اى حاجه
ربنا يستر والعربيه متعملش حركات نص كوم لانى هغرق فى شبر ميه عشان اعمل الكلام ده كله
وده كله عشان بس اشوف المشكلة من ايه امال لما تيجى نعالج العيب اللى فيها هنعمل ايه

[alking_2006]

حبيبى يا اكسل باشا شكرا لإهتمامك
بالنسبة للأسئلة اللى سألتها اتفضل النتيجة

لما بتدوس بنزين خفيف كأنك طالع عادي فيه رجرجة سواء اولاني او مارشدير ؟؟ و لا فيه هزة او رجة طول الوقت

بيبقى فيه رجرجه فى الأولانى او المارشدير لكن بحس انها بتاخد الغيار متأخر يعنى بكون معشق فتيس و بشيل رجلى من على الدبرياج و بدوس بنزين بالراحة الاقيها مأخدتش الغيار الا بعد حوالى 3 ثوانى و بسمع زى صوت بلية بتلف كدا فى خلال ال 3 ثوانى و فجأة بتقوم واخدة الغيار طبعا بعد ما بتكون اخدت بنزين كتير فبتقوم طالعه امريكانى

دور العربية و خليها ع السلانسيه شوف هتسمع زي صوت حاجة بتخبط و لا صوت الموتور بس بدون ما حاجة تخبط

مفيش صوت حاجة بتخبط

و العربية ع السلانسيه بعد ما تدور عالطول دوس تكة ع الدبرياج يعين أقل من ربع دوسة كمان كأنك ساند عليه بس اسمع اذا كان فيه صوت حرت او حاجة بتحك و لا لأ

و انا مش دايس خالص دبرياج بسمع صوت ونه كدا مؤخرا و لما بدوس دبرياج لحد الاخر بتروح الونة و الكلام دا و انا على السلانسيه
انا ان شاء الله هوديها للميكانيكى الاسبوع الجاى لكن كنت عايز حد يطمنى الموضوع ايه ابعاده

[aymanay32]

اولا خلى الميكانيكى يشوف لك ظبطه سلك الدبرياج عاوز يتربط شوية
ثانيا غير زيت الفتيس

[Amr Axel]

اذن يؤسفني أقولك ان كده غالبا طقم الدبرياج :(

العربية موديل كام و عاملة كام الف ؟ و اخر مرة غيرت سير الكاتينة كان ع كام ؟ و زيت الفتيس ؟ و هل شحمت و ربطت عصاية الفتيس قبل كده ؟

[alking_2006]

اذن يؤسفني أقولك ان كده غالبا طقم الدبرياج :(

العربية موديل كام و عاملة كام الف ؟ و اخر مرة غيرت سير الكاتينة كان ع كام ؟ و زيت الفتيس ؟ و هل شحمت و ربطت عصاية الفتيس قبل كده ؟

طقم دبرياج صح؟

العربية موديل 99 و عاملة اما 115 الف او 215 الف مش عارف لانى اشتريتها كانت عاملة 87 الف و مش عارف 87 و لا 187

اخر مرة غيرت سير الكاتينه كان 107 الف يعنى عامل كدا 8 الاف كيلو

زيت الفتيس غيرته على 106 الف يعنى عامل كدا 9 الاف كيلو

و عصاية الفتيس لسه متربطة و متشحمة مبقلهاش الف كيلو

و معلومة صغيرة العربية عملت كدا بعد ما عملت بيها مشوار لاسكندرية و رجعت فى نفس اليوم بس مكونتش بقرص يعنى اخرى 90 او 100

بس عايزك تعرفنى سعر طقم الدبرياج الاصلى بكام و مصنعية الميكانيكى هتبقى فى حدود كام و التغيير هياخد يوم و لا اكتر؟

و شكرا

[Amr Axel]

طقم دبرياج صح؟

العربية موديل 99 و عاملة اما 115 الف او 215 الف مش عارف لانى اشتريتها كانت عاملة 87 الف و مش عارف 87 و لا 187

اخر مرة غيرت سير الكاتينه كان 107 الف يعنى عامل كدا 8 الاف كيلو

زيت الفتيس غيرته على 106 الف يعنى عامل كدا 9 الاف كيلو

و عصاية الفتيس لسه متربطة و متشحمة مبقلهاش الف كيلو

و معلومة صغيرة العربية عملت كدا بعد ما عملت بيها مشوار لاسكندرية و رجعت فى نفس اليوم بس مكونتش بقرص يعنى اخرى 90 او 100

بس عايزك تعرفنى سعر طقم الدبرياج الاصلى بكام و مصنعية الميكانيكى هتبقى فى حدود كام و التغيير هياخد يوم و لا اكتر؟

و شكرا

لو العربية مغيرتش طقم دبرياج من ساعتها يبقي كتر خيرها اوي
و زي مقولتلك غالبا طقم الدبرياج لكن العربية مش قدامي عشان احدد اكتر و ممكن يكون الطقم محتاج يتغير بس تقدر تستخدمها كام شهر كمان فاللي يحدد الحالة الميكانيكي بس المهم يكون ميكانيكي عنده ضمير مش واحد عايز يعمل شغل و خلاص

و صوت الونة اللي عندك شاكك انها تكون بلية الشداد محتاجة تتغير او بلية الفتيس

و عامة طقم الدبرياج عندك أقل حاجة هيلعب في 250-300 فاليو كوري
و فيه اس جي بي هندي اللي المفروض بينزل مع العربية اساسا الفبريكة يعني ع حد علمي و فيه ليتل برده هندي بس الحقيقة مش عارف اسعارهم حاليا
المصنعية للميكانيكي في حدود 80 -100 ج
هو يوم واحد و كتيير كمان فك و تركيب الطقم مبياخدش دقايق يعني المشكلة كلها بتكون في فك الفتيس و نزوله
يعني تقدر تقول 4 - 5 ساعات يكون مخلص و مجرب العربية و بيدلع كمان في الشغل

بس خلي بالك لو هتغير خليه يبصلك ع وش الفلام لأن وش الفلام لو مش بالنعومة المطلوبة هتلاقي العربية بترعش في الطلعة و فيه ناس بيقولوا تتنعم عند خراط لكن مسمعتش ان الموضوع نجح و بالتالي وش الفلام بيتغير كله و وش الفلام ده زي اسطوانة كده بيركب عليها الطقم و يفضل تغيير سلك الدبرياج و زيت الفتيس مع الطقم و شوف فيبرة الفتيس بالمرة

و اي حاجة تجيبها خد القطعة القديمة معاك و جيب عليها لأنها احيانا بتفرق فرق ملم و خصوصا في طقم الدبرياج لأنه وجع دماغ و مترميش ابدا اي قطع غيار راكبة في العربية خاصة لو فبريكة عشان تقدر تجيب عليها

[waelgam2005]

طيب انا عندى رجه فى الاول بس رجه بحس فى الاستاند بتاع السماعات معرفش ده عشان ركبت فيه سماعتين ومع الفك والتركيب والحمل بتاع السماعتين واكمنها فيبر فا عامله الصوت ده ولا ايه مش فاهم وطبعا العربيه لسه مكملتش الالف كيلو لسه وموديل 2012 اوعى تقولى كدا طقم دبرياج

[Amr Axel]

طيب انا عندى رجه فى الاول بس رجه بحس فى الاستاند بتاع السماعات معرفش ده عشان ركبت فيه سماعتين ومع الفك والتركيب والحمل بتاع السماعتين واكمنها فيبر فا عامله الصوت ده ولا ايه مش فاهم وطبعا العربيه لسه مكملتش الالف كيلو لسه وموديل 2012 اوعى تقولى كدا طقم دبرياج

لا متقلقش هي ممكن يكون من الرف بس جرب تشيله و اطلع بالعربية و شوف
و الرجة بتاعت طقم الدبرياج هتلاقي العربية نفسها بتترجرج كانها هتبطل منك

[walaaeldeen]

السلام عليكم
ده في الغالب اسطوانة الدبرياج بس ياريت تبص الأول علي حشو عصاية الفتيس ولو طلعت طقم الدبرياج نصيحة لاتغيره بطقم دبرياج الهندي او الياباني نصيحه غيره بنوع اسمه فاليو
والله المستعان

[walaaeldeen]

السلام عليكم
ضع بين الرف بتاع السماعات وبين المسندين الموجودين علي الطرفان اسفنج بيلزق من ناحية وناحيه لأ
والله المستعان

[Amr Axel]

السلام عليكم
ده في الغالب اسطوانة الدبرياج بس ياريت تبص الأول علي حشو عصاية الفتيس ولو طلعت طقم الدبرياج نصيحة لاتغيره بطقم دبرياج الهندي او الياباني نصيحه غيره بنوع اسمه فاليو
والله المستعان

طب ممكن نعرف ليه بلاش هندي ؟؟ سيبك من الياباني احنا عارفين ان الياباني دلوقتي هنا لا راح اليابان و لا شافها
لكن الهندي يعني حاجة زي الاس جي بي اللي نازل مع العربية اساسا
والفاليو الكوري نضيف طبعا لكن الأصلي منه و للأسف الموضوع أصبح شبه معدوم انك تلاقي فاليو أصلي الاغلب الصيني اللي نزل تقليد و اللي بسببه شركة فاليو الاصلية اضافت شعار ع العلبة للتفرقة لكن ده يخلينا نقلق انه ممكن يتغير خاصة في ظل جشع بعض التجار

[alking_2006]

يعنى ممكن يكون حشو عصاية الفتيس السبب؟ هيا فعلا عايزة تتغير لكن متهيألى مش هيا السبب
دلوقتى الغيار بقى بيتاخد و يفصل و بعد كدا يتاخد تانى
ان شاء الله انا رايح الجمعه للميكانيكى

[Inteltech]

ده دبرياج يا باشا ولازم تحل مشكلته علشان مش يأثر على الفتيس وشكرا