اخيرا تقرير عن عربيتى الماروتى الجديدة..

[amgadshah]

أخيرا وبعد طول انتظار وتأخير شهر وشوية..
تقرير عن عربيتى الجديدة ماروتى 2012 ..

انا اولا كنت هجيب العربية من المصرية رحت واتفرجت لقيتها عامله 217 كم تخيلوا!!يعنى معنى كده انها جاية من القاهرة ابو رواش لاسكندرية ماشية..
وفى اعضاء بصراحة خوفونى من المصرية وغشهم وتعاملاتعم اللى مش دوغرى..
رحت توكلت على الله ورحت لأحمد مرعى مكان محترم وموزع معتمد للسوزوكى والنيسان ولقيت العربية عاملة حاجة واربعين كم ..فقلت ادى العيش لخبازه ..وعملولى نفس الخصم اللى المصرية عملتهولى وهو 250 جنيه..يعنى بدل 39750 بقى 39500 بس محطوليش فيها قشاية حتى الدواسات معطوهانيش يعنى من الاخر معطونيش اى هدية على انى اسمع فى صالات بتدى غطاء او دواسات او حتى ميدالية..


المهم العربية قرفتها حلوة الصراحة وكل ورقها مشى صاروخ حتى المرور عملنالها ملف ونمر وكل شيء فى ساعة وشوية ..
هو ملاحظاتى على العربية طبعا هى جميلة وخفيفة وشكلها جميل والاهم من ده كله انها زيرو..
بس الصراحة حاسس ان عربيتى القديمة كانت اعفى منها كتير ..
هو انا كان معايا سيات 133 حمارة شغل طلعت عين ابوها مكنش ليها اى طلبات غير حبة البنزين اللى بتاخده و وشوية المية كل كام يوم والزيت كل سنة تقريبا..يلا الله يرحم ايامها بقى بس صراحة مفتقد دوشتها وصوت مكنتها العالى جدا جدا وعداداتها اللى مش شغالة بس ادى سنة الحياه ..
بس بجد الماروتى عربية بسم الله ما شاء الله عربية تقييمى ليها انها ممتازة جدا وادى صورتين كمان ليها ..

ودى صورة اختها الكبيرة واقفة وراها..


أرجو إن موضوعى يكون خفيف عليكوا وأنا بهدديه للأخين العزيزين ..
Axel و </B>waelgam2005

[S O P H O S]

الف مبروك يا باشا
تقرير جميل وعربية ربنا يباركلك فيها
عاملها بس براحة خصوصا فالاول
وربنا يوفقك ..

[mody3on]

الف الف مبروك وربنا يهنيك بيها يا باشا
بس 40 الف في ماروتي ! :( طب ومفيش اي كماليات ؟

[waelgam2005]

مبرووووووووووك ياباشا العربيه دى اخت بتاعتى حتى الجلدة اللى عند البيبان لدرجة انى فكرت انت اخدت عربيتى وصورتها عندك هههههههه
مبروك يا جميل

[mrghost]

الف الف مبروك وربنا يباركلك فيها يارب

[mrghost]

اهم حاجه بالراحه عليها ف المطبات لان عفشتها ضعيفة

[amgadshah]

الف مبروك يا باشا
تقرير جميل وعربية ربنا يباركلك فيها
عاملها بس براحة خصوصا فالاول
وربنا يوفقك ..

الله يبارك فيك يا رب..
اهو بحاول اتعامل معاها واحده واحده وربنا ستار فى الاول والاخر..

[amgadshah]

الف الف مبروك وربنا يهنيك بيها يا باشا
بس 40 الف في ماروتي ! :( طب ومفيش اي كماليات ؟

الله يبارك فيك يا باشا

والله زى ما بقولك مفيهاش قشاية..بس بينى وبينك رحمة ..اصل اسكندرية بقت زحمة يمكن اكتر من القاهرة كمان ولازم معاك عربية مريحة فى سواقتها ..

[amgadshah]

مبرووووووووووك ياباشا العربيه دى اخت بتاعتى حتى الجلدة اللى عند البيبان لدرجة انى فكرت انت اخدت عربيتى وصورتها عندك هههههههه
مبروك يا جميل

الله يبارك فيك يا باشا مهوانت عريس ماروتى جديد زيى ..
عموما ربنا يكفينا شرهم ويدينا خيرهم..

[amgadshah]

الف الف مبروك وربنا يباركلك فيها يارب

الله يبارك فيك يا باشا وشكرا لذوقك..
أنابحاول اتعامل معاها بالراحة خالص وربنا المستعان

[amgadshah]

بس غريبة كله اتكلم عالعربية الجديدة ومحدش اتكلم على اختها الكبيرة اللى واقفة منوره وراها؟؟ :(

[hamaza81]

ألف مبروك وربنا يرزقك خيرها ويكفيك شرها

[amgadshah]

ألف مبروك وربنا يرزقك خيرها ويكفيك شرها

الله يبارك فيك يا باشا وشكرا لذوقك.

[BUNSH]

الف مبروووك وربنا يباركلك فيها يارب ..
وفعلا عربياااات دية تنفع فى الشوارع اللى نااس راكنها فيها صف 3 و5 وااكيد تركنها فى اى حتة وبتشم البنزين ومبرووك مرة تانية ...

[amgadshah]

الف مبروووك وربنا يباركلك فيها يارب ..

وفعلا عربياااات دية تنفع فى الشوارع اللى نااس راكنها فيها صف 3 و5 وااكيد تركنها فى اى حتة وبتشم البنزين ومبرووك مرة تانية ...

اولا طبعا الله يبارك فيك وشكرا لحضرتك..

اما بالنسبة لموضوع بتشم البنزين فده فيه كلام .. انا حاسس ان استهلاكها فى البنزين عالى شوية ..بس يمكن عشان انا بتحرك بيها كتير.