عاوز اشتري ماروتي

[egyptiandiver]

مبروك

[ibrahimmcse]

الله يبارك فيكم لسه هاظبط شوية حاجات واعمل تقرير كامل عن العربية

[Amr Axel]

منتظرين يا باشا تقريرين ان شاء الله

تقرير عن العربية
و تقرير عن التغييرات

مهو مش هتهرب هههههههه

[ibrahimmcse]

منتظرين يا باشا تقريرين ان شاء الله

تقرير عن العربية
و تقرير عن التغييرات

مهو مش هتهرب هههههههه

ان شاء الله بكرة هاروح اغير سير الكاتينة وسير الدينامو واعمل تقرير مفصل ان شاء الله
ماقدرش اهرب

[pop man]

مبروووووووووك وطمنى علشان بفكر فيها وخايف :)

[waelgam2005]

مبروووووووووك وطمنى علشان بفكر فيها وخايف :)

خايف ليه انت لقيت حد فى مصر بيقولك العربيه دى وحشة؟؟ سيبك من الشكل والاكسسورات العربيه دى بامانه عملية جدا انت هتعوز ايه من عربيه بتمشى وعلى اربع عجلات وب 40 الف جنيه وتريحك من التاكسيات والمواصلات وقرفها
الماروتى دى نعمه واللى يكرهها يعمى :)

[ibrahimmcse]

تقرير عن عربيتي الماروتي

من فترة طويلة وانا بحب العربية الماروتي ولما قررت اجيب عربية في حدود الفلوس اللي معايا واقتصادية وموديل مش قديم عشان مايطلعش عيني مع الصنايعية و قطع الغيا وخاصة اني ساكن في العاشر من رمضان فاخذت القرار على ماروتي وقولت اجيب حاجة 2008 او 2007 وبالفعل اتفقت مع زميل ساكن في مدينة نصر ننزل السوق في يوم جمعة

وانا ماشي في العاشر لقيت معرض مستعمل حاطط ماروتي فضي

كنت راكب تاكسي لما روحت تاني يوم جبت نمرتهم وكلمتهم قالي ماروتي 2008 معروضة ب 26 الف

اخذت معايا سواق في الشركة بيفهم في العربيات اتفرج عليها لقيناها رشة رفرف وباب كانت واخدة خبطة بسيطة ودواخل فربيكة بس العربية حالتها كويسة من هنا لهنا وصلنا ل 25 ونص شاملة عمولة المكتب

دفعت مبلغ واخدت العربية وروحت بعدها بيومين اخذت التوكيل و الرخصة (الرخصة كانت منتهية و الراجل بيجددها وجددها سنة ونصف تنتهي في 11 -2013

دي تعتبر اول عربية ليا كنت بسوق عربية اخويا من زمان بس نسيت السواقة

بدات اسوق بالراحة و العاشر مش زحمة فالموضوع سهل

نصحوني الزملاء اني اغير البوجيهات و السيور

روحت جبت طقم بوجيهات ب 35 جنيه وكوندنسر وابلاتين ب 20 جنيه

ورحت لواحد جمب البيت عندي غيرت زيت وركبلي البوجيهات و الكوندنسر و الابلاتين

غيرت زيت حطيت موبيل الجركن الابيض ب 85 جنيه اخدت 2ونص كيلو وفاض معايا كيلو نصف قالولي المرة الجاية اشتري كيلو واحد واغير وده بيتغير كل 2500 او 3000 كيلو

وروحت مونتها قولت ادلعها في الاول حطيتلها 92

كان فيها حوالي ثلث التانك اخدت 18 وربع لتر ب 34 جنيه تقريبا

حسيت بعدها انها بتطير مش بتمشي واضح ان المعلم كان بيديها 80

طبيعي انا مش بمشي بيها كتير

لحد دلوقتي بعد التفيولة عملت 235 كيلو و مؤشر البنزين على نصف التانك

اعتقد لو نصف التانك 14 لتر تبقى استهلاكها ممتاز حوالي 330 في الصفيحة

بالنسبة للسيور روحت قالولي في واحد في العاشر شغال في الياباني روحتله سألته على السيور قالي لازم تجيبلي ارقامها او تخلي الميكانيكي يفكها واجيبلك زيها

قولتله طيب عاوز مراية شمال المراية ناعمة بتقفل لوحدها من الهوا قالي بتتباع الاتنين سوا ب 70 جنيه الاتنين جبتهم وروحت جايب المفك ومغير المراية الشمال وسيبت اليمين وشغالة زي الفل من ساعتها

رجعت للميكانيكي اللي جمبي قالي ابقى هاتهالي افكلك السيور وتروح تجيب زيها واركبهالك

قولت اروح يوم السبت عندي اجازة وابقى براحتى

روحت للميكانيكي الناهردة لقيته قافل

بكرة ان شاء الله هاغير السيور عشان مسافر المحلة يوم الاربع مشوار حوالي 160 كيلو

وهابقى اكمل واقوللكم عملت ايه مع السيور و مع السفر

[hih2]

بارك الله لك فيها

وفي انتظار جديدك

[Amr Axel]

تمام يا باشا و في انتظار تقرير عن السيور و قطع الغيار بس في موضوع منفصل في القسم و يا سلام لو صور تبقي عملت حاجة واجب هههههههههه