سير الكاتينة و الدينامو للماروتي

[ibrahimmcse]

عاوز اغير سير الكاتينة و السر الدينامو
روحت اجيبهم الراجل قالي لازمي تجيبلي الرقم بتاع السير او تجيب السير معاك
الميكانيكي قالي افكهولك تجيب ذيه
ماحدش يعرف الارقام دي ولا لازم افكه
وشكرا

[mesaharaty]

عامة لو رحت من غير الرقم لأى بتاع قطع غيار متخصص فى السوزوكى حيديك السيور على طول لأنها بالنسبة له محفوظة .
وأرشح لحضرتك إما ميدو اللى فى أحمد حلمى أو سوزوكى سنتر إللى فى التوفيقية .
بس ياريت تنقى نوع كويس إن أمكن

بالتوفيق

[hamaza81]

ولا مقاسات ولا أرقام
خليك في المضمون
في نوع كذا حد هنا استعمله وانا برضه استعملته
SGP اللي هي Suzuki Ginuine Parts
ودا ثمنه بـ 35 جنية عند ميدو

في وسط البلد عندك كذا حد
في سوزوكي سنتر في التوفيقية
وفي رامي اللي هو في أحمد حلمي
لو انت قريب من دمشق في أكرم حمدي بس دا هتلاقي عنده غالي
Continintal بـ 65
Sun بـ 85

[Amr Axel]

أضيف واحد ع ميدو شبرا و سوزوكي سنتر التوفيقية و اكرم حمدي شارع دمشق
ليدرز في الدقي شارع ايران حاجتهم نضيفة

و نصيحة مني متجيبش اي سير معليهوش اي بيانات خاصة سير الكاتينة لأنه يعتبر زي ما تقول من روح الموتور لأنك ممكن تلاقي واحد يقولك هندي و نضيف و يعملك من البحر طحينة و يا دوب عليه حتة استيكر ملوش تلاتين لازمة ميفرقش عن الصيني حاجة

جيب حاجة مكتوب عليها كل البيانات و تكون هندي او ياباني فعلا مش هندي لا راح الهند و لا شافها او ياباني لا شاف اليابان و لا راحها

في سير الدينامو يفضل تجيب نفس المقاس ممكن واحد يقولك مقاس اكبر درجة ولا اتنين عادي
هو اه عادي و مش هيأثر و الصنايعي هيحرك الدينامو حسب مقاس السير و يركبه لكن نصيحتي تجيبه نفس المقاس

و قدامك حل من التلاتة في الشراء
ياما الميكانيكي يفك السيور و تجيب عليها

ياما واحد متخصص سوزوكي يكون عارف بس خلي بالك لأنهم ساعات بيدوا حاجات غلط و حصلت معايا كذا مرة بالرغم اني قايله المقاس و يجيبلي مقاس غلط لو واحد مش عارف هيدب مشاوير

ياما تشوف الكتالوج و تجيب ع نفس المقاسات

و انا مع الحل الأول ان الميكانيكي يفك و تجيب عليه

و عايز انبهك لنقطة كل قطع الغيار الفبريكة لما تتفك متسيبهاش للميكانيكي حتي لو هيديلك فلوس عليها خدها شيلها لأن هي ديه اللي هتجيب عليها بعد كده بدل ما تفضل تفك و تدب مشاوير و ترجع و تدوخ , عشان الميكانيكية اغلبهم اغبية تقليب قطع غيار من الزباين

و منتظرين تقرير عن تغيير السيور و شرائها اوعي تنسي بقي :)

[ibrahimmcse]

الف شكر يا شباب
ان شاء الله هاروح للميكيانيكي يوم السبت يفكهم وبعدين اروح اجيب زيهم
المشكلة اني في العاشر من رمضان وفيه ناس شغالة في الياباني وبيقولي عندنا
ان شاء الله هاعمل تقرير عن العربية و السيور وكل حاجة

[Amr Axel]

تمام يا باشا و نحن في الانتظار التقرير

معلش اول تغييرة لقطع الغيار بتبقي مقرفة عشان لسه متعرفش القطع لكن طالما معاك القطع القديمة هتجيب عليها بعد كده ان شاء الله عالطول و تروح تركب و تمشي :)