إعـــــــلان

Collapse

.

,
See more
See less

تقرير عن عربيتي الماروتي

Collapse
X
 
  • Filter
  • الوقت
  • Show
Clear All
new posts

  • تقرير عن عربيتي الماروتي

    تقرير عن عربيتي الماروتي
    من فترة طويلة وانا بحب العربية الماروتي ولما قررت اجيب عربية في حدود الفلوس اللي معايا واقتصادية وموديل مش قديم عشان مايطلعش عيني مع الصنايعية و قطع الغيار وخاصة اني ساكن في العاشر من رمضان فاخذت القرار على ماروتي وقولت اجيب حاجة 2008 او 2007 وبالفعل اتفقت مع زميل ساكن في مدينة نصر ننزل السوق في يوم جمعة
    وانا ماشي في العاشر لقيت معرض مستعمل حاطط ماروتي فضي
    كنت راكب تاكسي لما روحت تاني يوم جبت نمرتهم وكلمتهم قالي ماروتي 2008 معروضة ب 26 الف
    اخذت معايا سواق في الشركة بيفهم في العربيات اتفرج عليها لقيناها رشة رفرف وباب كانت واخدة خبطة بسيطة ودواخل فربيكة بس العربية حاتها كويسة من هنا لهنا وصلنا ل 25 ونص شاملة عمولة المكتب
    دفعت مبلغ واخدت العربية وروحت بعدها بيومين اخذت التوكيل و الرخصة (الرخصة كانت منتهية و الراجل بيجددها وجددها سنة ونصف تنتهي في 11 -2013
    دي تعتبر اول عربية ليا كنت بسوق عربية اخويا من زمان بس نسيت السواقة
    بدات اسوق بالراحة و العاشر مخش زحمة فالموضوع سهل
    نصحوني الزملاء اني اغير البوجيهات و السيور
    روحت جبت طقم بوجيهات ب 35 جنيه وكوندنسر وابلاتين ب 20 جنيه
    ورةحت لواحد جمب البيت عندي غيرت زيت وركبلي البوجيهات و الكوندنسر و الابلاتين
    غيرت زيت حطيت موبيل الجركن الابيض ب 85 جنيه اخدت 2ونص كيلو وفاض معايا كيلو نصف قالولي المرة الجاية اشتري كيلو واحد واغير وده بيتغير كل 2500 او 3000 كيلو
    وروحت مونتها قولت ادلعها في الاول حطيتلها 92
    كان فيها حوالي ثلث التانك اخدت 18 وربع لتر ب 34 جنيه تقريبا
    حسيت بعدها انها بتطير مش بتمشي واضح ان المعلم كان بيديها 80
    طبيعي انا مش بمشي بيها كتير
    حد دلوقتي بعد التفيولة عملت 235 كيلو و مؤشر البنزين على نصف التانك
    اعتقد لو نصف التانك 14 لتر تبقى استهلاكها ممتاز حوالي 330 في الصفيحة
    بالنسبة للسيور روحت قالولي في واحد في العاشر شغال في الياباني روحتله سألته على السيور قالي لازم تجيبلي ارقامها او تخلي الميكانيكي يفكها واجيبلك زيها
    قولتله طيب عاوز مراية شمال المراية ناعمة بتقفل لوحدها من الهوا قالي بتتباع الاتنين سوا ب 70 جنيه الاتنين جبتهم وروحت جايب المفك ومغير المراية الشمال وسيبت اليمين وشغالة زي الفل من ساعتها
    رجعت للميكانيكي اللي جمبي قالي ابقى هاتهالي افكلك السيور وتروح تجيب زيها واركبهالك
    قولت اروح يوم السبت عندي اجازة وابقى براحتى
    روحت يوم السبت مالقتش الميكانيكي روحتله يوم الاحد بعد الشغل
    فك سير الدينامو و الكاتينة وفلتر الهواء و قالي هات فلتر زيت
    روحت لواحد مشهور في العاشر من رمضان اسمه العفيفي لقيت عنده سير الكاتينة ياباني مكتوب عليه سوزوكي ب 80 جنيه وفلتر الزيت تايواني ب 20 جنيه مكتوب عليه تويوتا وقالي باقي الحاجات قالي مش موجوده
    روحت لواحد تاني لقيت عنده سير الدينامو جوود يير ب 15 جنيه
    وبعد دوخة مالقتش فلتر الهواء قالولي ركب فلتر هواء بتاع 128 جبته ورجعت للميكانيكي قالي استرب انت وانا اول ما اخلص هارنلك . بعد ساعة تقريبا لقيته بيرن نزلت استلمت العربية كله تمام
    تاني يوم روحت مونت عشان مسافر يوم الاربع
    فولت اخدت 16 لتر 92 كانت عاملة 240 كيلو من اخر تفويلة يعني 300 في الصفيحة جوا البلد
    يوم الاربع قررت امشي بدري عشان الحر
    نزلت الساعة 5 الصبح اطمنت على المياه و الزيت واخدت معايا السيور اللي طلعت من العربية
    شنطة العربية مش وحشة اخدت حاجات معقولة وحطيت باقي الحاجات في الكرسي الخلفي جمب الاولاد
    وتوكلت على الله سافرت من العاشر للمحلة طلعت على السلام ثم الدائري ثم اسكندرية الزراعي
    الطريق كان فاضي وجميل ومشيت معظم الطريق على 80 كيلو
    اخدت الطريق في نفس واحد 150 كيلو بالظبك وصلت المحلة الحمد لله بالسلامة قضيت يومين وطلعت على دمياط الجديدة اول يوم في رمضان كان جمعة و الطريق فاضي
    حوالي 83 كيلو بالظبك
    وجيبت بيها 100 على الطريق الدولي
    وناوي ارجع ان شاء الله على العاشر من الطريق الدولي
    اللي اكتشفته وانا في الطريق ان احيانا لما بيبقى الطريق مش مظبوط وانا بجري العربية بتلب وتحك في العجلة الخلفية اخويا قالي يبقى المساعد الخلفي مش مظبوط
    وممكن ينحل الكاوتش
    ناوي ان شاء الله لما ارجع اظبطه
    اجمل حاجة ممكن تشوفها في دمياط ان فيه في كل شارع 50 عربية ماروتي
    وانا راكن العربية تلاقي جمبك 3 او 4 عربيات ماروتي راكنة جمبك اكتر بلد في مصر فيها ماروتي
    رجعت من دمياط للعاشر 200 كيلو على الطريق الدولي الحمد لله وصلت وكله تمام
    بس لسه هاشوف موضوع المساعد اللي فيه مشكلة ده لانه بيخلي الكاوتش الخلفي يحك في العربية





    ارجو ان اكون ذكرت كل التفاصيل

    وهاكتب اي جديد ان شاء الله



  • #2
    مبروووووك عليك العربية
    وربنا يبارك لحضرتك فيها ان شاء الله
    رمضان كريم عليك ان شاء الله
    و تقرير ممتاز تسلم ايدك يا استاذنا

    Comment


    • #3
      مبروك عليك يا باشا وربنا يباركلك فيها
      وريت تقولنا ايه رايك عن العربيه واقصى سرعه جبتها بيها
      من الاخر كده عايزين تقرير بالصور عن العربيه ورايك فيها اللى عجبك واللى معجبكش

      Comment


      • #4
        بحترمها جدا العربيه دى
        جروب مالكى وعاشقى لانسر كريستاله
        https://www.facebook.com/groups/lancer.egypt.1996.2000/

        Comment


        • #5
          مبروك وربنا يباركلك فيها
          No Turbo..No Party

          Comment


          • #6
            شكرا على التقرير الجميل وربنا يباركلك فيها ويديك خيرها ويكفيك شرها

            المساعد مشاكله بتبان في صورة نطنطه جامده للعربية لمجرد انك تاخد اقل مطب حتى وبتبان اكتر عالسرعات البسيطه هتلاقي العربية بتنط وتفضل تتنطط
            اما عالسرعات العاليه فبتظهر في شكل عومان جامد وبالذات لو اخدت مطب هوا ممكن بعيد الشر العربية تتقلب بسببه

            اما مجرد عومان بسيط مظهرش غير مع السرعه فدي حاجات لا تتعدى ظبط هوا العجل (كل فرده على 27) وظبط الزوايا والترصيص
            غير كده معتقدش ان في مشكله ...


            خد بالك من الابلاتينات اللي في السوق لان 90% منها في السوق مضروبه ومكتوب عليها ياباني وهيا محصلتش موزمبيق حتى!!!

            افضل انواع الابلاتينات هتلاقيه تويوتا ونيسان والواحد تمنه لا يقل عن 20 ولا يزيد عن 35

            الكوندنسرات برضو في مضروب كتير جدا وممكن بعيد الشر يقطع بيك مره واحده وبالتالي النوع الوحيد المضمون هو نوع اسمه دينسو ياباني 25 ميكرو فاراد وده تمنه بحوالي 45 جنيه وبييجي في علية شفافه ومكتوب عليها الاختصار الشهير(sgp)

            السيور لو العربية كملت 40 ألف غيرهم انما لو لسا اتقل شويه

            في رأيي افضل مكان تجيب منه القطع كلها وهتلاقي حاجتها من غير ما تفك ولا تعمل حاجه هو شارع احمد حلمي عند محلات السوزوكي هناك... اشهرهم ميدو الكنج (رامي)

            ولو عايز حاجات نضيفه بس اغلى شويه في مكانين
            في التوفيقيه ,,, سوزوكي سنتر فوق اسماك ابو غالي
            في شارع دمشق,,, اكرم حمدي

            تحياتي
            don't judge a car unless you have driven it

            hm414 سابقا

            Comment


            • #7
              شكرا على كل الردود
              وشكرا على نصائحكم الغالية
              اما بالنسبة للسوزوكي عامة عربية ممتازة وعلى قد فلوسها
              ناعمة جدا قطع الغيار رخيصة
              بتعمل معايا 300 كيلو في الصفيحة جوا البلد و400 على السريع
              واعتقد هاتتحسن جوا البلد عن كده لاني كنت في الاول
              اخر سرعة جبتها بيها كانت 100 وماردتش اقرص اكتر عشان كان معايا الولاد
              قولت كده حلو قوي ورجعت 90
              وبعدين اللي تنزل دمياط ويشوف عدد الماروتي اللي هناك يستغرب مع ان الدمايطة معاهم فلوس
              بس ناس عمليين وعارفين بيدفعوا الفلوس في ايه

              Comment


              • #8
                مبروووك عليك ياباشا واخيرا لقيت حد هنا ساكن فى العاشر وكمان معاه نفس لون عربيتى فضى يعنى جيران والعربيه اخت بتاعتى فرق الموديل بس بتاعتى 2012
                حاجه اخيرة بس موضوع المساعدين ده وانت محمل العجل بتحس انه بيحك ؟ لكن لو مش محمل مبتحسش بحاجه
                لو كدا فامعتقدش انه مساعدين لان فى واحد اعرفه مستلم ماروتى 2012 وعنده نفس المشكلة دى ومش معقولة تكون المساعدين فيها مشكلة والعربية لسه زيرو انت اكشف عليها ممكن تكون محتاجة ظبط بس
                ومبروك عليك مرة تانية وعاوز ابقى اشوفك بقى لو تعرف قهوة ضى القمر اللى فى الاردنية انا بقعد عليها كتير بليل

                Comment


                • #9
                  مبروك يا باشا
                  وتقرير جميل تسلم ..

                  Comment


                  • #10
                    المشاركة الأصلية كتبت بواسطة waelgam2005 مشاهدة المشاركة
                    مبروووك عليك ياباشا واخيرا لقيت حد هنا ساكن فى العاشر وكمان معاه نفس لون عربيتى فضى يعنى جيران والعربيه اخت بتاعتى فرق الموديل بس بتاعتى 2012
                    حاجه اخيرة بس موضوع المساعدين ده وانت محمل العجل بتحس انه بيحك ؟ لكن لو مش محمل مبتحسش بحاجه
                    لو كدا فامعتقدش انه مساعدين لان فى واحد اعرفه مستلم ماروتى 2012 وعنده نفس المشكلة دى ومش معقولة تكون المساعدين فيها مشكلة والعربية لسه زيرو انت اكشف عليها ممكن تكون محتاجة ظبط بس
                    ومبروك عليك مرة تانية وعاوز ابقى اشوفك بقى لو تعرف قهوة ضى القمر اللى فى الاردنية انا بقعد عليها كتير بليل



                    الله يبارك فيك يا باشا ان شاء الله نتقابل قريبا

                    Comment


                    • #11
                      الف مبروك يا باشا
                      وربنا يباركلك فيها و يكفيك شرها و يديك خيرها

                      و تقرير جميل على فكرة

                      الف شكر

                      احمد

                      Comment


                      • #12
                        ألف مبروك العربية ، فعلاً عربية ممتازة وموفرة للبنزين وعفشتها كويسة
                        بس أنت متأكد من موضوع إستهلاك البنزين ده !! بسم الله ماشاء الله أنا عندى كانت بتعمل جوة البلد 265 كم وهي زيرو نزلت بعد كده لحوالى 220 كم للصفيحة
                        بسم الله ماشاء الله ربنا يباركلك فيها

                        Comment


                        • #13
                          المشاركة الأصلية كتبت بواسطة خالد مشاهدة المشاركة
                          ألف مبروك العربية ، فعلاً عربية ممتازة وموفرة للبنزين وعفشتها كويسة
                          بس أنت متأكد من موضوع إستهلاك البنزين ده !! بسم الله ماشاء الله أنا عندى كانت بتعمل جوة البلد 265 كم وهي زيرو نزلت بعد كده لحوالى 220 كم للصفيحة
                          بسم الله ماشاء الله ربنا يباركلك فيها
                          موضوع البنزين ده يختلف معاي عشان جوا البلد عندي غير جوا البلد عندك
                          انا ساكن في العاشر من رمضان وجوا البلد بجيب رابع وممكن اوصل ل 70 و80
                          ومافيش اشارات وهما شوية مطبات بس

                          Comment


                          • #14
                            المشاركة الأصلية كتبت بواسطة ibrahimmcse مشاهدة المشاركة
                            موضوع البنزين ده يختلف معاي عشان جوا البلد عندي غير جوا البلد عندك
                            انا ساكن في العاشر من رمضان وجوا البلد بجيب رابع وممكن اوصل ل 70 و80
                            ومافيش اشارات وهما شوية مطبات بس
                            نصيحة منى متجريش فى العاشر لسببين اولا مليانة بهايم ومتعرفش بيطلعلوك منين والسبب التانى ممكن تبقى ماشى فى طريق كل يوم وتيجى فى يوم معين تفاجئ انهم عملولك مطب صناعى عسل كدا شبه الكوبرى وانت عارف فى العاشر مبيدهنوش المطب غير لما الواحد يحفظه فا خليك فى ال 60

                            Comment


                            • #15
                              مش عارف يبدو ان ردي اتمسح في الدروب اللي حصل ساعة المنتدي الجديد
                              ألف مبروك ع العربية و تقرير جميل جداااا

                              بعد تغيير السيور و طقم الكهربا زي ما حازم باشا hm414 قالك
                              بص ع فلتر الهواء لو محتاج يتغير و يفضل بعد المدة ديه انه يتغير
                              و فلتر البنزين و تنضف الكربراتير و البوابة
                              زيت الفتيس هل غيرته و لا لأ لو مغيرتوش يفضل تغيره عشان تمشي معاه من دلوقتي و عندك موبيل و شل لزوجة 90 اللتر بحوالي 24 ج و الفتيس بياخد حوالي لترين و ربع
                              بخصوص زيت الموتور جرب نوع زيت تاني و هتحس بالفرق و حرام تحط في العربية زيت يقعد 2000 ك بس لو الموتور لسه حالته كويسة و كمان موبيل
                              حط حاجة تريح معاك 5 الاف كيلو و عندك انواع تانية زي شيل الاصفر بيقعد 5 الاف بـ120ج
                              فيسكو 2000 بيقعد 5 الاف ك - 7 الاف ك بـ97 ج
                              فيسكو 3000 بيقعد 10 الاف ك - 12 الف ك بـ120 ج
                              فيه انواع تانية بس غالية و الانواع السابقة ماشية كويس مع الماروتي بدون مشاكل
                              [CENTER][SIGPIC][/SIGPIC]
                              [SIZE=4][URL="http://www.nilemotors.net/Nile/252145-a.html"]سلسلة تعالوا نعرف التعليمية[/URL][/SIZE]
                              [SIZE=4][URL="http://www.nilemotors.net/Nile/195073-a.html"]أدوات يجب ان تكون في كل سيارة[/URL]
                              [URL="http://www.nilemotors.net/Nile/194027-a.html"]اسعار جميع كماليات و اكسسوارات السيارات[/URL][/SIZE]
                              [/CENTER]

                              AXEL سابقا

                              Comment

                              Working...
                              X