عملت حادثة بسيطة ومحتاج مساعدة

[icekimo22]

الفانوس اللى قدام على اليمين اتفشفش والحمد لله الخبطة جت فيه هو

والصاح من قدام اتعوج بسيط و من على الجنب اليمين اتعوج بسيط اوى والشبكة اللى من قدام البلاستيك دى اتكسرت



يا ريت اعرف المفروض اعمل ايه عشان لسه جديد
انا عاوز اشترى فانوس و شبكة و اروح لسمكرى يعملهالى


مش عارف اتعامل ازاى .. يا ريت حد يقولى سمكرى كويس فى المعادى .. ويا ترى التوكيل ايه نظامه .. ولون العربية هيرجع بعد السمكرة ولا لاء ؟


محتاج اعرف كل حاجة كل حاجة والسعر كام لكل حاجة واشتريها منين واروح لمين

[khalidawad]

أسلام عليكم
أولا ألف سلامه والحمد لله على كل شئ
إبداء بشراء الحاجات دى الفانوس و الشبكه و اعتقد احسن مكان ياإما من التوفيقيه سوزكى سنتر
أو من ميدو بأحمد حلمى عقبال ما تلاقى حد من الزملاء يعرف حد سمكرى كويس
الله يديك خيرها و يكفيك شرها

[alking_2006]

الفانوس بيبقى فى حدود 50 اما فانوس الاشارة بيبقى ب 15
و الشبكة فيه ب 60 و فيه ب 80 (ال 80 دى بتاعة ماروتى 2012 و شكلها تحفه اما ال 60 دى العادية)
و دول تلاقيهم عند سوزوكى سنتر فى التوفيقية

لو عاوز تقدير مننا لمصنعية السمكرى يبقى محتاجين صورة للخبطة

و بالنسبة للون العربية فيه نوعين من السمكرة
1- سمكرة على البارد و دى بتتعمل من غير الصاج ما يتسخن و لذلك بيبقى نسبة استعدال الصاج فى حدود 80 % لكن الدهان بيفضل موجود على الصاج لكن النتيجة النهائية ان الخبطة مش بتبقى باينة و لكن مع التركيز فى الصاج بتلاقيه "مضعضع" و لكنها حل كويس فى بلدنا و شوارعها التحفه و بتكون تكلفتها قليلة

2- سمكرة على الساخن و دى بيتم تسخين الصاج و من ثم استعداله و نسبة الاستعدال بتبقى فى حدود 95 الى 100 % و لكن الدهان اللى على الصاج بيكون اتحرق و بكدا بتبقى محتاج الصاج دا يتمعجن و يتسحق و يدخل فرن و دى بتكون مكلفة و لو الواحد عمل كدا فى كل خبطة فى العربية فى شوارع بلدنا و سواقين الميكروباصات العباقرة اللى الواحد بيشوفهم يبقى مش هيخلص

و حمدلله على سلامتك

[ahma8]

مافيش كلام بعد كلام الكينج

الف سلام عليك و فى الف داهية الصاج و المهم انت احمد ربنا انها جت فى الصاج

[lidosasa]

حصلت معايا نفس الخبطة بس موصلتش للفانوس خدت الإشارة اليمين بس
عموماً أول حاجة تشترى الفانوس والإشارة والشبكة عشان السمكرى يستعدل الصاج على حجم الفوانيس والإشارة ويبتهم فى مكانهم كويس . وبعدين تروح لسمكرى كويس بإذن الله تيجى معاك على البارد ومش حقدر انصحك بحد معين لإنى مش فى القاهرة .
وطبعاً الخبطة واضحة بعد الإستعدال لإنها فى ركن العربية فالدهان أتقشر منه حته صغيرة جنب الإشارة بس أنا سايبها لإنى لسه بتعلم وشوية كده وحظبط كل الخدوش بإذن الله
والحمد لله على سلامتك وفداك

[dr.hazem]

حمد لله عالسلامة اولا
الفانوس كان ب 35 والكورنر بلمبته ب 20
والشبكه في من 10جنيه
ههههههههههههههههههههه

عند ميدو الكنج


تحياتي

[icekimo22]

طب حد يقولى اروح لميدو ازاى ؟


وسنتر السوزكى فى التوفيقية ده مشهور يعنى ؟ اصلى روحت مرتين بس مشوفتوش .. لما اروح تانى هسأل عنه ان شاء الله



ويا ريت لو حد يقولى على سمكرى كويس فى المعادى .. وايه رآيكوا اوديها التوكيل ؟

[dr.hazem]

طب حد يقولى اروح لميدو ازاى ؟


وسنتر السوزكى فى التوفيقية ده مشهور يعنى ؟ اصلى روحت مرتين بس مشوفتوش .. لما اروح تانى هسأل عنه ان شاء الله



ويا ريت لو حد يقولى على سمكرى كويس فى المعادى .. وايه رآيكوا اوديها التوكيل ؟

ميدو في شارع احمد حلمي مقابل المطافي محلات ميدو الكنج 2 وليهم فرع في التوفيقيه بس مش فاكر فين بالظبط

سوزوكي سنتر في الدور التاني في العماره اللي فيها اسماك ابو غالي


سمكري انا كنت اعرف واحظد بس مش في المعادي في م نصر

عالاوتوستراد وانت باتجاه الذاهب للمعادي


تحياتي