الماروتي مش عاوزه تدور و مش عارف من ايه يا ريت حد يساعدني؟؟

[rameahmed]

السلام عليكم و رحمة الله و بركاته

انا النهارده الصبح جيت ادور العربية لقيتها مش عاوزه تدور و مش عارف من ايه هل العيب في المارش ولا البطاريه بس انا بصيت علي البطاريه لقيت فيها ميه و مش ناشفه لا حاجه و زقيت العربيه عشان تدور و دارت الحمد لله بس لما جيت ركنتها عند الشغل و بطلت العربيه و حبيت اجرب اشغلها لقيتها برده مش راديه تدور و شكلها كده لازم حد يزقها فبرجاء المساعده ضروريييي عشان عاوز اعرف العيب فين بالظبط و جزاكم الله كل خير.

[alking_2006]

السلام عليكم

1- و انتا بتدور لو صوت المارش ضعيف و بيعتل "يعنى تحس انه مطلع صوت بيطلع فى الروح" يبقى دى (بطارية او الشحن بتاع الدينامو ضعيف و فى الغالب بطارية) ..... بيتم الكشف عند الكهربائى على البطارية و شحن الدينامو لبيان الاصلاح اما بتغيير البطارية او اصلاح دائرة الدينامو

2- اما لو صوت المارش كويس يبقى ممكن (طقم بوجيهات) عايز يتغير لأنه عدى عليه اكتر من 10 الاف كيلو او واخد رطوبة او الاحتمال الابعد (ابلاتين) بردو عدى عليه اكتر من 10 الاف كيلو و بيبتدى يلدع و فى الاغلب بوجيهات

3- طبعا بيبقى فيه احتمال (مستبعد) و هو المارش و دا لو مش بيطلع اى صوت خااااااالص فيما عدا صوت (تك تك) و دا بيبقى اوتوماتيك المارش او ترس البندكس باظ و دا بيحصل لما تقرص على المارش جامد فى الدوارة عدة مرات

ممكن تقولنا اخر مره غيرت البوجيهات و الابلاتين امتى؟
و البطارية دى معاك بقالها قد ايه؟
و لما فتحت غطيان البطارية و العربية دايرة هل لقيت فوران تحت اى غطا من الغطيان (يعنى فيها ربع ضارب و فى طريقها للموت)؟

[hamahmy]

بوص الحل الأسهل انك تزوقها زى المرة اللى فاتت عشان تدور و تروح لأقرب واحد بتاع بطاريات تخليه يكشف على شحن البطارية بالطونجر لو تمام و الديناموا بيشحن يبقى المشكلة من المارش لو فيه حاجة فى البطارية حايقولك و مش شرط ان البطارية فيها مية تبقى شغالة كويس لأن ممكن يكون فيها ربع ضارب او ممكن الدينامو عندك مش شحنه ضعيف ..... و لو العيب من البطارية افضل تجيب المرة اللى جاية بطارية جافة و لا مية و لا وجع دماغ ... تركبها و تنسى

[mohamed_kta]

90 % البطاريه و طبعاً لازم تكشف عليها.

[rameahmed]

انا فعلا بسمع صوت المارش اكنه بيطلع في الروح كده بس مش تكتكه ولا حاجه و العربيه موجوده من 2008 و عامله 17000 كيلو و مغيرتش بوجيهات خالص

[rameahmed]

طب ايه احسن انواع البطاريات الجافه و اشتريها منين برجاء المساعده و متشكر جدا علي الرد و ابجد استفدت جدا و معلش عشان انا لسه جديد في موضوع العربيات ده :)

[alking_2006]

انا فعلا بسمع صوت المارش اكنه بيطلع في الروح كده بس مش تكتكه ولا حاجه و العربيه موجوده من 2008 و عامله 17000 كيلو و مغيرتش بوجيهات خالص

كدا يبقى اكيد بطارية
انا عن نفسى ركبت بطارية جافة ماركة "هانكوك" و كانت عاملة 230 جنيه و اديته البطارية القديمة بس الكلام دا من سنة ممكن تكون غليت و دى تجيبها من

محل "الإيمان للإطارات و البطاريات"
العنوان: 101 شارع التحرير
الطريق: من ميدان التحرير - هتدخل شارع التحرير - هتدخل أول يوترن بعد ميدان الدقى هتلاقيه على ايدك اليمين
المواعيد: من 9 الصبح لحد 11 بليل ما عدا الأحد
التليفون:
01223131096
01223966154
0233368054

و ابقا طمنا

[rameahmed]

فعلا العيب طلع من البطاريه و انا جبت بطارية فارتا 40 امبير من كحل الفردوس في العباسيه بس كنت عاوز اعرف هل بطارية الماروتي الفابريكه بتكون 40 امبير و لا ايه بالظبط

[alking_2006]

40 امبير

[Amr Axel]

فعلا العيب طلع من البطاريه و انا جبت بطارية فارتا 40 امبير من كحل الفردوس في العباسيه بس كنت عاوز اعرف هل بطارية الماروتي الفابريكه بتكون 40 امبير و لا ايه بالظبط

الف مبروك يا باشا بس ليه تجيب من محل عندك التوكيل نفسه بعد رمسيس تاخد نزلة شارع شنن و السبتية من كوبري اكتوبر و اول ما تنزل اسأل ع توكيل فارتا هيقولوك عليه لأنه تحت نزلة الكوبري و سعرها بيبقي ارخص من التجار اللي برة زي ما شوفت ناهيك اني لقيت تجار ساعات بيجيبوا بطاريات واقعة او انتاج قديم من محلات غير معروفة بدل التوكيل و يبيعها باضعاف
اهم حاجة بقي تتابع صيانتها و تروح بالضمان للتوكيل كل شهر تعملها صيانة و يمضيلك في الكارت الاصفر اللي خدته هناك لأنهم أضمن مكان تعمل فيه صيانتها عشان التجار برة بيغشوا ساعات المية اللي بتتحط
بخصوص البطارية زي ما قولتلك في الموضوع التاني هي الأصل 38 لكن بتتغير بــ40 امبير

[rameahmed]

متشكر جدا بس انا جيبتها بسعر 350 + القديمة و ان شاء الله هبقي اتابع صيانتها في التوكيل و جزاكم الله كل خير

[alking_2006]

بس مش الفارتا دى المفروض جافه؟

[rameahmed]

ايوه بالطبع جافه بس ليه انت بتسأل السؤال ده هو انا قولت حاجه غلط ولا ايه :( انت قلقتني بس هي اكيد جافه عشان ملهاش عيون بتاعت المياه المقطره ذي القديمة و انا لمل كنت بشتري كنت بسأل عن الجافه و لو مكنتش جافه هعرف اذاي ؟؟؟ معلش اكيد سؤالي غبي جدا بس انا جديد في الموضوع ده

[rameahmed]

و هي ده شكلها و كنت عاوز اعرف حاجه كنت لقيت ناس بتقول ان في لمبه بتعرفك اذا كان البطاريه مشحونه بتكون خضراء و لو سوداء بتكون عاوزه تتشحن و بتبقي لونها ابيض لما تفضي بس انا مش عارف فين لمبة البيان ده فياريت حد يقلي

[alking_2006]

ايوه بالطبع جافه بس ليه انت بتسأل السؤال ده هو انا قولت حاجه غلط ولا ايه :( انت قلقتني بس هي اكيد جافه عشان ملهاش عيون بتاعت المياه المقطره ذي القديمة و انا لمل كنت بشتري كنت بسأل عن الجافه و لو مكنتش جافه هعرف اذاي ؟؟؟ معلش اكيد سؤالي غبي جدا بس انا جديد في الموضوع ده

لا ابدا انا سألت السؤال دا لما لقيت الناس بتكلمك انك تعملها صيانة كل فترة فالصيانة دى بتتعمل للسائلة مش للجافة لكن طالما مفيهاش عيون يبقى خلاص جافة متخافش

و بالنسبة للمؤشر البيان فأنا سمعت ان المؤشر دا مش موجود فى البطاريات الفارتا
هو بيبقى عبارة دا دائرة فيها لون
الاصفر يعنى البطارية جيدة

بس على فكرة المؤشر دا ملوش لزمة لأن فى عربية والدى البطارية باظت و بنبص فى المؤشر لقيناه اصفر بردو :)