تأخر فى سماع صوت الدوارة

[mesaharaty]

عند تدوير المفتاح فى الكونتاكت كنت الأول باسمع صوت الدوارة مع تحريك المفتاح مباشرة
حاليا بيبقى فيه تأخير فى سماع صوت الدوراة حوالى ثانيتين كده يعنى لقطة الكونتاكت بقت متأخرة شوية عن التكة بتاعت التدوير .
هل دى مشكلة ولا بداية مشكلة وكيف أتحاشاها ؟
يعنى مشكلة فى المارش مثلا أو البطارية ولا إيه بالضبط ؟

مشكورين يا حبايبى جميعا

[midooo_119]

غالبا البطارية هى بقالها اد ايه و جافه و لاسايلة

[mesaharaty]

البطارية سايلة
وهى بطاريتها اللى نازلة معاها فابريقة
وبقالها حوالى 3 سنين (العربية موديل 2009)

[temo85]

غالبا بطارية

[alking_2006]

السلام عليكم
دى (بطارية او الشحن بتاع الدينامو ضعيف و فى الغالب بطارية) ..... بيتم الكشف عند الكهربائى على البطارية و شحن الدينامو لبيان الاصلاح اما بتغيير البطارية او اصلاح دائرة الدينامو

و لما بتفتح غطيان البطارية و العربية دايرة هل بتلاقى فوران تحت اى غطا من الغطيان (يعنى فيها ربع ضارب و فى طريقها للموت)؟

[mesaharaty]

فعلا فيه فوران من واحد أو إتنين من غطيان البطارية وبادلق عليه مياه .
بس الملاحظ إن عملية التأخير دى ممكن مرة ومرة وفى الغالب بتكون عند تدوير العربية بعد فترة برودة طويلة .

[alking_2006]

مهو البطارية السائلة على عكس الجافة

لما بتبقى عايزة تتغير بتقعد فترة كدا تهيس ساعات و ساعات لأ على حسب الجو
و بعد كدا تريح خالص

اما الجافة فمش بتتفاهم بتريح مره واحدة

[mesaharaty]

طيب فيه ملحوظة تانية
هل الموضوع ليه علاقة بالبوجيهات
أنا البوجيهات عندى عاملة بالمستريح كده 5000 كم وبقالها فى العربية حوالى سنتين ونص أو أكتر كده
فهل الموضوع ده ليه علاقة ولا خلاص بطارية يعنى بطارية ؟

[alking_2006]

لأ فى حالة البوجيهات انك تسمع صوت المارش فدا مش هيتأخر لكن اللى هيتأخر ان العربية تدور اصلا

يعنى المارش هيدور عادى و هيحاول يدور الماتور لكن الماتور هيتأخر فى الاستجابة او مش هيستجيب اصلا فى الحالات المتقدمة

و فى الطبيعى البوجيهات بتتغير على 10 الاف كيلو
لكن لو دى بوجيهات الفابريكة, بتقعد اكتر من كدا طبعا

[mesaharaty]

يعنى الموضوع كده بدايته عند الكهربائى للكشف على البطارية والدينامو ؟

[dr.hazem]

يعنى الموضوع كده بدايته عند الكهربائى للكشف على البطارية والدينامو ؟

الحقيقه ممكن متروحش للكهربائي انما تروح لحد بتاع بطاريات هيكشفلك ولو هتغير البطاريه هتاخدها منه وتنجز بدل متروح لكهربائي وياخد حتى لو 5 جنيه لانك غالبا طالما في فتحتين بيفورو يعني والبطاريه بقالها 3 سنين كتير خير ابوها دي بطاريه اصيله ما شاء الله
هههههههههههههههههههه

ممكن تاخدلها صورة لان مش هتكرر ان بطاريه تقعد 3 سنين....

هههههههههههههههه


تحياتي

[mesaharaty]

ههههههههه
حلوة منك يا دكتور حازم
الحقيقة أنا رحت يوم الخميس الماضى لكهربائى وبالتجربة على المارش تبين إن المارش محتاج جلبة وتم خرط جلبة نحاس والتركيب والحمد لله المسألة بقت ممتازة والدوارة اتظبطت جدا وبقت مع تكة المفتاح ومن أول مرة ولله الحمد والمنة .