العربية كانت بتجرى بيا لوحدها

[micromoud]

السلام عليكم
كنت ماشى عالدائرى بالليل راجع مالمطار وكنت ماشى بالعربيه على سرعه من 90 ل 100 مرة واحدة لقيت العربيه زى ما يكون حد بيسحبها او بيشدها وبقت بتجرى اسرع ابتديت اهدى وانا مدى الغيار لقيت مفيش فايدة العربيه بعزم مافيها بتجرى رحت مورت العربيه واذا بيا افاجأ بصووت الموتور عالى جدا وكأنى دايس الدواسة عالاخر والعربية لسه بتجرى ابتديت اهدى سوية ودخلت الحارة اليمين و العربية صوتها عالى جدا لغايه ما وقفت العربيه وبطلتها وشديت الهاند بريك قولت ادورها تانى سميت الله واذا بيا اسمع الصوت العالى شغال مرة تانيه بطلتها مرة تانيه وانا بحط رجليا على دواسة البنزين واذا بيا ملاقيهاش :))))))

طلعت الدواسه معلقه رحت خابطها جامد برجليا راحت ناطرة لفوق ودورت العربيه لقيتها رجعت اشتغلت عادى ومشيت فى امان الله وروحت والحمد لله ... بالمناسبة الموضوع دا يا جماعه حصل فوق المنطقة اللى فيها ترب اليهود ......

السؤال دلوقتى الدواسة بتاعت البنزين دى مربوطه بواير ولا سوسته ول ايه وهل ليها قطعه بتتغير عشان انا قلقان يحصل معايا الموقف دا تانى ...

[yousefsemsem]

ده واير الدواسه عاوز يتزيت حصل معايا ماتقلقش
وشكله كان ياهودي وحش اوي هههههههههههههههههه

[hossamalsadik]

وتوته توه خلصت الحدوده
وبقى غير الوير او زيته روح للميكانيكى يكشفى على القصه ديه

[mshmshm3]

زيت wd 40 علي الواير

[lidosasa]

حصلت معايا وكانت مش من الدواسة كانت من بوابة البنزين نفسها رحت لميكانيكى فك عمة الموتور وظبط البوابة وزيتها عشان متعلقش تانى

[Land_Cruiser]

انا معرفش اماروتي ايه نظامها بس في عربيات تانيه الموضوع ممكن يحصل من عند دواسه البنزين و ممكن. يحصل من عند الموتور من قدام . لو التعليقه من عند الدواسه يبقي احتمال ان السلك بتاع الدواسه بيشبك في الجراب اللي بيبقي ماشي فيه السلك و بالتالي اول لما يشبك فيها هتلاقي دواسه البنزين بقت كأنك مركب مثبت سرعه و مش هترد معاك تاني إلا لما السلك يخرج بره الحته المشرشره اللي بيمسك فيها و ده بيبقي عن طريق اللي حضرتك عملته ولو المشكله كده يبقي لازم تخللي بالك لان الشرشره دي ممكن مع الوقت تبرد في سلك البنزين لحد ما تقطعه و الاحتمال التاني و ده الاغلب ان السوسته اللي موصله السلك بالموتور تكون فيها مشكله و دي بتتغير و طبعا وديها لميكانيكي بسرعه علشان الموضوع ده ممكن لاقدر الله يعملك مشكله كبيره لو ماشي في طريق زحمه او لو عربيه قدامك ضربت فرامل مره واحده. بالنسبه للتصرف لو كنت في مكان زحمه انك تمور الفتيس بسرعه و تشغل الانتظار و تطفئ الموتور خالص و تحاول ترجع الدواسه لمكانها عن طريق الضغط عليها ضغطه سريعه و تشيل رجلك لحد ما تطمن انها رجعت لمكانها و ما تضغطش مده لان العربيه. ممكن تشرء منك

[abogogo]

بص يا باشا المشكلة اللى انت بتحكيها دي حصلت لي ايضا على الدائر وانا بجري المشكلة دي بتكون عند السوسته اللى في اخر سلك البنزين من ناحية الكربيراتير شمال عارف الحتة اللى الميكانيكي بيزود منها البنزين تحت العمة ساعات لما بتدوس بنزين على الاخر السوستة بتعلق وتفضل مشدودة .... الحل تحت العمة من الناحية الشمال هتلاقي نهاية سلك البنزين هتدوس للأخر بصباعك وتسيبه السوسته هتفك ... وده ايضاً اللى حصل معاك لما ضغط بالجامد على الدواسه برجليك قام سلك البنزين شدة السوسته وفك التعليقة