تقرير تسقيط ماتور و فتيس للماروتى

[alking_2006]

السلام عليكم

باركولى سقطت ماتور و فتيس اخيرا للماروتى
زى منتوا عارفين و كنت حكيت هنا ان عندى العربية موديل 99 و كان فيها مجموعة كبيرة من المشاكل

بالنسبة للموتور:
------------------
1- دخان ابيض من الشكمان عند القرص على الموتور
2- نقص زيت
3- نقص مياه
4- جوان وش سلندر + وش سلندر مقفع
5- نفخ مياه فى دورة التبريد بسبب وش السلندر و دا كان بيخلى العربية حرارتها تولع بعد عمل مشوار 30 كيلو فأكثر و مياه الرادياتير كلها تروح على القربة و تقع فى الشارع و الرادياتير يفضى
6- دخان ابيض من الشكمان فى الصباح بسبب كاوتش الصبابات
7- سحب تعبان علشان الميكانيكى العبقرى لما عملت عنده جوان وش السلندر من حوالى سنة و نص حط جوانين على بعض
8- تأكل بنزين بسبب موضوع الجوانين دا بردو

و بردو الفتيس عندى كان فيه مشاكل كتير
--------------------------------------------
1- تسرب زيت بسبب اويل سيل الكوبلن و تم تغييره اكثر من مرة بلا فائدة
2- لما بجيب مارشدير و احاول اجيب اى غيار تانى بعديه كنت بتعذب علشان غيارات الفتيس كانت بايشة
3- صوت ونه و خروشة على السلانسيه بتروح لما ادوس دبرياج و دى طبعا بلية

فكمية الاعطال دى خلتنى مفكرش فى التصليح و انما افكر فى التسقيط علشان الوقت و الجهد و فرق التكلفة لأنى لو صلحت متهيألى مكنتش هتفرق كتير عن الموتور الاستيراد بل على العكس ممكن اصرف اكتر على التصليح

توكلت على الله و سألت فى كذا حته و طبعا مفكرتش اروح بورسعيد نظرا للظروف الامنيه علشان الكلام دا كان فى نص شهر فبراير فى عز ايام الولعه فى بورسعيد

بردو معرفتش اخد ميكانيكى معايا علشان الميكانيكى اللى بتعامل معاه على طول ندل معايا و مجاش نظرا لأنشغاله

1- احمد حلمى: طبعا تحس انهم بيغلوا جامد اكن مفيش مواتير ماروتى غير عندهم و كان الموتور بالفتيس ب 4000 جنيه

2- الحرفيين: و هناك مفيش غير محل واحد بيتعامل فى الماروتى و لقيت عنده كذا حاجة
- موتور بفتيس عادة كاربراتير و دا كان ب 3000
- موتور بفتيس اوتو كاربراتير و دا كان ب 3500
- موتور بفتيس عادة انكشجن ب 4500

عجبنى الموتور الاوتو فطلبت من التاجر انى اخد الموتور اللى راكب على الاوتو و اخد معاه الفتيس العادة اللى راكب على الموتور التانى و قد كان

و اخد الموتور بتاعى ب 300 جنيه و اديته عليهم 3000 بعد الفصال
و اخد منى 150 جنيه علشان يخلصلى الورق من بورسعيد و يبعته على المرور بتاعى

طلعت على الميكانيكى فى نفس اليوم بعد شراء
1- قاعدة فتيس: 70 جنيه
2- طقم دبرياج فاليو كورى (أسطوانة + ديسك + بلية) 360 جنيه
3- علبتين زيت فتيس موبيل لزوجة 90 جنيه
4- زيت شل الاصفر 20w50 ب 125 جنيه

و تم تسقيط الموتور فى 6 ساعات و كنت ماشى
الميكانيكى اخد مصنعية 350 جنيه

طبعا الموتور كان على التجربة و الحمد لله ربنا كرم

باركولى :)

[hugan]

10000مبروك
طب ليه مافكرتش تعدل العربيه وتسقط الموتور الاوتو بفتيسه
وكانت هاتبقي نقله جامده للعربيه

[alking_2006]

10000مبروك
طب ليه مافكرتش تعدل العربيه وتسقط الموتور الاوتو بفتيسه
وكانت هاتبقي نقله جامده للعربيه

و الله كان نفسى
لكن طبعا الماروتى الاوتو مش منتشرة فى مصر
و لما فكرت فيها لما احتاج اعملها صيانة و لا قطع غيار
طبعا تراجعت و قولت اجيب مانيوال

[hugan]

و الله كان نفسى
لكن طبعا الماروتى الاوتو مش منتشرة فى مصر
و لما فكرت فيها لما احتاج اعملها صيانة و لا قطع غيار
طبعا تراجعت و قولت اجيب مانيوال

تمام كلامك مظبوط
كنت ناسي ان مفيش ماروتي اوتو في مصر

[msa142]

انا برضه احترت نفس الحيرة فى الاوتو ولا المانيوال
بس المانيوال احسن فى عدة نقاط
مصاريفه قليله مقارنة بالاوتو
اعطاله قليله
قطع غيار متوفرة

لكن الاوتو لو بتدور على قطع غيار ليه دا لو لقيت مثلا هتلاقي تمنه مضروب فى السما
زى العربيات الصينى اول مانزلت مصر الناس كانت تلف لفة حلوه عشان قطع الغيار وفى الاخر بيتوفقلها من اى عربية تانيه ولا زالو فى نفس المشكلة ويادينى على العطلة الى ممكن توصل بالشهور

[max100x]

الف مبروك يابو حميد

والله انا ندمت اني معملتش زيك لان واضح ان تكاليف العمرة زي تكاليف الموتور الاستيراد بس المشكله ان الموتور الاستيراد يخوف حبتين

[bondok20002002]

طب انت ليه مجبتش انجشكشن
علي للف مبروووووووووووووك

[alking_2006]

انا برضه احترت نفس الحيرة فى الاوتو ولا المانيوال
بس المانيوال احسن فى عدة نقاط
مصاريفه قليله مقارنة بالاوتو
اعطاله قليله
قطع غيار متوفرة

لكن الاوتو لو بتدور على قطع غيار ليه دا لو لقيت مثلا هتلاقي تمنه مضروب فى السما
زى العربيات الصينى اول مانزلت مصر الناس كانت تلف لفة حلوه عشان قطع الغيار وفى الاخر بيتوفقلها من اى عربية تانيه ولا زالو فى نفس المشكلة ويادينى على العطلة الى ممكن توصل بالشهور

+11111111111
كلام سليم

[alking_2006]

الف مبروك يابو حميد

والله انا ندمت اني معملتش زيك لان واضح ان تكاليف العمرة زي تكاليف الموتور الاستيراد بس المشكله ان الموتور الاستيراد يخوف حبتين

متندمش على حاجة عملتها ابدا

بردو العمره اللى انتا عملتها كويسه و اديك نظفت الموتور

بردو متنساش العامل اللى خلانى اسقط موتور انى كان عندى مشاكل كتير فى الموتور و الفتيس
دا غير عامل الوقت و العطله

و بردو فى الاخر كان موضوع فيه
risk
يعنى انا و حظى

و عموما يا باشا الف الف مبروك على العمرة و متناس تقولنا ايه انطباعك بعد شهر و لا شهرين

[alking_2006]

طب انت ليه مجبتش انجشكشن
علي للف مبروووووووووووووك

فيه حاجة صحيح نسيت اقولها

الموتور الانجكشن بيجى بضفيرة كهربا لازم تتغير مع الضفيره اللى عندك

دا غير بقى الدوشة بتاعة انك لازم تحط 92 و ان الرشاشات ممكن تتسد و لا تحتاج تتغير
و حلنى بقى لو لقيت رشاشات للماروتى فى محلات قطع الغيار

أشتريت الدماغ و جبت الموتور العادى

الكاربراتير اخرك هتنظفه كل 10 و لا 15 الف و هتحط اى بنزين تلاقيه مش هيقول لأ

[Amr Axel]

ما شاء الله
الف مبروك بالرغم اني من غير مؤيدين التسقيط لكت انت كنت مضطر في جميع الاحوال تسقط
و يا ريت تشاركنا بالاسعار في موضوع الاسعار مع ذكر الانواع او الصنع فين

و احب اضيف ان الماروتي مفيش منها اوتو لا هنا و لا نزلت برة ده فتيس متولف عليها
و الانجيكشن طبعا وجع دماغ للتركيب ده غير قطع الغيار انسي هو مفيش احسن من الستوك

[Amr Axel]

الف مبروك يابو حميد

والله انا ندمت اني معملتش زيك لان واضح ان تكاليف العمرة زي تكاليف الموتور الاستيراد بس المشكله ان الموتور الاستيراد يخوف حبتين

يا باشا انت كل اللي كان عندك نص عمرة تسقط موتور عشان نص عمرة و تكلف حوالي 4000 ج
ده غير ان الموتور هيكون انت و نصيبك

[max100x]

يا باشا انت كل اللي كان عندك نص عمرة تسقط موتور عشان نص عمرة و تكلف حوالي 4000 ج
ده غير ان الموتور هيكون انت و نصيبك

تحب احسبلك نص العمرة دي صرفت اد ايه؟ خصوصا اني معرفتش ان وش السلندر بايظ غير بعد ما عملت طحينه تاني

[Amr Axel]

تحب احسبلك نص العمرة دي صرفت اد ايه؟ خصوصا اني معرفتش ان وش السلندر بايظ غير بعد ما عملت طحينه تاني

يا باشا و تحسب و ليه مانت كاتب الاسعار في الموضوع النص عمرة كلفتك قطع غيار بـ555 ج تقريبا بدون وش السلندر اللي فرق معاك بس وش السلندر بـ850 ج يعني كله حوالي 1400 ج من 3000-4000 ج للموتور بس غير المصنعية و تخليص الورق و اديك شايف الاسعار شوف الفرق
اما باقي المصاريف اللي صرفتها كانت في حاجات ملهاش علاقة بالموتور و العمرة يعني انت لو كنت فكرت في قصة تسقيط مع باقي المصاريف كنت هتعمل حسابك في 5000 ج:)

[alking_2006]

يا باشا و تحسب و ليه مانت كاتب الاسعار في الموضوع النص عمرة كلفتك قطع غيار بـ555 ج تقريبا بدون وش السلندر اللي فرق معاك بس وش السلندر بـ850 ج يعني كله حوالي 1400 ج من 3000-4000 ج للموتور بس غير المصنعية و تخليص الورق و اديك شايف الاسعار شوف الفرق
اما باقي المصاريف اللي صرفتها كانت في حاجات ملهاش علاقة بالموتور و العمرة يعني انت لو كنت فكرت في قصة تسقيط مع باقي المصاريف كنت هتعمل حسابك في 5000 ج:)

بس اختلف معاك يا عمرو

علشان نقارن صح فخللى بالك ان اللى عندى دا موتور بالفتيس

و انا لما حسبت تقريبا النص عمره معاه عملت 2500 جنيه و دا كله مقربناش ناحية الفتيس

يعنى لو حبيت كمان تعمل شغل فى الفتيس هتلاقى العملية بقت هيا هيا ان لم تكن العمره اغلى

و لا ايه رأيك؟