مابين ضمان الالف و السفر !!! ساعدوني

[HHALAWANY]

السلام عليكم يا شباب السوزوكي ...
انا وصلت لل١٠٠٠ كيلو خلاص ، ورايح لضمان الالف كيلو قريب
بس المشكلة دلوقتي اني مش فاضي واحتمال اسافر قبل ما اروح التوكيل
١) اولا هل ممكن اسافر قبل مااروح التوكيل
٢) فكرت اني اغير زيت قبل السفر ، ايه هو افضل نوع للماروتي احطه خارج التوكيل
٣) لما اغير الزيت خارج التوكيل في مشكلة من حيث الضمان ولا عادي ؟
٤) في حاجة تاني المفروض اعملها قبل ما اسافر !!!
٥) اخيرا ... ان شاء الله لما اروح التوكيل بعد كده اعمل حسابي على كام في الفلوس تقريبا ؟؟؟!!!


صحيح فيها حاجة لما اروح التوكيل وانا على ١٢٠٠ كيلو ولا حاجة !!!!!!! ولا لازم الالف بالظبط

وشكرا يا شباب ،،، :)

[aw2100]

ماتحبكش الموضوع قوى 1000 او 1500 مش مشكله سافر ولما تيجى ربنا يسهلها بس ماتقرصش اوى على الموتور وانت مسافر علشان لسة بيلين وترجع بالسلامة؟؟

[el diesel]

تسافر وترجع بالسلامة ان شاء الله
واعتقد انك بتليفون واحد للتوكيل وهما احسن ناس تقدر تجاوبك على استفساراتك بدقة :)

[bassemali]

الأفضل تعمل الصيانه قبل السفر ... زيت التليين ده خطر جدا .. وكمان التوكيل في صيانة الألف هيظبطوا العفشه ويشيكوا ع العربيه كلها مش موضوع تغيير الزيت وبس .

[mohamed_mesho3]

غير الزيت و توكل على الله و سافر و لما ترجع اعمل صيانة بس متقرصش على المكنة لسه بتليين , و يفضل انك تعمل الصيانة عشان يربطوا عفشة و يكشوفوا على زوايا و ترصيص و كده بس مش مشكلة و لازم تغيير زيت

[dr.hazem]

صيانة الالف ماكسيمام لحد 1500 كيلو بعدها بتطلع من الضمان...
رايي متسافرش بزيت التليين لو المسافه الكليه للسفره اكتر من 200 كيلو...
بالنسبة للمده الزمنية أعتقد لازم خلال 6 شهور كحد أقصى بين كل صيانة والتانيه...
تحياتي

Sent from my LT18i using Forum Runner

[mohamed_mesho3]

انا قبل الماروتى كان معايا لانوس زيرووووو و كنت فاكر ان اول صيانة فى 5000 كيلو و روحت عملتها على 7500 كيلو و فضلت على زيت التلين دا لحد 6000 كيلو و سافرت تلت مرات عليه كمان , و فى التوكيل بهدلونى طبعا بس مطلعتش من الضمان و لا اى حاجة
ف لو هتسافر يا ريت تغير زيت الاول مهم جدااااااااااااا

[Amr Axel]

نصيحة روح اعمل الصيانة و اوعي تسافر ع زيت التليين
عشان تغير الزيت و يراجعوا ع العربية كلها و العفشة و السوائل و اي مشاكل بتواجها تقولهم عليها عشان يظبطوها و تسافر و انت مطمن
و اعمل حسابك في 250-300 ج هي مش هتوصل ان شاء الله بس مجرد زيادة افضل

[HHALAWANY]

بجد شكرا جدا يا شباب على النصايح
مع ان بعض قال سافر والبعض قال متسافرش الا وانت رايح التوكيل :)
بس على كل حال شكرا بجد وتعبتكم معايا
المشكلة عندي ان انا الاسبوع ده كله عندي شغل ومش هافضى الا اخر الاسبوع طبعا ، واخر الاسبوع اجازة زي ماكلنا عارفين
وكل سنة وانتم طيبين :)
وفي نفس اخر الاسبوع ده برضه انا مسافر فكده كده مش هالحق اروح التوكيل دلوقتي الا بعد الاجازة ياعني على اخر الاسبوع اللي جاي كمان مش ده
فحاجة من الاتنين اما اسافر وخلاص بس طبعا اغير الزيت ، واما اكنسل موضوع السفر ده من الاساس وافضل بالعربية كده لحد برضوا نهاية الاسبوع اللي بعد شم النسيم
ياعني في جميع الاحوال العربية مش هاتروع التوكيل الا بعد نهاية الاسبوع بتاع شم النسيم
الفكرة هنا في الشفر من عدمه وكل الحكاية يوم رايح جاي على طول ،، وكله على الله :)
سؤال بقا ، لو ماعرفتش اكنسل السفر ايه نوع الزيت اللي المفروض احطه للماروتي ؟؟؟
واروح لمين يغيرهولي ؟؟؟ وشكرا

[aw2100]

غيره بشل الأصفر لسة شارية ب 130 جنية وغير فلتر الزيت كمان !!

[HHALAWANY]

طب معلش سؤال
هو انا ممكن ابعت المدام التوكيل بالعربية بدالي ؟؟؟ علما بان العربية رخصتها باسمي

[Land_Cruiser]

طب معلش سؤال
هو انا ممكن ابعت المدام التوكيل بالعربية بدالي ؟؟؟ علما بان العربية رخصتها باسمي

عادي مفيش مشاكل اي حد يروح المهم بس تبقي معاها رخصه العربيه . التوكيل بياخد رخصه العربيه علشان يقرأ ينقل منها البيانات زي رقم الشاسيه و الموتور اللي بيحتاج انها تتسجل عنده في كل صيانه و كمان يتأكد ان اللي جايب العربيه معاه رخصتها و مش بيشترطوا وجود صاحب العربيه بنفسه تسهيلا علي الناس . المهم بس انها علشان اول صيانه انها تعطيهم بيانات حضرتك زي الاسم بالكامل ورقم الموبايل و ما تنساش دفتر ضمان العربيه لتفعيل الضمان

[Amr Axel]

مفيش مشاكل يا باشا و خليها تتابع معاك في التليفون و تسألهم ايه اللي هيتعمل الأول و التكلفة عشان مفيش اي حاجة زيادة تتعمل ملهاش لازمة

بس حاول تبقي تعملها توكيل قيادة في الشهر العقاري لأن قانونا في حالة ان اللي سايق مش صاحب العربية و لا صاحب العربية معاه لازم يكون معاه توكيل يثبت ان صاحب العربية سامح له بالقيادة لو بطاقتها مذكور فيها اسمك يبقي خلاص ممكن تعدي بس انا بقولك عشان تبقي في الامان بس

[HHALAWANY]

عادي مفيش مشاكل اي حد يروح المهم بس تبقي معاها رخصه العربيه . التوكيل بياخد رخصه العربيه علشان يقرأ ينقل منها البيانات زي رقم الشاسيه و الموتور اللي بيحتاج انها تتسجل عنده في كل صيانه و كمان يتأكد ان اللي جايب العربيه معاه رخصتها و مش بيشترطوا وجود صاحب العربيه بنفسه تسهيلا علي الناس . المهم بس انها علشان اول صيانه انها تعطيهم بيانات حضرتك زي الاسم بالكامل ورقم الموبايل و ما تنساش دفتر ضمان العربيه لتفعيل الضمان

الف شكر ليك ، تسلم

[HHALAWANY]

مفيش مشاكل يا باشا و خليها تتابع معاك في التليفون و تسألهم ايه اللي هيتعمل الأول و التكلفة عشان مفيش اي حاجة زيادة تتعمل ملهاش لازمة

بس حاول تبقي تعملها توكيل قيادة في الشهر العقاري لأن قانونا في حالة ان اللي سايق مش صاحب العربية و لا صاحب العربية معاه لازم يكون معاه توكيل يثبت ان صاحب العربية سامح له بالقيادة لو بطاقتها مذكور فيها اسمك يبقي خلاص ممكن تعدي بس انا بقولك عشان تبقي في الامان بس

تمام ... انا كل حاجة مفهمها عليا نقطة نقطة وبالمناسبة موضوع التوكيل ده انا فكرت فيه برضه مع العلم ان اسمي موجود عندها في البطاقة ... بس برضو لزوم الامان
اشكرك يا استاذي على ردك واهتمامك
تحياتي :)