الي حازم خضر وكل خبراء السوزوكي

[mohamed_rhem]

حازم باشا صباح الخير
منور المنتدي
انا معايا شاريد 90 تكيف زي الفل وعربيه تمام ومريحاني علي الاخر
اخويا عنده معرض سيارات ويعلم مدي حبي للهاتشباك
عارض علي سوزوكي سويفت هاتشباك 94
زيرو مرفوعه من ساعه ما اشترتها لم ترحص
العربيه حاله شاذه عداد 500 كم فقط
العربيه كانت مرفوعه ومتشحمه وبالزق بتاع الباكتات
هي لونها ابيض ولسه بحاله المصنع
هي 1300 فاضيه صاحب السياره بيحلف ان البنزين اللي فيها حاطه سنه 94 ب 40 قرش
الزيت اللي فيها بتاع المصنع
كل حاجتها الاصليه حتي ميه الردياتير
هل لو اشتريت العربيه ده تبقي لقطه
ينفع اركبلها تكيف في التوكيل وبيقي تمام ويتكلف كام
ايه سعر السوق السعر العادي
وسعر العربيه ده بالتحيد تعمل كام
وهل الموتور بتاعها قطع غياره موجوده ولا كامه مزودجه اللي انت اتكلمت عنه
وشكرا واسف للاطاله

[mohamed_rhem]

ها يا شباب انا انهارده إن شاء الله رايح اتفرج علي العربيه مفيش حد عنده معلومات عنها؟

[islamnabil]

حاول تسأل عن قطع غيارها
قريت هنا قبل كده ان قطع غيارها نادرة
بس مش متأكد

[islamnabil]

راجع الموضوع ده

http://www.nilemotors.net/Nile/showthread.php?t=33869

[mohamed_rhem]

الاستاذ islamnabil
شكرا علي الرد

[mohamed_rhem]

انا سألت علي الموتور بتاعها 1300 الياباني مش 1000 اللامريكي الياباني اللي بكامه واحده
بس السعر المطلوب فيها غالي شويه
عايز اعرف السعر الصح
وكمان العربيه زيرو
لو ركبتلها تكيف يعيبها
يعني حيبهدل الحوض والضفيره ولا ايه النظام؟
شكرا مقدما للردود

[AHMEDCAR]

اسمحولى ادلوا بدلوى فى الموضوع ده
العربيه فعلان ممتاز بس فى حاجه احب اقولها واكيد هاتحصل جلب الصبابات اكيد نشفت و عايزه تتغير يعنى لما هاتدور العربيه هتلاقيها بتطلع دخنه زرقا و ده معناه مش ان الموتور فوت لا ده معناه ان الجلب دى عايزه تتغير و غالبا هاتحتاج شغل كتير فى العفشه و خاصه الجلب برضوا علشان الركنه بتبوظ الحاجات دى

و الله الموفق

[hazem_khidr]

استاذ محمد
آسف للتاخير و الله لسه شايف الموضوع حالا
لما يبقي فيه حاجه زي كده ابعت ليا رساله علي الخاص و انا ادخل
و اسف للتاخير مره تانيه:)
..........
المهم العربيه لو بالحاله اللي بتقول عليها دي ما تسيبهاش
بس اهم حاجه تكون مافيهاش بارومه
اصل فتره زي دي لو العربيه مش متخزنه كويس يبقي حتلاقي البارومه سارحه فيها
اهم حاجه تكون متخزنه كويس و مافيش فيها بارومه و حط تحت بارومه ميت خط.
بالنسبه لقطع الغيار هيا نفسها السويفت العاديه ما عدا الابواب الخلفيه و الشنطه و الفوانيس الخلفيه و لعلمك حتلاقي قطع الغيار في المحلات اللي في احمد حلمي كتيييييييييير اوي.
بالنسبه للتمن بصراحه ما اقدرش افتي فيه لان العربيه لو بالحاله دي حالتها شاذه فعلا
يعني انا لو متكيف منها و عاوزها ممكن ادفع فيها 38 الف و انا مبسوط
رغم اني عارف انها مش حتجيبهم و انا ببيع بس لو حالتها نضيفه حركبها 5 سنين او اكتر مش ححط فيها مسمار.
اللي حيضايقك منها بس هو كاوتش العربيه كله فعلا حيحتاج يتغير
يعني كاوتش الابواب و الشنطه يعني اي جظء مطاط فيها حيحتاج يتغير.
لكن دي واحده واحده تغيره مافيش مشكله
يا ريت لو جبتها تصورها و تورينا الصور:)
ااااه علي فكره لتر البنزين سنه 94 كان ب 90 قرش الاوكتان 80 و ا جنيه الاوكتان 90
اللي كان ب 40 قرش كان السولار:)هههههههه
اظاهر عليه كان بيحط سولار
الحمد لله ان صاحبها ركنها ههههههههههه
بالنسبه للتكييف فبيركب عادي جدا و طالما الموتور كويس حيبقي ممتاز و تكييف السويفت بصراحه تحفه.

[mohamed_rhem]

الاستاذ احمد
كلام حضرتك مظبوط بس انا نسيت اقول حاجه
هو كان مدي المفتاح لسايس الجراج
طبعا هو رافع العربيه مغطي اغلب اجزائها بالشحم
بس كانت بتدور كل كام شهر ساعه
العربيه اللي ركبها بيقول بسم الله ما شاء الله
بس هل ده كفايه ولا برضه في حاجات ممكن تكون في حاجه تانيه
التكيف حد يعرف حيتكلف كام في التوكيل وحيبقي في مشاكل في التركيب والضفيره حتتغبر ولا معمول حسابها ولا حيتلعب فيها
ارجو الافاده

[mohamed_rhem]

شكرا حازم باشا علي الافاده هو اخويا شافها وبيقول مفيهاش ولا ملي بارومه
ومش بالنسبه للثمن36 هو حيرخصها علي طول بأسمي لو في نصيب
انا بس اللي مقلق منه في لعب في الضفيره وفي الحوض علشان التكيف
شكرا جزيلا يا باشا

[hazem_khidr]

طب يبقي كويس لو بالتمن دا
لعلمك ما ياخدهاش غير لو واحد غاوي
و بعد كده حالتها هيا اللي حتبيعها بس برضه حتخسر فيها شويه.
بالنسبه للتكييف فماتقلقش مافيش لعب في الضفيره ولا حاجه
بيركب سهل جدا

[mohamed_rhem]

الف الف شكر يا حازم باشا تعبناك معانا

[hazem_khidr]

لا شكر علي واجب يا باشا
طمني بس علي الاخبار
و عملت ايه