بيع سوزوكى ماروتى

[shimoshosho]

لو سمحت حد يفدنى انا معايا سوزوكى ماروتى كنت اشترتها مستعمله من اربع شهوور

وصلحتها وعملتها سروجى جديد و عملتلها بويا ميتالك و الميكانيكا والمسمكرة كلها حلوة ومفيهاش اى حاجة تمام يعنى بقت

عربية تمام بس فيها شووية شغل فى العفشة حاجة بسيطة

بس انا دلوقتى فكرت فى بيعها ومش عارفة تجبلى كام بصراحة مع العلم انى صرفت عليها لحد 23 الف كنت اشترتها ب 13 الف بصراحة انا وضبت فيها فى كل حاجة وجيت فى العفشة هى كانت محتاجة مبلغ 300 ج بس انا مقدتش لانى كنت فكرت فى بيعها لانى محتاجة فلوسها وهى مترخصة لمده سنة لسه ترخيشها من 3 اغسطس 2008 لحد 3 اغسطس 2009

انا لو طلبت فيها اللى صرفته ممكن يجيلى فيها المبلغ ده هى موديل 1995

ياريت الافاده وشكراااا

[mohamed_88sk]

لا حول ولا قوة إلا بالله !!!

لأ ما ظونش تجيب اللي أتدفع فيها عالأقل ...
مش عارف أقولك إيه بجد !!!!

طيب هو متقدرش أنت حضرتك تكم بيها ؟؟؟
أصل حرام اللي دفعته كله ده كنت جيبها جديده أحسن
جديده 2008 ب 36 ألف وفي 38
يعني حضرتك مكلفها تمنها زيرو بجد الله يعينك ويحسنلك بيعها

[Tamer-Ezzat]

هى كدة واقفة عليك ب ـ 23 الف جنيه
ولا 23 + 13 (ثمن الشراء )
علشان تفرق كتير قوى
وفى كلتا الحالتين العربية دى اعتقد توبها 18-20 الف جنيه لو سليمة

وياريت مجتش على شغل العفشة واعمله علشان لما تبيعها متقولش للمشترى عايزة مسمار علشان دة بيفرق كتير

[shimoshosho]

لالالا 23 بالتوضيب هى 13 وانا زود 10 عليها


ياررب بجد تجبلى المبلغ ده او اقل الف او اتنين مش مهم

الف شكر للاهتمام

[m000dy]

للاسف ياشيمو مش هاتجيب اللى يرضيكى
وانا سيبتلك مشاركه فى موضوع تانى انتى كنتى عارضه فيه العربيه
انا زيك جبت عربيه 127 ايم الغلو موديل 74 وصرفت عليها عمرة موتور كامله وعفشه كامله وجنوط المانى وتهبيط وكراسى جلد وانتريور كامل جوه بالتابلوه والعدادات وركبت كاوتش عريض حتى الاكصدامات جبتها ايطالى اصلى نيكل ب 950 جنيه بس لوحدهم وخدت بيها صيت زى الفل فى البلد كلها واتعرفت عشان كانت الوحيده البرتقالى وكنت جايبها ب 13 الف والله على القفل ايام الغلو وحسبت اللى صرفته لقيته 6000 جنيه يعنى واقعه عليا بتمن انضف فيورا فيكى يابلد بفرق 15 سنه فى الموديل كمان
دلوقتى مش جايبه تمنها اللى اشتريته بيها
هاتركبى عربيات يبقى خدى دى قاعده ماتتغيرش
اوعى تتوقعى انك تجيبى اللى صرفتيه على عربيتك اما تيجى تبيعيها التجار بس اللى بيعملوا كده عشان بيزوقوا
انما احنا بنركب عربيه فيها روحنا والواحد مابيستريحش نفسيا لو حس بس ان كان فى حاجه احسن ومعملهاش
وماتقلقيش ربك دايما بيعوض يعنى فى عربيتك الجايه يمكن يكون فيها بركه وخير اكتر من تمنها انا شفت كده بعينى واللى يغش هايتغش واللى يستعوض ربنا ربنا بيبدله خير وعن تجربه
قوليلى بس تفاصيل اكتر عنها ولو كده يمكن يكون شاريها عندى ان شاء الله