ماروتى حبيبتى....عايز احافظ عليها

[yasser36b]

السلام عليكم ورحمه الله

أنا لسه مشترى ماروتى ولا يوجد عندى أى معلومات خاااااااااالص عن العربيات.....عايز أعرف ازاى أهتم بيها وأفوقها وتكون دايما مبهجه و بصحتها

[emad_2020]

سبيها على الله هو الحافظ
اعمل الصيانة فىوقتها وايدك فى العربية او ما تحس ان فيها حاجة

[lidosasa]

ربنا يبارك ليك فيها ويديك خيرها ويكفيك شرها
هى العربية زيرو ولا مستعملة عشان نقدر نفيدك اكتر فى الحاجات اللى ممكن تعملها للحفاظ على العربية

[yasser36b]

ربنا يجازيكم خير.....هى مستعمله موديل 2007 و غيرتلها الأربع فرد و طقم الكهرباء

[waelgam2005]

طيب راجع الفلاتر هوا وبنزين وشوف الزيت لو عاوز يتغير غيره وغير الفلتر بالمرة وشيك علي السيور

[HHALAWANY]

الف مبروووووك ، ربنا يديك خيرها ويكفيك شرها
وان شاء الله الجهابزة هنا يغيدوك في اللي انت عاوز تعرفه

[Amr Axel]

الف مبروك يا باشا ربنا يديك خيرها و يكفيك شرها
بس مشوفناش تقرير عن العربية و انطباعك عنها :)

عامة فيه شوية صيانات وقائية المفروض تعملها لأنك متعرفش المالك السابق عملها و لا لأ و هي كالآتي :

غير سير الكاتينة و الميكانيكي يبص ع بلية الكاتينة لو محتاجة تتغير اهم حاجة
اكشف ع سير الدينامو
غير فلاتر هوا و بنزين

و بتقول غيرت طقم الكهربا اذن تقصد ابلاتين و كوندينسر و بوجيهات

طبعا زيت الموتور و الفلتر مفروغ منه مع العلم الموتور بياخد 2.75 لتر بالفلتر و 2.5 من غير فلتر و يفضل تغير الفلتر مع كل تغييرة و الزيت اللي يعتبر ماشي كويس مع الماروتي شل hx5 اللي بيقال عليه شل الاصفر و لزوجته 15w50 و ده متوسط تغيير 4-5 الاف ع حسب طريقة السواقة و الجو و حالة الموتور و طبعا بالكشف عليه بيظهر الي حدا ما حالته
زيت الفتيس كذلك يتغير برده شل لزوجة 75w90 او 80w90 و ع ما اتذكر الماروتي بتاخد 2 لتر و بيتغير بعد كده كل 20-30 الف ك و اوعي حد يقولك زيت اللفتيس مبيتغيرش و بيتزود لو نقص ده معناه ان فيه تسريب عندك و اوعي تخلي حد يعبي من الطرمبة البرتقالي لأن فيها بلاوي و بواقي الزيت في اماكن كتيير لكن اللي يعبي يستخدم رداخ و يحطلك من الجيركن المتبرشم و يفضل تعبيه في البنزينة

مية الريداتير تتغير و تحط مية ريداتير سواء خضرا او زرقا المهم تكون مية نضيفة زي موبيل او ادكو او اي نوعية مجربة و ديه بتتغير كل سنتين او 40 الف ك تقريبيا

زيت الفرامل يتغير برده كل سنتين عشان بيفقد خواصه و الشوائب و برده اوعي حد يقولك مبيتغيرش و بيتزود نقص يعني فيه تسريب سواء ماستر عمومي او فرعي ضارب او التيل خلصان و تستخدم نوعية كويسة زي بيندكس او لوكهيد او اس ال
و تخلي الميكانيكي ينزل الزيت اللي في الدورة كلها الأول و بعدين ينضف الدورة بالزيت الجديدة و ينزل الزيت الجديدة من كل فردة و بعدين يملي ع نضافة و ياخد هوا من الدورة اوعي يخلط او مينضفش الدورة عشان ممكن الماستر يضرب لو كذا نوع ع بعضه

شوف مية البطارية لو سايلة و اعملها صيانة كل شهر

نضف البوابة و الكربراتير و رجلش دواسة البنزين و زييت دواسات البنزين و الفرامل و الدبرياج و بالمرة خلي الميكانيكي يبصلك ع طقم الدبرياج

و زيت مفصلات الابواب و الشنطة و الكبوت و ربط مسامير العربية كلها

و ظبط زوايا و ربط عفشة ممكن قبل تربيط العفشة تغسل العربية من تحت و ترش wd-40 ع العفشة او تقول العامل و هو عارف هيرش فين و بعدها بيوم تروح تغسلها من تحت تاني و ترش شحم ابيض ع العفشة و تروح تربط بعدها العفشة هترجع كأنها جديدة

بس كده يا باشا ديه صيانة وقائية دلوقتي
و من بعدها بقي صيانات دورية و قولنا العربية عاملة كام الف ك عشان نقولك لو فيه حاجة تانية محتاجة يتكشف عليها

لكن طالما عملت القصة اللي فوق ديه ان شاء الله العربية مش هتطلب منك حاجة غير زيت و بنزين الصيانات الدورية مش هتكون قبل 20 الف ك كمان

و احنا معاك ان شاء الله في اي صيانات عايز تسال عليها بس قولنا عاملة كام الف دلوقتي

اهم حاجة متنساش الانذار و اي تظبيط في العربية اسال و ان شاء الله نفيدك

اهم حاجة متنسناش بالتقارير عن اي حاجة تعملها في العربية حتي لو جبتلها معطر هههههه

[mesaharaty]

يا جمالك يا عمورة
أستاذ والله

بس الأخ الكريم ماقليناش هى عاملة كم ألف كيلو ؟

[rameahmed]

استاذ يا عمرو بجد جزاك الله كل خير

[yasser36b]

جزاكم الله خيرا كلكم....وخصوصا Amr Axel بجد انت قولتلى حاجات حاسس ان العربيه ان شاء الله هتطلع سفينه فضائيه :) هى العربيه عامله 30 ألف كيلو ومتغيرها موبيل 1 والميكانيكى بيقولى غيره بعد ألف كيلو احتياطى عشان صاحب العربيه بيقول ان لسه ناقص 3000 كيلو وانا ساكن فى شيراتون فممكن أوديها محطه بنزين فين قريبه ونظيفه والحاجات دى يا عمرو تتكلف فى حدود كام....ومعلش من يومين كانت مش بتدور الميكانيكى قالى الاسبراتير كان فيه رايش ونظفه بس صوتها عالى بعد ما كنت وطيته وسحبها مش مظبوط فهروح أظبطها ان شاء الله ولكن الرش و الحاجات اللى عمرو قالها ان شاء الله أعملها بس لازم أغير زيت الفرامل والتيل دلوقتى ولا ايه؟ مع ان الميكانيكى صاحبى بيشكر فيه وانا حسيته لما ضبطلى سحب العربيه و الكركره وقالى مافيهاش حاجه بفضل الله...أفيدونى بارك الله لكم

[yasser36b]

وبالنسبه عن انطباعى للعربيه ياعمرو هى جميله جدا و الحمدلله بناتى لسه صغيرين فلمانا وهى اللهم بارك فرده على الطريق و بتجيب لحد 120 بس بقلق بعديها بس بجيب السرعه دى كل فتره عشان اصحيها :) عشان بحس ساعات انها شبه بناتى عايزه تجرى وتلعب بس خفيفه فبهدى بعد 30 ثانيه تانى.....وعندى مشكله فى الأول دايما بتكركر و تقف و خصوصا لما يكون فى حد ورايا بيزمر او لا برتبك وبتفصل كتيييييير بس الناس محترمه ولسه ماشتمتش فعلى ما اعتقد لازم اتدرب شويه على الأول ده فى حته فاضيه ان شاء الله بس عموما بحبها الحمدلله وبعاملها زى عيالى وبفكر أطلعها معايا فى الأسانسير قدام الشقه :)

[Amr Axel]

جزاكم الله خيرا كلكم....وخصوصا Amr Axel بجد انت قولتلى حاجات حاسس ان العربيه ان شاء الله هتطلع سفينه فضائيه :)
هى العربيه عامله 30 ألف كيلو ومتغيرها موبيل 1

والميكانيكى بيقولى غيره بعد ألف كيلو احتياطى عشان صاحب العربيه بيقول ان لسه ناقص 3000 كيلو

وانا ساكن فى شيراتون فممكن أوديها محطه بنزين فين قريبه ونظيفه

والحاجات دى يا عمرو تتكلف فى حدود كام

ومعلش من يومين كانت مش بتدور الميكانيكى قالى الاسبراتير كان فيه رايش ونظفه بس صوتها عالى بعد ما كنت وطيته وسحبها مش مظبوط فهروح أظبطها ان شاء الله

ولكن الرش و الحاجات اللى عمرو قالها ان شاء الله أعملها بس لازم أغير زيت الفرامل والتيل دلوقتى ولا ايه؟ مع ان الميكانيكى صاحبى بيشكر فيه وانا حسيته لما ضبطلى سحب العربيه و الكركره وقالى مافيهاش حاجه بفضل الله...أفيدونى بارك الله لكم

طالما موبيل وان ده زيت تخليقي مش فاكر لزوجة كانت 5w30 و لا 5w40 المعادل له في شل هو شل الترا عبارة عن جيركن اسود و سعره في نفس حدود موبيل برده اما شل الاصفر لزوجة 15w50 ده معدني و سعره دلوقتي بقي 125-130 طبعا الزيت التخليقي افضل من جميع النواحي لكن وجوده يعتبر زي عدمه بالنسبة موتور الماروتي لكن الميزة انه هيحافظ ع نضافة الموتور اكتر من المعدني و عمره اطول من التخليقي يعني المعدني ممكن ميكملش 4000 و ممكن يكمل 5000 و يعدي عكس التخليقي الضعف و احيانا قد يصل لـ12 الف كمان

معرفش فين بنزينات شل هناك بصراحة ممكن تسأل الناس في القسم العام و هم يفيدوك

بخصوص التكلفة تتوقف عايز تعمل ايه دلوقتي
يعني مثلا سيور و بلية و فلاتر و تيل هتلعب في حدود 250 ج

مية ريداتير موبيل 80 ج

زيت فتيس في حدود 50 ج و زي الموتور ع حسب و الفلتر في حدود 25 ج متركبش غير الياباني بلاش الانواع بتاع اللي بيمشي 5000 و بيمشي مش عارف ايه زي حوار الزيت زيت 5000 و
زيت 10000 كله هجس الفرق ان الفلتر ابو 5000 بتبقي خامته مش اد كده و ارخص اما اللي بيقولوا 10000 او ياباني ده خاماته انضف و غالبا هتلاقي بتاع تويوتا او زيوركس يركب عندك

زيت فرامل اخر مرة كنت جايب بيندكس العلبة 400 ملم بـ15 ج

منظف كربراتير بـ15-20 ج الانواع فيه كتيير لكن الغالب اللي هتلاقيه ابرو علبته زرقا و غطا احمر
w-40 ع حسب حجم العلبة بتبدأ من 10-15 ج

شحم ابيض و ده هتلاقيه في ماركت محطات البنزين و خاصة سمايل في وطنية النوع اللي هناك فالفولين و سعرها حوالي 25 ج

ديه الاسعار من غير مصنعيات اما باقي الحاجات اللي ذكرتها فكلها مصنعيات و انت تظبط مع الميكانيكي و الميكانيكي يقدر يظبطلك القصة ديه كلها في ساعتين زمن و يكون بيدلع كمان
بس زي ما انت شايف كلها حاجات خفيفة و تخلي العربية عروسة

بخصوص الفرامل طبعا مهمة لو التيل لسه خلاص غير الزيت بس لو التيل بيخلص يبقي غير الاتنين و تكلفتهم بسيطة

وبالنسبه عن انطباعى للعربيه ياعمرو هى جميله جدا و الحمدلله بناتى لسه صغيرين فلمانا وهى اللهم بارك فرده على الطريق و بتجيب لحد 120 بس بقلق بعديها بس بجيب السرعه دى كل فتره عشان اصحيها :) عشان بحس ساعات انها شبه بناتى عايزه تجرى وتلعب بس خفيفه فبهدى بعد 30 ثانيه تانى.....وعندى مشكله فى الأول دايما بتكركر و تقف و خصوصا لما يكون فى حد ورايا بيزمر او لا برتبك وبتفصل كتيييييير بس الناس محترمه ولسه ماشتمتش فعلى ما اعتقد لازم اتدرب شويه على الأول ده فى حته فاضيه ان شاء الله بس عموما بحبها الحمدلله وبعاملها زى عيالى وبفكر أطلعها معايا فى الأسانسير قدام الشقه :)

تسلم ايديك ع التقرير يا باشا بس كان المقصود تقرير في موضوع منفصل في القسم :)
و هننتظر بقي تقرير عن اللي هتعمله في العربية ان شاء الله سواء صيانات او كماليات و اكسسوارات

و اي استفسار اتفضل يا باشا و ان شاء الله نفيدك :)

[yasser36b]

يا عمرو ربنا يكرمك بجد هروح أشوف ميه الرادياتير أغيرها وأشوف برضه منظف الكربراتير...بس الشحم الأبيض بيستخدم فى ايه يا عمرو معلش؟ وهحط انطباعى عن الماروتى فى موضوع لوحده من عينى ياباشا

[Amr Axel]

الشحم الابيض للعفشة راجع مشاركتي الاولي في الموضوع لو مش عايزه مفيش مشاكل