محتاج صور لماروتى موديل 96 ضرورى ومحتاج رأيكم فى العربية دى !!!

[moury]

ياجماعة انا بفكر اجيب سوزوكى ماروتى مستعملة على قد فلوسى اللى هى فى حدود 15 - 17 الف

ممكن حد يكلمنى عن العربية دى اكتر وهل هى كويسة ولا لا خصوصا ان الفلوس اعتقد هتجيب موديلات قديمة شوية يعنى تسعينات
وهل تتحمل السفر ولا لا
مشوارى يوميا لشغلى 30 كيلو رايح وزيهم جاي ..
السفر البعيد زى من الشرقية للقاهرة او كده هل تقدر تسافر المسافة دى اللى هى حوالى 100 كيلو متواصل ؟؟
طيب بالنسبة للحمولة هل تقدر تشيلنى ومعايا تلاتة تانيين وزنين خفاف والتالت تقيل ؟؟
بتعطل كل شوية زى ال 128 ولا هى احسن من ال 128 ؟؟؟؟؟

واخيرا انا معروض عليا ماروتى 96 حالتها كويسة بس لسه مشوفتهاش هشوفها واقولكم حالتها ايه بالظبط واخد رأيكم بس مبدئيا هل موديل 96 كويس ولا تعبان ؟؟؟

وياريت لو حد يحطلى صور لماروتى 96 من بره ومن جوه ضرووووري بس يكون متأكد ان دى موديل 96

وشكرا لكم

[lidosasa]

العربية تستحمل السفر من غير مشاكل بإذن الله
لكن الموتور 800 سى سى يعنى 4 أفراد حيبقى حمل كبير على الموتور وحيسخن ويتبهدل منك بسرعة وسحب العربية حيبقى الضياع هى تستحمل العدد ده بس مش بشكل يومى وبإستمرار ولمسافات طويلة دا رأى الشخصى لآن عربيتى بمشى بيها أنا ومراتى وأبنى الصغير زى الفل ولما أركب معايا أتنين كمان ورا بتبقى حمادة تانى خالص كأنك راكب بطة بلدى مع العلم إنها موديل 2007 هى بتجرى وكل حاجة والسحب مغقول لكن على حساب الموتور بيبقى بينعر وخصوصاً فى المطالع .
بالنسبة للأعطال مفيش عربية فى الدنيا ملهاش أعطال لكن طبعاً مش زى أعطال ال 128 لآن الموديل أحدث بس المهم هى عاملة كام كيلو وحالة الموتور أيه ولو تقدر تزق المبلغ فوق ال 20000 ألف وتجيب حاجة موديل فوق ال2000 حيكون أحسن وحتكون الشكل الجديد اللى من أول 2000 لحد 2014 هو نفس الشكل .

[Amr Axel]

العربية في العادي تستحمل لكن زي ما ذكر بالعدد ده هيبقي حمل و هتحس انها بطة بلدي فعلا
و كمان موديل 96 اكيد هتبقي متبهدلة و مش بعيد تجيبها تقرفك لأن فيه حاجات متبنش الا مع الاستخدام يعني الموتور متاكل من جوة او العفشة هتلاقي نفسك جايب عربية تصرف عليها و بالتالي الأفضل تجيب موديل احدث شوية فوق الـ2000 و ده الطبيعي في اي عربية مستعملة بيبقي انت و نصيبك
الـ128 سبب اعطالها قطع غيار جودتها سيئة و اصحابها جايبنها عشان ميصرفوش عليها و احيانا بيكون صنايعي تعبان و بالتالي طبيعي تلاقي اعطال كتييير و في اي عربية
و كمان لاحظ الفرق عربية عدي عليها 30 سنة مش زي عربية عدي عليها 5 سنين كمان قطع الغيار و جودتها و الصنايعي الشاطر ممكن يخليك تمشي بعجلة طول عمرك و ميبقاش فيها اعطال بس هتحتاج تصرف في الأول عشان ترتاح بعد كده الميزة في الماروتي ان الشغل سهل فيها و قطع غيارها رخيصة جدااا و متوافرة اهم حاجة تعرف ان العربية محتاجة مصاريف و صيانات دورية مش زيت و بنزين و خلاص
يعني لما بتجيب عربية مستعملة اعمل حسابك في مجموعة صيانات لا بد منها سيور و فلاتر و بوجيهات و باقي طقم الكهربا ان لزم الامر و تنضيف للكربراتير و البوابة و تغيير سوائل العربية كلها زيت موتور و فتيس و فرامل و مية ريداتير و تبدأ مع العربية صفحة جديدة ديه الصيانات الاساسية اللي تتعمل لأي عربية مستعملة
اما الباقي فيعتمد ع الحالة بقي بتاعت الموتور نفسه و الشاسيه سليم و العفشة و ده ميبنش الا عن طريق الكشف و يفضل الكشف ع الموتور في مركز او بنزينة مش شغل ميكانيكية يقولك اسمع صوته ده ع اساس انه مركب سينسور في ودانه هههههه

شكل 96 هتحس انه زي الصندوق و شكلها بدائي شوية و الفوانيس مربعة و من ورا الشطة مربعة شوية و طالع منها حليتين سود ع ما اتذكر كان فيها لمبات عشان النمر
اما الشكل الجديد المنتشر في الشوارع ده من موديل 2000 فيما فوق

[moury]

شكرا يا جماعة على ردودكم
وموضوع الحمل ده اكيد مش كل يوم ومش هيبقى لمسافات طويلة ده ممكن يكون مرة كل اسبوع او اتنين والمسافة هتكون مش اكتر من 10 - 20 كيلو

بس المشكلة ان اللى معروض عليا هى موديل 96 ودى بتاعت اخت واحد زميلى وبيبيعوها عشان هى مسافرة
لكن انا مش عارف موضوع الشكل ده

والمشكلة مش عارف الاقى العربية دى فين هنا فى الشرقية مش قدامى غير معارض وانا عارف ان المعارض معظمهم بيبقوا نصابين وخايف بصراحة
وفكرت انزل سوق الجمعة لكن للاسف مليش خبرة فى العربيات ومعظم صحابي ملهومش خبرة فى موضوع البيع والشرا ده
بصراحة محتار مش عارف اعمل ايه
مفيش حد منكم طيب قدامه ماروتى موديل فوق ال 2000 تكون فى حدود 20 الف يقولى عليها ولو المكان قريب ممكن انزل واشوفها
المشكلة ان شغلى بحكم طبيعته بيخلينى مش فاضى اصلا لانى دايما نبطشيات فى المستشفى بحكم انى طبيب بس نحاول لو فيه ماروتى حلوة