تقرير بتنظيف الكاربتير وتغير طقم الكهرباء وتنظيف فلتر البنزين

[waelgam2005]

ازيكو يا شباب عاملين ايه
انا النهارده قولت انظف الكاربتير بنفسى بدل ما اوديها لميكانيكى وهوا الموضو شكله مش مستاهل
الاول اشتريت اسبراى ابرو لتنظيف الكاربتير ب 25 جنيه امريكى ودى صورته
[sor2]http://www.abro.com/media/images/products/13_full.jpg[/sor2]

فكيت العمه خالص والعربية مبطله ولفيت قماشه على فتحتين الكاربتير ورشيت على بكرة البنزين بالدبليو دى والمجموعه اللى جمبها اللى فيها سوست وبعد كدا جبت منظف الكاربتير ولفيت القماشه حوالين الكاربتير علشان مفيش اى حاجه من الاسبراى تطير على الحوض ورشيت بالاسبراى فى الفتحتين لحد ما لمعت شوية وبعد كدا رفعت الشفاط ودورت مدرتش وحاولت معاها لحد ما جابت سبتها تسخن شوية وقعدت ارش فى الفتحتين بالاسبراى وازود ببكرة البنزين من الكابوت كام مرة كدا لحد ما حسيت انها نضفت ولمعت روحت مركب العمه تانى وربطت ونزلت الشفاط وشديت على الطريق شويه كدا بتاع ربع ساعه علشان الرواسب تطلع وعديت على الميكانيكى علشان اغير طقم الكهربا وغيرت البوجيهات وجبت ابلاتينه جديدة يابانى ب 25 جنيه هيا غاليه شوية بس انا شوفت الصينى اللى مكتوب عليها يبانى وشوفت دى حسيت بالفرق بصراحة لان القديمه كانت محروقة وانا كنت مغير الفبريكه قبل كدا وكنت عاوز اركبها ووريتها للميكانيكى قالى محروقة واللى كانت راكبه محروقة برضه وقالى لو دى كمان اتحرقت بسرعه يبقى الموبينه السبب هيا اللى بتحرق الابلاتينه وكانت عندى مشكلة تنتيشه رخمه كدا على كل الغيرات من اول ما استملت العربية لو انا مش كابس بنزين قولتله عليها قعد يظبط الكهربا وظبطها فعلا وظبط الهوا وقعد يعمل شوية حاجات غريبة كدا انا مفهمتهاش وقعدت يزود جامد لحد ما الماتور كان بينعر وقالى التاكيهات عاوزة تتظبط وهيا اللى عامله تنتيشه على السرعات اللى بتقول عليها دى بس مش هينفع النهارده علشان هيبقى حرام عليا لان الجو ده مينفعش
وفى الاخر خليته ينظف فلتر البنزين وهوا بينظفه شكله معجبنيش قولت اشترى واحد جديد واشتريت فلتر كوبايه هيونداى كورى ب 20 جنيه
اسف على الرغى الكتير بس قولت احكى بالتفصيل

[mesaharaty]

ألف مبروك يا باشا
بس ليه مارضيش يظبط التاكيهات ؟
وهل فلتر البنزين بيتنضف ؟ أنا أعرف إنه بيتغير لما بيتسخ على طول

[waelgam2005]

ألف مبروك يا باشا
بس ليه مارضيش يظبط التاكيهات ؟
وهل فلتر البنزين بيتنضف ؟ أنا أعرف إنه بيتغير لما بيتسخ على طول

الله يبارك فى حضرتك
مرضيش علشان العربيه لازم تكون بارده ده غير ان الجو كان كله تراب ومولع لوحده فا قالى خليك فى يوم تانى احسن
والفلتر بيتنظف وانا نضفته فى اول عشر الاف ولما شوفته وانا عامل عشرين شكله معجبنيش عشان كدا قولت اشترى واحد جديد احسن وخصوصا لانى بستعمل بنزين تمانين

[lidosasa]

الله ينور وشغل أصلى
بس كنت عايز أسال عن فلتر البنزين بتاع الهيواندى أى نوع يركب على الماروتى ولا موديل معين من الهيونداى

[micromoud]

انا الميكانيكى عندى بيفك العمة ويزود بنزين من السوسته اللى فى الكاربيراتير ويسد فتحه الكاربيراتير بايده لغايه ما بتنضف

سؤال بقى

هو فين التاكيهات يا جماعه ؟ وهل اى حد ممكن يظبطه ولالازم ميكانيكى وشكرا على التقرير

[waelgam2005]

الله ينور وشغل أصلى
بس كنت عايز أسال عن فلتر البنزين بتاع الهيواندى أى نوع يركب على الماروتى ولا موديل معين من الهيونداى

والله ما اعرف انا الاول كنت شارى الفلتر العادى ده اللى الفتحتين الخرج والداخل قصاد بعض بس بعد ما الميكانيكى فك الفلتر القديم لقيته شكله مختلف ولما وصفت شكله للراجل اللى انا اشتريت منه وانا برجع القديم جابلى بتاع الهيونداى ده

[waelgam2005]

انا الميكانيكى عندى بيفك العمة ويزود بنزين من السوسته اللى فى الكاربيراتير ويسد فتحه الكاربيراتير بايده لغايه ما بتنضف

سؤال بقى

هو فين التاكيهات يا جماعه ؟ وهل اى حد ممكن يظبطه ولالازم ميكانيكى وشكرا على التقرير

معرفش موضوع السد ده بصراحه
بالنسبة للتكيهات اللى اعرفه انه بيفك وش الماتور واول حاجه بتقابله هيا التكيهات ووراها وش السلندر

[ganash]

انا الميكانيكى عندى بيفك العمة ويزود بنزين من السوسته اللى فى الكاربيراتير ويسد فتحه الكاربيراتير بايده لغايه ما بتنضف

سؤال بقى

هو فين التاكيهات يا جماعه ؟ وهل اى حد ممكن يظبطه ولالازم ميكانيكى وشكرا على التقرير

دى ياباشا التاكيهات لما بيفك وش الموتور بتبقى تحته بيظبطها بحاجه اسمها فيلر ( الى فى الصوره ده) بيظبط الخلوص بين عامود الكامة والصبابات لازم واحد متخصص ميكانيكى او حد بتاع تاكيهات بس غالبا الميكانيكى هو الى بيظبطها ولازم العربيه تكون بارده

[dr.hazem]

مبدئيا مبروك الصيانه....
ثانيا...
انا مبحبش اللعب والافتاء....

وادي الخبز لخبازه ولو اكل نصه...
في واحد متخصص تاكيهات تحت كوبري مجرى العيون زعيم واصلي وبيدي ضمان عالظبط وبيدي فاتوره
وما شاء الله فاهمين....
ده تروحله ويكشف ويقولك تظبط ولا لا....
غير كدة متخليش حد يمد ايده عالتاكيهات لانك هتزعل جامد.....
تحياتي

Sent from my Xperia Arc S using Forum Runner

[micromoud]

دى ياباشا التاكيهات لما بيفك وش الموتور بتبقى تحته بيظبطها بحاجه اسمها فيلر ( الى فى الصوره ده) بيظبط الخلوص بين عامود الكامة والصبابات لازم واحد متخصص ميكانيكى او حد بتاع تاكيهات بس غالبا الميكانيكى هو الى بيظبطها ولازم العربيه تكون بارده

تمام كده انا فهمت منك حاجه جديده عاوز اعرف بقى دا بيفرق فى ايه فى العربيه و اعراض اعطاله ايه وشكرا ليك ولمجهودك :018a1d~146:

[ganash]

تمام كده انا فهمت منك حاجه جديده عاوز اعرف بقى دا بيفرق فى ايه فى العربيه و اعراض اعطاله ايه وشكرا ليك ولمجهودك :018a1d~146:

لو التاكيهات مش مظبوطه تلاقى الموتور بيسخن وممكن استهلاك البنزين يزيد وسحب العربيه يضعف والعربيه على السلانسيه مش مظبوطه والصبح قبل العربيه ما تسخن بتلاقى زى صوت تكتكه كده

[khalidawad]

طيب سلامو عليكو
التاكيهات دي ليها معدلات بعديها بتظبطها يعني مثلا كل ٤٠٠٠٠ كم او ما شابه
وهل ليها علاقه بتغيير سير الكتينه يعني لازم تتظبط بعد تغيير السير
والسخونيه دي معناها المؤشر يوصل للمنطقه الخيره منه مش الي هيه اعلي من النص بشويه

[S O P H O S]

مبــروك