الموتور بيسرب زيت داخل الكربيراتير

[basem74]

السادة خبراء الماروتى
تحية طيبة لكم وكل عام وانتم بخير

أنا معايا ماروتى 2008 أستعمال هذا الشهر تكون قفلت خمس سنوات أن شاء الله ،
لاقتها منذ اسبوعين مخنوقة جدا فى المشى أخرها كان 50كم وبطلع دخان كتير من الشكمان مع الغيار التالت عند طلوع اي كبري،
بلأضافة ألى أخر مرة غيرت زيت من اسبوع لاقيت الزيت نازل اسود وقليل جدا اقل من لتر،

ورحت لمكانيكى غير البوجيهات وأبلتين وفلتر بنزين ثم فلتر هواء ولاكن عند فتح الكربيراتير لوحظ زيت متسرب فية ،
وقال لى كان فية حد بتعلم على العربية ؟ لأن الموتور محتاج نصف عمرة أو ممكن تكون عمرة كاملة ،

فقلت أخذ برئي حضرتكم وأنتم أهل الخبرة أصلا ،
قبل ما أخد أي قرار أو حتى أروح لحد تانى يبص عليها ،
دي أيام عيد وخايف تفتح معايا
أرجو المشورة منكم وفى أنتظار ردكم
ولكم وافر الشكر والتقدير،،،

أخوكم باسم سعيد

[aldesha989]

اللى اعرفه ان الزيت لما يدخل الكربراتير بيبقى من القرص على العربيه بس كون ان الزيت اللى نزل اقل من لتر معنى كده ان الزيت بيتحرق منك وانتا ماشى اكيد البوجيهات طالعه معرقه زيت يبقى طقم شنبر ولو المايه بتنقص يبقى وش سلندر كمان

[basem74]

شكرا يا باشا على ردك الكريم ،
الحمد الله المية مش بتنقص ، ولا العربية بتسخن ،
وبالنسبة لموضوع الزيت للأسف بقالى كتير لما بغير زيت بيحط 3 لتر فقط للموتور
مع أنى أول ما جبتها كانت بغير زيت فى بنزينة وكان بيحط الجركن كلة 4 لتر
الميكانيكى كان موصل خرطوم للي طالع من الموتور واصل لتحت بس طلع دخان كتير جد
وبقى يحرجنى خاصة فى الأشارات والزحمة فقررت أن أرجع تان وأوصل على الكربيراتير مباشرة

وربنا يسترها
مرة أخري شكرا للأفادة

[saddam]

صديقي المواطن
طلع الخرطوم.بره تاني ﻷن.تبخير الزيت خلاص حيقفل الكربريتير وحتعطل ويؤسفني أقلك إنك خلاص لازم تفتح مكنة و 40% ممكن.تنسد بطقم شنبر ولكن 60% الشنبر مش كفاية وحتعمل عمرة.عوضك الله بالخير خلص العيد بيها وإتكل على الله لميكانيكي يخاف الله وإشتري حاجتها بنفسك
ودمتم للنضال

[lidosasa]

وبالنسبة لموضوع الزيت للأسف بقالى كتير لما بغير زيت بيحط 3 لتر فقط للموتور
مع أنى أول ما جبتها كانت بغير زيت فى بنزينة وكان بيحط الجركن كلة 4 لتر

يا بيه اللى حضرتك عملته فى عربيتك ده حرام وإنت اللى جنيت عليها العربية بتاخد 2.5 كيلو زيت لو مش حتغير الفلتر ولو حتغير الفلتر يبقى 2.75 يعنى 3 لتر إلا ربع وحضرتك بتحط 4 لتر من أول ما جبتها . إقراء الكتاولج حتلاقى تحذير إن الزيت الزيادة مؤذى زيه بالظبط زى ما يكون العربية مفيش فيها زيت

[Mecha]

Check the PCV valve

[alking_2006]

كدا لازم طقم شنبر على الاقل و فى الغالب كمان موضوع الزيت اللى 4 لتر دا ممكن يكون ضرب الاويلسيلات (كرنك امامى - كرنك خلفى - كامة)

[Amr Axel]

يا ليلة بيضا 4 لتر ؟؟؟؟!!!!! ده انا اتصدمت يوم ما يكون صنايعي بيغير زيت و مش فاهم بيحط 3 لتر و اقل واجب ترزعه ع قفاه بسبب غبائه لأنه المفروض صنايعي و شغال في العربيات و فاهم لكن يحط 4 لتر ده المفروض يتعلق و يتسلم تسليم اهالي 4 لتر ليه هو موتور 1600 سي سي
الموتور عندك بالفلتر مبياخدش غير 3 لتر الا ربع يعني 3 لتر كتييير جداا كمان ع الموتور و زعلان انها عملت كده !!! كده يا باشا الموتور داخل في عمرة اقل الخساير طقم شنبر و الله اعلم ايه تاني اتأثر و خلي بالك لو مشيت بالعربية الزيت اقل من المستوي الصحيح الدنيا هتخرب جوة و هتشيل الموتور ترميه و تجيب غيره
نصيحة روح خلص عربيتك قبل العيد لأن العمرة دي بتاخدلها يومين او اركنها لبعد العيد و قضيها مواصلات لحد ما تظبطها عشان متعملش معاك حركة نص كوم في العيد و مش هتلاقي اللي يلحقك

[dr.hazem]

انا مش مستحمل الصدمه ومش هقدر اعلق....

Sent from my Xperia Arc S using Forum Runner

[basem74]

اولا شكرا لكل التعليقات ومجهودكم معى فأنا استفدت منكم ،
والحمد الله على كل شيء ماحدش بيتعلم ببلاش ، وحاخد بالى من ....
اولا الهدؤ فى طريقة السواقة ،،،، مع انى مش حاسيس ان رجلي ثقيلة الى هذة الدرجة ، لاكن بردو حسوق باسلوب جديد ،
وكمان استفدت كيف اتعامل مع العربية ولا اهمل فيها ، ولا اتحرج من السؤال طول ما فى ناس ذي حضرتكم خدوميين وعندهم سعة صدر .
وسوف اتابع معكم بعد العيد لما اروح الورشة وحقولكم قالولى اية وممكن تتكلف كام
والله المستعان
شكرا لكم وعيد سعيد عليكم .
باسم

[samosa1984]

ربنا يسترها معاك وخير انشاﻷة
انا بردو بداية لتبخير الزيت من غطاء التاكية محتاجين نفةم منكو نعمل فى التوكيل فى.ابو رواش ولا برة علشان التلاتة بستم المبكانيكية بيخافو يطلعو ساسا الاسبرتير بتاع العربية نتمل اية من فضلكو فيدونا

[aymanay32]

ما تقلقكش خالص
العربية الماروتى عربية جميلة و كويسة خالص
اوعى تتضايق

اعتقد ان الموضوع بسيط جدا جدا

روح اشترى جوان وش سلندر تقريبا فى حدود 8 جنية او 15 جنية و روح للميكانيكى خليه يغير لك الجوان
و روح بعدها على طول جرب العربية و ما تنساش تدعيلى

[khalidawad]

بس لو غيرت الجوان وبعدها لاقدر الله ماتصلحيتش فاشتري موتور جديد احسن وخلي بالك بعد كده

[D . a .\ AYMAN]

4 لتر زيت من ساعة ما جبتها ... بصراحة أنا قريت الرقم وفضلت متنح 5 دقائق ... لو حضرتك كنت بتغير في بنزينة أو صنايعي هو اللى كان بيحطهم من نفسه يبقى واجب عليك تروح تنفضه

طبعا بعد الصدمة دي

غالبا طرمبة الزيت تعبانة أو على وشك إنها تبوظ أو باظت

ممكن السلندرات نفسها تكون اتجرحت

وطبعا طقم الشمبر طلع عينه بالثلاثة

الأويل سيلات طبعا ضربت بالعشرة .. واحتمال البساتم تكون متكسرة أو بعضها

وش السلندر هو الحاجة الوحيدة اللى ممكن تكون سليمة وما حصلهاش حاجة في الفيلم ده وإن كان احتمال قليل برضه

الموتور كدة كان شغال تحت ضغط رهيب ومش عارف يودي الزيت فين ... والضغط ده ممكن يسمع في أي حاجة عشوائية جوة الموتور مهما كانت ومش هاتبان أبدا إلا لما تفتح الموتور وتشوف إيه اللى بايظ

لو فتحت العربية ولاقيت إنك محتاج تغير الحاجات دي كلها أو حتى 50 % منها .. يبقى نصيحتي ليك تسقط موتور جديد وتريح دماغك من الوش ده .. وتخلي الحاجات السليمة من موتورك القديم جايز تحتاجها في المستقبل لأن بحالته كدة لو محتاج كل الحاجات دي يبقى مالوش قيمة ومش هايجيب فلوس لو بعته .. يعني لو وش السلندر سليم يبقى خليه وهكذا

ويبقى كدة أوفرلك من الهم والعك بتاع الصنايعية .. لأن الحاجات دي مش بترجع زي ما كانت أبدا .. لو وش سلندر بس ولا طقم شمبر بس كنت قلتلك ماشي ... لكن لو دخلت في الباقي يبقى حرام تصرف عليها تصليح