إعـــــــلان

Collapse

.

,
See more
See less

قصة 15000 كيلو

Collapse
X
 
  • Filter
  • الوقت
  • Show
Clear All
new posts

  • قصة 15000 كيلو

    السلام عليكم أنا غبت عن المتابعة و المشاركة كتير بس جايبلكم معايا قصة ال 15000 كيلو اللى غبت فيهم. العربية عاملة معايا دلوقت حوالى 30000 و ربنا يكفينى و يكفيكم شرها! أول الحكاية جت فى آخر المدة من شهر مايو 2013. قلت أبر نفسى و اطلع إجازة اسكندرية مع المدام و العيال و قد كان. بس كل اللى حصل إن فيه ناس عرفت....بس. فى اسكندرية عند فرع فتح الله بتاع المنتزه فيه شارع بيلف من وراه قدام الكورنيش علطول...مدخل الشارع محطوط عليه مطب أمنى عبارة عن خوابير صلب مسننة سمك 10 سم و ارتفاع حوالى 20. المفروض إنها على سوست...تعدى سليم تنزل معاك و تفوت ... عكس تاخد الجنط و العفشة معاها. السوست مملحة من البحر فعديت بالكاوتش لكن لامؤاخذه خابور منهم وقف و منزلش و الصراحة معملش صوت ... المهم روحت على خير. تانى يوم جيت أطلع و نازل نفق السيوف لقيت لمبة الزيت نورت و صوت الخبط اشتغل...فيه إيه؟ كشفت بالمقياس طلع ناقص....بنتى كانت سابت الباب مفتوح فقلت يمكن واحد مضايق من ركنتى عامل فيا مقلب....مكانش ممكن أتصور أى شىء تانى. ستر ربنا كان معايا لترين زيت حططهم و مشيت الكورنيش كله تمام. على ماروحت اللمبة نورت تانى. قلت لأ... كده مش حلو...أكشف يطلع الخابور المتين عاملى حفر أخدود بطول حلة الزيت من تحت و جاى فى آخره و خلاها تطق قامت عاملة خرم صغير عمال بينقط نقطة كل ثانية تقريبا. حيث إنه كان موسم و إجازة غرمت إجازة من الشغل و اضطريت أستنى عشان أقطر العربية و أصلحها. اتصلحت فى يوم و الموتور كله اتفك من تحت عشان يوصلوا للمسامير كلها بتاعة حلة الزيت لأن موتور الماروتى مدكوك كله على بعضه فى مساحة صغيرة....كانت قصة لوحدها. بعد ما اتصلحت كانت شفة الحلة لسة بتجيب نقطة كل 30 ثانية. قلت أطلع بيها مسافة الطريق لحد المنوفية أوديها التوكيل هناك يظبطوها .... أنا بروح هناك علطول. الناس الصراحة كانوا ذوق جدا و استعدلوها مقالوش ملناش فيه و لا قالوا قطع غيار و لا حاجة و ايديهم ماشاء الله تتلف فى حرير الحلة كتمت تماما. خدت بعضى و طالع عالزراعى بين شبين الكوم و قويسنا و كنت لوحدى ساعتها...الطريق ده فرعى صحيح بس حارتين فى كل اتجاه لكن على جنابه شجر كتير. عيل صغير عنده 8 سنين سايق حماره حصاوى من غير لجام الحمارة نفرت منه و قلبته فى الغيط و طلعت تجرى بعزم ما فيها عمودى على الأسفلت. أنا يدوب كنت مهدى على 40 أو 50 عشان فيه مطب قدامى و ممور ماشفتش غير الجتة البيضا طالعة من وسط الشجر و بعدها علطول البرابيز كان فى حجرى. الحمد لله...الحمارة طلعت سليمة و الواد كان فى الغيط و أنا كفى بس اللى اتعور و خدت معاها الرفرف اليمين و الكبوت كله و فدغت القايم اليمين و هبطت السقف شوية لأنها كانت طلعت برجست عليه قبل ما تقع. روحت بالعربية مش دريان بالدنيا...سبتها عند الحاج قعدت شهر تتصلح. الكبوت جبته صينى من التوفيقية ب 350 و كان فيه تايوانى ب 450. الرفرف كله صواريخ و القايم كذلك و الكبوت و السقف اترشوا من جديد. البرابيز تريبلكس من شبين ب 200 و فيه حاجز ملون فوق بس مش زى الأصلى مع زاوية ضوء معينة بيعمل عتامة زى الشبورة البيضا لكن غير كده كويس....نحمد ربنا. آخر حاجة بقى التيل و الطنابير. اللى بيسوق ف ممكان زى القاهرة لازم ياكل تيل بسرعة. التيل ابتدى يصفر على 25000 بس المشكلة إن صفارته ضعيفة أو لدرجة إنى على ما سمعتها كان اتاكل كله و دخل عالطنبورة...كل اللى طلبه كان فرملة جامدة بفادى بيها واحد عالزراعى وقف من 60 ل 10. غيرت الطنابير الأصلية كى بى إكس بطنابير كاريكو تايوانى سعرها فى الحى السابع 250. و التيل شلت الأصلى كى بى إكس بتاع التوكيل و خليته معايا و جبت تايوانى جرين لايف سعره ف الحى السابع 70. اللى عايز الطنابير الأصلى أنا مستعد أبيعها . هيه بس عايزة تتخرط أنا مكنش فيا دماغ للكلام ده. و ربنا يكفينا و يكفيكم شر الطريق

  • #2
    حمد لله على السلامه اولا
    ثانيا عربيتك والله اعلم واخده عين محترمه وربنا يسترها عليك،،
    بالنسبة للتيل فانا غيرته على 40 الف مش لانه خلص وانما لاني زهقت منه وكان فيه نصه!!! وانا في القاهرة ومن الواضح ان حضرتك كنت بتستخدمها كتير،،،
    تحياتي

    Sent from my Xperia Arc S using Forum Runner
    don't judge a car unless you have driven it

    hm414 سابقا

    Comment


    • #3
      المشاركة الأصلية كتبت بواسطة dr.hazem مشاهدة المشاركة
      حمد لله على السلامه اولا
      ثانيا عربيتك والله اعلم واخده عين محترمه وربنا يسترها عليك،،
      بالنسبة للتيل فانا غيرته على 40 الف مش لانه خلص وانما لاني زهقت منه وكان فيه نصه!!! وانا في القاهرة ومن الواضح ان حضرتك كنت بتستخدمها كتير،،،
      تحياتي

      sent from my xperia arc s using forum runner
      الله يسلم حضرتك. العين الحمد لله اتعرفت اصلها كانت باينة اوى و الحمد لله على كل شىء.

      بالنسبة للتيل انا فعلا بستخدم العربية كتير مشوار الشغل لوحده ٦٠ كيلو كل يوم غير مشاوير وسط البلد غير السفر للمنوفية و الحمد لله ربنا يديمها نعمة الماروتى عربية اصيلة بجد

      Comment

      Working...
      X