بلية الشداد اتفرتكت!

[mr_twist]

السلام عليكم ورحمة الله وبركاته
النهارده الماروتي اول مره تستندل معايا كنت مروح من الشغل وماشي 80 -90 علي الصحراوي وفجأه العربيه فصلت تماما ركنت علي جنب و اتصلت بصديق اقترح عليا احاول ادور تاني صوت المارش شغال بس سريع حبتين و شيكنا علي الكهربا و البنزين طلع كله تمام بيقولي اشوف سير الكاتينه قلتله دانا مغير سير وبليه من 4 شهور المهم فتحت الاسبراتير وحاولت ادور لقيت الشاكوش بيلف قالي كده الكاتينه سليم.
المهم كلمت ميكانيكي معرفه جالي وبعد الفحص واتمحيص قالي بلية الشداد اتفرتكت جوه علبة السير!!!!
مع اني مغيرها قريب وكنت مشتريها من سوزوكي سنتر وفضل يشكر فيها كتير ومكتوب علي علبتها انها قطعة غيار اصليه... لحسن الحظ و بما ان معنديش حد بيبيع قطع غيار في سوهاج للماروتي وكل ماحتاج مسمار ليها بطلبه من مصر كنت محتفظ ببلية الشداد الاصلية في الشنطه طلعتها وركبناها وبعد كده اكتشفت ان كمان سوستة البليه اتعوجت جامد المهم ربنا ستر والراجل استغني عن السوسته وروحت بعد 6 ساعات من العناء في الصحرا

الاستفسار بتاعي عايز اجيب بلية شداد جديده وتكون فعلا اصليه وعايز اجيب السوسته اللي اتعوجت دي يا ريت حد يساعدني لأني تقريبا اتعقدت من العربيه ومش عايز اركبها تاني لغاية ما اطمنلها...
و شكرا علي وقتكم الثمين...

[Amr Axel]

نصيحة مني القطع الخطيرة اللي زي ديه تجيبها من منفذ بيع قطع غيار مودرن موتورز في الدقي ش المساحة قدام سوبر ماركت السعودي زي سير الكاتينة و بلية الكاتينة و ماستر الفرامل العمومي من الاخر الحاجات اللي ممكن تخرب الدنيا لو مش أصلية و تتسوح فيها هي ديه اللي تجيبها من التوكيل و ده اللي انا بعمله اغلي شوية بس أضمن من القطع اللي برة

[mr_twist]

تسلم علي النصيحه
طيب دلوقتي بما اني مش عايش في القاهره مفيش رقم تليفون اقدر اعرف الحاجه دي موجوده ولا لأ
وبالنسبه لسوستة البليه يا تري دي هلاقيها ولا لأ الميكانيكي بيقولي الحاجات اللي زي دي مابتتبعش ومش هلاقيها إلا استيراد ايه رأيك يا كبير في الكلام ده! ..

[max100x]

حصل نفس المشكله عندي من فتره و عملت بيها تقرير .....السير عندي اتقطع بسبب ان البلية اللي راكبه كانت تعبانه.

انا جبت بلية ياباني من محل اسمه كاميليو كار في احمد حلمي و سعرها كان 75 جنيه .....الهندي كان تمنها 45 لكن معجبنيش شكلها و مرضتش اشتريها

طبعا يومها صرفت مصاريف كتيره علشان اجيب العربيه عند الميكانيكي.

و زي ما قالك عمر اكسل....القطع الاصليه الحساسه اللي زي دي لازم تجبها حاجه نضيفه, انا بطلت اتعامل مع سوزوكي سنتر بسبب اسعارهم و قطع الغيار اللي مبتقعدش.

[mr_twist]

انا النهارده الحمد لله اكتشفت اني ليا قريب شغال في فرع الدقي وطلبت منه بليه جديده وكمان سير جديد بس المشكله لازالت قائمه بالنسبه للسوسته... محدش يقدر يفيدني اجيب السوسته دي منين

[Amr Axel]

شوف في التوكيل برده حتي لو هتركبها عندهم