ايه اخبار الماروتي مع بنزين 80

[elpilot]

السلام عليكم
لو سمحتم يا جماعه انا عندي ماروتي الحمد لله عامل بيها500كيلو لحد دلوقتي المهم لما اشتريتها سألت المعرض احوطلها بنزين ايه قالي حط92 عشان ماتعطلش منك كتير
المهم انا بدوخ هنا في الزقازيق عشان الاقي بنزين92 واروح بنزينة وطنية اعدي عليها كل يوم عشان عندنا هنا البنزينات بتغش البنزين المهم مبلاقيش92 الا فين وفين والموجود بس80 مش عارف ايه الحل في المشكله دي
ممكن من خلال خبراتكم الكبيرة اعرف ايه الفرق بين ال80 وال92 وطالما ال80بيبوظ العربية ليه اصلا بينزلوة وليه عليه زحمة كل يوم كده وهل فعلا كلام المعرض ان ال80بيبوظ العربية صحيح ولا بيشتغلني وايه اللي هيبوظ في العربية لو حطيتلها 80 من بنزينة الجيش اللي اعتقد انه بيبقي نضيف فيها يعني ايه اللي هيفرقه عن ال92؟؟
ارجو مساعدتي لانهاء هذه الحيرة وشكرا جزيلا لكم

[السعيد عيد]

البنزين ال92 نقي ولو مش لاقي 92 حط 90 مش بطال ال80 مش هيبوظ بس بيفرق ف السحب وبيبقي مكربن

[lidosasa]

مبدئياً الرواسب اللى فى البنزين 80 أكتر فتعمل ترسبات كربونية على البساتم وغرف الإحتراق داخل الموتور ودى بتسبب مشاكل للموتور على المدى البعيد
الماروتى مظبوطة على بنزين 88 وطبعاً ده مش موجود فى مصر فأقرب حاجة ليه هى بنزين 92 ..
طيب تعمل أيه عشان تحط بنزين 80 فى الماروتى ؟؟
أولاً تزود فلتر بنزين زى مهو مشروح بالتفصيل فى الموضوع ده

http://www.nilemotors.net/Nile/277692-a.html

ثانياً تظبط كهربة العربية عند ميكانيكى على البنزين 80
ثالثاً متابعة فلاتر البنزين والبوجيهات وتنضيف الكربراتير حيكون على فترات أقل من لو كنت بتحط بنزين 92 ( يعنى ممكن كل 5000 إلى 7000 كيلو )
طبعاً سحب العربية حيقل مع البنزين 80 لكن مش بالصورة الرهيبة اللى الناس بتتخيلها

[elpilot]

شكرا جزيلا يا جماعه الصورة وضحت كده وفعلا الناس طلع عندها حق لو عايز اشتري دماغي اخليني في ال92 بس هي مظبوطه علي88 لو حطيتلها ال92 مش هيبقي غلط ولا عادي اني احط اعلي لكن محطش اقل معلش انا بحس ان اسئلتي مبتدئة جدا استحملوني شوية عبال ما اتعلم لاني لسه جديد في المجال

[scientist9508]

بسم الله الرحمن الرحيم

الأخ الفاضل epilot

لقد قام الأخ الفاضل lidosasa بشرح إحترافى و وافى للمشكله و أنا لن أضيف الكثير على ما قاله.
غير أننى أريد أن أؤكد أن سحب الماروتى ضيعف جدآ . . . جدآ عند إستخدام بنزين 80 و أيضآ يكون صوت المحرك عالى. كما أن إستخدام بنزين 80 فى السفر بالماروتى . . . ذل حقيقى.

لا أريد أن أكون غير واقعى و لكن إبتعد عن بنزين 80 مهما كلفك الأمر

و السلام عليكم و رحمة الله و بركاته

[scientist9508]

مبدئياً الرواسب اللى فى البنزين 80 أكتر فتعمل ترسبات كربونية على البساتم وغرف الإحتراق داخل الموتور ودى بتسبب مشاكل للموتور على المدى البعيد
الماروتى مظبوطة على بنزين 88 وطبعاً ده مش موجود فى مصر فأقرب حاجة ليه هى بنزين 92 ..
طيب تعمل أيه عشان تحط بنزين 80 فى الماروتى ؟؟
أولاً تزود فلتر بنزين زى مهو مشروح بالتفصيل فى الموضوع ده

http://www.nilemotors.net/Nile/277692-a.html

ثانياً تظبط كهربة العربية عند ميكانيكى على البنزين 80
ثالثاً متابعة فلاتر البنزين والبوجيهات وتنضيف الكربراتير حيكون على فترات أقل من لو كنت بتحط بنزين 92 ( يعنى ممكن كل 5000 إلى 7000 كيلو )
طبعاً سحب العربية حيقل مع البنزين 80 لكن مش بالصورة الرهيبة اللى الناس بتتخيلها

كلام إحترافى