تقرير ماروتي 2014

[دينا]

أنا أقصد إن زيت الفرامل لو نقص يبقى ندور على السبب قبل ما نزود لآنه المفروض مش بينقص ومش بيحصل ليه تبخر زى زيت الموتور ... يعنى لو لقتيه ناقص يبقى التيل تأكل أو فيه تسريب نعالج المشكلة الأول وبعد كده نزود الزيت ...
وبالنسبة لزيت الفتيس هو كمان مش بيحصل فيه تبخر زى زيت الموتور وبيتراجع عليه بس على فترات طويلة مش زى زيت المحرك ومش بيتزود هو كمان لآنه لو ناقص يبقى فيه تسريب ويتعالج الأول .. وأقرى الموضوع ده

http://www.nilemotors.net/nile/418521-a.html

شكرا جزيلاااا حاضر هقرى الموضوع

على فكرة انا قعدت ادور عالمكان بتاع زيت الفتيس موش لاقياه

انا فاكره انى شوفته قبل كدا بس مش فاكره المكان

ممكن توضحهولى مكانه فين

[lidosasa]

شكرا جزيلاااا حاضر هقرى الموضوع

على فكرة انا قعدت ادور عالمكان بتاع زيت الفتيس موش لاقياه

انا فاكره انى شوفته قبل كدا بس مش فاكره المكان

ممكن توضحهولى مكانه فين

دى صورة لمقاس زيت الفتيس متعلم عليه بالدايرة الحمرا

وبيبقى زى المسمار القلاوظ بيتفك ويتربط مش زى مقاس زيت الموتور يتشد وبس

[دينا]

انا قريت الموضوع اللى قولتى عليه ومش فاهمه حاجه

ايه الحجات الغريبه دى كوبلين وطوالى وورد

لا الحجات دى صعبه اوى عليا

[lidosasa]

انا قريت الموضوع اللى قولتى عليه ومش فاهمه حاجه

ايه الحجات الغريبه دى كوبلين وطوالى وورد

لا الحجات دى صعبه اوى عليا

ربنا ما يوريكى عذاب الكبالن وبإذن الله لسه بدرى على ما تدخلى فى الصداع بتاع الكبالن أنا كان قصدى إنك تقرى الموضوع وتستفيدى منه فى نقطة إكتشافى لنقص الزيت من الفتيس وإن الحل مش مجرد تزويد الزيت وإنى رحت فوراً لميكانيكى لعلاج المشكلة الأول

[دينا]

ربنا يستر

[J A G U A R]

انا قريت الموضوع اللى قولتى عليه ومش فاهمه حاجه

ايه الحجات الغريبه دى كوبلين وطوالى وورد

لا الحجات دى صعبه اوى عليا

هو فى حاجه سهله عليكى اصلا

[أبو بلال]

يا جماعة، انا روحت 3 بنزينات التعاون، وملقيتش زيت فيسكو، انا حزين، ومش عارف اجيبه منين

[Amr Axel]

الف مبروك يا باشا ربنا يديك خيرها و يكفيك شرها
بالنسبة الصيانات ناوي تعملها في التوكيل و لا برة ؟؟

[أبو بلال]

الف مبروك يا باشا ربنا يديك خيرها و يكفيك شرها
بالنسبة الصيانات ناوي تعملها في التوكيل و لا برة ؟؟

والله ناوي اعملها برا، التوكيل معرفتش فيه ميزة واحدة تخليني اروحه، ولا سعره حلو، ولا رايق مثلا، ولا شاطر وماهر، ولا حتى مكانه قريب، ولا معاملتهم كويسة، مفيش غير حاجة واحدة انه اسمه التوكيل، (قال يعني المصنع في الهند باعت مندوب يظبط العربيات في التوكيل)، لو التوكيل ده كان اسمه مدحت ولا سيّد مكانش حد هيروحه، وانا مش من النوع اللي بينبهر بالأسماء.
....
سؤال، اجيب فيسكو 3000 من أنهي بنزينة قريبة من خط المترو الأول (المرج - حلوان)؟

[M_Maruti_2014]

بسم الله الرحمن الرحيم
أنا أبو بلال، مرحب بيكم، طبعا انا متابع من زمان نايل موتورز، واتهريت قراءة في مواضيعكم (صحيح من غير ما أكون عضو)، وده لان كان عندي رغبة ملحّة في اني اشتري سيارة، وكنت محتار حيرة كبيرة بين الجديد والمستعمل، وبين الماروتي واللادا (جداد أو مستعمل) والـ127 مستعمل [نظرا للإمكانيات المادية المحدودة]، وبعد استخارة، وإعانة من الله، اشتريت ماروتي 2014، بعد ما انتظرت فترة طويلة لغاية ما نزلت (كلكم عارفين انها اتأخرت بطريقة غبية)، عامة، حبيت أفيدكم وتفيدوني، وانزل تقرير عن اللي شوفته مع العربية
...........
المسافة المقطوعة:
وقت الشراء (20كم)
الآن (500كم)
...
صوت المحرّك:
وقت التدوير من بعد بيات (ضوضاء واهتزازات مبالغة لثواني ثم هدوء نسبي) ويمكن التغلب على ذلك بشدّ الشفاط لثوان، او دوس بنزين
...
أصوات غريبة في العربية الزيرو:
وقت الشراء: صوت صفير الفرامل الأمامية عالي إلى حد كبير، والمشكلة ان الصفير غير متواصل، بل متقطع (مع كل لفة للكوتش صفارة) ومش عارف ليه، المفروض يبقى الصفارة منتظمة لان الحديدة اياها اللي بيقفش عليها التيل (مش عارف اسمها) مزبوطة بطريقة معتدلة، وده بيوحي الي ان ممكن حاجة مش مزبوطة
الآن: صوت صفير الفرامل الأمامية يكاد يكون معدوم، ولو فيه صوت يعالج بالدوس على الفرامل بشدة مرة واحدة.
....
خشونة الفتيس:
وقت الشراء: خشونة في الغيار الأول، والمارشدير
الآن: الموضوع أهون وأيسر، ومازال الغيار الأول ساعات يعلق لمرتين ويجيب في الثالثة
....
نعومة الدركسيون:
ناعم جدا، لدرجة ان الطفل ذو الثلاث أو الأربع سنوات يستطيع انه يدير التارة يمين وشمال والعربية متوقفة تماما على اسفلت
....
استهلاك البنزين:
استهلاك كويس، هو مش ممتاز زي ما الناس باهرانا ومعشمانا، بس كويس، وده لسبب، ان السيارة كربراتير، مش رشاشات، وده طبعا مش بيوفر في البنزين زي الرشاشات، بس طبعا بيعطيك مزايا الكربراتير، يعني تقدر بعد كده ترمي على التاني (لو البطارية عملتها معاك)، وتتجنب وقوف السيارة الكامل في حالة عطل الكارتة، واللي انت هارشه
....
ضيق الصالون:
السيارة من الخارج شكلها طفولي جدا كما يعرف الجميع(والموضوع ده بيتحسن جدا مع جنوط 13، انا مركبتهاش بس واحد اعرفه مركبها مخلي العربية زي الكيا برايد بالضبط)، ولكن من الداخل (لما تقعد جوا يعني) فالسيارة ليست ضيقة، بل جيّدة، تقارب الكثير من السيارات الأخرى التي هي أضعافها وأضعاف أضعافها في الثمن
.....
ضيق الشنطة:
مقولكش يا معلم، ضيقة، تمامك نزلة إلى السوق(ده لو انتم راكبين فول تانك في العربية)، فمتحاولش تعمل للعربية غطاء، عشان هياخد الشنطة كلها وهترجع تبيعه بنصف السعر، ومتحاولش تشغل الشنطة باي حاجة لان هي المساحة الصغيرة دي اللي حيلتك، يعني متفكرش تسيب جرجن ميا، ولا جركن بنزين في الشنطة
* علاج ضيق الشنطة: السيارة يمكن طيّ الكراسي الخلفية إلى الأمام، (على نصفين، كل نصف على حدة) لمعالجة ضيق الشنطة، لاحظ ان ضهر الكنبة (المقسومة نصفين) معمول حديد، ومتغلف بموكيت متواصل مع موكيت الشنطة يعني متقلقش على ضهر الكنبة، بمعنى
1-لو هتشيل حاجة متوسطة، تنزل نصف ضهر الكنبة إلى الأمام، يبقى عندك مكان شخص كان هيقعد هتستعمله مع الشنطة
2-لو هتشيل حاجة كبيرة، تنزل الكنبة كلها إلى الأمام، وممكن تشيل غسالة يا معالم، او تلاجة صغيرة في العربية، وده بقا غير متوافر في عربيات تانية سيدان، بس الكنبة لا تطوى للأمام
3-لو هتشيل حاجة طويلة، سجاد مبروم مثلا، اي حوار هتعمل الآتي، هتنزل نص الكنبة اليمين لقدام، وهتنزل الكرسي المجاور للسواق لورا (وهتخلع مسند الراس)، وهتحط الحاجة الطويلة على الكرسيين، ولو اتزنقت عادي سيب باب الشنطة مفتوح يديك طول اكتر
.....
الكاسيت والسماعات:
هي مش بينزل معاها كاسيت وطبعا ولا سماعات، وانا صراحة لسه مركبتش، ولكن عامة، انا متضايق من البلاستيكة اللي فوق الشنطة (اللي المفروض يركب فيها السماعات) عشان محجّمة ارتفاع الشنطة، فانا بشيلها (هي بتتفك بسهولة على فكرة وتركب بسهولة)
.....
الحرّ والتكييف
السيارة غير مكيّفة، وبما اني مجبتش شماسات لسه، فلو سبت اي حاجة معدن على التابلوه ربع ساعة هتحرق ايدك لو جيت تمسكها خاصة لو العربية راكنة في الشمس، واثناء الحركة بالسيارة بعد الركنة في الشمس، الدنيا بتبقى حلوة بسرعة لو فتحت الشبابيك
.....
نور السيارة
نور السيارة الأمامي الواطي بيؤذي اللي جايين في المقابل، وبيقعدوا يرعشولي، وكأني مشغل النور العالي بتاعي (وطبعا بيتهيألهم)، فمش عارف هل النور فعلا عالي، ولا الناس بيتهيألها؟
.....
أبعاد السيارة:
العربية صغيرة، وابعادها صغيرة، وسهل ركنها وسهل خروجها، ومفيدة للي بيتعلم سواقة مش هيخبط ويرزع كتير، والعربية اللي قدامك تعدي في خمس دقايق من حتة مزنوقة وتعدي انت في ثانية لان العرض عندك اصغر من العرض عنده ب10 او 15 سنتي
....
الورق والترخيص والمرور:
المعرض جاب الورق بعد 16 يوم من استلام العربية (وده طبعا بعد تهزيق وزنّ بدأ من اليوم الـ، 14، يعني جاب نتيجة ههههه)
فحص لطيف
ملف 26 جنيه
تأمين 245 جنيه (3سنين)
طفاية 148 جنيه (غليت من يوم 1 مايو)
نمر 35 جنيه اللوحتين و10 جنيه خطاط
ضرايب 465 جنيه(3سنين)
المجموع: 930 جنيه (نار في جتتهم، الطرق مهببة وكلها تكسير ومسامير، والسيستم قعد واقع في المرور قرابة الـ3 ايام، وطوابير وزحمة، والرخصة طلعت بـ3 شهور مؤقتا لغاية ما يتم الاستعلام عن الافراج الجمركي او شهادة البيانات حاجة كده [ولكن مكتوب في ضهر الرخصة ان الضرايب والتأمين مدفوعين لغاية 3 سنين] فطبعا بعد 3 شهور هروح ادفع 10 جنيه عشان اطلع رخصة تانية، يبقى المجموع 940 جنيه، قول 950 بالحبشتكنات)
.....
مشكلة تدوير السيارة:
العربية فيها مشكلة، طبعا انا متخضيتش لاني قرأت عن المشكلة دي في منتداكم اكتر من مرة، خاصة من اصحاب الماروتي الزيرو، وصاحبنا اللي كتب موضوع اسمه (طلاسم الماروتي او حاجة زي كده)، المهم:
1-العربية لازم تدوس دوسة واحدة على دواسة البنزين للآخر قبل ما تدور عشان تدور من أول مرة
2-لو العربية قايمة من البيات في الشتا، زي ما قال صاحبنا، تدوس دوسة على البنزين، وبعدين تشد الشفاط درجتين، وبعدين تدوّر، ومتنساش ترجّع الشفاط مكانه عشان متخربش العربية
3-وركز اوي اوي مع النقطة دي، العربية لو بطلت منك في مطب، ولا في اشارة، ولا لأي سبب، تدورها تاني في ساعتها تدور عادي متكسفكش، لكن امتى بقا تكسفك؟ لو انت بطلت العربية وسيبتها مبطلة 5 دقائق وحبيت تدورها تاني، مش هتدور إلا لما تبرد، ومؤشر الحرارة ينزل تحت ال c، (يعني يا إما تدوّر العربية بعد ما تبطل مباشرة، يا إما هتضطر تستناها تبرد خالص، انما نظام اخش اشتري شبسي واطلع، او ربع جبنة من السوبر ماركت واطلع، هتطلع مش هتدور معاك يا معلم)
*ودي حلها في أوقات كتير انك تشد الشفاط برده شدتين عليك وتطول ايدك على المارش شويا (اوعى تزود عن 5 ثواني تخربه)، وان شاء الله هتدور معاك من المرة الأولى أو التانية.
....
صيانة الألف كيلو:
منتظر من الشباب يفيدونا في نوع الزيت، انا لقيت الكلام على الفلتر الكوري حلو، والسؤال، اجيب منين الزيت، والفلتر، انا قاعد في القاهرة، ويريت يبقى فيه اختيارات كتير عشان انقّي الأصلح ليّا.
....
وفي النهاية، ها أنا انضميت لفريق ماروتي نايل موتورز، ولو وصلت لجديد هبلغكم إن شاء الله، نفيد ونستفيد

السلام عليكم ورحمة الله وبركاته

أولا أحب أقول لحضرتك إنك كفيت ووفيت.

أنا الحمد لله إشتريت ماروتى 2014 ( أو اللى هى 2013 ومتعدل الإفراج الجمركى بتاعها زى ما حضراتكم بتقولوا ) وإستلمت العربية من 3 أيام والحمد لله رخصتها تانى يوم إستلام

أنا إشتريتها من معرض القرش على فكرة، وللناس اللى محتارة فى المعارض أنا عن تجربة برشح بشدة معرض القرش. ناس محترمة جدا ومحترفين.

أنا إستلمت العربية منهم بعد ما قدمت أوراقى وعملت طلب التقسيط من البنك ب 48 ساعة. وكان ممكن يبقى قبل كده بس التأخير كان بسبب طبع الشيكات فى البنك.

المهم أحب أقول لحضرتك إنك اتكلمت عن كل حاجة أنا لاحظتها فى العربية لكن فيه نقطة واحدة محتاجة توضيح من حضراتكم جميعا.

أنا من يوم ما إستلمتها وهى بتبطل منى أول ما أشيل رجلى من على البنزين بعد ما أكون ماشى بسرعة
يعنى من 90 ل 100 كده. والموضوع ده قالقنى ومضايقنى جدا. فـ ياترى حضراتكم تنصحونى بإيه.

فى حد أعرفه قالى انى المفروض بعد ما إستلمت العربية أروح التوكيل أعمل كشف عليها عشان أطمن لأنها المفروض إنها كانت مركونة فى المعرض. فهل ممكن ده يكون ليه علاقة فعلا بموضوع تبطيل العربية.

أرجوكم دلونى، عاوز أحس إنى فرحان بيها وميكنش فى حاجة معكننة عليا الفرحة.

وشكرا جزيلا

[M_Maruti_2014]

يا جماعة، انا روحت 3 بنزينات التعاون، وملقيتش زيت فيسكو، انا حزين، ومش عارف اجيبه منين

هو ايه زيت فيسكو ده ؟

[M_Maruti_2014]

[دينا]

هو فى حاجه سهله عليكى اصلا

ليييه كدا بقا ههههههه تخصص احباط

[دينا]

كنت عاوزة اعرف هو انا ارفع العربيه ف البنزينه كل اد ايه

انا بغسلها باره وجوا لكن مرفعتهاش ولا مره حد يفدنى

[J A G U A R]

هو ايه زيت فيسكو ده ؟

اكيد بتهزر

ده نوع زيت