اشتري قسط ماروتي ولا شانا بيني ؟؟

[ehabatta]

انا محتاج اخد رأيكم
انا مشواري من شبرا للقرية الذكية كل يوم ولأني يومي كله في الشغل مش بروح اي حتة تاني :(
انا عاوز العربية علشان اضمن حاجة اروح بيها مش اكتر
ممكن اسافر بيها اسكندرية او اسيوط بس دا مرة او مرتين في السنة كلها .
هل الماروتي لو اشتريتها قسط تنفع ؟
انا هدفع مقدم 20000 يعني قسطها هيكون حوالي 700 جنيه
هل هتستحمل ولا هتبهدلني زي ال128
ولا اجيب الشانا ال1000ى سي سي الصيني ؟؟؟والناس بتشكر في العربية
ياريت تجوبوني ولو اقتنعت هنزل احجزها علطول

[ramymechanics]

البينى مع المدام .. عربية واسعة ... ثبات حلو .... تكييفها جيد و فيها شوية حركات ... ازاز كهربا و abs .. يعيبها قطع غيارها مش موجودة كلها برة لكن التوكيل موجود و بياخد وقت شوية لكن اعرف ناس عملت حوادث بيها و جابت حاجتها كلها .. استهلاك البنزين فالطوالى بدون تكييف اقل من 6 لتر لل 100 كيلو وتانكها 37 لتر ... عيبها الوحيد من وجهة نظرى اعادة البيع .... الاوتوماتيك منها حلو بس فيه نتشة بين اول نقلتين و ساعات بتنعر شوية لكن طبعا انت فاهم دى 1000 سى سى فكتر خيرها :)
الماروتى تحسها صحرا من جوة وقعدتها مش مريحة ... شوف الاتنين وربنا يكرم ولو مكانك اجيب الشانا المانوال فرق كبير جدا عن الماروتى

[ramymechanics]

[color="rgb(0, 100, 0)"]نسيت اقول انها عالية عن الأرض و مشيت بيها دائرى 120 و كانت زى الفل
[/color]

[MaZaGAngeE]

شانا… لو هتقارن بالمارواي القديمة .. الشكل الجديد مشفتهاش لسه بس لو فاضية ملط زي القديمة يبقي مالهاش لازمة

[Zing0]

اسكندرية و أسيوط !!!
و لا دى و لا دى, فى السفر الأمان هو الأهم, و ربنا يستر طريقنا
لو عدى جنبك عربية نقل على طريق سريع بأى واحد فيهم , العربية هتطير و تحدف جامد من ضغط الهواء بتاع النقل
و دى أرواح ناس, ربنا يسلمك من كل سوء
فكر فى حاجه مستعمله
ممكن تكون متعبه شوية فى صيانتها بس أكيد حجمها هيديها ثبات شوية فى السفر
أعانك الله

[hamo81]

انا رأيي تفكر في البي واي دي f3
انا دفعت 15000 مقدم وبدفع قسط 1020 كل شهر على 90 شهر من بنك ناصر الإجتماعي
عربية ممتازة واسعة وماتورها قوي وسحبها ممتاز قاعدتها مريحة جدا زي الكورولا 2007 بالظبط انا بسافر بيها من أسيوط للقاهرة ومن أسيوط لأسكندرية مش بحس بالسفر خالص

[ramymechanics]

بالنسبة للسفر فى ناس راحت بيها مطروح واسكندرية والحياة حلوة بس الحذر مطلوب طبعا

[ibrahimahmed]

انا اتحطيت فى نفس الحيرة دى لما كنت بشترى من شهر بس كانت بين الالتو 2015 800 سى سى والجيلى باندينو 1300 سى سى
طبعا فرق الامكانيات والكماليات كانت لصالح الجيلى باكتساح وكمان الوكيل غبور ...
بس بعد طول تفكير اخترت الالتو برضو :) :)
اصل انا كنت شاريها قسط ... فبصراحة مش حمل سخافات الصينى لان كفاية اوى الف جنيه قسط
فانت لو هاتبقى قد المغامرة بتاعة الصينى يبقى اكسب الكماليات وهات الصينى
لو عاوز عربية اعتمادية وقطع غيار رخيصة ... يبقى خليك فى السوزوكى
بس فى معلومة لازم تبقى عارفها ... الماروتى اتوقف تصنيعها خلاص واخر موديل 2014
وبخصوص مشاويرك ... فالعربيتين يروحى ويسافرو عادى جدا ... بس تخليك حذر فى السواقة ومتعديش ال100 او 110 لظروف الامان