سؤال لدكتور أيمن بخصوص توكيل السوزوكي

[Mahmoud.Fathy]

دكتور أيمن تحياتي ليك/ طبعا مش محتاج انى اشرح الحيرة اللى انا واقع فيها منذ بيع عربيتي الجوليت من اقل من شهر والمقارنات والمتابعات في مختلف الاقسام ... ومش هضحك عليك ...السوزوكس ديزاير بالنسبة ليا مفيهاش غلطة ... لكن اللى مخرجها برة الحسابات موضوع التوكيل اللى محدش شكر فيه ... وده مش من مجرد قرايات على المنتدى بس لكن من اصدقاء ليا معاهم عربيات سوزوكي ... لكن كون انت كان معاك ألتو وبعدين رحت للسويفت يعني عندك خبرة كبيرة مع التوكيل ده ... انا عاوز اعرف توكيل السوزوكي موقعه ايه من الاعراب ... يعني زي توكيل مين واحسن من مين واسوأ من مين ... انا مش عاوز لما اجيب عربية جديدة الف بيها على ميكانيكية ولا لو حصل فيها حاجة واحتجت قطعة غيار اركنها بالشهور عشان القطعة مش موجودة ... انا عاوز يكون فيه توكيل محترم واقف ورا العربية عشان اكون مطمن ... هل توكيل السوزوكي يقدر يكون كده ؟؟؟

[D . a .\ AYMAN]

أنا اتكلمت كتير في موضوع التوكيل ده على فكرة

توكيل سوزوكي زيه زي أي توكيل متوسط المستوى في مصر مش وحش لدرجة إن الواحد يهرب منه ومش رائع لدرجة إن الواحد يجيب عربية سيئة مخصوص عشانه

أنا ممكن أقول إن التوكيل أفضل بكثير من عز العرب وبمراحل كمان سواء من حيث إخترافية وتدريب الفنيين جوة التوكيل أو توافر قطع الغيار أو حتى لما بيكون في قطع يجب تغييرها في الضمان

طوال مدة استعمالي للعربية الألتو كنت دايما لما باحتاج لأي قطعة غيار وبالذات القطع المهمة كنت أروح أشتريها من التوكيل وأركبها أنا بمعرفتي أو عن طريق أي ميكانيكي يكون كويس ... وعمري ما روحت وقالي إن في حاجة معينة مش موجودة .. غير مرة حساس السرعة بتاع العربية قالي مش موجود بس جابهولي من عند سوزوكي سنتر في التوفيقية ... وقالي إن النوع ده هو الأصلي برضه .. دي أحد التجارب

عموما أنا لم أكن مواظب على الصيانات الدورية في التوكيل غير يمكن لغاية 20 ألف في الألتو وماكملتش الرقم ده حتى في البيرسونا مع عز العرب من كتر قرفه ... وأعتقد إني هاعمل كدة في السويفت برضه .. بالنسبة لي الصيانات الدورية عبارة عن وسيلة أخرى لسرقة العميل بعد ما سرقوه في سعر السيارة عند الشراء ... وده في كل توكيلات مصر بلا استثناء ... حتى اللى سمعته ما حصلتش منها ... وأنا ما بحبش أحس إن حد بيسرقني وأنا زي الـ .......... :)

العربية تدخل تقعد يتعمل فيها شوية شغل ما يستاهلوش الفلوس اللي بيطلبها التوكيل مقابل الشغل ده .. غير إن في بعض التوكيلات العربية مش بيتعمل فيها شغل حتى تدخل تقف شوية جوة الهانجر وبعد كدة تطلع ويقولك كله تمام روح ادفع وهي ما اتعملش فيها حاجة أصلا ... وده شوفته بعيني في عز العرب وغبور

بالنسبة لقطع الغيار بتاعة السويفت بقت منتشرة دلوقتي خارج التوكيل أصلا سواء جديد أو استيراد عند رامي (ميدو سوزوكي) فوق نفق شبرا ... وعند سوزوكي سنتر في التوفيقية والاثنين بيجيبوا فطع غيارهم من الهند لحسابهم الخاص وبيوزعوها من خلال محلات في الدقي وشارع دمشق وغيرهم ... يعني بإذن الله لو جبت العربية مش هاتقف على قطعة غيار محتاجها (لو احتاجتها) ... حتى لو مالاقيتهاش في التوكيل ... وده برغم إن العربية لسة أصلا ماعملتش انتشار لسة

ما شاء الله ... أقدر أقول إن أكثر حاجة شجعتني أجيب سوزوكي تاني هو ثقتي في الصانع الياباني ده وفي الماركة دي ... ما شاء الله لا قوة إلا بالله الألتو برغم معاملتي العنيفة لها لم تقصر معي في أي شيء حيوي ...

لو هاقيم التوكيل .. هاقول إنه زي منصور وغبور ويمكن أفضول وبالتأكيد أفضل من عز العرب .. والكلام ده من ناحية الكفاءة الفنية ... وده عن بعض التجارب القليلة مع منصور وغبور .. وعن خبرة أطول مع عز العرب

لكن من ناحية الإدارة والتسويق للأسف هو ضايع شوية وبالذات التسويق

وفي الآخر كل توكيلات مصر أو معظمها بتعمل عبيطة لما يبقى فيه مشكلة كبيرة محتاجة تتغير في الضمان

[Mohamed.Ramah]

طيب ياريت اعرف بعد اذن ا. محمود افضل مكان لعمل الصيانة تابع للتوكيل الاقدر اعمل فية الصيانات الدورية لحد 20.000 او اكثر وانا مطمئن

واية صحة موضوع فتح مركز صيانة جديد من عدمة ! وهل فعلاً مراكز الصيانة فى تحسن أم لا

ومين بيتعامل فى السويفت بشكل عام فى كل جزء من العربية لو مش عند حضرتك مانع ممكن تبعتهالى حتى علشان متعتبرش اعلان على الخاص وجزاك الله كل خير ..

[D . a .\ AYMAN]

هو اللى أنا أعرفه إن التوكيل عمل مكان مستقل لسوزوكي في أبو رواش والناس اللى راحت هناك بيقولوا إنه مجهز بصورة جيدة وممكن تتابع عربيتك بيحصل فيها إيه من خلال حاجز زجاجي ... والله أعلم


وكمان دلوقتي بيجهز مكان جديد لسوزوكي على طريق الاسماعيلية عشان ينقل له ماركة سوزوكي وتفضل نيسان في فرع الهايكستب لوحدها ... ومن كلام الناس إنه بإذن الله هايكون فرع مجهز تجهيز عالي

[Mohamed.Ramah]

شكراً جزيلاً لحضرتك وياريت لو حضرتك تجيبنى على باقى الاسئلة معلش بثقل على حضرتك لاكن انا بس عاوز اطمن منكم كأصحاب خبرة وتعامل مع السوزوكى

[D . a .\ AYMAN]

بصراحة أنا قلت اللى أعرفه


من ناحية التوكيل أنا ما اتعاملتش غير مع فرع الهايكستب اللى موجود دلوقتي في محور جوزيف تيتو ... وعمري ما روحت فرع أبو رواش غير مرة واحد فقط في 2008 .. والحمد لله عمري ما قابلت معاهم مشكلة شخصية محددة

من ناحية حد برة التوكيل بيتعامل مع العربية ما عنديش حد محدد

يعني مرة روحت لواحد في الحرفيين ومرة روحت لواحد في أسيوط .. ومش فاكر ليه بصراحة بس كلها حاجات عبيطة يعني شد سير أوتغييره أو تربيط عفشة فقط ... الحمد لله العربية الألتو عمرها ما عملت معايا مشاكل

كان في واحد كنت بروح أعمل عنده الصيانات بتاعة العربية في الأول اسمه محمد عبده وكان معرفة عن طريق العضو والأخ والزميل الفاضل والرائع محمد ممدوح في قسم الدايو وهاتلاقي عنوانه موجود في مواضيع كثيرة في القسم هناك