تــقـريـر : عـن سـوزوكي الـتـو 2008 بـعـد اسـتـخـدام 7 سـنـيـن

[Amr Axel]

بسم الله الرحمن الرحيم
السلام عليكم و رحمة الله و بركاته

ازيكم يا نسور السوزوكي بقالي كتيير مشوفتكمش و لا عملنا مقابلات اللي اغلبها مبيتمش لظروف خارجة عن ارادتنا
احدي مقابلات نسور السوزوكي و كانت ناس مشيت و ناس لسه مجتش



و ما شاء الله شايف نسور السوزوكي زادوا معانا بموديلاتجديدة زي السويفت و الالتو الجديدة
حبيت اكتب الموضوع ده لكل شخص محتار يجيب الالتو و لا لأ و هو تقرير عن السوزوكي التو موديل 2008 - 2013 800 سي سي
و ده بعد ما بيعتها بعد عشرة و تجربة 7 سنين و 185 الف كيلو

بداية مواصفات العربية بشكل عام
800 سي سي انجيكشن 12 صمام و ده بيديك عزم ع السرعات القليلة و المتوسطة
فتيس 5 غيار غير المارشدير
فيه منها فول اوبشن و فيه تكييف بس و فيه بدون تكييف
جنوط مقاس 13
تانك بنزين 35 لتر
و شوية مواصفات تانية

نيجي لـ لوللا ( اسم دلع بتاعها )
و ما شاء الله احدث صورها قبل بيعها مباشرة




التو 2008 مشيت بيها ع مدار 7 سنين 185 الف
من الاخر العربية ديه محترمة و حمالة قاسية و اللي يجيبها يجيبها و هو مطمن
العربية خلال 7 سنين الحمد لله معملتش فيها حاجة غير الصيانات الدورية
الا حاجة واحدة غيرتها خارج الصيانات و هي ماستر فرامل عمومي و ده حصل بعد ما واحد اتذاكي عند ميكانيكي اللي بتعامل معاه و شاف زيت الفرامل ناقص و حب يوجب و حط لي زيت فرامل مختلف عن اللي فيها فهو غالبا اللي اتسبب فانه يضرب و غيرته و جبته من التوكيل مودرن في الدقي ش المساحة و سعره كان 300 ج او 300 و كسور أصلي بوش علامة سوزوكي يعني ارخص من برة اللي قالولي 400 و 450 ج
غير كده كلها صيانات دورية زي مقولت زيوت سيور بوجيهات فلاتر كاوتش يعني حتي طقم الكهربا ملمستوش
سير الكاتينة و بلية الكاتينة الفبريكة غيرتهم ع 75 الف مع العلم بعد كده مبخليش السير او البلية يقعدوا اكتر من 20 الف ك و بغيرهم عالطول ده مفيهاش هزار يابا
تيل الفرامل الفبريكة اتغير بعد 40 الف ك
البوجيهات الفبريكة ما شاء الله فضلت معايا لحد 100 الف شغالة و كانت تكمل و نسور السوزوكي يشهدوا ع البوجيهات ديه اللي لن تتكرر لكن طبعا بعد كده كل 20 الف
طقم الدبرياج الفبريكة مغيرتوش الا بعد 120 الف ك و كان نازل يمشي شوية كمان بس قولت بلاش و اغير احسن بدل ما تعملها معايا في الطريق سلك الدبرياج ما شاء الله كمل معايا طقم كمان بعد الفبريكة و غيرته مع الطقم التاني
زيت طبعا تخليقي لحد ما عديت 100 الف بدأت احط زيت نصف تخليقي و هو اللي استمريت عليه لأن الموتور عدي 100 الف و الحمد لله الزيت مكنش بينقص
الصيانات الدورية و بالذات بعد الـ100 مكنتش بستني يجي وقتها و اغير زي قبل الـ100 الف و كل شهرين كنت بعمل بولش بنفسي و بعد كل شتا غسيل العربية من تحت و تشحيمها

مميزات
العربية مفيدة في الزحمة و الركنات عشان حجمها
بتشيل و متقولش لأ كويسة في المطبات و الاماكن المكسرة
ثباتها جيد جداا بالنسبة لعربية في الفئة ديه و العربية معاك لحد 140 و انا اعلي حاجة جبتها بيها للتجربة فقط ع طريق العين السخنة كانت 160 و مزودش و رجعت تاني للـ 120
سهلة تشتغل فيها بنفسك مش معقدة لأني كنت بعمل اغلب الصيانات بنفسي
موفرة طبعا في البنزين الصفيحة ( 20 لتر ) كنت بعمل بيها حوالي 400-420 ك طبعا بشرط انك عامل كل الصيانات و ضغط الكاوتش مظبوط و كله تمام

نيجي بقي للعيوب من وجهة نظري
مساحة العربية الداخلية ضيقة شوية مقارنة بعربية I10 بس الموضوع نسبة و تناسب
يعني في i10 المساحة ع حساب الحوض لكن في الالتو الحوض تشتغل فيه براحتك و مش متكتف بس برده التصميم في i10 احلي للمساحة الداخلية
اضعف مكان لاحظته في العربية الشنطة و ده سبب انكم طول ما انتوا ماشيين هتلاقوا التو مخبوطة من ورا اي حاجة تدخل فيها تدخل الشنطة
كان بيجنني الفبر اللي في العربية و ده بيرجع للتقفيل و خصوصا ان فيه حاجات كتيير كبس فكان الحل عشان اخلص من التزييق ده لباد و ازنقه ورا التابلوه و اماكن تانية عشان ارتاح
العزل بالنسبة لي سئ و تحس انك قاعد مع الموتور في الحوض و اضطريت اعمل عزل بنفسي للكبوت يقلل شوية بس عشان تتعزل صح لازم تعمل عزل زيادة في الابواب و ورا التابلوه و عزل مضاعف تحت الكبوت عشان تقلل صوت العربجي اللي في الحوض
طبعا حاجات كتيير كانت محتاجة تتقفل احسن من كده ع الاقل زي السيلاريو و السويفت
كانت محتاجة وسائل امان اكتر

معتقدش فيه اي حاجة تانية نسيتها
و اخيرا كما سبق و قولت تقييمي عربية محترمة عملية و اعتمادية و متقلقش منها طول مانت محافظ عليها و صياناتها الدورية بتتعمل و اخيرا اللي اشتراها ربنا يباركله فيها و يكفيه شرها

و اي استفسار في الالتو اتفضلوا :)

[hardmind_doc]

هى عربية كويسة على قد داخل المدينة وعلى قد فلوسها واى عربية تحترمها هتحترمك
وماقولتلناش جيبت ايه بعدها ؟

[ibrahimahmed]

هى فعلا عربية محترمة زى ما قلت وحتى النيو التو معايا محترمة جدا وحمالة اسية
ربنا يبارك للى اشتراها ويباركلك فى الجديدة ان شاء الله

[omar_saad]

العربية جميلة
عيوبها اللي ملهاش حل بالنسبة لي --- هي المساعدين بتاعتها الخلفية كان لازم تكون اشد من كده شوية باي شكل من الاشكال -- و كمان و ده الاهم مساحة الصالون الداخلية كانت محتاجة 10 سم طول عشان لو انت عايز تريح اللي قاعد ورا يبقي لازم تتعب انت بصراحة.
و طالما ذكرت ال اي تن --- انا بحب العربيات الصغيرة عن الكبيرة -- و بصراحة اكتر عربية تمنيت ان اشتريها كانت ال اي تن بس لما جيت اشتري كان السعر عالي --
الحمد لله علي كل حال -- و ربنا يبارك لي و للجميع و و يقينا شرور الطريق

[Samy Sharaf]

يا ترى صوت الموتور عالى جدا لانى بعانى مع عربيتى 127 فيورا بحس أنى راكب كاراكة أو جرار زراعى
برجاء الأفادة
وشكرا

[egyption2012]

حضرتك بتحط بنزين 92 ولا 80 ؟

[omar_saad]

يا ترى صوت الموتور عالى جدا لانى بعانى مع عربيتى 127 فيورا بحس أنى راكب كاراكة أو جرار زراعى
برجاء الأفادة
وشكرا

كان معايا 127 زمان -- و عارف صوتها كويس -- لا طبعا فرق كبير جدااااا -- يا راجل ده انا لما ركبت اللادا حسيت انها اختراع مقارنة بصوت ال 127 -- المقصود ان الصوت عالي مقارنة بغيرها من السيارات الحديثة -- و مما يزيد الطين بلة -- هو صوت كاوتشات السيارة علي الطريق -- اقصد تحديدا الكاوتش الفابريقة -- الجود يير

[omar_saad]

حضرتك بتحط بنزين 92 ولا 80 ؟

بمناسبة بنزين ال 92 -- اليوم اللي حطيت فيه بنزين 92 للعربية 127 -العربية عطلت و طلعت عيني -- سبحان الله
عامة موضوع البنزين يؤثر علي المحرك من حيث الكهرباء و الكركرة المعروفة ل 80و قد يكون ليس له علاقة بالصوت

[D . a .\ AYMAN]

مبارك عليك ومبروك للى اشتراها ... واخد عروسة ما شاء الله ... العربية دي كان ليها اهتمام خاص دونا عن غيرها من أي ألتو تانية

تسلم إيدك على التقرير

أنا برضه بايع عربيتي بعد 6 سنوات عاملة 110 ألف وما غيرتش فيها مسمار ... غير الإكصدامات والفوانيس الأمامية نتيجة لخبطة أمامية

وكله بعد كدة صيانات دورية زي سيور وبوجيهات وفلاتر وتيل فرامل فقط لا غير

سؤال بقى انت كنت بتجيب اللباد العازل منين ... عشان تحطه بين الفايبر بتاع الأبواب ... وهل في مكان قريب من التجمع

أصلي عايز أجيب كمية كويسة منه

كان معايا 127 زمان -- و عارف صوتها كويس -- لا طبعا فرق كبير جدااااا -- يا راجل ده انا لما ركبت اللادا حسيت انها اختراع مقارنة بصوت ال 127 -- المقصود ان الصوت عالي مقارنة بغيرها من السيارات الحديثة -- و مما يزيد الطين بلة -- هو صوت كاوتشات السيارة علي الطريق -- اقصد تحديدا الكاوتش الفابريقة -- الجود يير

فعلا الكاوتش الجوديير الهندي اللى بينزل فيها صوته عالي ومزعج لما تتعود عليه ... بس كفاءته ممتازة بالنسبة لتجربتي معاه

ولما غيرته فرق جامد جدا في الصوت

[Amr Axel]

هى عربية كويسة على قد داخل المدينة وعلى قد فلوسها واى عربية تحترمها هتحترمك
وماقولتلناش جيبت ايه بعدها ؟

لسه مجبتش حاجة

[Amr Axel]

هى فعلا عربية محترمة زى ما قلت وحتى النيو التو معايا محترمة جدا وحمالة اسية
ربنا يبارك للى اشتراها ويباركلك فى الجديدة ان شاء الله

ده حقيقي بس النيو التو مجربتهاش غير مرة كانت لسه منزلتش بس شخصيا شايف انها اكتسبت شهرة بالشكل 2008-2013 و لو كانوا كملوا الشكل ده مع تحسين التقفيل و اضافة كماليات كانت هتضرب اكتر و اكتر

[Amr Axel]

العربية جميلة
عيوبها اللي ملهاش حل بالنسبة لي --- هي المساعدين بتاعتها الخلفية كان لازم تكون اشد من كده شوية باي شكل من الاشكال -- و كمان و ده الاهم مساحة الصالون الداخلية كانت محتاجة 10 سم طول عشان لو انت عايز تريح اللي قاعد ورا يبقي لازم تتعب انت بصراحة.
و طالما ذكرت ال اي تن --- انا بحب العربيات الصغيرة عن الكبيرة -- و بصراحة اكتر عربية تمنيت ان اشتريها كانت ال اي تن بس لما جيت اشتري كان السعر عالي --
الحمد لله علي كل حال -- و ربنا يبارك لي و للجميع و و يقينا شرور الطريق

هي المساعدين فعلا ضعيفة شوية بس لتتناسب مع العربية
و المساحة كانت محتاجة تزيد طولا و عرضا
i10 بصراحة عربية حلوة لولا سعرها العالي و مقرفة انك تشتغل في حوضها

[Amr Axel]

يا ترى صوت الموتور عالى جدا لانى بعانى مع عربيتى 127 فيورا بحس أنى راكب كاراكة أو جرار زراعى
برجاء الأفادة
وشكرا

هو عالي بس مش لدرجة 127 يعني نقدر نقول مقبول بالنسبة لناس كتيير و كمان مقارنة بعربيات عزلها اكتر يعتبر عالي لكن بالنسبة لشخص زيي ودنه مع العربية في اي تكة حتي مش مقبول :)

[Amr Axel]

حضرتك بتحط بنزين 92 ولا 80 ؟

92 طبعا و قبلها 90 لما كان موجود لو حطيت 80 مش هتلاقي العربية سحب و تسقيف

[omar_saad]

ده حقيقي بس النيو التو مجربتهاش غير مرة كانت لسه منزلتش بس شخصيا شايف انها اكتسبت شهرة بالشكل 2008-2013 و لو كانوا كملوا الشكل ده مع تحسين التقفيل و اضافة كماليات كانت هتضرب اكتر و اكتر

تاييد تام لما تقوله --- الشكل القديم في رايي افضل بكتيير من الشكل الجديد -- كل ما تم في الشكل الجديد هو مجرد جعله يبدوا حديثا و لكن اللمحة الجمالية لم تكتمل -- فكان لابد من اضافة بعض التعديلات علي السيارة من الداخل ايضا من حيث المساحة الداخلية -- و العفشة ايضا
و هذا ما فعلته كيا مع سيارة سيراتو الشكل الجديد -- تم التجديد -- لمجرد التجديد -- و لكن دون فهم.