سير الكاتينه

[waelgam2005]

ازيكو ياشباب
انا بستفسر عن تغيير سير الكاتينه للماروتي انا عربيتي شاريها زيرو شهر 4 سنه 2012 وهيا موديل 2012 وعامله دولقتي 47 الف كيلو ومش عارف سير الفبريكه بيقعد لكام الف ولو محتاج يتغير اغير سير بس ولا اغير معاه البليه ومش عارف بصراحه يعني ايه بليه الكاتينه دي
ياريت تفدوني ياجماعه لاني مقلق من موضوع سير الكاتينه ده لاني سمعت انه ممكن يضرب الصبابات لو اتقطع وانا ماشي
واخر سؤال هوا اي ميكانيكي يعرف يغير السير ده ولا شغلانه ومحتاجه خبير ؟
شكرا ليكم

[Mecha]

اسير الكاتينه الياباني يتغير كل 100,000كم ويستحسن تغير طرمبه ميه وبليه شداد الكاتينه بيتباعوا علي انهم طقم كاتينه ,لو هندي زباله غير علي 50,000 كم عشان بيضرب فجأه وكسر مواتير
شغلانه عاديه وفيه ناس بتغيرو بنفسها

[waelgam2005]

يعنى الفبريكه ده اغيره امتى ؟ اسيبه كمان عشرين واغيره ولا اعمل ايه

[khalidawad]

مساء الخي . نصيحه. حاول تعدي علي ميكانيكي. تغيره. ماتيبهوش اكتر من كده.
ثمن. السير الجديد. تقريبا. 40. جنيه. انا متعود اجيبه من اكرم حمدي بمصر الجديده. غالي حبه لكن مضمون
الناس هنا في المنتدي اجمعت علي تغيير السير اللي بعد الفابريكه علي 20000 كم. لانه مها قلك اصلي مش هيكون ذي الفبريكه
البليه. ممكن تسيبها المرادي. وتغيرها مع السير اللي بعده يعني علي سبعين الف مثلا
طلمبه الميه. سيبها طالما شغاله

[waelgam2005]

طيب انافتحت الكتالوج ولقيت فعلا انه بيتغير على 100 الف كيلو وسير الدينمو على 40 الف
الكلام ده صح ولا غلط

[khaled_yassin]

يا باشا حاجتها بمللاليم غيرها نضافه
انا غير على 20 الف كضمان مش اكتر وحفاظ على لعربيه

[waelgam2005]

مش على الفلوس والتكلفه انا كل الى شاغل بالى حاجتين الحاجه الاولى هيا خايف اغير السير والى هركبه ميكنش نفس الجود بتاعة الفريكه
والحاجه التانيه والاهم خايف الميكانيكى يعرفش يظبط تقسيمة العربيه ز بتاعة بلادها والعربيه تركبها مية عفريت خصوصا انى م العاشر من رمضان ويعتبر ميش حد بيفهم مع انها عربيه العيل الصير يشغل فيها

[scientist9508]

بسم الله الرحمن الرحيم

اﻷخ الفاضل waelgam2005

أمتلك ماروتى منذ عام 2009 و قد إشتريتها على الزيرو و قد قمت بالفعل بعمل صيانة 100,000 كم من إسبوع فقط.

لن أطيل عليك الحديث و سأعطيك خبرة سنوات مع الماروتى فى سطور قليله جدآ.

1 - ما قرأته فى مانيوال السياره صحيح و لكن ﻻ أحد يقوم بتطبيقه نهائيهآ (لن يدع أحد سير الكاتينه و البليه حتى 100,000 كم )

2 - إن كنت ستشترى الطقم اﻷصلى من التوكيل (تقريبآ 300 جنيه) فأنصحك بتغييره على 50,000 كم

3 - إن كنت ستشترى طقم تجارى (غير أصلى مثل سير دايكو و بلية B.M.G) فأمامك إختيارين:

اﻷول: إن أردت الحصول على أفضل آداء للمحرك (صوت منخفض+نعومه فى السحب+ طول عمر المحرك) فقم بتغييره على 20,000 كم

الثانى: أن تستنفذ طقم الكاتينه بالكاتينه بالكامل و عندئذ يمكنك تركه يعمل حتى 40,000 كم

اﻷرقام التى كتبتها لحضرتك دقيقه جدآ جدآ و لذلك ﻻ تشغل بجودة السير مالم يكن السير تم تخزينه بطريقه سيئه جدآ فهذا أمر آخر. و أود أن أخبر حضرتك أنه ﻻ يوجد ميكانيكى ماهر ﻻ يكشف على السير قبل تركيبه و لو ﻻحظ فيه شىء ماكان ليقم بتركيبه و سيخبرك بذلك.

واﻵن ما هو الفرق بين الطقم اﻷصلى و الغير أصلى إذا كان الفرق فى الكيلومترات بسيط و لكن الفرق فى السعر كبير؟

إنه اﻹطمئنان . . . . أشعر باﻹطمئنان أكثر وأنا أستعمل اﻷصلى ﻷننى كثير السفر بهذه الصغيره جدآ. و لكن إن لم يتيسر لى الحصول على اﻷصلى أشترى الغير أصلى و أقم بتغييره كما أخبرتك بدقه
دع عنك القلق فاﻷمر بسيط و رخيص

أرحب بكل إستفساراتك

.السلام عليكم و رحمة الله و بركاته

[waelgam2005]

بسم الله الرحمن الرحيم

اﻷخ الفاضل waelgam2005

أمتلك ماروتى منذ عام 2009 و قد إشتريتها على الزيرو و قد قمت بالفعل بعمل صيانة 100,000 كم من إسبوع فقط.

لن أطيل عليك الحديث و سأعطيك خبرة سنوات مع الماروتى فى سطور قليله جدآ.

1 - ما قرأته فى مانيوال السياره صحيح و لكن ﻻ أحد يقوم بتطبيقه نهائيهآ (لن يدع أحد سير الكاتينه و البليه حتى 100,000 كم )

2 - إن كنت ستشترى الطقم اﻷصلى من التوكيل (تقريبآ 300 جنيه) فأنصحك بتغييره على 50,000 كم

3 - إن كنت ستشترى طقم تجارى (غير أصلى مثل سير دايكو و بلية b.m.g) فأمامك إختيارين:

اﻷول: إن أردت الحصول على أفضل آداء للمحرك (صوت منخفض+نعومه فى السحب+ طول عمر المحرك) فقم بتغييره على 20,000 كم

الثانى: أن تستنفذ طقم الكاتينه بالكاتينه بالكامل و عندئذ يمكنك تركه يعمل حتى 40,000 كم

اﻷرقام التى كتبتها لحضرتك دقيقه جدآ جدآ و لذلك ﻻ تشغل بجودة السير مالم يكن السير تم تخزينه بطريقه سيئه جدآ فهذا أمر آخر. و أود أن أخبر حضرتك أنه ﻻ يوجد ميكانيكى ماهر ﻻ يكشف على السير قبل تركيبه و لو ﻻحظ فيه شىء ماكان ليقم بتركيبه و سيخبرك بذلك.

واﻵن ما هو الفرق بين الطقم اﻷصلى و الغير أصلى إذا كان الفرق فى الكيلومترات بسيط و لكن الفرق فى السعر كبير؟

إنه اﻹطمئنان . . . . أشعر باﻹطمئنان أكثر وأنا أستعمل اﻷصلى ﻷننى كثير السفر بهذه الصغيره جدآ. و لكن إن لم يتيسر لى الحصول على اﻷصلى أشترى الغير أصلى و أقم بتغييره كما أخبرتك بدقه
دع عنك القلق فاﻷمر بسيط و رخيص

أرحب بكل إستفساراتك

.السلام عليكم و رحمة الله و بركاته

الف شكر لحضرتك علي المعلومات الحلوه دي
انا فعلا غيرته امبارح علي 47 الف كيلو وبسم الله ما شاء الله السير القديم طالع زي الجديد مفهوش الهواا وعلشان كدا غيرته واحتفظت بيه لاني ناوي استخدم السير الجديد ده 30 الف وهركب القديم تاني واستخدمه 20 الف
بالنسبه للبليه ناوي اغيرها المره الجايه برضه
وبالنسبه للسير جبت نوع كرتونته بيضا ومرسوم عليها علامه السوزوكي ياباني وكان تمنه ب 90 جنيه ولقيت نوع تاني الماني كان ب 70 جنيه بصراحه ارتحت اكتر للسوزوكي لما شوفت الخامتين والميكانيكي غير السير في نص ساعه تقريبا واخد 50 جنيه

[mesaharaty]

ألف مبروك
لكن محتاجين رأى إخواتنا فى مسألة تركيب السير القديم مرة تانية
إمممممممممم مش عارف ينفع ولا يبقى غلط ؟

[scientist9508]

بسم الله الرحمن الرحيم

اﻷخ الفاضل mesaharaty

مخاوفك صحيحه تمامآ. إعادة تركيب السير القديم مخاطره كبير جدآ تهدد بفقدام المحرك فى لحظة.

السير الجديد يحتفظ بخواص مادته فتره أطول من السير الذى تم تركيبه و إستعماله بالفعل و ذلك حيث أن السير الذى تم تركيبه و إستخدامه يتعرض لم ﻻ يتعرض له الجديد من:
1 - قوة شد كبيره
2 - إحتكاك
3 - درجة حراره مرتفعه

و لذلك تتغير خواص مادة السير. فإذا تم فك السير و إخراجه من مكانه ثم تخزينه ولو لوقت قصير يكون قد فقد الكثير من لدونته اﻷمر الذى يهدد بظهور تشققات سريعه إذا ما تم تعريضه لنفس العوامل السابق ذكرها. و نفس اﻷمر ينطبق على سير الدينامو

السلام عليكم ورحمة الله و بركاته

[waelgam2005]

عليه العوض زعلان علي سير الفبريكه مش اكتر لكن خلاص مش هركبه

[Mecha]

السير القديم ممكن يركب تاني طالما علي نفس العدله ,الميكانيكي لما بيحل وش السلندر مش بيغير سير التقسيمة الا لو عمره جه
احسن سيور بديل الفابريكه gates و dayco

[mesaharaty]

عليه العوض زعلان علي سير الفبريكه مش اكتر لكن خلاص مش هركبه

ماتزعلش
قدر إن عمره الإفتراضى انتهى وانت لحقت وغيرته قبل ما يعمل مشكلة لا سمح الله .
يبقى ساعتها بقى نقول ياريتنا غيرنا ولا كانت حصلت مشكلة .
المهم إن السيارة بخير وإن كان على الفلوس اللى اشتريت بيها السير المتركب حاليا فالمسألة هينة والمهم تبقى مطمئن وإنت راكب عربيتك .
وأنصحك تعمل زى ما أنا عامل كده :
أنا جايب أجندة وباكتب فيها كل كبيرة وصغيرة عن العربية وصيانتها يعنى مثلا سعر قطعة الغيار ومنين إشتريتها وإمتى ومين الصنايعى وخد كام وكان عداد الكيلومتر كام ساعة ما ركبت وأى معلومة أخرى موجودة تخص عملية الصيانة ، وكذلك فى الزيوت ومياه التبريد والسيور وكله . أجندة مسميها (يوميات العربية) .
وبعد كده لو لا قدر الله فيه أى حاجة ظهرت وإحتاجت لصيانة يبقى ده قضاء وقدر وإنت عامل كل اللى عليك .