حاجه غريبه في فتيس الالتو!!!

[3mr Farrag]

لسه خالتي جايبه التو 800 سي سي...
و انا يعتبر اللي باخدها:) علشان لسه خفيفه في السواقه
بس لاحظت ان الفتيس بيتهز جامد....و انا طالع و لو شلت رجلي من البنزين
تحس ان الفتيس مش مربوط....
غير العضه اللي في الاول و التاني...
فهل هي كده طبيعي ولا لأ...
انا كنت قلت هبقي اوديها للصيانه بتاعت 1000 كم...
بس مقلق احسن يكون في حاجه غلط....و لسه علي 1000 كم كتير...

و سوءال اخير غير موضوع الفتيس....
هي العربيه منلينه ....يعني اعدي بيها 80 عادي
اصل مش بعدي 60 كم

و شكرا

[yasserramzy]

انا حاسس ان كده عندك مشكله فى الفتيس ..
العادى فى الالتو ان النقله التانيه والمارشدير بتعصلج شويه صغيره ..
لاكن الفتييس ثابت..
بالنسبه للسرعة اجرى مايهمكش بس خلى بالك من المصبات فى مصرنا المحروسه ..
انا بمشى على 90 عادى وساعات 100 110 بس فى السرعات العاليه بحس ان عجله القياده خفيفه قوى .. وربنا يسترها معانا..

[3mr Farrag]

الف شكر استاذ ياسر...
و ان شاء الله هحاول قريب اروح التوكيل....
معلش افتكرت حاجه تانيه...
و ان المرايات الجانبيه مش بعرف اظبطها كويس و اطلعها لناحيه بره...
بيبقي اخرها بيجيب ليا يجي تلت العربيه....
فهل كده طبيعي ؟؟؟ اصل لو طبيعي يبقي العربيه مش مصممه للطوال

[yasserramzy]

اتا كمان عندى نفس المشكله ..الطول..
خصوصا مع المرايا اليمين ..
فتعامل معاها و مع مرايا الصلون مع بعض ..
لاكن المرايا الشمال مفهاش نفس المشكله ..
وربنا معاك ومعانا جميعا..

[zalpany2000]

انا الفيتيس بيعلق معايا في الريفيرس بس"المارشدير"
و فعلا احيانا كتير بتبقي العربية ماخدتش الغيار و المارش مش بيجي غير لو دوست سنة بنزين وحاولت تاني

بس غير كده بقيت الغيارات مافيهاش مشكلة

[D . a .\ AYMAN]

فعلا الريفيرس هوة اللى كتير بيعلق معايا ومايرضاش ييجي غير لما اديها غيار غيره وارجع اجيبه من جديد ... بس انا كنت قريت هنا ان المشكلة دي بتتعمل في التوكيل وان شاء الله أروح أعمل صيانة الخمسة اللى مش عايزة تتعمل دي قريب وأقلهم عليه وبعدين أقولكوا على النتيجة

غير كده الفتيس بيبقى ثابت من غير رجرجة ولا حاجة

وفعلا المراية بتاعة اليمين انا بجيبها على الآخر عشان أشوف كويس .. ومن غير مايكون الكرسي راجع ورا قوي لأن الكرسي كل مايرجع كل ما مجال الرؤية في المراية اليمين يقل

[y_omran]

انا برضه الفيتس ساعات بيعلق معايا فى المارشيدير فى الالتو

[om_omar13]

ماشاء الله كل اصحاب الاتوا بيشتكوا من نفس العيب اللي في الفيتيس و انا كنت فاكرة ان المشكلة عندي انا بس طيب خير الحمد لله
عندي نفس المشكلة في النقلة التانية و المرشيدير و ده مش بيجي الا لما اجيب اول و اطلع سنة صغيرة و بعدين ارجع
مش عارفة اقول ايه
الحمد لله على كل حال

[D . a .\ AYMAN]

ماشاء الله كل اصحاب الاتوا بيشتكوا من نفس العيب اللي في الفيتيس و انا كنت فاكرة ان المشكلة عندي انا بس طيب خير الحمد لله
عندي نفس المشكلة في النقلة التانية و المرشيدير و ده مش بيجي الا لما اجيب اول و اطلع سنة صغيرة و بعدين ارجع
مش عارفة اقول ايه
الحمد لله على كل حال

هو كده يبقى مش عيب ده كده يبقى حاجة أصلا في تصميم العربية

في فكرة حلوة ممكن تعمليها بدل ماتجيبي الأول وتطلعي سنة صغيرة لقدام ... لأ هاتي الرابع وانتي في مكانك ماتطلعيش خالص وبعدين هاتي المارشيدير تاني هاتلاقيه بييجي بسهولة جربي وقوليلنا على النتيجة

وبعدين في الصيانة لازم تقوليلهم على الموضوع ده عشان ده عيب فني في العربية

[mohamedwasfy]

انا برضه الفيتس ساعات بيعلق معايا فى المارشيدير فى الالتو 800

[Egypt_Eagle]

انا حاسس ان كده عندك مشكله فى الفتيس ..
العادى فى الالتو ان النقله التانيه والمارشدير بتعصلج شويه صغيره ..
لاكن الفتييس ثابت..
بالنسبه للسرعة اجرى مايهمكش بس خلى بالك من المصبات فى مصرنا المحروسه ..
انا بمشى على 90 عادى وساعات 100 110 بس فى السرعات العاليه بحس ان عجله القياده خفيفه قوى .. وربنا يسترها معانا..

انا معايا الالتو الزن ال 2007 ال 1000 سي سي
ومشكلة المارشدير موجودة فيها برده وبتصطر اني اشيل رجلي من علي الدبرياج مرة او مرتين عشان ييجي معايا
والمهندسين بتوع التوكيل قالولي هي كده مالهاش حل في 2007 و2008 و الماروتي الكلام ده لسه قايلنهولي يوم السبت 22/11/2008
انما الفتيس لا بيتهز ولا حاجة
وموضوع المرايا مش عاملي مشكلة ولا حاجة وانا طويل برده

وموضوع السرعة انا بوصل ل 120 ومافيش مشكلة غير خفة الدريكسيون

[memomodee]

انا كده برضه مش عارف ليه بس هو كده طبيعى

:)

[3mr Farrag]

انا روحت التوكيل و قلت المهندس علي الهزه في الفتيس مع طلعه العربيه...
قالللي هي كده...
و وراللي التو جديده فيها نفس الهزه....
هي بتبان و انت طالع جامد بالعربيه....
اما موضوع المرشيدير انا متعود علي التعليق ده بقالي كتير...
عندي كده في عربيتي من اول ما جبتها

[engahmed29]

انا معايا التو بقالها 6 شهور تقريبا ، و موضوع اهتزاز الفتيس ده عادى مش مؤثر فى حاجة و موجود من اول ما جبتها
و حكاية تعليق الفتيس دى مشكلة بسيطة و بتحصل فى عربيات كتير ، متعتبرش مشكلة اوى يعنى ، و طبعا لازم الواحد يبقى مقتنع بالمثل القائل الغالى ثمنه فيه
يعنى اكيد لما تشترى عربية ب 47 الف جنيه غير طبعا لما تشترى ب 67 الف

يعنى ، بالنسبة لينا كطبقة متوسطة كويس اوى و الحمد لله اننا قدرنا نجيب سيارة على الزيرو و بسعر معقول عشان الاسعار فى مصر سيئة جدا بسبب الجمارك و مش حتلاقى حاجة بالسعر ده غير صينى و انا لا احب السيارات الصينى ولا انصح بيها خالص..
و الالتو مش وحشة ، ناعمة و استهلاكها للبنزين مفيش و صغيرة مناسبة للزحمة و الركنة ..