سؤال لأهل الخبرة الله ينجيكم.

[ahmedsherif200]

سلام عليكم جميعا... انا عايز اسأل عن حاجة من اهل الخبرة والخير. دلوقتى انا بفكر اشترى عربية ملاكى واشغلها تاكسى من الباطن بمعنى انى مش هشترى نمر ليها كل اللى انا هعملة انى اشتريها لونها ابيض. العربية اللى بفكر فيها هى السوزوكى التو الشكل الجديد. العربية رخيصة واستهلاك البنزين بتاعها حلو وصغيرة وتقدر تمشى فى الشوارع من غير ما تتخبط كتير. مش عايز تريقة الله يخليكم على فكرتى , انا حالى زى الزفت وامى مريضة وعلاجها غالى فمش هقدر بحال من الاحوال انى اشترى فيرنا او لانوس. يعنى يا هشترى العربية دية يا مش هشترى حاجة خالص. المهم اللى انا عايز اعرفة هل العربية دية تقدر تمشى واجيب بيها فلوس حلوة اعيش منها. وتجيب تقريبا كام فى وردية ال 8 ساعات تقريبا. انا عارف طبعا ان الارزاق على الله ونعم بالله بس بردة عايز اعرف. عشان محطش فلوسى فيها وبعد كدة اتبهدل انا وامى. وشكرا ليكم.

[amr011111]

ربنا يشفى والدتك
وان شاء الله العربيه تستحمل بس بعد ما تعدى مثلاً الـ 60 ألف كم هتحتاج اللى هتحتاجه اى عربيه ماشيه الكيلوهات ديه
الحاجه التانيه ان العربيه صغيره كتاكسى يعنى فيه ناس هتفضل الاكبر بس ديه كلها ارزاق
وخلى بالك ان انت هتبقى معرض ان كل شويه امين شرطه ياخد منك فلوس

[amrseif]

ربنا يوفقك ويرزقك بالحلال ... متقلقش عربيات سوزوكى عربيات محترمة وبتستحمل واستهلاكها فى البنزين راااائع جدا ... لكن عيبها ضيقة عشان كدة متحاولش تركب فيها اوزان تقيلة.

[J A G U A R]

بس الالتو انا عمرى ما شوفتها بتشتغل تاكس ومفيش اصلا حد هايشاورلك
اللادا والشاهين الملاكى شغالين تاكس فى بعض المحافظات

[pepo2011]

ياباشا ربنا يرزقك بالحلال بس الالتو تاكسي غريبة شوية
لكن هي كعربية كويسة طبعا وحاول تشوفلك دورة مدارس كمان او توصيلة لحد تكون ثابتة مع باقي شغلك عليها وربنا يوفقك

[memo_p910]

هيا كويسه جدا بس مش هاتشيل معاك في مشاوير المطار والسفريات علشان خاطر الشنطه وشنط السفر الكبيره
لكن الشغل العادي داخل المدينه ممتازه جدا واعتماديه